وبعدين بقى هو مفيش غيري ولا ايه ؟؟؟؟؟؟؟؟؟؟؟؟؟؟؟؟؟؟؟؟

تحديث

النهاردة زوجي اتصل بي وقالي المدرسة قررت اليوم الخروج الساعة 2ظهرا ولسة الادارة مكلماني دلوقتي يلا روحي هات العيال وكنت هناك فورا وامبارح واليوم لما بوصل المدرسة الراجل البواب دة بيجري ينادي على يوسف ومريم ويقولهم يلا ماما جت بحنان كدة مش معهود وهات شنطتك يلا وانا ولا كاني شيفاه اصلا

وكنت قلت لزوجي يكلم الادارة يسال المسئولة عن الاجراء اللي تم أخذه فضلت تعتذر وتقول معلش يعني معلش بقى المهم سيبنا التليفون وتاكيد من زوجي ان الوضع دة لو اتكرر هنقل الاولاد من المدرسة

بيتهيالي خافوا على العدة هههههه

قصدي خافوا انقل العيال من المدرسة خصوصا ان السنة الجاية هيبقوا تلاتة واللي وراها اربعة قوة برضه

ولا لما عملنا زوبعة قلقوا

انا خلاص عرفت ان الوضع في اي حتة يا رشوة يا دربكة بس الاولى ذنب ممكن زي ما قلتوا لي الجأ له لما خلاص ما عدتش ينفع غير كدة انما فيه بدائل اهو بتجيب حل

اخي الله يرحمه كان دوما يقولي انت قلبك طيب ودة ما ينفعش غريبة دة هو كان اطيب واطيب لدرجة المثالية فاسترده ربنا عن عمر32سنة

الله يرحمه ويبدو فعلا ان ممكن افلسع بدري بدري لو فضلت على كدة زي استاذ علي يونس ما قالي ووقتها هيشتري البواب ويبيع في العيال يارب سلم

ممكن حد يتطوع ويديني دورة تدريبية في الشراسة والتطنيش وانعدام الضمير وموت القلب والجليطة والموبقات دياعوذو بالله؟؟

الطبع يغلب التطبع

وانا هرجع دوما واقول زي خالد زوجي ما بيقول

الله خير حافظا وهو ارحم الراحمين

النتيجة اليوم كويسة مش كدة برضه تدي امل ان الصح والخير لازم ينتصر ههههههههههههههههههه اخر الفيلم؟؟

قررت بقى اني أجند البواب الأخر وياخد باله من العيال اذا احتاجوا حاجة

اما عن الدادة يا دكتور ابراهيم للاسف الشديد مش هقدر اكون مطمنة عليهم مع اي حد بعد تجارب مؤلمة مع سواقين التاكسي وباصات المدرسة والدادات سواء شخصية او مع اخرين

فكان اسلم حل ولو انه مكلف ان ابوهم يوديهم وانا اجيب تاكسي من البيت واروح اخدهم وارجع بيهم للبيت بس بشتري راسي وواولادي

متعبة انا عارفة بس سنتين على الحال دة لحين اتمام تعلم القيادة وبعدها وانا رايحة المدرسة بالعربية هدوس على البواب

ههههههه

ربنا يبارك فيكم

بواب مدرسة العيال كنت زمان كل فترة بديله حاجة لله خدوا بالكم معايا لله تحتها مليون خط

كان بيصعب علي وقفته على الباب وعارفة المرتب قليل رغم انها مدرسة خاصة وبسذاجتي المعروفة وطيبة قلبي فاكراه غلبان

المهم قعدت فترة ما اروحش بالعيال المدرسة ونسيت اوصي باباهم يعمل الواجب دة معاه المهم لاحظ بابا ان الراجل معاملته متغيرة وجافة فساله مالك طيب فيه ايه مغيرك

البواب لمح له على المعلوم

وجالي بابا يقولي فاعترضت وانتفضت وقلت لا انا باعملها لله مش علشان يفرضها علي ويبتزني بيها لو اتاخرت يقصر في واجبات عمله لا مش هديله تاني هديها للي يستاهلها من المدرسة برضه

عرفت بقى انه بيشتغل تسالي كدة وبيؤجر شقق للناس وله دخل اضافي كمان يعني مش محتاج والتصدق عليه ماينفعش ونازل ابتزاز في الناس برضه بطريقة ياخد فلوس يخلي باله من العيال والمعاملة خاصة وعادي جدا الناس بتدفع

لمحت للمدرسة ومديرها وشكيت للحجر يا عالم الراجل دة مش مظبوط ولا حياة لمن تنادي

المهم كام مرة المدرسة فجاءة تقرر العيال يطلعوا بدري ساعة ونصف تقريبا ومحدش يبلغني اروح الاقي البواب قاعد بيهم على الباب

واساله يقولي طالعين بدري طب رن علي ياعم علاء مش هفتح عليك او كلم الادارة يحلف انه ممعهوش رصيد

اقوله جرب ترن علي كدة ولو عملتها هجيبلك كارت

انا عاوزة اوصله انك لو هتستجدع وتبقى راجل تشتغل شغل بمايرضي الله هتلاقي مكافاة حلال عليها انما ارغام على اني ادفع له مرتب تاني مش من حقه وهو بيقبض مرتب اصلا على شغلته دي علشان يخص اولادي برعاية اضافية لا ارفضها دة اسمه رشوة

المهم برضه حاولت الفت نظره لشغل يخلي مستواه يتحسن وقلت في نفسي انتظر بس فعل يرضي ربنا منه في معاملة للعيال تخليني ابقى راضية واساعده دخله يتحسن بطريقة كويسة وما تخلنيش احس اني بديله رشوة

انما مينالظاهر بقينا بنستسهل

كان ياحضرات يوم الاحد الماضي يوم العاصفة الترابية والصقيع الذي لايوصف ولان الاولاد كان عندهم امتحان اضطريت اوديهم المدرسة وسالنا المدرسة المواعيد ايه قالوا زي ماهي

وجرجرت نفسي الساعة 3الاتلت روحت لقيت ولادي واقفين مردومين وبيترعشوا زي الارانب بقالهم ساعتين ؟؟؟؟

سألت هما خرجوا بدري قالي اه الساعة واحدة طار عقلي ياحضرات وانا بقوله حرام عليك حسبي الله ونعم الوكيل ما انت معاك تليفوناتي

يحلف ممعهوش رصيد وكأنه بيكلم سيدة من كوكب اخر ما تعرفش كلمني شكرا ولا تعرف ان فيه ادارة مدرسة فيها تليفوناتنا ممكن يبلغهم

حد يقولي طب العيال تدخل تقول بنفسها !!!

