الأربعاء، أبريل 30، 2008

دعوة للحب

تحديث اخر اهم
اسعدني جدااااااااا دعواتكم وسؤالكم عني وانا والحمد لله اصبحت معافاة وزال المرض بفضل الله تعالى فالحمد لله على كل حال
تعليقاتكم على الموضوع ثرية جدااااااا
تعلمت منها الكثييييير
فحتى نستفيد جميعا سأبروزها في تدوينة قادمة باذن الله
واهلا وسهلا بكل زواري لاول مرة أتمنى دوام التواصل فيما بينا
أشهد الله العلي العظيم أني احبكم في الله
===================
تحديث هام
اولا انا أهنأ حبيبتي في الله ام احمد المصرية لاني سمعت لها تدوينة يوم الخميس والتعليق الذي تم عرضه كان للربان تهانيا يا حبيبتي في الله
ثانيا أشكر تفاعلكم مع موضوعاتي بوركتم احبائي في الله
وباعتذر عن تفعيل الموديريشن مرة اخرى لان فيه مدونة بتدخل تسب سباب غير لائق فحرصا على زوارى قمت بتفعيله مرة اخرى لكن اي تعليق مهما كان فيه اختلاف في وجهات النظر سيتم عرضه والرد عليه والتناقش معه المهم ان تكون التعليقات في اطار محترم وخالية من اي سباب لاني ساحجب تلك
ثالثا اعتذر عن عدم متابعتي الكافية اليومين الماضيين واحتمال اليومين القادمين لمروري بوعكة صحية شديدة
لكن من دعوني حاليا لتدوينتهم تلبية لدعوتهم الكريمة ساتوجه فورا للتعليق عليها
واوعدكم بالتعليق على تعليقاتكم في هذه التدوينة بطريقة وافية باذن الله
أسألكم الدعاء
جزيتم كل الخير
[تحديث ]زعم قوم ان المحبة اثم ويح بعض النفوس ما أغباها
أنا بالحب قد اهتديت الى نفسي أنا بالحب قد عرفت الله

السلام عليكم ورحمة الله

تعرفت عندما دخلت عالم الانترنت والتدوين لكثيرمن المصطلحات

لكن لم اكن اعرف ان هذه المصطلحات تخفي خلفها ايضا جماعات وتوجهات مختلفة وايضا وراء كل توجه وجماعة منها خلافات بينها وبين الاخرى

واستغربت كثييييييييرا عندما وجدت ان كل هذه الجماعات مسلمين وتألمت في نفس الوقت

حتى انا لم اسلم من هذاالتصنيف عندما دخلت عالم التدوين فأجد من قال عني سلفية واخر قال اخوان
يا الهي انا احب كل هؤلاء سلفيين واخوان ويشرفني نتمائيي لهم واحب واحترم كل من قال لا اله الا الله ويسعى لرضى الله ورسوله محمدصلى الله عليه وسلم ويحترم الصحابة الكرام والتابعين ويتأسى بهم وبرسولنا الكريم
واتمنى ان يأتي اليوم الذي تعود فيه الخلافة الاسلامية والحكم الاسلامي ويسود الاسلام االعالم
على ايدي سلف ..اخوان او تبليغيين او اي مسلم
فكل هذه الجماعات والاسماء كلها مسلمين
هناك خلافات يمكن حلها فيما بينهم بسهولة
اعلم ان الخلاف بين السنة والشيعة عميق وكبير لكن في ظل ما نواجهه الان يمكن ان نطرح الخلاف جانبا او نفتح حواار هاديْ لحله او طرحه جانبا
واعلم ان الخلاف بين باقي الفرق يمكن حله بسهولة لان الجوهر واحد
اتمنى ان نطرح الخلافات والمشاكل جانبا ونتحد سويا على حب الله ورسوله ونطلقها دعوة للحب والتاخي فما بيننا

فهل هذا مستحيل في ظل ما نحن فيه الان؟؟؟؟!!!!!!


اتمنى ان يكون هذا ممكن حتى لا نوفر فرصة لأعداءالدين يفتكوا بنا
اطلقوها معي دعوة للحب


تحياتي

الخميس، أبريل 24، 2008

اقرأوها وأسمعوها بقلوبكم

ساهم بتوقيعك في مطالبة الحكومة الهولندية بسن قوانين من شأنها حماية المسلمين من العبث بمقدساتهم الدينية خاصة ومن التجديف على الأديان عامة

====================


السلام عليكم ورحمة الله



بعد ان اصبحت ام لديها اطفال واستطعمت معنى الامومة وحب الام



اصبحت اقرا بعض من ايات القران الكريم واتفاعل معها بطريقة مختلفة عما سبق



نعم بطريقة مختلفة




يكمن هذا الاختلاف الذي اصبحت اقرأها به في تأملي لمواقف الانبياء والرسل في الانسانية

