الأربعاء، ديسمبر 15، 2010

وبعدين بقى هو مفيش غيري ولا ايه ؟؟؟؟؟؟؟؟؟؟؟؟؟؟؟؟؟؟؟؟

تحديث
النهاردة زوجي اتصل بي وقالي المدرسة قررت اليوم الخروج الساعة 2ظهرا ولسة الادارة مكلماني دلوقتي يلا روحي هات العيال وكنت هناك فورا وامبارح واليوم لما بوصل المدرسة الراجل البواب دة بيجري ينادي على يوسف ومريم ويقولهم يلا ماما جت بحنان كدة مش معهود وهات شنطتك يلا وانا ولا كاني شيفاه اصلا
وكنت قلت لزوجي يكلم الادارة يسال المسئولة عن الاجراء اللي تم أخذه فضلت تعتذر وتقول معلش يعني معلش بقى المهم سيبنا التليفون وتاكيد من زوجي ان الوضع دة لو اتكرر هنقل الاولاد من المدرسة
بيتهيالي خافوا على العدة هههههه
قصدي خافوا انقل العيال من المدرسة خصوصا ان السنة الجاية هيبقوا تلاتة واللي وراها اربعة قوة برضه
ولا لما عملنا زوبعة قلقوا
انا خلاص عرفت ان الوضع في اي حتة يا رشوة يا دربكة بس الاولى ذنب ممكن زي ما قلتوا لي الجأ له لما خلاص ما عدتش ينفع غير كدة انما فيه بدائل اهو بتجيب حل
اخي الله يرحمه كان دوما يقولي انت قلبك طيب ودة ما ينفعش غريبة دة هو كان اطيب واطيب لدرجة المثالية فاسترده ربنا عن عمر32سنة
الله يرحمه ويبدو فعلا ان ممكن افلسع بدري بدري لو فضلت على كدة زي استاذ علي يونس ما قالي ووقتها هيشتري البواب ويبيع في العيال يارب سلم
ممكن حد يتطوع ويديني دورة تدريبية في الشراسة والتطنيش وانعدام الضمير وموت القلب والجليطة والموبقات دياعوذو بالله؟؟
الطبع يغلب التطبع
وانا هرجع دوما واقول زي خالد زوجي ما بيقول
الله خير حافظا وهو ارحم الراحمين
النتيجة اليوم كويسة مش كدة برضه تدي امل ان الصح والخير لازم ينتصر ههههههههههههههههههه اخر الفيلم؟؟
قررت بقى اني أجند البواب الأخر وياخد باله من العيال اذا احتاجوا حاجة
اما عن الدادة يا دكتور ابراهيم للاسف الشديد مش هقدر اكون مطمنة عليهم مع اي حد بعد تجارب مؤلمة مع سواقين التاكسي وباصات المدرسة والدادات سواء شخصية او مع اخرين
فكان اسلم حل ولو انه مكلف ان ابوهم يوديهم وانا اجيب تاكسي من البيت واروح اخدهم وارجع بيهم للبيت بس بشتري راسي وواولادي
متعبة انا عارفة بس سنتين على الحال دة لحين اتمام تعلم القيادة وبعدها وانا رايحة المدرسة بالعربية هدوس على البواب
ههههههه
ربنا يبارك فيكم
بواب مدرسة العيال كنت زمان كل فترة بديله حاجة لله خدوا بالكم معايا لله تحتها مليون خط

كان بيصعب علي وقفته على الباب وعارفة المرتب قليل رغم انها مدرسة خاصة وبسذاجتي المعروفة وطيبة قلبي فاكراه غلبان

المهم قعدت فترة ما اروحش بالعيال المدرسة ونسيت اوصي باباهم يعمل الواجب دة معاه المهم لاحظ بابا ان الراجل معاملته متغيرة وجافة فساله مالك طيب فيه ايه مغيرك

البواب لمح له على المعلوم

وجالي بابا يقولي فاعترضت وانتفضت وقلت لا انا باعملها لله مش علشان يفرضها علي ويبتزني بيها لو اتاخرت يقصر في واجبات عمله لا مش هديله تاني هديها للي يستاهلها من المدرسة برضه

عرفت بقى انه بيشتغل تسالي كدة وبيؤجر شقق للناس وله دخل اضافي كمان يعني مش محتاج والتصدق عليه ماينفعش ونازل ابتزاز في الناس برضه بطريقة ياخد فلوس يخلي باله من العيال والمعاملة خاصة وعادي جدا الناس بتدفع

لمحت للمدرسة ومديرها وشكيت للحجر يا عالم الراجل دة مش مظبوط ولا حياة لمن تنادي

المهم كام مرة المدرسة فجاءة تقرر العيال يطلعوا بدري ساعة ونصف تقريبا ومحدش يبلغني اروح الاقي البواب قاعد بيهم على الباب

واساله يقولي طالعين بدري طب رن علي ياعم علاء مش هفتح عليك او كلم الادارة يحلف انه ممعهوش رصيد

اقوله جرب ترن علي كدة ولو عملتها هجيبلك كارت

انا عاوزة اوصله انك لو هتستجدع وتبقى راجل تشتغل شغل بمايرضي الله هتلاقي مكافاة حلال عليها انما ارغام على اني ادفع له مرتب تاني مش من حقه وهو بيقبض مرتب اصلا على شغلته دي علشان يخص اولادي برعاية اضافية لا ارفضها دة اسمه رشوة

المهم برضه حاولت الفت نظره لشغل يخلي مستواه يتحسن وقلت في نفسي انتظر بس فعل يرضي ربنا منه في معاملة للعيال تخليني ابقى راضية واساعده دخله يتحسن بطريقة كويسة وما تخلنيش احس اني بديله رشوة

انما مينالظاهر بقينا بنستسهل

كان ياحضرات يوم الاحد الماضي يوم العاصفة الترابية والصقيع الذي لايوصف ولان الاولاد كان عندهم امتحان اضطريت اوديهم المدرسة وسالنا المدرسة المواعيد ايه قالوا زي ماهي

وجرجرت نفسي الساعة 3الاتلت روحت لقيت ولادي واقفين مردومين وبيترعشوا زي الارانب بقالهم ساعتين ؟؟؟؟

سألت هما خرجوا بدري قالي اه الساعة واحدة طار عقلي ياحضرات وانا بقوله حرام عليك حسبي الله ونعم الوكيل ما انت معاك تليفوناتي

يحلف ممعهوش رصيد وكأنه بيكلم سيدة من كوكب اخر ما تعرفش كلمني شكرا ولا تعرف ان فيه ادارة مدرسة فيها تليفوناتنا ممكن يبلغهم

حد يقولي طب العيال تدخل تقول بنفسها !!!