اقوله بمنتهى البساطة انا ما قلتش لهم على الاجراء دة قبل كدة متعودين يستنوا ماما بتيجي بالتاكسي تاخدهم للبيت

اصلهم زي الملايكة مطرح ما تحطهم وتقولهم يعملوا ولو حد قالهم هاتوا تليفون ماما وبابا نكلمهم كانوا جابوه

المهم اقوله حسبي الله ونعم الوكيل يقولي انا ظالم ايوة

اقوله يعني لو فيه مصلحة وفلوس هتيجي مش هتتصل يقولي لا رغم انه من كام يوم كان فيه شغلانة كويسة هيجيله فلوس كتيرة من وراها ولقيته اعطى للناس اصحابها تليفوناتي علشان اساعدهم الشغلانة تخلص واذا خلصت هيجيله فلوس كتير شفتم الضمير

لما طار عقلي وصعب علي عيالي روحت قلت لابوهم واتصل بادارة المدرسة وانا كمان كلمتهم ولا حياة لمن تنادي

يعيدوا ويزيدوا ان العيال كانت جت قالت

طب ياعالم هو احنا مش تليفوناتنا عندكم ؟؟؟؟

طيب لما المدرسة فضيت على الخمس ست اولاد منهم اتنين عيالي مش تسالوهم طيب انا كاتبة تليفوناتي في بطاقة المتابعة المدرسية ؟؟

المهم وكان لم يحدث شيء

منظر العيال قاتلني لما شفتهم كدة وبجد كان ممكن اقتل البواب لكن سارعت بالتحرك من امامه قبل الجريمة مرددة حسبي الله ونعم الوكيل وهو يقولي انا ظالم

الحل ايه يا جماعة؟؟؟؟

ارجع اديله فلوس تاني رشوة علشان ياخد باله من العيال رغم اني الحمد لله اقوم بالتصدق على ناس تستاهل بالمدرسة ومش منتظرة لا اهتمام بالعيال ولا غيره لرفضي الاسلوب دة

انما اقدم خدمات ادارية للمدرسة كعمل سي ديهات للمواد الدراسية وعمل منتدى للمدرسة وانشطة ما باخدش عليها اجر لكن عاوزة نهضة لمدرسة اولادي واهتمام بيهم ومش نافع او اني ببساطة انقلهم لمدرسة تانية بسبب البواب ويمكن اروح الاقي بواب واتنين افظع دلوني

العمل ايه

هيفضل الفساد ورايا ورايا وبرضه احاول اقف له والاخر يطلع مفيش فايدة ولا ايه ؟؟؟؟ّ!!!!

وبعدين بقى هو مفيش غيري ولا ايه؟؟؟؟؟؟؟!!!!!!!!!!!!!!

وداعا

جلست أتفحص الجدران وأتاملها جيدا.تجولت عيناي هنا وهناك أحاول أن أسجل بذاكرتي كل شيء كل تفصيل ولا أنساها

حتى استطيع استدعاء مكان الذكرى دون تعب ، زينت هذا الجدار بالورود والاخر بالستارة وهناك وضعت حجرة نومي الزرقاء ورتبتها بعناية وهنا كنت اجلس حينما يحين وقت التأمل وهناك اخترت المفرش الفضي لوضعه هكذا وهنا وضعت سرير لاستقبال ولدي الاول

يا الهي هنا حييت اجمل ايام عمري واصعب ايام حياتي وهنا شهدت الجدران على دموعي على فراق اخي الحبيب ليتني أستطيع نزع الجدار

جلست هنا استقبل الام المخاض وهناك كاد جنيني يسقط مني هنا كنت ابكي من الفرح وهناك بكيت من الالم

هنا استقبلني جيراني بفستاني الابيض مهنئين وداعين بالحياة السعيدة وهنا استقبلوني لتهنئتي بمولودي وهنا اخذوا بيدي حتى عرجت السلالم لشقتي

والان اتفحصها لاودعها واودع معها ذكريات اجمل ايام العمر

اشعر بالجدران تان معي واشعر بكل جزء فيها يبكيني

وداعا

وداعا ياجيراني

وداعا يا ذكرياتي

وداعا شبرا

شهدت الايام السابقة احداث كثيرة قلبت حياتي رأسا على عقب البطل الأساسي فيها هو الفساد الذي ينخر في العظام واصبحنا نتنفسه

الموضوع برمته اكبر مما نتصور خطة محكمة وتورتة كبيرة بيقسموها على بعض وصاحب البيت اللي كان بيتنا ماهو الاعضو صغيرجدا في المافيا اللي بتشتغل في الموضوع دة ووراه ناس كبيرة وتقيلة هي اللي بتخلص الورق واللي زي صاحب بيتنا ماهو الا واجهة بس او اداة او اسم يتخفى وراه ناس تانية هنروح فين احنا الغلابة فيهم الناس واحنا ماشيين بيقولولنا الحمد لله انكم نفدتم بجلدكم لانهم كانوا هيوقعوا عليكم البيت

يارب يارب يارب احمدك على كل شيء

يارب انا مش ندمانة اني حاولت اقف ضد الظلم وحاولت اخد بحقي

يارب انا فرحانة اوي ان كل جيراني الحمد لله بيحبوني وجيراني كلهم مسيحيين وكلنا كنا بنعيطعلي الجيرة اللي كانت بينا وبيوصوني وبيشددوا علي ازورهم اول باول ودة في عز اللي بيقولوا عليها فتنة طائفية

انا مبسوطة ان ربنا قدرني ووقفت ادام التحريض على الغدر وخيانة جيراني رغم ان صاحب البيت قال لنا هديكم اللي تطلبوه بشرط تخرجوا ومالكوش دعوة بحد ولكني رفضت وقلت له لا كلنا زي بعض ومش هديك فرصة تلوي دراعهم وتستعملنا في كدة حتى لو هخسر كل حاجة واكسب المحافظة على علاقتي بيهم

جيراني عرفوا بالكلام دةووقفنا مع بعض اكتررغم اني المسلمة الوحيدة في البيت وتقريبا الشارع كله كمان الا اني عمري ما حسيت باي ضغينة من حد فيهم

ومنهم نفسهم قالوا ان صاحب البيت اللي من ديانة واحدة شوف عمل ايه معاهم واحنا عملنا ايه

ووقتها حسيت ان دة بالنسبة لي لا يقدر بمال

انا راضية عن نفسي

وراضية عن اي حاجة ربنا ادهالي وباذن الله ربنا هيعوضني خير

يارب ياعالم بحالي تراضيني دوما

وحسبنا الله ونعم الوكيل

كل عام وانتم بخير

هل الاضراب هو الحل؟؟؟؟!!!!!!!!!!!!!!!!!!