كأباء او مواقفهم مع اقوامهم كما سأوضح بعد قليل مقصدي

واصبحت اضع نفسي مكان هذا النبي في هذا الموقف هذا بالطبع مع الاختلاف الكبير فمن انا منه طبعا



لكني افكر وارى الموقف كيف كانت مشاعر هذا النبي الانسان تجاه هذا الموقف وانهمر في بكائي حتى وان سمعتها وقرأتها مئات المرات خاصة بصوت الشيخ محمد جبريل بارك الله فيه



تعالوا لنستمع اليها ونقراها بقلوبنا حملوها من اعلاه وسنتكلم عنها هنا
بسم الله الرحمن الرحيم (وَقَالَ ارْكَبُواْ فِيهَا بِسْمِ اللّهِ مَجْرَاهَا وَمُرْسَاهَا إِنَّ رَبِّي لَغَفُورٌ رَّحِيمٌ {41} وَهِيَ تَجْرِي بِهِمْ فِي مَوْجٍ كَالْجِبَالِ وَنَادَى نُوحٌ ابْنَهُ وَكَانَ فِي مَعْزِلٍ يَا بُنَيَّ ارْكَب مَّعَنَا وَلاَ تَكُن مَّعَ الْكَافِرِينَ {42} قَالَ سَآوي إِلَى جَبَلٍ يَعْصِمُنِي مِنَ الْمَاءِ قَالَ لا عَاصِمَ الْيَوْمَ مِنْ أَمْرِ اللَّهِ إِلَّا مَنْ رَحِمَ وَحَالَ بَيْنَهُمَا الْمَوْجُ فَكَانَ مِنَ الْمُغْرَقِينَ{43}) (هود:41- 43)



اتفاعل هنا مع هذه الاية الكريمة كأم وافكر ان سيدنا نوح الاب ينادي على ابنه ويقول له تعالي يا بني ولا تكن مع الكفرة ولكن الابن يرفض ويقول الجبل سيعصمني




اتفاعل معها بشدة واتخيل نفسي استحلف ابني فلذة كبدي ان ينقذ نفسه وياتي معي وابني يرفض




لا اتحمله كام ارى ان ابني سيهلك اذا لما يستمع الي ويصر سيدنا نوح عليه السلام اصرار النبي والاب معا ان ينصحه ويقول له لا عاصم اليوم من امر ربي





ثم يأتي الموقف والاية التي تنهمر فيها دموعي[ وحال بينهما الموج فكان من المغرقين]




سبحان ربي جلا وعلا يجعل الموج حائل بين الاب وابنه الذي يغرق ويهلك حتى لا يرى فلذة كبده ومهجة فؤاده يهلك ويغرق اراني وقتها كام اعايش هذا الموقف الصعب وانا من انا عندما يمرض احد ابنائي عافاهم الله امرض بضم الالف نفسي مثله لارى بماذا يشعر فلذة كبدي وكيف ان ابني يتالم وانا معافاة




هو ضرب من الجنون كما قالها لي احد اطباء اولادي ولكني ام لا اتحمل على ابني نسمة هواء تمر على وجنتيه




بسم الله الرحمن الرحيم
وَنَادَى نُوحٌ رَبَّهُ فَقَالَ رَبِّ إِنَّ ابْنِي مِنْ أَهْلِي وَإِنَّ وَعْدَكَ الْحَقُّ وَأَنْتَ أَحْكَمُ الْحَاكِمِينَ * قَالَ يَا نُوحُ إِنَّهُ لَيْسَ مِنْ أَهْلِكَ إِنَّهُ عَمَلٌ غَيْرُ صَالِحٍ فَلا تَسْأَلْنِ مَا لَيْسَ لَكَ بِهِ عِلْمٌ إِنِّي أَعِظُكَ أَنْ تَكُونَ مِنَ الْجَاهِلِينَ) (هود: 45 - 46)



يأتي هنا سيدنا نوح وينادي رب العالمين يا الله ابني هو من اهلي واراه وقتها كأب يتمنى ان يعفو الله عن ابنه وتقر به عينه قيستعطف رب العالمين ان يعفو عنه ولكن هنا قضي الامر لان الابن هذا عمل غير صالح ويقول ربنا جلا وعلا لسيدنا نوح لا تسألني فانت لاتعلم وهذه موعظتي لك ولا تكن من الجاهلين



ـ "رب أني أعوذ بك أن أسألك ما ليس لي به علم وإلا تغفر لي وترحمني أكن من الخاسرين" (47 هود)



ارى هنا امتثال من سيدنا نوح لاوامر الله تعالى واقرار بما امره به الله له



لكن اتسائل كيف كان شعوره الابوي ؟؟؟؟



لكني ارجع واتذكر انه نوح النبي المكلف بتوصيل رسالة رب العالمين فهي اعلى واغلى من ذلك