اقوله بمنتهى البساطة انا ما قلتش لهم على الاجراء دة قبل كدة متعودين يستنوا ماما بتيجي بالتاكسي تاخدهم للبيت

اصلهم زي الملايكة مطرح ما تحطهم وتقولهم يعملوا ولو حد قالهم هاتوا تليفون ماما وبابا نكلمهم كانوا جابوه

المهم اقوله حسبي الله ونعم الوكيل يقولي انا ظالم ايوة

اقوله يعني لو فيه مصلحة وفلوس هتيجي مش هتتصل يقولي لا رغم انه من كام يوم كان فيه شغلانة كويسة هيجيله فلوس كتيرة من وراها ولقيته اعطى للناس اصحابها تليفوناتي علشان اساعدهم الشغلانة تخلص واذا خلصت هيجيله فلوس كتير شفتم الضمير

لما طار عقلي وصعب علي عيالي روحت قلت لابوهم واتصل بادارة المدرسة وانا كمان كلمتهم ولا حياة لمن تنادي

يعيدوا ويزيدوا ان العيال كانت جت قالت

طب ياعالم هو احنا مش تليفوناتنا عندكم ؟؟؟؟

طيب لما المدرسة فضيت على الخمس ست اولاد منهم اتنين عيالي مش تسالوهم طيب انا كاتبة تليفوناتي في بطاقة المتابعة المدرسية ؟؟

المهم وكان لم يحدث شيء

منظر العيال قاتلني لما شفتهم كدة وبجد كان ممكن اقتل البواب لكن سارعت بالتحرك من امامه قبل الجريمة مرددة حسبي الله ونعم الوكيل وهو يقولي انا ظالم

الحل ايه يا جماعة؟؟؟؟

ارجع اديله فلوس تاني رشوة علشان ياخد باله من العيال رغم اني الحمد لله اقوم بالتصدق على ناس تستاهل بالمدرسة ومش منتظرة لا اهتمام بالعيال ولا غيره لرفضي الاسلوب دة

انما اقدم خدمات ادارية للمدرسة كعمل سي ديهات للمواد الدراسية وعمل منتدى للمدرسة وانشطة ما باخدش عليها اجر لكن عاوزة نهضة لمدرسة اولادي واهتمام بيهم ومش نافع او اني ببساطة انقلهم لمدرسة تانية بسبب البواب ويمكن اروح الاقي بواب واتنين افظع دلوني

العمل ايه

هيفضل الفساد ورايا ورايا وبرضه احاول اقف له والاخر يطلع مفيش فايدة ولا ايه ؟؟؟؟ّ!!!!

وبعدين بقى هو مفيش غيري ولا ايه؟؟؟؟؟؟؟!!!!!!!!!!!!!!

الجمعة، ديسمبر 03، 2010

وداعا


جلست أتفحص الجدران وأتاملها جيدا.تجولت عيناي هنا وهناك أحاول أن أسجل بذاكرتي كل شيء كل تفصيل ولا أنساها

حتى استطيع استدعاء مكان الذكرى دون تعب ، زينت هذا الجدار بالورود والاخر بالستارة وهناك وضعت حجرة نومي الزرقاء ورتبتها بعناية وهنا كنت اجلس حينما يحين وقت التأمل وهناك اخترت المفرش الفضي لوضعه هكذا وهنا وضعت سرير لاستقبال ولدي الاول

يا الهي هنا حييت اجمل ايام عمري واصعب ايام حياتي وهنا شهدت الجدران على دموعي على فراق اخي الحبيب ليتني أستطيع نزع الجدار

جلست هنا استقبل الام المخاض وهناك كاد جنيني يسقط مني هنا كنت ابكي من الفرح وهناك بكيت من الالم

هنا استقبلني جيراني بفستاني الابيض مهنئين وداعين بالحياة السعيدة وهنا استقبلوني لتهنئتي بمولودي وهنا اخذوا بيدي حتى عرجت السلالم لشقتي

والان اتفحصها لاودعها واودع معها ذكريات اجمل ايام العمر

اشعر بالجدران تان معي واشعر بكل جزء فيها يبكيني

وداعا

وداعا ياجيراني

وداعا يا ذكرياتي

وداعا شبرا

شهدت الايام السابقة احداث كثيرة قلبت حياتي رأسا على عقب البطل الأساسي فيها هو الفساد الذي ينخر في العظام واصبحنا نتنفسه

الموضوع برمته اكبر مما نتصور خطة محكمة وتورتة كبيرة بيقسموها على بعض وصاحب البيت اللي كان بيتنا ماهو الاعضو صغيرجدا في المافيا اللي بتشتغل في الموضوع دة ووراه ناس كبيرة وتقيلة هي اللي بتخلص الورق واللي زي صاحب بيتنا ماهو الا واجهة بس او اداة او اسم يتخفى وراه ناس تانية هنروح فين احنا الغلابة فيهم الناس واحنا ماشيين بيقولولنا الحمد لله انكم نفدتم بجلدكم لانهم كانوا هيوقعوا عليكم البيت

يارب يارب يارب احمدك على كل شيء

يارب انا مش ندمانة اني حاولت اقف ضد الظلم وحاولت اخد بحقي

يارب انا فرحانة اوي ان كل جيراني الحمد لله بيحبوني وجيراني كلهم مسيحيين وكلنا كنا بنعيطعلي الجيرة اللي كانت بينا وبيوصوني وبيشددوا علي ازورهم اول باول ودة في عز اللي بيقولوا عليها فتنة طائفية

انا مبسوطة ان ربنا قدرني ووقفت ادام التحريض على الغدر وخيانة جيراني رغم ان صاحب البيت قال لنا هديكم اللي تطلبوه بشرط تخرجوا ومالكوش دعوة بحد ولكني رفضت وقلت له لا كلنا زي بعض ومش هديك فرصة تلوي دراعهم وتستعملنا في كدة حتى لو هخسر كل حاجة واكسب المحافظة على علاقتي بيهم

جيراني عرفوا بالكلام دةووقفنا مع بعض اكتررغم اني المسلمة الوحيدة في البيت وتقريبا الشارع كله كمان الا اني عمري ما حسيت باي ضغينة من حد فيهم

ومنهم نفسهم قالوا ان صاحب البيت اللي من ديانة واحدة شوف عمل ايه معاهم واحنا عملنا ايه


ووقتها حسيت ان دة بالنسبة لي لا يقدر بمال

انا راضية عن نفسي

وراضية عن اي حاجة ربنا ادهالي وباذن الله ربنا هيعوضني خير

يارب ياعالم بحالي تراضيني دوما

وحسبنا الله ونعم الوكيل

الخميس، نوفمبر 11، 2010

كل عام وانتم بخير

الأربعاء، نوفمبر 03، 2010

هل الاضراب هو الحل؟؟؟؟!!!!!!!!!!!!!!!!!!


في تطور غير مسبوق لموضوع بيتنا اللي جاله قرار ازالة ظالم وفي ظل تواطئ واضح من حي روض الفرج ضد سكان العقار رقم 12 ش محمد خليل من ش البعثة روض الفرج وفي ظل عدم وجود اي ضمير حي يرحم دموعي او يرحم اولادي ويرحم دموع واولاد اربع اسر كاملة بينهم رضع واللي بيرحم العباد ربنا تم قطع الكهرباء بالكامل عن بيتنا عن طريق شيل الكابل بالكامل اليوم صباحا اللي بيغذي 3 بيوت وقبلها وفي نصف رمضان تم قطع مية الشرب برضه ولولا وجود وصلة خاصة بعيدة عن العمومية قمنا بتوصيلها ما كان عندنا مية وطبعا الصرف الصحي اتردم والصرف بيتم في الشارع
ورغم قواضي مرفوعة من قبلنا ورغم محاضر اتعملت ورغم استغاثات اتكتبت لكل حتة ورغم مكالمات ورسايل محمول اليوم اتعملت لوسائل الاعلام علشان يلحقوني انا وعيالي والجيران من الظلام وابني سخن مولع وعاوز كمادات واضطريت اشتري تلج علشان الحرارة تنزل لاني طبعا ما عنديش كهربا ومحدش عبرني ولا حتى رد على تليفوناتي
ولان رئيس الحي اليوم قالنا بعلو صوته ما اقدرش اعمل لكم حاجة ولان الظاهر لنا ان محدش هيسال الا لو حصلت مصيبة كبيرة
ولاني لسة عندي بصيص امل ان يحصل تطور سريع يحل مشكلتي ما اعرفش ليه مع ان الواقع مش كدة خالص
وبكرة صباحا فيه مقابلة مع نائب المحافظ واحتمال المحافظ هنروح نعيط ونتحايل عليهم يوصلوا لنا الكهربا وفي حالة ماحدش سمع ياترى لو اضربت عن الاكل والشرب لحين حل المشكلة هل ممكن حد يعبرني ويساعدني ؟!!!!!!ولا ايه رايكم
اللي يحب يقدم مساعدة من اي نوع يحل المصيبة اللي انا فيها يتواصل من خلال تليفون خالد فتحي عن سكان المنزل المشئوم
0101754294
وذنبي في رقبتك ياحكومة وذنب عيالي اللي بايتين في الضلمة وخايفين
في رقبة اي حد ساعد الظالم على ظلمه وفي رقبة اي حد يقدر يوصل شكوتي للاعلام ومكسل
بكتب وفاضل شرطة واحدة واللاب توب يفصل شحن يا عالم
وحسبي الله ونعم الوكيل