في تطور غير مسبوق لموضوع بيتنا اللي جاله قرار ازالة ظالم وفي ظل تواطئ واضح من حي روض الفرج ضد سكان العقار رقم 12 ش محمد خليل من ش البعثة روض الفرج وفي ظل عدم وجود اي ضمير حي يرحم دموعي او يرحم اولادي ويرحم دموع واولاد اربع اسر كاملة بينهم رضع واللي بيرحم العباد ربنا تم قطع الكهرباء بالكامل عن بيتنا عن طريق شيل الكابل بالكامل اليوم صباحا اللي بيغذي 3 بيوت وقبلها وفي نصف رمضان تم قطع مية الشرب برضه ولولا وجود وصلة خاصة بعيدة عن العمومية قمنا بتوصيلها ما كان عندنا مية وطبعا الصرف الصحي اتردم والصرف بيتم في الشارع

ورغم قواضي مرفوعة من قبلنا ورغم محاضر اتعملت ورغم استغاثات اتكتبت لكل حتة ورغم مكالمات ورسايل محمول اليوم اتعملت لوسائل الاعلام علشان يلحقوني انا وعيالي والجيران من الظلام وابني سخن مولع وعاوز كمادات واضطريت اشتري تلج علشان الحرارة تنزل لاني طبعا ما عنديش كهربا ومحدش عبرني ولا حتى رد على تليفوناتي

ولان رئيس الحي اليوم قالنا بعلو صوته ما اقدرش اعمل لكم حاجة ولان الظاهر لنا ان محدش هيسال الا لو حصلت مصيبة كبيرة

ولاني لسة عندي بصيص امل ان يحصل تطور سريع يحل مشكلتي ما اعرفش ليه مع ان الواقع مش كدة خالص

وبكرة صباحا فيه مقابلة مع نائب المحافظ واحتمال المحافظ هنروح نعيط ونتحايل عليهم يوصلوا لنا الكهربا وفي حالة ماحدش سمع ياترى لو اضربت عن الاكل والشرب لحين حل المشكلة هل ممكن حد يعبرني ويساعدني ؟!!!!!!ولا ايه رايكم

اللي يحب يقدم مساعدة من اي نوع يحل المصيبة اللي انا فيها يتواصل من خلال تليفون خالد فتحي عن سكان المنزل المشئوم

0101754294

وذنبي في رقبتك ياحكومة وذنب عيالي اللي بايتين في الضلمة وخايفين

في رقبة اي حد ساعد الظالم على ظلمه وفي رقبة اي حد يقدر يوصل شكوتي للاعلام ومكسل

بكتب وفاضل شرطة واحدة واللاب توب يفصل شحن يا عالم

وحسبي الله ونعم الوكيل

حالة

السلام عليكم ورحمة الله

مهم جدا الرابط دة تتطلعوا عليه ونشارك مع بعض كالعادة في محاولة لتفريج كربة اخ لنا ولو بنشره على نطاق واسع وجزاكم الله خيرا

فاكرة لما اول مرة شفت مدونة واتمنيت يكون عندي انا كمان مدونة اكتب فيها براحتي واتبادل من خلالها خبرات وافكار ومعلومات وكمان اتواصل مع الناس واتكلم معاهم وانصحهم وينصحوني بدون اي مصالح كدة لله في لله

على طول كان زوجي انشأئها وقالي تعالي شوفي كدة وفتحها لي وكمان كتب لي اول تدوينة وكمان اختار لي اسمها لانه عارف اد ايه بحب النقاب وفرحت اوي بالمدونة واعتبرتها حتة مني مش ممكن ابعد عنه

وفعلا لحد دلوقتي أغيب على اد ما اغيب واحن لها واجري عليها وافتح تدوينة وكتير اوي اقفلها واوقات اكتب وافضفض فيها

هكون صريحة اكتر معاكم

انا باعتبراهل التدوين اهلي واخواتي بيسالوا علي ولما بقول عيانة ولا عندي اي ظروف على طول بيدعولي وبيساعدوني كل حد باللي يقدر عليه بدون اي مصلحة وبدون معرفة حبيت العالم دة جدا

عالم مختلف عن العالم الواقعي العالم الواقعي بقى مزيف الاخوات ما بتسالش عن بعضها كنت فاكرة انا بس لقيتني انا احسن من غيري

كان عندي ثلاث اخوة واختين توفى اخي الاكبرمني مباشرة من 8سنين تقريبا وكان مش محسسني اني عاوزة يكون لي حد غيره

واصل للرحم وكان بمثابة الاب واكتر لنا كلنا الله يرحمه لدرجة ان باقي الاخوة رموا كل المسئولية عليه واتعودوا انه هو بيعوض كل حاجة وكانت المفاجأة انه توفى بدون اي سابق انذار وكانت الطامة الكبرى بالنسبة لي انه ترك فراغ شديد وبقى واضح وجلي لان ما بقاش اخويا يزورني بانتظام ومبقاش يسال علي زي الاول ولا الاقي حنانه الاخوي ولا الاقيه في ازماتي

طبعا الاخين التانيين ولا على بالهم مكبرين دماغهم ودة اللي خلانا كبنات نعاني جدا واهتزينا نفسيا وبنحاول نقرب من بعض اكتر واكتر في محاولة لتعويض الفقد دة لحد ما تعودنا خلاص

الحمد لله مرتبطين ببعض جداوبنحاول نعوض بعض

بحمد الله قدرت اتخطى الكبوة دي بفضل الله تعالى وارادته وقتها حملت في مريم بنتي وانشغلت اوي بيها وزوجي ساندني واتحملني كتير وقتها وقررت اكون اسرة كبيرة وبقى يحصل لي الحمل ورا بعض ومن جوايا كنت ببقى مبسوطة اوي واقول لنفسي هعمل عائلة بتاعتي اخليها مرتبطة وتحب بعضها

يمكن ضغوط الحياة تخليهم ينشغلوا عن بعض ايوة انما دوما ما ينسوش بعض ويحبوا بعض ويحنو علي وعلى ابوهم بحاول انا ووالدهم اربيهم على كدة وربنا معايا