اكتفي بهذا اليوم



هذه بعض تأملاتي القلبية لبعض ايات القران الكريم وهناك المزيد في جعبتي



لكن هل جربتم مثلي ان تستمعوا الى القران الكريم وتقراوها بقلوبكم ؟؟؟




دعوة مني للتأمل القلبي للقران الكريم




واعدكم بالمزيد




تحياتي



الاثنين، أبريل 21، 2008

اخر العنقود لحد دلوقتي


تحديث
كلمة من بابا خالد فتحي وماما نونو لكل زوارنا الكرام واحبابنا في الله
كلمة بابا الاول
خالد فتحي عبد الفتاح: أرجو تبليغ كل الأخوة والأخوات الأعزاء أسمى آيات الاحترام و العرفان، وصادق التقدير والامتنان على كلماتهم التي زادتني بهجة وشعورا بالحب الصادق فعلا جزاكم الله خيرا وجعل الجنة مثواكم
ماما نونو اسعدتونا جداااااا جدااااااااا ورسمتوا على وجوهنا البسمة والفرحة بزيارتكم ودعواتك لنا ولاولادنا الله يبارك فيكم ويخليكم يارب
نحبكم في الله
السلام عليكم ورحمة الله


اليوم 21 ابريل 2007 بعد صلاة الفجر بشوية


حبة دربكة كدة وبكلم نفسي ايه دة دلوقتي ولا ايه ؟؟؟
زوجي الحبيب يعملي كوباية قرفة فظييييعة نصفها قرفة ونصفها عسل [يع يع ]


اشربها واطرده يروح شغله في مدينة جديدة تبعد عني ساعة ونصف تقريبا


انام لحد الساعة 10 صباحا على تليفونه





همممم ايه الاخبار ؟؟؟
انا له اقفل بئا عاوزة انام مفيش حاجة
طيب خير اي حاجة كلميني

طيب طيب
انام واصحى الساعة 12 على دربكة مريييييييعة واقول لنفسي

لا بئا دي باينها هي الساعة دي

طيب اتصل بحد ولا لحسن يكون زي الاسبوع اللي فات ويجوا كلهم على وشهم تاني ويطلع انذار كاذب
طيب هستنى شوية احسن بس انا في وسط البلد وزوجي بعيد يجي ساعة ونص بس اختي قريبة


استنيت شوية الظهر اذن والدربكة بقت بهدلة على الاخر ومش بقعد عمالة الف في الشقة زي النحلة واقول يااااااارب باعلى صوت وولادي معايا بيقوله وبقول كل الاذكار اللي اعرفها واقول كل الدعوات اللي بتمناها

اتصلت بزوجي تعالى بسررررعة خلاص خلااااااااص

هو يا عيني اهدي طيب هاجي بسرعة متخافيش
كل خمس دقايق يتصل بيا وانا اقوله كلم الدكتور يجهز نفسه مش قادرة اكلمه يرد علي ويقولي حاضر هكلمك
اتصلت باختي تيجي

بس حصل المفاجاءة بئا خلاص بجد اسراء ناوية تنزل في البيت وبسرعة صرخت وقلت يارب بلاش في البيت العيال هتتخض لحسن يجرى حاجة للنونو

زوجي يكلمني بهستريا ارد عليه خلاص يا خالد خلاص انت فين وارمي التليفون واجري في الشقة

جرس الباب يرن واقول مين الاقي شيماء بنت اخو زوجي بنوتة كدة 19 سنة ساعتها لسة هتقولي عمو كلمني وقال لي اروح لحضرتك قولتلها

حبيبتي وكأن الروح ردت فيا
الحمد لله خالد اتصرف اصلهم ساكنين قريبين منا
الحقيني يا شيماء هاتي تاكسي

تجري بسرعة في الشارع وهي بتعيط

الاقي حد بيخبط على الباب واقول مين الاقيه احد جيرانا

يسألني يا اختي فيه اخت منتقبة بتجري وتعيط عاوزين حاجة

قلت له ااااااه عاوزة تاكسي انا بولد

جري والشارع اتقلب مسيحيين ومسلمين

طلعوا اخدوا بايدي وبصيت قلت ولادي
جارتي قالت لي متخافيش روحي متخافيش

طبعا سواق التاكسي الله يسامحه كان عاوز يرميني في اي حتة

بس انا صممت على مكاني وقلت له وديني مطرح ما اقولك وهديك اللي انت عاوزه

طبعا اللي انت عاوزه تخليه يوديني المريخ

في السكة ابتهالات ودعوات مني لان اسراء قربت تيجي

وشيماء بتقرا قران واتصلت بعمها قالت له احنا في التاكسي تعالى على الدكتور

ادخل على الدكتور اللي دوخته معايا

اول حاجة يقولها انا مش قايل اما الوجع يكون كل ربع ساعة تيجي


كدة برضه زي كل مرة تيجي على وشك كدة


اقول والله يا دكتور الوجع جه مرة واحدة وما كانش معايا حد

يلتفت للممرضة ويقولها احفظيها [مس نونو انا يعني] دي كدة تيجي وهي خلاص على الاخر

[اصل فيه مرتين قبل دي جيت بنفس الطريقة حتى انه اخر زيارة قال لي الست العادية بقولها تيجي والوجع كل خمس دقايق انتي تيجي والوجع كل ربع ساعة]