الخميس، أكتوبر 21، 2010

حالة



السلام عليكم ورحمة الله
مهم جدا الرابط دة تتطلعوا عليه ونشارك مع بعض كالعادة في محاولة لتفريج كربة اخ لنا ولو بنشره على نطاق واسع وجزاكم الله خيرا

فاكرة لما اول مرة شفت مدونة واتمنيت يكون عندي انا كمان مدونة اكتب فيها براحتي واتبادل من خلالها خبرات وافكار ومعلومات وكمان اتواصل مع الناس واتكلم معاهم وانصحهم وينصحوني بدون اي مصالح كدة لله في لله

على طول كان زوجي انشأئها وقالي تعالي شوفي كدة وفتحها لي وكمان كتب لي اول تدوينة وكمان اختار لي اسمها لانه عارف اد ايه بحب النقاب وفرحت اوي بالمدونة واعتبرتها حتة مني مش ممكن ابعد عنه

وفعلا لحد دلوقتي أغيب على اد ما اغيب واحن لها واجري عليها وافتح تدوينة وكتير اوي اقفلها واوقات اكتب وافضفض فيها

هكون صريحة اكتر معاكم

انا باعتبراهل التدوين اهلي واخواتي بيسالوا علي ولما بقول عيانة ولا عندي اي ظروف على طول بيدعولي وبيساعدوني كل حد باللي يقدر عليه بدون اي مصلحة وبدون معرفة حبيت العالم دة جدا

عالم مختلف عن العالم الواقعي العالم الواقعي بقى مزيف الاخوات ما بتسالش عن بعضها كنت فاكرة انا بس لقيتني انا احسن من غيري

كان عندي ثلاث اخوة واختين توفى اخي الاكبرمني مباشرة من 8سنين تقريبا وكان مش محسسني اني عاوزة يكون لي حد غيره

واصل للرحم وكان بمثابة الاب واكتر لنا كلنا الله يرحمه لدرجة ان باقي الاخوة رموا كل المسئولية عليه واتعودوا انه هو بيعوض كل حاجة وكانت المفاجأة انه توفى بدون اي سابق انذار وكانت الطامة الكبرى بالنسبة لي انه ترك فراغ شديد وبقى واضح وجلي لان ما بقاش اخويا يزورني بانتظام ومبقاش يسال علي زي الاول ولا الاقي حنانه الاخوي ولا الاقيه في ازماتي

طبعا الاخين التانيين ولا على بالهم مكبرين دماغهم ودة اللي خلانا كبنات نعاني جدا واهتزينا نفسيا وبنحاول نقرب من بعض اكتر واكتر في محاولة لتعويض الفقد دة لحد ما تعودنا خلاص

الحمد لله مرتبطين ببعض جداوبنحاول نعوض بعض
بحمد الله قدرت اتخطى الكبوة دي بفضل الله تعالى وارادته وقتها حملت في مريم بنتي وانشغلت اوي بيها وزوجي ساندني واتحملني كتير وقتها وقررت اكون اسرة كبيرة وبقى يحصل لي الحمل ورا بعض ومن جوايا كنت ببقى مبسوطة اوي واقول لنفسي هعمل عائلة بتاعتي اخليها مرتبطة وتحب بعضها

يمكن ضغوط الحياة تخليهم ينشغلوا عن بعض ايوة انما دوما ما ينسوش بعض ويحبوا بعض ويحنو علي وعلى ابوهم بحاول انا ووالدهم اربيهم على كدة وربنا معايا

بلاقي بقى مشكلة بحكم اني الاخت الكبرى مطلوب مني اللي انا محتاجاه بحاول اعطيه لكن انا محتاجاه حاولت انا وزوجي نكون صداقات كتيرة ونتبادل زيارات اسرية لكن لقينا الواقع بيفرض نفسه المصلحة والغيرة والحسد والنميمة ومشاكل خايبة من نوعية بتتصلي وما بتتصليش وتعالي انتي اشمعنى انا وحاجات تضيع الوقت ونميمة الحريم استغفر الله العظيم وشغل العيال بقى فكان البعد احسن

طيب ايه الحل يا ناس ؟؟

بالنسبة لي كان المدونة واهلي من العالم دة وقبلهم بيتي وازوجي واولادي دول هما كل حياتي وكل شغلي الشاغل وشوية بقى جنبهم شغلي والحمد لله تعالى نجحت فيه جدا بفضل الله برضه ووقفة زوجي جنبي لاني صممت انجح لكن ما كانش ينفع انجح بدون وقفته ومساندته لي وماكانش اناني


في يوم الاولاد راحوا مكتبة جنب البيت علشان يشتروا طلبات اشتروا بدالها لعب وقتها ما كانتش اسراء معاهم لكن اشتروا من كل لعبة اربعة لكل واحد لعبة ورغم اني وقتها عاقبتهم انهم اشتروا غير اللي طلبته منهم الا ان نصف الكوب المليان انهم اشتروا لبعضهم وعملوا حساب اختهم اللي مش معاهم

ودة اد ايه بسطني انهم لما هيفرحوا هيفرحوا مع بعض ووقتها قلت يارب ولا زلت بقول يارب يفضلوا يحبوا بعض على طول لا زوجة اخ تفرقهم ولا زوج اخت يفرقهم يارب يحبوا بعض على طول

ما اعرفش التدوينة سببها ايه وحاسة انها متلخبطة ومش مرتبطة يمكن

بس حالة حساها وعاوزة اكتبها حبيت احكيها مع اهلي في العالم الافتراضي

احبكم في الله

الجمعة، أكتوبر 01، 2010

دعواتكم بالشفاء


الحمد لله تعالى على كل حاجة واي حاجة يارب

مريضة لا ابارح السرير بقالي حوالي 6ايام الا للذهاب للدكتورالباطنة او الحنجرة واخيراالتحاليل او اخذ حقنة والحمد لله تعالى على كل حال

اقوم بعمل تحليل معين بعد ما غلبوا الدكاترة لاني اخدت ادوية كتير

طلبي منكم تدعولي ربنا يجيبها سليمة باذن الله تعالى والتحليل هتطلع نتيجته الاتنين وهطمنكم زي ما بقلقكم

معلش سامحوني ما انتم اخواتي بجد وانتم اللي بتسالوا علي وعودتوني على كرم اخلاقكم
يارب اشفى مرضانا وارحم موتانا واهدنا وارحمنا يارب العالمين


الجمعة، سبتمبر 24، 2010

لسة شوية صغننة


ازيكم كلكم وحشتوني

كل عام وانتم بخير بمناسبة كل حاجة وكل مناسبة

الاحداث كانت كتيرة جدا جدا جدا سواء من الناحية الشخصية او كل حاجة حوالينا لدرجة مش عارفة اكتب في ايه ولا ايه