بلاقي بقى مشكلة بحكم اني الاخت الكبرى مطلوب مني اللي انا محتاجاه بحاول اعطيه لكن انا محتاجاه حاولت انا وزوجي نكون صداقات كتيرة ونتبادل زيارات اسرية لكن لقينا الواقع بيفرض نفسه المصلحة والغيرة والحسد والنميمة ومشاكل خايبة من نوعية بتتصلي وما بتتصليش وتعالي انتي اشمعنى انا وحاجات تضيع الوقت ونميمة الحريم استغفر الله العظيم وشغل العيال بقى فكان البعد احسن

طيب ايه الحل يا ناس ؟؟

بالنسبة لي كان المدونة واهلي من العالم دة وقبلهم بيتي وازوجي واولادي دول هما كل حياتي وكل شغلي الشاغل وشوية بقى جنبهم شغلي والحمد لله تعالى نجحت فيه جدا بفضل الله برضه ووقفة زوجي جنبي لاني صممت انجح لكن ما كانش ينفع انجح بدون وقفته ومساندته لي وماكانش اناني

في يوم الاولاد راحوا مكتبة جنب البيت علشان يشتروا طلبات اشتروا بدالها لعب وقتها ما كانتش اسراء معاهم لكن اشتروا من كل لعبة اربعة لكل واحد لعبة ورغم اني وقتها عاقبتهم انهم اشتروا غير اللي طلبته منهم الا ان نصف الكوب المليان انهم اشتروا لبعضهم وعملوا حساب اختهم اللي مش معاهم

ودة اد ايه بسطني انهم لما هيفرحوا هيفرحوا مع بعض ووقتها قلت يارب ولا زلت بقول يارب يفضلوا يحبوا بعض على طول لا زوجة اخ تفرقهم ولا زوج اخت يفرقهم يارب يحبوا بعض على طول

ما اعرفش التدوينة سببها ايه وحاسة انها متلخبطة ومش مرتبطة يمكن

بس حالة حساها وعاوزة اكتبها حبيت احكيها مع اهلي في العالم الافتراضي

احبكم في الله

دعواتكم بالشفاء

الحمد لله تعالى على كل حاجة واي حاجة يارب

مريضة لا ابارح السرير بقالي حوالي 6ايام الا للذهاب للدكتورالباطنة او الحنجرة واخيراالتحاليل او اخذ حقنة والحمد لله تعالى على كل حال

اقوم بعمل تحليل معين بعد ما غلبوا الدكاترة لاني اخدت ادوية كتير

طلبي منكم تدعولي ربنا يجيبها سليمة باذن الله تعالى والتحليل هتطلع نتيجته الاتنين وهطمنكم زي ما بقلقكم

معلش سامحوني ما انتم اخواتي بجد وانتم اللي بتسالوا علي وعودتوني على كرم اخلاقكم
يارب اشفى مرضانا وارحم موتانا واهدنا وارحمنا يارب العالمين

لسة شوية صغننة

ازيكم كلكم وحشتوني

كل عام وانتم بخير بمناسبة كل حاجة وكل مناسبة

الاحداث كانت كتيرة جدا جدا جدا سواء من الناحية الشخصية او كل حاجة حوالينا لدرجة مش عارفة اكتب في ايه ولا ايه

بالنسبة للناحية الشخصية وموضوع شبرا فلم يعد هناك اي امل في اي حاجة انا في انتظار رحمة ربنا سبحانه وتعالى ببساطة لاني الشق الضعيف والضعيف جدا ولاني بمنتهى البساطة واجعني الحلال فاشرب بقى واخليني مع الحلال يمكن ينفعني ببساطة اكترالدنيا بايظة وابتدينا ننهار اهو لان الراجل ايده طايلة وبتوع الحي والمجلس المنحلي بنفسهم وبذاتهم قاعدين هما اللي بيساومونا دة انا كمان اتعرفت على محامي عنده بيت وعاوز يطلع له ترخيص علشان يبني هناك في شبرا بتوع الحي قالوله هنطلعهولك بس بالنص قلت له يعني ايه ياعم دة قالي يعني الترخيص ب3ادوار في شقتين يعني ست شقق هما ياتلاتة وانا تلاتة يانهار مالوش شمس يعني ايه دة قالي يعني ببساطة الشقة ب300الف هما 900وانا900وبالشفاعلى طول عرفت موقعي وعلى طول باءت كل محاولاتي في اني اخد حقي بالفشل وطبعا مش هنقدر نعيش في المجاري ماهو المجاري اتردمت والحمدلله بنصرف في الشارع وكل يوم والتاني عند دكتور ومهددين فعلا بالمرض والاوبئة

وحسبي الله ونعم الوكيل في الظلمة وحسبي الله ونعم الوكيل فيكم يا موظفين حي روض الفرج واحد واحدوواحدة واحدة وحسبي الله ونعم الوكيل وحسبي الله ونعم الوكيل فيكم يابتوع العاشرة مساءا عشموني بالحلق ووعدوني ميت مرة هيجم يصوروا مشكلتي انا والجيران ولا حد فيهم سأل وذلوني من كتر الاتصال والمحايلة يجوا يصوروا هتفرق كتيرلو المشكلة ظهرت على التليفزيون دة الراجل دة لمجرد مقال نوارة على الدستور كان بيشتكي للناس ويقول فضحوني في الجرنان فمابالكم تليفزيون

يمكن حد يحن علي وينشرحالتي قبل الانهيارالتام اللي قربت منه بالقوي

انما خلاص انا في انتظار رحمة ربنا اللي مافي بعدها اي حاجة تانية

بالمناسبة بقى رحمة ربنا سبحانه وتعالى وعنايته انقذتني في الاسبوع الاخير من رمضان عارفين ازاي ؟؟

كنت بشتري سحور وحلويات وراجعة البيت وزوجي دخل قبلي بشوية على ما اجي خطوتي على ادي يعني كان في الاثناء دي جالي حرامي يخطف شنطة ايدي وطبعا صرخت والواد يشد في الشنطة مش عارف بس دلق اللبن وبوظ الزيتون وطبعا انا منتقبة ما عرفش يلاقي بقي فين علشان يكتم نفسي والطبيعي انه طلع يجري خصوصا ان الدنيا اتلمت واولهم زوجي وحاولوا يمسكوه كان جري

الطريف في الموضوع اني حصل لي حالة انهيار وزوجي راح يعمل محضر قالوله هي تيجي قالهم حاضر بس اثبتوا الحالة وهروح اجيبها وياريت يبقى فيه تواجد امني لان الصبح كان فيه حرامي في البيت اللي جنبنا ومن يومين برضه الظابط ساب اللي في ايده وقاله انت شايف مفيش تواجد امني يعني زوجي بيقولي قلت خلاص هيلبسني قضية