المهم يديني الحقنة الجميلة بتاعتي اللي بولد مخصوص علشانها واروح في البنج واصحى على صوت بابا وبيقولي حمد الله على سلامتك يانونو والدكتور بيقوله معلش بئا المرة دي ما لحقتش تيجي تصور حاجة[ اصل الاستاذ زوجي بيحضر الولادة كلها من اولها لاخرها واول النونو ما يطلع الدنيا ويتلف بس بيصوره غير بئا صور السونار وفيديوهات ذكريات جمييييلة اوي ]

اشوفها بقى اسراء يعني

الاقيها واخدة بوكس في عينها وفي بقها بسبب تاخيري على الحضور واسال ليه كدة تعبانة اوي وازعل اوي اوي لدرجة لما بشوف صورها لدلوقتي اعيط

سالت شيماء نزلت امتى قالت لي حوالي 3 العصر يا طنط بعد ما جينا كدة بربع ساعة

وكانت شوشو فرحانة اوي انها حضرت الولادة بتاعت اسراء وارتبطت بيها اوي لدلوقتي




النهاردة اسراء الساعة 3 عصرا هيبقى عندها عام بالتمام والكمال لحد دلوقتي هي اخر العنقود سكر معقود

ممكن تدعولها ربنا يخليها ويبارك فيها هي واخوتها



اسراء بنوتي الصغنتوتة يوم ميلادك احلى يوم


هعمل احتفال صغنتوت لها يوم الجمعة باذن الله وهيكون احلى من الاحتفال اللي ادامكم دة واصورها كمان وانزل صورة تشوفوها


يلا فيه تورتات كتييير كل واحد ياخد حتة وتدعولها امانة عليكوا

يارب اعيش واشوفها زي البنوتة اللي ماسكة المصحف فوق دي وازوجها وافرح بيها هي واخوتها قولوا امين

الحمد لله يارب والشكر ليك بعتلي احلى واجمل ابتسامات في حياتي

هم زوجي واولادي ربنا يخليهم ويبارك فيهم

تحياتي














الخميس، أبريل 17، 2008

فوبيا

تحديث هااااااااااام
================

====================================================================







السلام عليكم ورحمة الله


احبتي واخوتي في الله


سمعنا جميعا من وسائل الاعلام المختلفة ولا سيما المدونات اخبار محاكمات الاخوان المسلمين ولا حول ولا قوة الا بالله


وادعو الله لهم بتفريج همهم وهمنا معهم يارب العالمين


في نفس الوقت الذي تمت فيه المحاكمة واعلان الحكم على جماعة الاخوان


توقعت كما اعتدت ان ارى المدونات المتخصصة في شتم وسب الاخوان المسلمين ولا سيما السلفيين وبالمرة من يظهر على مدوناتهم الالتزام ان تطل علينا باحقادها وغلها ولا سيما امراضها النفسية


لتعلن شماتتها وتاييدها للحكم وبالفعل وجدت


لكن وجدت في نفس الوقت اصحاب هذه المدونات يتناقلون خبر عن فتوى الشيخ عبد الحميد بن كلاب والتي زعموا فيها اباحة الشيخ لقتل الجنود المصريين على الحدود ونقلوا اصحاب المدونات السوداء هذا الخبر من كافة الوسائل جنبا الى جنب بخبر اخر يقال ان حماس تجهز لاقتحام حدود مصر وتشتري الاسلحة لاقتحام الحدود وصبوا اللعنات على حماس وفلسطين


وبالطبع لم ينسوا شتم وسب الاخوان المسلمين باعتبارهم على حد قولهم هم جناح لحماس في مصر


وحدث ولا حرج فيما قيل والملفت للنظر اني رايت هذه المدونات تكتب في نفس ذات الموضوع في وقت واحد ونفس الخبر باختلاف الصياغة للموضوع وبتنوع الشتائم


لا انكر اني في نفس ذات الوقت شعرت بالضيق لخبر الفتوى وخبر اقتحام حماس للمعبروما يشبه حرب علينا كما صوروه افتراءا