بالنسبة للناحية الشخصية وموضوع شبرا فلم يعد هناك اي امل في اي حاجة انا في انتظار رحمة ربنا سبحانه وتعالى ببساطة لاني الشق الضعيف والضعيف جدا ولاني بمنتهى البساطة واجعني الحلال فاشرب بقى واخليني مع الحلال يمكن ينفعني ببساطة اكترالدنيا بايظة وابتدينا ننهار اهو لان الراجل ايده طايلة وبتوع الحي والمجلس المنحلي بنفسهم وبذاتهم قاعدين هما اللي بيساومونا دة انا كمان اتعرفت على محامي عنده بيت وعاوز يطلع له ترخيص علشان يبني هناك في شبرا بتوع الحي قالوله هنطلعهولك بس بالنص قلت له يعني ايه ياعم دة قالي يعني الترخيص ب3ادوار في شقتين يعني ست شقق هما ياتلاتة وانا تلاتة يانهار مالوش شمس يعني ايه دة قالي يعني ببساطة الشقة ب300الف هما 900وانا900وبالشفاعلى طول عرفت موقعي وعلى طول باءت كل محاولاتي في اني اخد حقي بالفشل وطبعا مش هنقدر نعيش في المجاري ماهو المجاري اتردمت والحمدلله بنصرف في الشارع وكل يوم والتاني عند دكتور ومهددين فعلا بالمرض والاوبئة

وحسبي الله ونعم الوكيل في الظلمة وحسبي الله ونعم الوكيل فيكم يا موظفين حي روض الفرج واحد واحدوواحدة واحدة وحسبي الله ونعم الوكيل وحسبي الله ونعم الوكيل فيكم يابتوع العاشرة مساءا عشموني بالحلق ووعدوني ميت مرة هيجم يصوروا مشكلتي انا والجيران ولا حد فيهم سأل وذلوني من كتر الاتصال والمحايلة يجوا يصوروا هتفرق كتيرلو المشكلة ظهرت على التليفزيون دة الراجل دة لمجرد مقال نوارة على الدستور كان بيشتكي للناس ويقول فضحوني في الجرنان فمابالكم تليفزيون

يمكن حد يحن علي وينشرحالتي قبل الانهيارالتام اللي قربت منه بالقوي


انما خلاص انا في انتظار رحمة ربنا اللي مافي بعدها اي حاجة تانية

بالمناسبة بقى رحمة ربنا سبحانه وتعالى وعنايته انقذتني في الاسبوع الاخير من رمضان عارفين ازاي ؟؟

كنت بشتري سحور وحلويات وراجعة البيت وزوجي دخل قبلي بشوية على ما اجي خطوتي على ادي يعني كان في الاثناء دي جالي حرامي يخطف شنطة ايدي وطبعا صرخت والواد يشد في الشنطة مش عارف بس دلق اللبن وبوظ الزيتون وطبعا انا منتقبة ما عرفش يلاقي بقي فين علشان يكتم نفسي والطبيعي انه طلع يجري خصوصا ان الدنيا اتلمت واولهم زوجي وحاولوا يمسكوه كان جري

الطريف في الموضوع اني حصل لي حالة انهيار وزوجي راح يعمل محضر قالوله هي تيجي قالهم حاضر بس اثبتوا الحالة وهروح اجيبها وياريت يبقى فيه تواجد امني لان الصبح كان فيه حرامي في البيت اللي جنبنا ومن يومين برضه الظابط ساب اللي في ايده وقاله انت شايف مفيش تواجد امني يعني زوجي بيقولي قلت خلاص هيلبسني قضية

المهم بقى ياحضرات بعدها بيومين شفت الحرامي تاني هههههههههههههههه اه والله شفته هو والعصابة مع بعض الساعة 6الصبح واول عيني ماجت في عينه عرفته وشاورت لزوجي عليه الواد ركب العربية اللي معاه وطلعوا يجروا لكن حفظت رقم العربية وطلعنا جري على القسم وسيادة البيه الامين كان بيقول استنوا للساعة عشرة يكون مااعرفش فلان بيه جه مش هيسيبه قلت له لكن انا عندي عيال ومش معقول هفضل في القسم قاعدة بيهم 4ساعات والدنيا رمضان قال خلاص هعمل لكم محضر واستنوا اشوف هديكم رقمه ولا ايه

وبعد ما عمله طلب مني اخرج برة وقال لزوجي تليفوني اهو ابعتلي كارت شاحن وهبعتلك رقم المحضر وانا تحت امرك في اي حاجة

ههههههههههههههههههههههههه

الامين عاوز رشوة
حد عنده علاج لحالة فساد مستعصية

شفتم بقى انا مستنية رحمة ربنا احسن من كل حاجة وعجبي

الأربعاء، أغسطس 18، 2010

دعواتكم دوما محتاجاها ونصايحكم يا محامين التدوين المجدع وخيرنعمله سوا


معلش استحملوني بجد اصلي ممكن اروح فيها لو ما اتكلمتش او قلت آه من شدة الألم

والموضوع فعلا بقى ياخد من صحتي رغم ان خالد زوجي بيقولي انتي قوية حد غيرك في الوضع دة كان هيبقى تصرفه حاجة تانية وكلمة في سركم انا اضعف مما اي حد يتخيل وواخد في مقلب بس لازم اكون قوية علشان اقويه هو وحط ايدي في ايده وافكر معاه ونربي ولادنا هيروحوا فين من غيرنا

الحمد لله على كل حال

انا روحت الحي علشان اجيب معلومات للمحامي وكانت معايا زميلة بتشتغل هناك علشان تسهل علي الموضوع لكن طبعا اخفوا علي اي حاجة وكنت بشد المعلومات شد وحسيت من الموظفين الشماتة وكان فاضل يطلعولي لسانهم اد ايه الظلم وحش ومفيش رحمة كنت عاوزة اصرخ فيهم واقولهم ازاي عيالكم بتاكلوها وتربوها حرام؟؟؟!!!طعمه ايه دة ؟!!! اعوذو بالله العلي العظيم

تعرفوا ان حتى القسم بيساعد الراجل دة

بس هقولكم حاجة انا حساها ما اعرفش هتقولوا علي اتجننت بس دي الحقيقة لما روحت الحي حسيت ان ربنا معايا وبيوجهني ولما اروح حتة الاقي حاجة بتدفعني لحتة تانية

حتى اني دخلت مكان ما ينفعش حد يدخله الا الموظفين وصديقتي بتكلم صديقتها وانا عندي هواية النظر في الارض عيني وقتها وهي بتتجه للنظر في الارض تلاقت بورقة موجودة على المكتب فيها عنوان بيتنا فتعلقت بيها وقلت للموظفة دة بيتنا اللي هيتهد

قالت لي بيت كرم دة خلاص دفع بقولك دفع قلت لها ايه دة قالت طلب رخصة وشفته طالب قطع المية والكهربا واخلاءنا واصدار رخصة

وشفت رقم قرار الازالة كمان ارسلت استغاثات كتيرة اوي وكتبت في مواقع كتيرة وارسلت للجرايد

وروحت البيت في حالة يأس وشفت محامي تاني كمل على اللي فاضل مني

المهم بالليل راح زوجي مع الجيران لمكتب محامي ساكن معانا في الدور الرابع اللي فوقي وجاله في البداية ازالة وما اتحركش وادانا دفعة وامل زراح مع زوجي والجيران للحي تاني يوم وللحق الراجل فاهم وجاب كتب وبيقراها وشاف كم الفساد اللي في الحي متمثل في رخصة الهدم بتطلع ورئيس الحي وقع عليها ومفيش ورقة تثبت علم السكان اليقيني اول المحامي ما قالها لرئيس الحي اتفزع وزعق في الموظفين اللي بيستغفلوه واوقف اجراءات الرخصة

كمان الملف لا يوجد فيه ما يثبت ان كرم اشترى العقار بتاعنا او انه ملكه فبالتالي يجيب له قرار ازالة ليه

تعالوا بقى نحول المشهد عندي في البيت الناضورجية طبعا عرفوه ان الرجالة في الحي والستات في البيوت يقوم يبعت لنا واحد يفتح الكهربا ويقول هقطعها وتصوت جارتي والتانية تقوله فين الورق وانا هطلب لك النجدة لو قطعتها يخطف الورقة ويطلع يجري وبعدها بشوية يجيلنا واحد يفحت علشان يقطع بقى المية ونعيد الكرة بس المرة دي طلبت النجدة والنجدة جت

وانا بكلم النجدة كنت في حالة فزع ام ومعايا اربع اطفال الساعة १२ الظهر في رمضان وغرقانين في العرق الاقي حد عاوز يقطع المية فبتكلم بفزع الاقي بتاع النجدة بدل ما يهدئ من روعي يزعق في ويقولي خلاص خلاص عاوزة ايه يعني ؟؟؟؟!!!!!