المهم بقى ياحضرات بعدها بيومين شفت الحرامي تاني هههههههههههههههه اه والله شفته هو والعصابة مع بعض الساعة 6الصبح واول عيني ماجت في عينه عرفته وشاورت لزوجي عليه الواد ركب العربية اللي معاه وطلعوا يجروا لكن حفظت رقم العربية وطلعنا جري على القسم وسيادة البيه الامين كان بيقول استنوا للساعة عشرة يكون مااعرفش فلان بيه جه مش هيسيبه قلت له لكن انا عندي عيال ومش معقول هفضل في القسم قاعدة بيهم 4ساعات والدنيا رمضان قال خلاص هعمل لكم محضر واستنوا اشوف هديكم رقمه ولا ايه

وبعد ما عمله طلب مني اخرج برة وقال لزوجي تليفوني اهو ابعتلي كارت شاحن وهبعتلك رقم المحضر وانا تحت امرك في اي حاجة

ههههههههههههههههههههههههه

الامين عاوز رشوة

حد عنده علاج لحالة فساد مستعصية

شفتم بقى انا مستنية رحمة ربنا احسن من كل حاجة وعجبي

دعواتكم دوما محتاجاها ونصايحكم يا محامين التدوين المجدع وخيرنعمله سوا

معلش استحملوني بجد اصلي ممكن اروح فيها لو ما اتكلمتش او قلت آه من شدة الألم

والموضوع فعلا بقى ياخد من صحتي رغم ان خالد زوجي بيقولي انتي قوية حد غيرك في الوضع دة كان هيبقى تصرفه حاجة تانية وكلمة في سركم انا اضعف مما اي حد يتخيل وواخد في مقلب بس لازم اكون قوية علشان اقويه هو وحط ايدي في ايده وافكر معاه ونربي ولادنا هيروحوا فين من غيرنا

الحمد لله على كل حال

انا روحت الحي علشان اجيب معلومات للمحامي وكانت معايا زميلة بتشتغل هناك علشان تسهل علي الموضوع لكن طبعا اخفوا علي اي حاجة وكنت بشد المعلومات شد وحسيت من الموظفين الشماتة وكان فاضل يطلعولي لسانهم اد ايه الظلم وحش ومفيش رحمة كنت عاوزة اصرخ فيهم واقولهم ازاي عيالكم بتاكلوها وتربوها حرام؟؟؟!!!طعمه ايه دة ؟!!! اعوذو بالله العلي العظيم

تعرفوا ان حتى القسم بيساعد الراجل دة

بس هقولكم حاجة انا حساها ما اعرفش هتقولوا علي اتجننت بس دي الحقيقة لما روحت الحي حسيت ان ربنا معايا وبيوجهني ولما اروح حتة الاقي حاجة بتدفعني لحتة تانية

حتى اني دخلت مكان ما ينفعش حد يدخله الا الموظفين وصديقتي بتكلم صديقتها وانا عندي هواية النظر في الارض عيني وقتها وهي بتتجه للنظر في الارض تلاقت بورقة موجودة على المكتب فيها عنوان بيتنا فتعلقت بيها وقلت للموظفة دة بيتنا اللي هيتهد

قالت لي بيت كرم دة خلاص دفع بقولك دفع قلت لها ايه دة قالت طلب رخصة وشفته طالب قطع المية والكهربا واخلاءنا واصدار رخصة

وشفت رقم قرار الازالة كمان ارسلت استغاثات كتيرة اوي وكتبت في مواقع كتيرة وارسلت للجرايد

وروحت البيت في حالة يأس وشفت محامي تاني كمل على اللي فاضل مني

المهم بالليل راح زوجي مع الجيران لمكتب محامي ساكن معانا في الدور الرابع اللي فوقي وجاله في البداية ازالة وما اتحركش وادانا دفعة وامل زراح مع زوجي والجيران للحي تاني يوم وللحق الراجل فاهم وجاب كتب وبيقراها وشاف كم الفساد اللي في الحي متمثل في رخصة الهدم بتطلع ورئيس الحي وقع عليها ومفيش ورقة تثبت علم السكان اليقيني اول المحامي ما قالها لرئيس الحي اتفزع وزعق في الموظفين اللي بيستغفلوه واوقف اجراءات الرخصة

كمان الملف لا يوجد فيه ما يثبت ان كرم اشترى العقار بتاعنا او انه ملكه فبالتالي يجيب له قرار ازالة ليه

تعالوا بقى نحول المشهد عندي في البيت الناضورجية طبعا عرفوه ان الرجالة في الحي والستات في البيوت يقوم يبعت لنا واحد يفتح الكهربا ويقول هقطعها وتصوت جارتي والتانية تقوله فين الورق وانا هطلب لك النجدة لو قطعتها يخطف الورقة ويطلع يجري وبعدها بشوية يجيلنا واحد يفحت علشان يقطع بقى المية ونعيد الكرة بس المرة دي طلبت النجدة والنجدة جت

وانا بكلم النجدة كنت في حالة فزع ام ومعايا اربع اطفال الساعة १२ الظهر في رمضان وغرقانين في العرق الاقي حد عاوز يقطع المية فبتكلم بفزع الاقي بتاع النجدة بدل ما يهدئ من روعي يزعق في ويقولي خلاص خلاص عاوزة ايه يعني ؟؟؟؟!!!!!

قلت له المية ما تتقطعش يقولي هبعتلك عربية نجدة بعد ربع ساعة جت

وركزوا معايا علشان تعرفوا ان ربنا معايا وبيوجهني زي احساسي ما بيقول

واحد جالنا البيت وقال مين بلغ قلت له انا قالي تعالي هاتي بطاقتك وكلمي الباشا الظابط افتكرت ان بطاقتي مع زوجي علشان عملت بيها طلب في الحي اني عاوزة المستندات علشان ارفع قضية ولازم ببطاقتي زوجي يسحب الملف

المهم روحت للبيه الظابط رجلي انتنت وانا رايحة وكنت هقع وروحت وانا بتألم وبرضه ببص على رجلي وفي اثناء نزول عيني على الارض البيه الظابط ماسك ورقة فيها اسم زوجي الرباعي والعنوان وسال عليه قلت له انا مراته استرجعت المكالمة اللي طلبتهم بيها لقيتني لم اعطي اي حد اسمي او اسم زوجي اعطيتهم عنوان بس وطلعت اجيب صورة بطاقة نزلت لقيت البيه الظابط مشي ونبه وشدد ان سكان العقار بالكامل يجوا القسم يحرروا محضر كنت كلمت خالد علشان البطاقة وحكيت له وقلت له كلم المحامي قال لره انتبه دي مؤامرة من القسم لان المالك اشتراه هيلموا البطايق ويضغطوا عليكم تمضوا على انكم علمتم بقرار الازالة