ولكني في نفس ذات الوقت فكرت بان حماس والشيخ ليس بمجنون لاصدار فتوى كهذه من شانها قلب الدنيا على ام راسه وراس اخوانه في فلسطين كما انني فكرت ايضا انه من الممكن ان يكون الخبر كلمات مقتطعة من كلام الشيخ هدفها يمكن ان يكون فرقعة صحفية او ان يكون هذا ليس الا كلام كاذب ولم يحدث اصلا و الهدف منه قطع اي طريق على اخواننا في فلسطين اذا حدث وتم وقوفهم على الحدود مرة اخرى فيكون هناك حجة لقفل وسد الحدود في وجوههم وعدم مساعدتهم باي وسيلة كانت


وفكرت هل حماس والاخوة الفلسطينين عندهم قذائف هاون والاسلحة والعتاد التي تم ذكرها في الخبر الذي يتناقلوه فعلا؟؟؟


واذا كان لديهم اليس من الاولى انهم يوجهوه لعدوهم ويحرروا انفسهم ؟؟؟ ام انهم يحتفظوا بها ليقتحموا به حدود جيرانهم تاركين ديارهم ؟؟


اي كلام يعقل هذا!!!!!!


افتراء عليهم وحسبي الله ونعم الوكيل


وفكرت ايضا لماذا يتم بث خبر كهذا في هذا الوقت بالذات الذي تم فيه اصدار الاحكام على قيادي الاخوان


والاجابة بالطبع حتى نتذكر ان حماس والاخوان اخوات فلا نتعاطف معهم


وتذكرت ايضا موقف هذه المدونات السوداء من الاخوان ايام اضراب 6 ابريل واقاويلهم بان الاخوان باعوا الشعب بعدم مشاركتهم في الاضراب بالرغم من ان الاخوان اعلنوا موافقتهم على الاضراب ولكن ان يكون منظم


وتذكرت اقاويلهم حول ان الاخوان ابرموا صفقة لتبرأة القياديين بشرط عدم مشاركتهم في الاضراب لكن جاء الحكم على القياديين مخيب لما قالوه فلا صفقة ولا شيء


وبالطبع عندما وجدت هذا الخبر












اصبحت متاكدة تماما ان هذه المدونات هي ليست الا لمدونين لا يكرهوا الاخوان او السلفيين او الملتحين فحسب


وانما لديهم فوبيا معروفة جلية اكبر من ذلك


بسم الله الرحمن الرحيم

﴿ يُرِيدُونَ أَن يُطْفِؤُواْ نُورَ اللّهِ بِأَفْوَاهِهِمْ وَيَأْبَى اللّهُ إِلاَّ أَن يُتِمَّ نُورَهُ وَلَوْ كَرِهَ الْكَافِرُونَ * هُوَ الَّذِي أَرْسَلَ رَسُولَهُ بِالْهُدَى وَدِينِ الْحَقِّ لِيُظْهِرَهُ عَلَى الدِّينِ كُلِّهِ وَلَوْ كَرِهَ الْمُشْرِكُونَ ﴾(التوبة: 32-

صدق الله العظيم[خالص تحياتي لاخي عصفور المدينة]


كل ما ارجوه من الاخوة المدونين مرتادي هذه المدونات توخي بعض الحذر مما يكتب
هؤلاء


ولا يتسرعوا في اصدار احكامهم الا قبل التاكد االتام خاصة وهم معروف نهجهمم




ما جعلني اكتب هذه التدوينة ما رايته من تعليقات لاخوة احسبهم على خير تأثروا باخبارهم وصدقوها




وكثيرا ما نراهم يضعوا الاخبارالمكذوبة اغلبها وعندما ينشر الحقيقي منها لا يكذبوا ما نشروه


وحسبي الله ونعم الوكيل


ادعوا معي ان يفرج الله هم وكرب كل مكروب اللهم امين يارب العالمين


تحياتي

الأحد، أبريل 13، 2008

تاجات حكومية

السلام عليكم ورحمة الله
=====================


بداية احب اقول ان فيه تدوينة جديدة في القوارير شرفونا بالزيارة
وتدوينة جديدة في العلمانية ايضا
=================