قلت له المية ما تتقطعش يقولي هبعتلك عربية نجدة بعد ربع ساعة جت

وركزوا معايا علشان تعرفوا ان ربنا معايا وبيوجهني زي احساسي ما بيقول

واحد جالنا البيت وقال مين بلغ قلت له انا قالي تعالي هاتي بطاقتك وكلمي الباشا الظابط افتكرت ان بطاقتي مع زوجي علشان عملت بيها طلب في الحي اني عاوزة المستندات علشان ارفع قضية ولازم ببطاقتي زوجي يسحب الملف

المهم روحت للبيه الظابط رجلي انتنت وانا رايحة وكنت هقع وروحت وانا بتألم وبرضه ببص على رجلي وفي اثناء نزول عيني على الارض البيه الظابط ماسك ورقة فيها اسم زوجي الرباعي والعنوان وسال عليه قلت له انا مراته استرجعت المكالمة اللي طلبتهم بيها لقيتني لم اعطي اي حد اسمي او اسم زوجي اعطيتهم عنوان بس وطلعت اجيب صورة بطاقة نزلت لقيت البيه الظابط مشي ونبه وشدد ان سكان العقار بالكامل يجوا القسم يحرروا محضر كنت كلمت خالد علشان البطاقة وحكيت له وقلت له كلم المحامي قال لره انتبه دي مؤامرة من القسم لان المالك اشتراه هيلموا البطايق ويضغطوا عليكم تمضوا على انكم علمتم بقرار الازالة

وبعدها بشوية جالنا امناء شرطة خبطوا علينا برضه الستات اللي عارفين ومتاكدين اننا لوحدنا ومافتحناش لحد منهم

شفتم وصلنا لفين

مشكلة عاوزة اللي عنده نصيحة يقولهالي

البيتين مشتركين كمان في الصرف الصحي وطبعا وهو بيهد الاولاني ردم الصرف وعملنا محضر بكدة دلوقتي بيتنا بيصرف في المنور وتكونت بحيرة من الصرف الصحي ولكم تخيل المرض والتلوث في الحر دة

حاولنا نجيب سباكين يعملولها صرفة خايفين بيقولوا دي مخالفة

والحي اللي بلغناه طبعا مش هيساعدنا طب مخرجها ايه دي ؟؟؟؟

معلش عاوزة برضه نصيحة بخصوص لو القرار بتاع الازالة بقى نهائي هل ممكن تيجي قوة ترمينا في الشارع وتهد البيت؟؟؟

ولا ممكن يخلونا نقعد فيه على مسئوليتنا ؟؟

طيب الجزء اللي البيتين مشتركين فيه مش ممكن يهدمه وفعلا لو اتهدم الحمامات والمطابخ تقع وطول ما الجزء المشترك دة موجود البيت يعيش 100سنة تانية لان الجزء دة بمثابة دعامة والبيت مش محتاج غير شوية ترميمات بسيطة انما اثاثاته حجارة وكلنا موضبين كويس

وحتى اخر لجنة جت كشفت واصدرت القرار ما كشفتش على اساسه ولا حاجة ومفيش اي شرخ موجود خطير ولا حاجة

تعرفوا احنا مستعدين نسيبه ونمشي ويبني البرج ال12دور اللي الدور الواحد اربع شقق والشقة ب300الف يشبع بيه بس يعوضنا كويس وبالطريقة اللي ترضي ربنا مش ترضيه هو وبمزاجه هو الراجل عاوز يرمي ملاليم ويقولنا روحوا اي حتة مش ضروري شبرا

طب ما يروح هو اي حتة اشمعنى احنا نبتدي نعمر في حتة تانية

المحامي قالنا اننا بنحاول نضغط عليه ونلوي احنا دراعه بدل ما يقطم هو وسطنا ونحاول ناخد منه نصف حقوقنا

المحامي ارسل جواب للاموال العامة والضرائب يقولهم ان الراجل دة بيشتري البيوت القديمة ويهدها ويطلع بابراج او بيبيعها اراضي فاضية وعمله الاصلي جواهرجي في محل 30متر وسالهم سؤال هل بيقدم اقرار ضريبي عن النشاط دة والا فمن اين له كل ذلك ؟؟

الراجل عمال يتسلى على شارع شبرا وجاب 3ازالات ل३ بيوت في اسبوعين وماشي في بيتين ادامنا وبيتين في الخطة واصلا الشهر اللي فات مطلع ازالة لبيت غيرهم غير برجين كبار في شارعين مهمين في شبرا

اصحابه اوي بتوع حي روض الفرج

المهم المحامي قال دة ضغط مننا عليه ايه رايكم يا قانونيين ؟؟؟

وفيه حاجة تانية كمان سمعنا انه بيتاجر في الاثار وبيشتري البيوت القديمة في المحيط بتاعنا بس منطقة شبرا كانت منتجع للامراء الشوام والبيوت اللي فيها كان اغلبها قصور

وفعلا سمعنا انه فعلا لقى اثار في البيت اللي جنبنا المحامي برضه عمل جواب بكدة للاثار وقالنا برضه دة نغط عليه بيه او يعطل الهدم شوية لان الاثار بتشكل لجنة للتاكد من البلاغ وتحط ايدها على البيوت شوية

ياترى الحاجات دي هتنفع؟؟!!!

الحاجات دي كلها اتكتبت وعريضة الدعوى والطعن اتعمل واليوم وبعد ساعتين من دلوقتي هتتقدم

دعواتكم ونصايحكم ما تبخلوش بيها علي

مش عارفة انام ولا بناكل ولا بنشرب والحمد لله بنضحك ولسة فيه امل انا ظني وقتي بالله خيروكبيرة وعارفة اني مظلومة وربنا واقف جنبي ودوما بشجع نفسي بنفسي وبقول يانونو من امتى ما حصلش اي حاجة كنت بتتمنيها زي ما انتي عاوزة حتى الحدث اللي كنت بظنه شر وازعل بعد شوية افهم ان مفيش حاجة اسمها وحش ولا شر كل خير وكل صح بس بيتفهم في اوانه

ربنا بيعمل للانسان كل حاجة حلوة

الحمد لله على كل حال يارب الحمد لله حمدا كثيرا طيبا مباركا فيه

معلش استحملوني رمضان كريم عليكم

فيه رابط مهم اوي كله خير باذن الله ربنا يقدرنا جميعا ونشارك فيه باللي نقدر عليه هنااااااااااااااااا

الثلاثاء، أغسطس 10، 2010

يارب




طبعا انا بشكر كل من تواصل معايا وحاول يساندني ويدعيلي في الازمة اللي انا فيها


بس احب اطمنكم علي وعلى احوالي واقولكم ان مفيش فايدة الفساد ريحته فاحت على الاخر وبقى يزكم الانوف