وبعدها بشوية جالنا امناء شرطة خبطوا علينا برضه الستات اللي عارفين ومتاكدين اننا لوحدنا ومافتحناش لحد منهم

شفتم وصلنا لفين

مشكلة عاوزة اللي عنده نصيحة يقولهالي

البيتين مشتركين كمان في الصرف الصحي وطبعا وهو بيهد الاولاني ردم الصرف وعملنا محضر بكدة دلوقتي بيتنا بيصرف في المنور وتكونت بحيرة من الصرف الصحي ولكم تخيل المرض والتلوث في الحر دة

حاولنا نجيب سباكين يعملولها صرفة خايفين بيقولوا دي مخالفة

والحي اللي بلغناه طبعا مش هيساعدنا طب مخرجها ايه دي ؟؟؟؟

معلش عاوزة برضه نصيحة بخصوص لو القرار بتاع الازالة بقى نهائي هل ممكن تيجي قوة ترمينا في الشارع وتهد البيت؟؟؟

ولا ممكن يخلونا نقعد فيه على مسئوليتنا ؟؟

طيب الجزء اللي البيتين مشتركين فيه مش ممكن يهدمه وفعلا لو اتهدم الحمامات والمطابخ تقع وطول ما الجزء المشترك دة موجود البيت يعيش 100سنة تانية لان الجزء دة بمثابة دعامة والبيت مش محتاج غير شوية ترميمات بسيطة انما اثاثاته حجارة وكلنا موضبين كويس

وحتى اخر لجنة جت كشفت واصدرت القرار ما كشفتش على اساسه ولا حاجة ومفيش اي شرخ موجود خطير ولا حاجة

تعرفوا احنا مستعدين نسيبه ونمشي ويبني البرج ال12دور اللي الدور الواحد اربع شقق والشقة ب300الف يشبع بيه بس يعوضنا كويس وبالطريقة اللي ترضي ربنا مش ترضيه هو وبمزاجه هو الراجل عاوز يرمي ملاليم ويقولنا روحوا اي حتة مش ضروري شبرا

طب ما يروح هو اي حتة اشمعنى احنا نبتدي نعمر في حتة تانية

المحامي قالنا اننا بنحاول نضغط عليه ونلوي احنا دراعه بدل ما يقطم هو وسطنا ونحاول ناخد منه نصف حقوقنا

المحامي ارسل جواب للاموال العامة والضرائب يقولهم ان الراجل دة بيشتري البيوت القديمة ويهدها ويطلع بابراج او بيبيعها اراضي فاضية وعمله الاصلي جواهرجي في محل 30متر وسالهم سؤال هل بيقدم اقرار ضريبي عن النشاط دة والا فمن اين له كل ذلك ؟؟

الراجل عمال يتسلى على شارع شبرا وجاب 3ازالات ل३ بيوت في اسبوعين وماشي في بيتين ادامنا وبيتين في الخطة واصلا الشهر اللي فات مطلع ازالة لبيت غيرهم غير برجين كبار في شارعين مهمين في شبرا

اصحابه اوي بتوع حي روض الفرج

المهم المحامي قال دة ضغط مننا عليه ايه رايكم يا قانونيين ؟؟؟

وفيه حاجة تانية كمان سمعنا انه بيتاجر في الاثار وبيشتري البيوت القديمة في المحيط بتاعنا بس منطقة شبرا كانت منتجع للامراء الشوام والبيوت اللي فيها كان اغلبها قصور

وفعلا سمعنا انه فعلا لقى اثار في البيت اللي جنبنا المحامي برضه عمل جواب بكدة للاثار وقالنا برضه دة نغط عليه بيه او يعطل الهدم شوية لان الاثار بتشكل لجنة للتاكد من البلاغ وتحط ايدها على البيوت شوية

ياترى الحاجات دي هتنفع؟؟!!!

الحاجات دي كلها اتكتبت وعريضة الدعوى والطعن اتعمل واليوم وبعد ساعتين من دلوقتي هتتقدم

دعواتكم ونصايحكم ما تبخلوش بيها علي

مش عارفة انام ولا بناكل ولا بنشرب والحمد لله بنضحك ولسة فيه امل انا ظني وقتي بالله خيروكبيرة وعارفة اني مظلومة وربنا واقف جنبي ودوما بشجع نفسي بنفسي وبقول يانونو من امتى ما حصلش اي حاجة كنت بتتمنيها زي ما انتي عاوزة حتى الحدث اللي كنت بظنه شر وازعل بعد شوية افهم ان مفيش حاجة اسمها وحش ولا شر كل خير وكل صح بس بيتفهم في اوانه

ربنا بيعمل للانسان كل حاجة حلوة

الحمد لله على كل حال يارب الحمد لله حمدا كثيرا طيبا مباركا فيه

معلش استحملوني رمضان كريم عليكم

فيه رابط مهم اوي كله خير باذن الله ربنا يقدرنا جميعا ونشارك فيه باللي نقدر عليه هنااااااااااااااااا

يارب

طبعا انا بشكر كل من تواصل معايا وحاول يساندني ويدعيلي في الازمة اللي انا فيها

بس احب اطمنكم علي وعلى احوالي واقولكم ان مفيش فايدة الفساد ريحته فاحت على الاخر وبقى يزكم الانوف

في موضوعي دة مفيش حاجة هتنفع فيه غير الرشاوي وغير ان اشتري الضمائر معايا فلوس هنفع هعرف اشتري ضمير اتخن تخين انما ان معلش مش هعرف ارش ولا ارشي حد اصلي انا وزوجي يادوب نقدر نأكل عيالنا ويعني ناكل معاهم انما هنرشي موظفين حي روض الفرج مش هينفع او بالاصح مش هنقدر يبقى نروح نغور في داهية والغني يغتني فوق غناه ويمشي ويتمختر على جثثنا لا وايه اقوله خليني اقولك الله يبارك لك كدة هحسبن عليك وادعي ربنا يفقرك يقولي لا مش هيسمع منك

حتى ربنا بيشككني انه هيقبل دعوتي وكانه ضامن باين برضه أداه رشوة علشان ما يقبلش دعوتي استغفرالله العلي العظيم

