الغابة اللي اسمها دنيا

مش عارفة أعيش فيها ، ندمانة ، متضايقة عايشة كأني في دنيا مش ليا أبدا ، أنا من صغري واضحة بحب كل الناس وبصدق أي حد وكل حاجة عمري ما بافترض ان اللي أدامي كذاب ابدا أو أنه ممكن يسرقني أو ينصب علي أو ياكل حق من حقوقي أو يظلمني

يا سلام بقى لو الحد دة له كينونة خاصة مهيبة مظهر الدين عليه واضح وتيجي للمعاملة تلاقيها تحت الصفروتلاقيه ما يفرقش حاجة عن اي حد ما هو بني ادم

تيجي تتعامل معاه من ناحية انه عارف ربنا وهيرحمك تلاقي العكس

صدمة كبيرة ليا ألاقي كدة وصدمة كبيرة علي

وقرار اخدته مفيش ثقة في حد

مفيش ثقة في اي حد

أنا وزوجي كنا بنقول كل اللي بيتقال صدق احتمال الكدب فيه ضعيف

تغيرت المعادلة وبقت كل اللي بيتقال من اي حد وبيتعمل هو كدب الى ان يثبت صدقه مش مرة واحدة لا عشر مرات أقله

خسارة على الدنيا وخسارة على الناس

مفيش حد بيرحم حد ابدا عمالين ننهب في بعض وعمالين نتجبر على بعض

وبقى اللي بيغتني وبترتفع مكانته دلوقتي وتسعة وتسعين في المية منه حرام في حرام وممصوص من دم الغلابة وانا منهم وبقى غناه تحت مسميات عمولة ممكن اتعابي ما يضرش شطارة في التجارة ماشي اهو اي مسمى يحلل بيه لنفسه نهبنا وخلاص

حسبي الله ونعم الوكيل في كل حد واي حد نهب حق من حقوقي انا واسرتي خصوصا

حسبي الله ونعم الوكيل في كل حد بيحلل لنفسه موقف ا و عمل او مال او افتعل موقف ظلم بيه حد ونهب حق من حقوق اي حد وانا كمان

حسبي الله ونعم الوكيل في كل من لي عنده مظلمة من اي نوع وبات فاكر انه أتشطر علي وكسب جولة

حسبي الله ونعم الوكيل في كل من ساهم في نهب مظلوم وكان هو الجسر اللي عبر به الظالم وظلم المظلوم

خلاص انتهت دنيتي الخضرا ما عدتش لها وجود لازم تكون انتهت من بدري

بس مش عارفة اتخلص منها قولولي اعمل ايه؟؟

قولولي ازاي ما اساعدش حد شايفاه محتاج لمساعدة اقدر اعملها؟؟؟

قولولي ازاي اقدر اعيش هنا في الغابة دي اللي اسمها دنيا

الجزء التاني من الموضوع السابق قريبا باذن الله

جزاكم الله خيرا على التفاعل فيه

تحياتي