في موضوعي دة مفيش حاجة هتنفع فيه غير الرشاوي وغير ان اشتري الضمائر معايا فلوس هنفع هعرف اشتري ضمير اتخن تخين انما ان معلش مش هعرف ارش ولا ارشي حد اصلي انا وزوجي يادوب نقدر نأكل عيالنا ويعني ناكل معاهم انما هنرشي موظفين حي روض الفرج مش هينفع او بالاصح مش هنقدر يبقى نروح نغور في داهية والغني يغتني فوق غناه ويمشي ويتمختر على جثثنا لا وايه اقوله خليني اقولك الله يبارك لك كدة هحسبن عليك وادعي ربنا يفقرك يقولي لا مش هيسمع منك


حتى ربنا بيشككني انه هيقبل دعوتي وكانه ضامن باين برضه أداه رشوة علشان ما يقبلش دعوتي استغفرالله العلي العظيم


ياحضرات انا ابتديت مشواري في المطالبة بحقي لما عرفت بالصدفة البحتة عن طريق صديقة في الحي ان بيتنا جاله ازالة للدور الرابع اللي فوقي وترميم لباقي البيت فروحت مع ولادي وزوجي اعيط لرئيس الحي واقوله ساعدنا نرمم البيت ومستعدين نرممه على حسابنا كمان ودة طبعا بعد ما كنا هنتخانق مع السكرتارية اللي مش عاوزانا ندخل لرئيس الحي والراجل مشكورا بعت من مكتبه اشارة تلزم صاحب البيت بالترميم وقلت له وقتها قرار الترميم مش في مصلحة الراجل اللي بيهد اكيد هيطعن فيه ومش هيرممه باعتبار انه اشترى بيتنا ودة برضه مش عارفين حقيقي ولا لا رئيس الحي قال لو رفض رمموه انتم السكان بطريق قانونية ما وقالي بالحرف عيشي مع ولادك في البيت وما تخرجيش منه


اليوم دة خرجت من عنده ربنا جند واحد صعبت عليه انا وعيالي وانا بعيط وقال لزوجي في ودنه روح لجنة التظلمات الراجل عامل او هيعمل تظلم ويجيب قرار ازالة للبيت ورجعنا لرئيس الحي وقال يعمل دة من حقه وانتم تتظلمه بالعربي نقضيها تظلمات


روحنا للتظلمات لقينا الظلمة المهندسة امل هانم ام كرش واسع حسبي الله ونعم الوكيل زعقت وقالت مفيش تظلمات خدوا بالكم بتعيطي ليه اما يعمل حاجة ابقوا تعالوا اشتكوا وروحت البيت وحمدت ربنا وابتديت امشي في اتصالاتي بالعاشرة مساء انهم يجوا يصوروا عندنا وكل البرامج اللي ممكن صوتي يوصل للمسئولين من خلالها وكان فاضل ابوس على ايدهم من محيلاتي عليهم يلحقوني ومعايا اسرتين تانيين


والحق ادوني اكتر من خمس مواعيد فيها زوجي ياخد اجازة والجيران ونستعد ونقول خلاص هيصوروا وصوتنا يوصل وهنخلص باذن الله لكن للاسف محدش بيجي ولا حد بيسال


طب المحامي رحلة البحث عن محامي شريف ما يستغلش الموقف واما يبتزني ويستنزف فلوسنا او يعقد صفقة مع صاحب البيت ويبيعنا له


للاسف اتهد حيلي وما لقيتش محامي يوحد ربنا عنده ضمير


نوارة نجم دلتني الله يبارك فيها على محامي تعرفه لكن طلع مش تخصصه دة


المهم على بال ما لقيت محامي عنده عشرة في المية ضمير روحنا بيه اول امبارح للحي وكانت مفاجأة كبيرة


طلب المحامي الاطلاع على الملف بتاع بيتنا والبيت المجاور رفضوا طبعا لما هدد وصوته طلع طلعوا الملف


خليكوا معايا


اول مرة لما عيطت ورئيس الحي طمني كان بتاريخ 15شهر7والمهندسة امل قالت مفيش تظلمات لقينا اول ورقة في الملف تظلم في قرار الترميم بتاريخ 13شهر7يعني قبل زيارتي بيومين ومن وانا هناك لو كنت عرفت كنت هعمل دعوى مستعجلة او اعرف بيه واعرف الجلسة اللي التظلم دة هيحددها واحضرها واقوم محامي يرد عليها انما الموظفين خبوها ايوة خبوها ولم يخطروا اي حد بيها بل والجلسة اتحددت بتاريخ 4شهر 8يعني من ست ايام واتحكم فيها خلاص ولم يتم اخطارنا بشيء بيت كامل فيه اربع اسر ولا اسرة اخدت اخطار باي حاجة في اي حاجة لان بمنتهى السهولة اشترى الراجل دة موظفين حي روض الفرج فرد فرد وكلهم وقفوا ضد اربع اسر وحكمت المحكمة باعدامي واعدام اولادي وزوجي و3اسر تانية فيهم اسرتين عبارة عن ارملة وحيدة مالهاش ماوى وارملة تانية زوجت اولادها ومعاها بنت دة ماواها حكمت المحكمة بازالة البيت حتى سطح الارض لانه خطر هيقع عليكم يا عبط هتموتوا نسيبكم تموتوا تحتيه يعني لازم يتشال علشان يتبني البرج اللي هيكون فيه ارضي وعشرة متكرر وكل دور اربع شقق الشقة 350الف


المحامي قالنا اتفاهموا مع الراجل واللي يرميه خدوه طبعا يادوبك وصلنا البيت لقيناه باعت لنا واحد من الحي وكيل للمجلس المحلي عاوزيقعد يحلها معانا وهو بنفسه كلمنا وقعد معانا وقالنا انا طلعت قرار بالازالة خدوا المبلغ دة واللي مش هيجيب شقة ايجارها 400ج حتى وامشوا


قلنا نوسطن المسألة واللي تدفعه خده احجز لنا شقق صغيرة طوب احمر عندك قال لا لاهبيعها احتمال ارض مش هبني


لو ما اخدتوش المبلغ دة ولاخر مرة خلاص خليكوا فيه وههدوا عليكوا


وهنا يا حضرات خارت قوايا وانا بقوله حرام عليك كل اللي حيلتنا هي الشقة دي والله يا ناس لو املك غيرها هسيبهاله


ماعنديش ياعالم دة كل اللي شقيت بيه انا وزوجي طول عشر سنين زواج صرفنا اللي حيلتنا واحنا بنتزوج على توضيبها وتاسيسها وكلها على بعضها 50م بس اصلها في شارع شبرا


حسبي الله ونعم الوكيل في كل واحد ظالم ساعد الراجل دة وغيره في اللي بيعملوه


وعلى فكرة انامش اول بيت في شارع شبرا يحصل معاه كدة الراجل بيشتري المنطقة كل فترة يتسلى على شارع


فين الضمير


المحامي عمل لي يأس وقال خلاص انتهى


ما بانمش من ساعتها بحاول اعيش ومنتظرة الحي يجيلي في يوم وينزلني مع ولادي بالقوة من شقتنا او يقطع علينا مية ونور او لو سمح لنا نبقى موجودين نمضي اقارات بتحمل مسئولية ارواحنا فبسهولة يعمل اي حاجة توقع البيت على دماغنا ونبقى مع السلامة