ياحضرات انا ابتديت مشواري في المطالبة بحقي لما عرفت بالصدفة البحتة عن طريق صديقة في الحي ان بيتنا جاله ازالة للدور الرابع اللي فوقي وترميم لباقي البيت فروحت مع ولادي وزوجي اعيط لرئيس الحي واقوله ساعدنا نرمم البيت ومستعدين نرممه على حسابنا كمان ودة طبعا بعد ما كنا هنتخانق مع السكرتارية اللي مش عاوزانا ندخل لرئيس الحي والراجل مشكورا بعت من مكتبه اشارة تلزم صاحب البيت بالترميم وقلت له وقتها قرار الترميم مش في مصلحة الراجل اللي بيهد اكيد هيطعن فيه ومش هيرممه باعتبار انه اشترى بيتنا ودة برضه مش عارفين حقيقي ولا لا رئيس الحي قال لو رفض رمموه انتم السكان بطريق قانونية ما وقالي بالحرف عيشي مع ولادك في البيت وما تخرجيش منه

اليوم دة خرجت من عنده ربنا جند واحد صعبت عليه انا وعيالي وانا بعيط وقال لزوجي في ودنه روح لجنة التظلمات الراجل عامل او هيعمل تظلم ويجيب قرار ازالة للبيت ورجعنا لرئيس الحي وقال يعمل دة من حقه وانتم تتظلمه بالعربي نقضيها تظلمات

روحنا للتظلمات لقينا الظلمة المهندسة امل هانم ام كرش واسع حسبي الله ونعم الوكيل زعقت وقالت مفيش تظلمات خدوا بالكم بتعيطي ليه اما يعمل حاجة ابقوا تعالوا اشتكوا وروحت البيت وحمدت ربنا وابتديت امشي في اتصالاتي بالعاشرة مساء انهم يجوا يصوروا عندنا وكل البرامج اللي ممكن صوتي يوصل للمسئولين من خلالها وكان فاضل ابوس على ايدهم من محيلاتي عليهم يلحقوني ومعايا اسرتين تانيين

والحق ادوني اكتر من خمس مواعيد فيها زوجي ياخد اجازة والجيران ونستعد ونقول خلاص هيصوروا وصوتنا يوصل وهنخلص باذن الله لكن للاسف محدش بيجي ولا حد بيسال

طب المحامي رحلة البحث عن محامي شريف ما يستغلش الموقف واما يبتزني ويستنزف فلوسنا او يعقد صفقة مع صاحب البيت ويبيعنا له

للاسف اتهد حيلي وما لقيتش محامي يوحد ربنا عنده ضمير

نوارة نجم دلتني الله يبارك فيها على محامي تعرفه لكن طلع مش تخصصه دة

المهم على بال ما لقيت محامي عنده عشرة في المية ضمير روحنا بيه اول امبارح للحي وكانت مفاجأة كبيرة

طلب المحامي الاطلاع على الملف بتاع بيتنا والبيت المجاور رفضوا طبعا لما هدد وصوته طلع طلعوا الملف

خليكوا معايا

اول مرة لما عيطت ورئيس الحي طمني كان بتاريخ 15شهر7والمهندسة امل قالت مفيش تظلمات لقينا اول ورقة في الملف تظلم في قرار الترميم بتاريخ 13شهر7يعني قبل زيارتي بيومين ومن وانا هناك لو كنت عرفت كنت هعمل دعوى مستعجلة او اعرف بيه واعرف الجلسة اللي التظلم دة هيحددها واحضرها واقوم محامي يرد عليها انما الموظفين خبوها ايوة خبوها ولم يخطروا اي حد بيها بل والجلسة اتحددت بتاريخ 4شهر 8يعني من ست ايام واتحكم فيها خلاص ولم يتم اخطارنا بشيء بيت كامل فيه اربع اسر ولا اسرة اخدت اخطار باي حاجة في اي حاجة لان بمنتهى السهولة اشترى الراجل دة موظفين حي روض الفرج فرد فرد وكلهم وقفوا ضد اربع اسر وحكمت المحكمة باعدامي واعدام اولادي وزوجي و3اسر تانية فيهم اسرتين عبارة عن ارملة وحيدة مالهاش ماوى وارملة تانية زوجت اولادها ومعاها بنت دة ماواها حكمت المحكمة بازالة البيت حتى سطح الارض لانه خطر هيقع عليكم يا عبط هتموتوا نسيبكم تموتوا تحتيه يعني لازم يتشال علشان يتبني البرج اللي هيكون فيه ارضي وعشرة متكرر وكل دور اربع شقق الشقة 350الف

المحامي قالنا اتفاهموا مع الراجل واللي يرميه خدوه طبعا يادوبك وصلنا البيت لقيناه باعت لنا واحد من الحي وكيل للمجلس المحلي عاوزيقعد يحلها معانا وهو بنفسه كلمنا وقعد معانا وقالنا انا طلعت قرار بالازالة خدوا المبلغ دة واللي مش هيجيب شقة ايجارها 400ج حتى وامشوا

قلنا نوسطن المسألة واللي تدفعه خده احجز لنا شقق صغيرة طوب احمر عندك قال لا لاهبيعها احتمال ارض مش هبني

لو ما اخدتوش المبلغ دة ولاخر مرة خلاص خليكوا فيه وههدوا عليكوا

وهنا يا حضرات خارت قوايا وانا بقوله حرام عليك كل اللي حيلتنا هي الشقة دي والله يا ناس لو املك غيرها هسيبهاله

ماعنديش ياعالم دة كل اللي شقيت بيه انا وزوجي طول عشر سنين زواج صرفنا اللي حيلتنا واحنا بنتزوج على توضيبها وتاسيسها وكلها على بعضها 50م بس اصلها في شارع شبرا

حسبي الله ونعم الوكيل في كل واحد ظالم ساعد الراجل دة وغيره في اللي بيعملوه

وعلى فكرة انامش اول بيت في شارع شبرا يحصل معاه كدة الراجل بيشتري المنطقة كل فترة يتسلى على شارع

فين الضمير

المحامي عمل لي يأس وقال خلاص انتهى

ما بانمش من ساعتها بحاول اعيش ومنتظرة الحي يجيلي في يوم وينزلني مع ولادي بالقوة من شقتنا او يقطع علينا مية ونور او لو سمح لنا نبقى موجودين نمضي اقارات بتحمل مسئولية ارواحنا فبسهولة يعمل اي حاجة توقع البيت على دماغنا ونبقى مع السلامة