بما ان الاحداث ساخنة اليومين دول في البلد فقررت اجاوب على التاجات الحكومية


اللي تم ارسالها لي عبر الاخوة الاعزاء اللي عملوها وجاوبوها


وامامكم تاجين بالتمام والكمال


التاج الاول تاج من استراحة الكاشفة لتشكيل حكومة عسقلانيا العظمى


والتاج التاني تاج مجلس الشعب من خالتشي فرنسا

بسم الله نبدا
====================







مين من المدونين يصلح لتولى منصب
رئيس الوزراء فى دولة عسقلانيا العظمى [عصفور المدينة]
وزير الثقافة [ صاحب مدونة فليعد للدين مجده]
وزير الإعلام [ احمد النجم القادم واحمد الجيزاوي]
وزير التعليم [ اناعاشقة النقاب نفسي [اصلي بحب المنظومة التعليمية اوي ونفسي اصلحها برؤيتي الخاصة]
وزير البحث العلمى (أيوة .. البحث العلمى ليه وزارة لوحده)[صاحب مدونة افاق علمية]
وزير الجامع الكبير (زى شيخ الأزهر فى الدولة الصديقة مصر يعنى)[ الضاكتور خالد]
وزير الصحة [دكتور بيطري مع د/اجدع بنوتة]ودة طبعا علشان دكتور بيطري ينورنا برضه على الاتجاه المستحدث في تغذيتنا الجديدة من اللحوم اياها
وزير العدل [عاشقة الفردوس طبعا]
وزير الداخلية [محب الدين ]
وزير الخارجية [خالتي فرنسا الحبيبة]
وزير الهجوم (زى الدفاع فى دول تانية يعنى)[ عمرو سلامة صاحب مدونة لسة عايش]
وزير المواصلات [ ابي بس مع عربيتها بطوط ]
وزير المالية [عبده الرايق معلش هيظبطها انا عارفة]
وزير الاتصالات [الراقص مع الذئاب]


وزير الزراعة[ المهندس مصري ربنا يفرحه]


=======================================================
============

دخلت مجلس الشعب من اوسع ابوابه ايه هو رمزك الانتخابى المفضل ؟؟؟؟


غصن الزيتون معلش اصلي بحب اي حاجة خضرا


كنت تفضل الدخول مستقل او تتبع حزب معين ؟؟؟؟


اذا دخلت اصلا يبقى لوحدي كدة بيتهيألي دة مستقل


اذا دخلت مستقل هل توافق على التوقيع للحزب الوطنى بعد نجاحك كمستقل ؟؟؟؟


لأ طبعا دة غش هفضل كدة لوحدي مع نفسي يعني


ايه اول حاجه هتعملها لنفسك ولاسرتك ؟؟؟؟؟


لنفسي ركعتين شكر وابتهالات ربنا يوفقني وارضيه في الشغلانة اللي ما يعلم بيها غيره دي واتوكل على الله واعمل اول استجواب


لاسرتي باعتباره انه حاجة كويسة وأمل ذلك يبقى هعملهم بسبوسة


ايه المشروع اللى ناوى تعمله لاهل دايرتك ؟؟؟؟دون ذكر اسم الدائرة ان اردت


بما ان اليوسي ماس اوجده عضو مجلس الشعب عندنا هنا بس بفلوس كتير انا بقى هخليه ببلاش ومتاح للاطفال كلهم


مش اللي قادر يدفع بس وانا في مدينة عمرانية جديدة


قعدت فى المجلس جنب نائب مميز . من هو النائب ؟؟؟


طبعا بتاع حديد عز دي عاوزة كلام دة مميز جدااا


قدمت سؤال للحكومه ايه هو السؤال ؟؟؟؟؟


وضعتم خططكم لاحتواء الشعب بعد الاضراب في محاولة لاعادة ثقته فيكم ولا ايه ؟؟؟


طلب احاطه موضوعه ايه ؟؟؟


عن حادث اطلاق الرصاص على البمبوطي اللي في السويس والشباب الليي بتنضرب من اسرائيل على الحدود والبنت اللي انضربت برصاص اسرائيل على الحدود


وبتقدمه لمين ؟؟؟؟


للحكومة ولمن يهمه الامر فيها


استجواب لاتنين من الوزراء مين ؟؟؟؟

ما ينفعش اكترطيب عموما مبدئيا

وزير الصحة ووزير التعليم

موضوعه ايه ؟؟؟؟


الناس هتفضل تموت على ابواب المستشفيات لحد امتى ؟ والعلاج على نفقة الدولة هيفضل يعالج السادة الممثلين والمطربين لحد امتى ؟؟ والدواء بتاع الغلابة هيفضل المادة الفعالة فيه صفر لحد امتى ؟؟ دة وزير الصحة


وزير التعليم بقى


التعليم هيرتفع كفاءته امتى ؟؟ والمناهج اللي قلتوا طورناها السنة دي على اي اساس اتطورت ومين اللي طوربالشكل المفزع دة دي بقت صعبة واكتر جهل؟؟


مادة التربية الدينية والقران والتاريخ الاسلامي وغزوات الرسول متجاهلة كدة ليه في المدارس؟؟


هل انت مع الخصخصه ؟؟؟؟؟؟


مع الخصخصة المدروسة اللي فلوسها ترجع للبلد وتكون هي القيمة الحقيقية للي اتخصخص وتصب في مصلحة البلد تاني