انا باصرخ بس من غير صوت


حسبي الله ونعم الوكيل


يا ناس حد عنده اي امل او نصيحة ينصحني بيها تفيدني


يا محامين ياللي لسة باقي عندكم ضمير في زمن يباع فيه الضمير ويشترى حد عنده حل يساعدني بيه ؟؟؟؟؟؟؟؟؟؟؟؟؟


يابتوع البرامج والسبق الصحفي اجهزوا لقضية كبيرة هتيجي قريب ضحاياها ام واربع اطفال اغبيا وقع البيت عليهم رغم انهم عارفين انه هيقع قعدوا فيه اصل خمس ست لجان جم قالوا البيت كويس وعاوز ترميم بس احسن لجنة فيهم قالت لا دة هيقع بالتلاتة ودي اللجنة الفاهمة انما الباقي ما بيفهموش يلا يا برامج هحضرلكم صورنا وهحضرلكم اصل الحكاية علشان تاخدوا المعلومات بدري بدري


كان نفسي والله اصور معاكم وانا عايشة


ربنا كبير وقادر على كل شيء


عارفة نكدت عليكم بس والله الصورة اغمق من كدة واصعب بجد حاولت ابيضها شوية


بالله عليكم تدعولي ربنا يفرجها علي ويرحمني


واذا قدر الله ومت وصلوا الحكاية للمسئولين يمكن تنقذوا غيري
كل عام وانتم بخير
رمضان كريم
اسفة جدا اني زعلتكم


الخميس، يوليو 22، 2010

بلاغ الى من يستطيع المساعدة باسرع مايمكن


اسكن في العقاررقم 12ح محمد خليل من شارع البعثة روض الفرج والملاصق والمشترك اشتراك خطيرمن ناحية الاسقف للعقاررقم 4ح نخلة صالح بمعنى سقف الدورالاول للدورالارضي في العقارالساكنة فيه يدخل في سقف الدورالارضي للعقارالملاصق ويمتد حتى غرفة وصالة في العقارالمجاورروهكذا في الدورالتاني والتالت والرابع اسكن في الدورالتالت وذلك لان مالك العقارين كان واحد وبناهم بهذه الطريقة بالحجارة الصخرية وايضا يشتركوا في الصرف الصحي والمياه

فوجئنا ببيع المالك لمنزل4ح نخلة صالح لرجل له باع طويل استصدرامرهدم وازالة لهذا المنزل الملاصق لنا حتى سطح الارض بدون اي مراعاة للاشتراك الخطيربين العقارين ودون اشراف هندسي من قبل الحي وقمنا بتحرير محضراحوال رقم25نثبت ذلك وارسل الحي لجنة واتنين وتلاتة للمعاينة وكل منهم تاتي وتقول لا داعي للقلق وتاخذ ما فيه النصيب من مالك العقار المجاوروتمشي والرجل يهدم ويزيل الان بطريقة عشوائية غوغائية تعرض عقارنا للخطر اللهم انه اتى بمجموعة اخشاب ووضعها تحت بلكوناتنا ((قال يعني بتسندها)))

والحي قال له لا تلمس مكان الاشتراك مع المنزل ولا تهدم فيه اهدم من حوله فقط

نذهب للحي ((حي روض الفرج))) ونحاول استصدارمعلومات ونحاول كتابة شكاوي وقمنا بعمل محضراخر رقم 3324اداري وتم تحويله للحي وارسل لجنة للمنزل واخذه اللي في النصيب ومشيوا

ذهبنا اول امس للحي وعلمت بطريقة ما ان هذا الرجل اشترى عقارنا واستصدرامر ازالة للدورالرابع في عقارنا وترميم وتنكيس لمنزلنا وقام ايضا بالتظلم في هذا القرار ليستصدرامر بازالة العقاربالكامل(((( طبعا امال هيطلع بالبرج ازاي))))

وخاطبتنا المهندسة امل بان بيتكم هيقع ولسة ما اتظلمش الراجل ولاحاجة مستعجلين ليه دة اصدر امربازالة رقم 10ورقم7ومنزله وسوركان مخالف لما يجي عليكم الدورابقوا اشتكوا وهو ما جعلني انهاربكاءا لذلك فرددمهندس وحيد معلش ربنا على المفتري

وذهبت لسكرتارية رئيس الحي وكانوا مش عاوزين يدخلوني باي طريقة كتبت الشكوى وطلع السكرتيريقولي بعد انتظار3ساعات تحولتي للجنة الاسكان هتعاين وتبت في الامر فقلت عاوزة اقابل رئيس الحي ولخوفه من اني ممكن اعمل مشكلة دخلني وللحق قابلنا الرجل بكثيرمن المودة وقال بالحرف الواحد هنجيب المالك علشان يرمم العقار وان رفض هتتحدواكسكان لترمموا العقارانتم على حسابكم وقال للموظف ابعت اشارة الان من مكتبي لاحضاره

ولم يحدث اي شيء للان حتى ان قرارازالة الدورالرابع وترميم المنزل لم يخطرنا احد به ولاحتى اخطرنا انه اشترى بيتنا كله عرفناه بالصدفة في الحي

المشكلة الان الراجل دة بيهددنا انه هيخرب في العقار وانه هيبذل وباسرع وقت هيشيل البيت حتى لو اضطره الامر انه يهده فوق دماغنا

الراجل دة تخصص شراء البيوت في شبرا وازالتها وبيع اراضيها المتر ب20الف

ياعالم انا مهددة واطفالي يوميا ومعايا اسرتين في شقتين ارملة واخواتها وارملة اخرى وبناتها

الرجل له باع وقادرعلى شراء الضمائر معاه فلوس بس انا معايا ربنا وانتم

حاولت كتابة ايميلات لكافة البرامج وحاولت الاتصال بيهم دون جدوى

اللي يقدر يوصل صوتي ويلحقني يساعدني

معنديش غير الشقة دي كل اللي حيلتي والا هبقى في الشارع

حياتنا مهددة اما بانهيارالمنزل بفعل فاعل على رؤوسنا او بتشريدنا في الشوارع باستصدارقرارات مخالفة للواقع

وكل دة علشان مترالارض ابو عشرين الف او الشقة ب400الف

طيب نتفاهم معاه ويعوضنا بشقق زي اللي احنا فيها او يعطينا مبالغ محترمة تعوضنا طبعا لا هيجرح فلوسه ليه يعني

طيب نعمل ايه بس

تحركات الرجل دة سريعة جدا وتتطور بسرعة بجد الحقوني قبل ما اكون تحت الانقاض

مشاكلي كتيرة بس انا عارفة قلوبكم كبيرة

يارب بحق اذان الفجر وهذا الصباح تفك كربي وتهلك الظالم يارب

السبت، يونيو 26، 2010

حدث بالفعل في مستشفى الدمرداش الجامعي


السلام عليكم ورحمة الله

ازيكم كلكم يا حبايبي كل عام وانتم بخير

والدتي الحمد لله تعالى بتتحسن وكويسة لسة جاية من عندها امبارح جزاكم الله خيرا على سؤالكم

تعرفوا ان فيه اخوة واخوات لا يزالوا بيتصلوا ومن دول عربية كمان اغلبهم فاكر اني انا اللي هرد على التليفون

لكن سبحان الله في بعض من الفئات ربنا يهديهم بيتصلوا يعاكسوا تتصوروا بيعاكسوا ومن هنا من قلبي بدعيلهم ربنا يهدي لهم الحال يارب ويعف كل مسلم يارب العالمين

========

هتكلم معاكم عن اشياء حصلت بالفعل لامي ولغيرها في مستشفى الدمرداش الجامعي واللي ساقنا لدخولها المسعف لانها اقرب مستشفى لنا ولرفض مستشفى استقبال امي وبصراحة انا باستغرب ان فيه مريض يروح بالاسعاف محتاج نقل دم فوري لمستشفى وترفض المستشفى استقباله