انا باصرخ بس من غير صوت

حسبي الله ونعم الوكيل

يا ناس حد عنده اي امل او نصيحة ينصحني بيها تفيدني

يا محامين ياللي لسة باقي عندكم ضمير في زمن يباع فيه الضمير ويشترى حد عنده حل يساعدني بيه ؟؟؟؟؟؟؟؟؟؟؟؟؟

يابتوع البرامج والسبق الصحفي اجهزوا لقضية كبيرة هتيجي قريب ضحاياها ام واربع اطفال اغبيا وقع البيت عليهم رغم انهم عارفين انه هيقع قعدوا فيه اصل خمس ست لجان جم قالوا البيت كويس وعاوز ترميم بس احسن لجنة فيهم قالت لا دة هيقع بالتلاتة ودي اللجنة الفاهمة انما الباقي ما بيفهموش يلا يا برامج هحضرلكم صورنا وهحضرلكم اصل الحكاية علشان تاخدوا المعلومات بدري بدري

كان نفسي والله اصور معاكم وانا عايشة

ربنا كبير وقادر على كل شيء

عارفة نكدت عليكم بس والله الصورة اغمق من كدة واصعب بجد حاولت ابيضها شوية

بالله عليكم تدعولي ربنا يفرجها علي ويرحمني

واذا قدر الله ومت وصلوا الحكاية للمسئولين يمكن تنقذوا غيري

كل عام وانتم بخير

رمضان كريم

اسفة جدا اني زعلتكم

بلاغ الى من يستطيع المساعدة باسرع مايمكن

اسكن في العقاررقم 12ح محمد خليل من شارع البعثة روض الفرج والملاصق والمشترك اشتراك خطيرمن ناحية الاسقف للعقاررقم 4ح نخلة صالح بمعنى سقف الدورالاول للدورالارضي في العقارالساكنة فيه يدخل في سقف الدورالارضي للعقارالملاصق ويمتد حتى غرفة وصالة في العقارالمجاورروهكذا في الدورالتاني والتالت والرابع اسكن في الدورالتالت وذلك لان مالك العقارين كان واحد وبناهم بهذه الطريقة بالحجارة الصخرية وايضا يشتركوا في الصرف الصحي والمياه

فوجئنا ببيع المالك لمنزل4ح نخلة صالح لرجل له باع طويل استصدرامرهدم وازالة لهذا المنزل الملاصق لنا حتى سطح الارض بدون اي مراعاة للاشتراك الخطيربين العقارين ودون اشراف هندسي من قبل الحي وقمنا بتحرير محضراحوال رقم25نثبت ذلك وارسل الحي لجنة واتنين وتلاتة للمعاينة وكل منهم تاتي وتقول لا داعي للقلق وتاخذ ما فيه النصيب من مالك العقار المجاوروتمشي والرجل يهدم ويزيل الان بطريقة عشوائية غوغائية تعرض عقارنا للخطر اللهم انه اتى بمجموعة اخشاب ووضعها تحت بلكوناتنا ((قال يعني بتسندها)))

والحي قال له لا تلمس مكان الاشتراك مع المنزل ولا تهدم فيه اهدم من حوله فقط

نذهب للحي ((حي روض الفرج))) ونحاول استصدارمعلومات ونحاول كتابة شكاوي وقمنا بعمل محضراخر رقم 3324اداري وتم تحويله للحي وارسل لجنة للمنزل واخذه اللي في النصيب ومشيوا

ذهبنا اول امس للحي وعلمت بطريقة ما ان هذا الرجل اشترى عقارنا واستصدرامر ازالة للدورالرابع في عقارنا وترميم وتنكيس لمنزلنا وقام ايضا بالتظلم في هذا القرار ليستصدرامر بازالة العقاربالكامل(((( طبعا امال هيطلع بالبرج ازاي))))

وخاطبتنا المهندسة امل بان بيتكم هيقع ولسة ما اتظلمش الراجل ولاحاجة مستعجلين ليه دة اصدر امربازالة رقم 10ورقم7ومنزله وسوركان مخالف لما يجي عليكم الدورابقوا اشتكوا وهو ما جعلني انهاربكاءا لذلك فرددمهندس وحيد معلش ربنا على المفتري

وذهبت لسكرتارية رئيس الحي وكانوا مش عاوزين يدخلوني باي طريقة كتبت الشكوى وطلع السكرتيريقولي بعد انتظار3ساعات تحولتي للجنة الاسكان هتعاين وتبت في الامر فقلت عاوزة اقابل رئيس الحي ولخوفه من اني ممكن اعمل مشكلة دخلني وللحق قابلنا الرجل بكثيرمن المودة وقال بالحرف الواحد هنجيب المالك علشان يرمم العقار وان رفض هتتحدواكسكان لترمموا العقارانتم على حسابكم وقال للموظف ابعت اشارة الان من مكتبي لاحضاره

ولم يحدث اي شيء للان حتى ان قرارازالة الدورالرابع وترميم المنزل لم يخطرنا احد به ولاحتى اخطرنا انه اشترى بيتنا كله عرفناه بالصدفة في الحي

المشكلة الان الراجل دة بيهددنا انه هيخرب في العقار وانه هيبذل وباسرع وقت هيشيل البيت حتى لو اضطره الامر انه يهده فوق دماغنا

الراجل دة تخصص شراء البيوت في شبرا وازالتها وبيع اراضيها المتر ب20الف

ياعالم انا مهددة واطفالي يوميا ومعايا اسرتين في شقتين ارملة واخواتها وارملة اخرى وبناتها

الرجل له باع وقادرعلى شراء الضمائر معاه فلوس بس انا معايا ربنا وانتم

حاولت كتابة ايميلات لكافة البرامج وحاولت الاتصال بيهم دون جدوى

اللي يقدر يوصل صوتي ويلحقني يساعدني

معنديش غير الشقة دي كل اللي حيلتي والا هبقى في الشارع

حياتنا مهددة اما بانهيارالمنزل بفعل فاعل على رؤوسنا او بتشريدنا في الشوارع باستصدارقرارات مخالفة للواقع

وكل دة علشان مترالارض ابو عشرين الف او الشقة ب400الف

طيب نتفاهم معاه ويعوضنا بشقق زي اللي احنا فيها او يعطينا مبالغ محترمة تعوضنا طبعا لا هيجرح فلوسه ليه يعني

طيب نعمل ايه بس

تحركات الرجل دة سريعة جدا وتتطور بسرعة بجد الحقوني قبل ما اكون تحت الانقاض

مشاكلي كتيرة بس انا عارفة قلوبكم كبيرة

يارب بحق اذان الفجر وهذا الصباح تفك كربي وتهلك الظالم يارب