وطبعا فيه حاجات مش مع تخصيصها نهائي بضم النون زي البنوك


هل انت مع قطع العلاقه مع اسرائيل ؟؟؟؟؟


دة سؤال برضه اه طبعا قطع واستئصال كمان


هل تؤيد الحرب الحرب على العراق ؟؟؟؟؟؟؟؟


دة برضه سؤال طبعا لا ربنا يفك كربهم وكربنا


هل تؤيد مرور الامريكان فى القناه ؟؟؟؟؟؟


بعد اللي حصل وقبله طبعا لا حتى لو فيها حرب علينا اهو نموت في حرب واسمنا بنحارب بدل دمنا الرخيص اللي بيسيحوه بمرورهم فيها من غير ضبط ولا ربط


هل انت مشترك فى مؤامره كسر فرنسا هانم بالاشتراك مع ام دبوه ؟؟؟؟؟؟؟؟


اعمل مؤامرة على خالتشي فرنسا وزيرة خارجية عسقلانيا بحالها هو انا اقدر برضه


بس اموت واعرف مين ام دبوة دي


بتمرر التاج ده لمين ؟؟؟؟؟


امرره لكل اللي لسة لم يجيب عليه وكل زواري الكرام وكل اللي يحب يجاوب عليه



الأحد، أبريل 06، 2008

معايا هدية


السلام عليكم ورحمة الله وبركاته

اولا عاوزة اعرف من حضراتكم ايه اخر اخبار الاضراب؟؟

للاسف لم استطع المشاركة فيه الا من خلال اضرابي عن الشراء اليوم

زوجي تولى المامورية :d

امتنعت عن احضار ابني من المدرسة

برضه الزوج مشكورا قام بالعملية دي نظرا لسوء الجو واتلككت يعني:d

وطبعا زي ما وعدتكم وضعت ايشارب اسود على الكرسي لان البلكونة تراب جدا:d

انما االغريب اني مش لاقية اي حد اعرفه او حولي معتصم

واشتم رائحة تدبيسة

يعني اشعر ان اللي نادوا بالاعتصام تراجعوا او انهم تم اعتقالهم قبل ما يقوموا بيه

بس سمعت برضه ان الاعتصام كان يقوده حركات زي كفاية ودول ليس لهم شعبية

عموما من لديه اخبار يتفضل مشكورا ويعلمني

=======================================================


الهدية

سمعنا جميعا عن فيلم فتنة

ايوة فتنة الهولندي المسيء للقران الكريم والرسول

حسبنا الله ونعم الوكيل

حزنت كثيرا لعرضه ولكني فرحت في نفس ا

ازاي؟؟؟!!!

سمعاك

حزنت بالطبع لانه مستعرض ايات مبتورة من موضعها والحقيقة لم استطع اكمال الفيلم لاخره

انما اطل علي من يومين اخ اكرمه الله ووضع رابط لمدونته يعرض فيلم فتنة برضه بس له شكل اخر

ولا انكر اني في البداية حصل لي غيظ لاني اسأت الفهم ولكن قررت اني قبل ما اعلق عليه ارى ما وضعه لعله خير

وفعلا طلع فيلم فتنة الحقيقي مش التقليد الهولندي الذي تم عرضه مؤخرا والحمد لله تم رفعه

ادعوكم جميعا لمتابعته ومتابعة المدونة في المجمل



عندي هدية اخرى

قبل ان تضغط اصدق النية وتوكل


لا تنسوني من صالح دعائكم



الأربعاء، أبريل 02، 2008

شقاوة شعب


السلام عليكم ورحمة الله وبركاته


احبتي في الله

بداية وكالعادة احب اعلن عن تدوينة جديدة في قسم الشيوعية وحقائق لاول مرة كنت اعرفها وتدوينة اخرى في قسم الشيعة عن كعبة في كربلاء يحج اليها مسلمين عاوزين تشوفوها ادخلوا على الهدى ائتنا بالضغط على البانر الخاص بها اعلاه


البداية


كلنا سمعنا عن اعتصام يوم 6 من ابريل وكلنا عرفنا من النت ايه الطلبات بتاعت الاعتصام برضه

الحقيقة انا بستغرب جدا جدا

هو الاعتصام دة لييييييييييييه؟؟؟؟؟؟؟!!!!!!!!!

وعلشان ايييييييييييييييييييه؟؟؟؟؟!!!!!!!!!!

دة احنا ناس ناسية الخير صحيح

انتوا يا جماعة مش شايفين البدائل الكتييييييييير والاختراعات اللي اتوفرت للسلع واصبحنا بنستغنى بيها عن السلع الغالية
ايه مش عارفينها ولا زي القطط بتاكلوا وتنكروا؟؟؟؟!!!!

افكركوا انا
انتوا نسيتوا بديل الزيت اللي بقى مغلي الحلبة

اهو دة اختراع جامد في البحيرة على ما اظن عملوا زيت جديد

ايوة اختراع وبديل رخيص الثمن يا ظلمة

يجيبوا الحلبة ويغلوها ويبردوها ويعبئوها في زجاجات زيت وتباع ارخص من الزيت المعروف

طيب يا ظالمة

نسيتوا الاختراع المبهر لبديل اللبن

قولوا اه نسينا

لا ازاي دة عمل ضجة اعلامية جاااامدة وطلع سيادة المسئووووووول عمل تجربة عملية ان الكلام دة باطل

لكن بما ان الاختراع دة دخل بيتي اكتر من مرة وكان مصيره حوض المطبخ فبسجل اعجابي بالمخترع اللي لم يقصر بالمرة ولم يحرمنا من نسبة البروتين اللي اتوجدت في الغراء واللون الابيض اللي موجود في الجير

طيب انكروا بقى الاختراع المبهر والبديل الفظيع للدقيق اللي اتعبأ واتبرشم في اجولة دقيق مدعم وتم بيعه وطبعا هو سيبيداك او جير ابيض وبالهنا والشفا يا مصريين

طيب دة فيه واحد في احد المحافظات طور الاختراع دة وعبأ العجين وكانوا بيتم بيعه معبأ برده كتر الف خيره

وفر علينا العجن واللت بس احنا نخبز

طيب قولوا بقى نسيتوا اللحمة بقى

انتوا كدة تاكلوا الكلاب والحمير الميتة اعزكم الله وتنكروا بقى

ازاي سامعة حد بيقول

يعني ماحدش سمع عن الصحفية اللي اتنكرت وراحت صورت بكاميرا الموبايل عملية سلخ لكلب ودبح لحمار ولمؤاخذة يعني وحضرت بيع الاشياء دي وتوزيعها على محلات الكباب والكفتة اللي في شارع سكة الوايلي

وكمان محلات الجزارة الكبيرة

عارفين عندي في السوق بيجوا يدبحوا ادامنا الخرفان والماعز ويبيعوها رخيييييييصة اوي بس بعينك تشوف الدبيحة من دول خلاص واقفة بتموت اصلا

والناس بتشتري ايه حصلهم ؟؟

عايشين اهم زي الفل

عمرنا سمعنا عن ان حد مات لما اكل لحم حمير ولا كلاب

عارفين في برنامج العاشرة مساء سألوا طبيب بيطري عن امكانية كشف اللحم دة عارفين رد وقال ايه؟؟؟

ان من الصعب كشفها وهي مفرومة وطبعا بيحطوا توابل كتيييييييير عليها وتتباع لمحلات الكباب بخمسة جنيه الكيلو

طيب عندي برضه السوق بتاع الجمعة اللي فاتت واحد معلق دبيحة بيقول انه عجل صغير وعمال ينادي ب24 جنيه الكيلو لحم بتلو صغير والناس بتشتري

انتوا عارفين دلوقتي كيلو اللحم ب40 جنيه اقله يبقى ابو 24 جنيه دة ايه اكيد حمار ولا حصان متعلق وكاتب عليه عجل

همممممممممممممممممم اقول تاني ولا كفاية اختراعات كدة

تقوموا تنكروا كل الخير والاختراعات اللي الدولة سيباكوا تخترعوها وتبيعوها لبعضكوا ولنا ومش ملاحقة على ضبطها هتضبط مين ولا مين بس

تسيبوا كل دة ورايحين تتشاقوا من الشقاوة يعني وتعملوا اعتصام

يا فرحتي يا فرحتي

يقولك ايه اوعى تروح شغلك واوعى تروح مدرستك

واوعوا تشتروا حاجة من اي تاجر اليوم دة واوعوا واوعوا وعلقوا راية سودا

ماشي ماشي بس انتوا طيب فكرتوا كويس في الموضوع دة ونظمتوه ؟؟؟

انا مع اي خطوة ايجابية بقلبي وكليتي وفشتي لان جيب زوجي عنده التهاب خبيث مستعصي

ارى ان الموضوع غير منظم بالمرة ويحتاج لاعادة تنظيم وترتيب ورقة بطلبات محددة

انما تطالب بان مفيش محسوبية ومفيش رشاوي تتنفذ ازاي دي

تطالب ان موظف مش يروح شغله يوم ويتخصم عليه اخرالشهر او يغطوا الموظفين على بعضهم وواحد يمضي للتاني

الخلاصة انتوا وانا عاوزين رد فعل ورد فعل قوي وكلمة نقول بيها لا احنا شعب واعي ومش هيضحك علينا

ونعمل اعتصامات بس بطريقة صح

وانا من هنا باعلن عن امكانية قيادتي لربات البيوت في اعتصام واطالب فيه بخفض كافة الاسعار فجأة كما ارتفعت فجأة

لاني اتفرست الحقيقة نزلت السوق الجمعة اللي فاتت رجعت ضغطي عالي ومشيت اكلم نفسي فيه

خلاص كفاية كدة هتدرسوا الموضوع وترتبوه وبعدين ابقوا اعتصموا

انما اللي هيتعمل دة اسمه شقاوة شعب

تحياتي