المهم دخلت امي المستشفى الساعة ستة واخدوا منها عينة دم وقالوا انها محتاجة نقل دم ودة كان قاله الدكتور المتابع لحالاتها في البيت قبل ما تتنقل وشكلها اساسا كان واضح جدا انها محتاجة دم وشها وشفايفها وواطرافها كله ساقع تلج وابيض مصفر ومابتقدرش لا تقف ولا حتى تتكلم ودوما بتقول عندي هبوط

المهم فضلت امي راقدة على السرير ولو وصفت لكم المرتبة اللي كانت نايمة عليها شكلها ايه مش هتصدقوني والفرش ومستوى النظافة اللي اقل من اقل حاجةواساسا العنبر للامراض المتوطنة واللي حطونا فيه لانهم كانوا فاكرينها مريضة كبد لانها كانت بتنزف

المهم فضلت امي على السرير ما حدش بيسال فينا نروح للدكاترة وادارة المستشفى كل ३ دقايق الحقونا فين الدم طب نشتري طب احنا كلنا نتبرع لها طب اللي انتوا عاوزينه المهم تلحقونا

انا جيت من العاشر الساعة عشرة مساء وكان الدكاترة دخلوا مين هما الدكاترة بقى قولوا حوالي خمسة ستة دكاترة صغيرين كل واحد فيهم ماسك دفتر انا مصدومة اساسا ومش مركزة بالمرة

كلهم لابسين بلاطي بيضا الا واحد لابس اخضر بس سنه مش بعيد عنهم بس شكله اكبروزي مايكون معيد او حاجة كدة المهم لقيتهم بيكشفوا على ماما وبيشرحوا حالتها لبعض وقالوا دم (((مفيش جديد))) احنا عمالين نسال امتى ياعالم الحقونا امتى الدم حالتها بتتدهور

قررت انا واختي نغيرلها هدومها وفعلا غيرنا هدومها وبعدين عاوزين نغير المرتبة اصلها وحشة اوي اوي

فحاولنا نغيرالمرتبة وبطريقة او باخرى امي وقعت واحنا ساندينها لان الحركة حتى الخفيفة مش قادرة عليها فبسرعة نزلناها على السرير وفي الوقت دة انا شفت امي ماتت عينها تسمرت في السقف واصدرت صوت كانه صوت الاحتضار ونزل ريم ابيض من فمها وقتها اختي صرخت وجمعت قوتي وضميت راسها وتلوت عليها الشهادة وبقيت اقولها قولي ياماما لا اله الا الله وزوجي قالها وتلتها امي وفاقت تقولي ايه يانونو ما تخافيش في نفس الوقت اختي بتصرخ في الدكاترة حرام عليكم امي ماتت فين الدم بنتحايل عليكم من الصبح ما لحقتوهاش ليه

يرد الدكتور المحترم طب هوحد منكم قال هتبرع وقتها تماسكنا رجال ونساء لان ريقنا نشف نطلب دة منهم

الغريب ان وقت امي ما وقعت العشر دكاترة ما زالوا معنا في الحجرة والله العظيم لم يتحرك دكتور واحد لمحاولة المساعدة والنجدة وبرضه وصل الدم بعد ساعة من الحدث وجت دكتورة كبيرة في الصباح قالت لهم نفس العشر دكاترة اللي بيتشرح لهم ان الحالة محتاجة نقل دم باستمرار طبعا مش قادرين يرفعوا وشهم في وشنا من الاحراج خصوصا اننا اتبرعنا وحاولنا نشتري دم ودة حصل برضه

عارفين بقى ان اي حاجة في المستشفى سواء عاوز تطلع لمريضك او تجيب مرتبة نظيفة كل دة له تمنه

انما الدكاترة تجيبهم بالزعيق والقوة

وسهل جدا اي طبيب يرد عليك طيب طالع حالا وما يسالش فيك وتنزل له تاني تلاقيه بيتصرمح او بيشرب نسكافيه

ولما تحمرله عينيك وتزعق معاه يطلع

المفاجأة بقى ان كل الدكاترة دي مش دكاترة دول شوية طلبة لسة بتتعلم وبتتعلم في اهالينا

لا عارفين يركبوا دم ولا عارفين يركبوا كالونة ولا عارفين ياخدوا قياس السكر ولا عارفين يركبوا اي حاجة وواحد ركب لامي خرطوم المفروض يكون خرطوم قسطرة بولية ركبوا من انفها علشان يوصل لمعدتها وعملوا لها كدمة من الداخل ازرقت من الخارج بسبب طريقته الغلط

وواحد ركب لها خرطوم من مناخيرها وما شغلش المحلول ولما نزلت تعمل منظارالمعدة سالونا هما ركبوا دة ليه قلنا لهم قالوا مهم شالته الممرضة ورمته في الباسكيت وطبيب المنظار قال دة مالوش لازمة هيترمي اهو ايه اللي بيعملوه دة

حتى الدم لما كان بيركب وتيجي الكالونة تتسد كان عذاب على بال ما يركبوها وكانت اختي بتركبها افضل

تعرفوا احنا الحمد لله افضل حالا ما كناش بنسكت وبنزعق وبنتخانق وحالة امي كانت لا تسمح بنقلها لمكان تاني رغم اننا حاولناننقلها واتصلنا فعلا بالاسعاف تيجي تاخدها فيه دكتورقال ان حالتها محتاجة دم بس وهتروحوا حتة تانية هتعيد تحاليل تاني وهتلفوا اللفة من الاول امكم تاخد الدم وهتلاقوها كويسة بعدها روحوا اي حتة تانية لكن لاجدوى من نقلها

دفيه حالة دخلت لسيدة عندها فيروس كبدي وبتنزف والمفترض تدخل الرعاية المركزة قالوا مفيش لها مكان ولا سرير هناك

للاسف الحالة دي توفت تاني يوم وهي بتخلص المكان في حجرة الرعاية تواجد ونقلوها فيه

تصدقوا المستشفى مفيهاش ترمومتر حرارة ومفيهاش لزق ومفيهاش شاش

المستشفى فيها تلاجات كتيرة كلها بايظة

الناس بتموت من العطش وما بتشربش مية ساقعة في الحردة ودول مرضى

المستشفى مفيهاش اي حاجة

الدكاترة بيجوا ضيوف وبس

وبيتعلم ويتسلى على المرضى عفوا شوية عيال

يا عالم هو المستشفيات الجامعي دي اللي بيدخلها الناس الغلابة هما بس اللي نتعلم فيهم

طبعا المستشفيات الكبيرة والاستثماري لا

طيب هو دة صح اللي بيحصل دة؟؟؟؟؟

مرضى الامراض المعدية محطوطين كدة خلطبيطة على المرضى العاديين والاستقبال غير مجهز والطواريء شرحه؟؟؟؟؟؟؟؟؟

طيب انا الايام اللي قعدتها في المستشى حسستني ان مصر كلها مرضانة والناس بتبقى عيانة وتخش المستشفيات دي تموت من قلة الاهتمام والرعاية والتأخر في اسعافهم ونجدتهم لقلة الموارد لقلة الدكاترة وجهلها ممكن كل دة ؟؟؟؟؟؟

طيب اعذرهم لان الضغط عليهم كبير ولا انقم على بلدي قلة رعايتنا ولا اعمل ايه

يا جماعة لازم خطوة ايجابية للمستشفيات دي بجد

انا شفت فيها العجب وشفت بعيني حالات كتيراوي صعبة وناس موجودة بالست شهور

المستشفيات دي والناس دي محتاجة لوجودنا ومساعدتنا

عارفين شوية لزق وشاش وترمومترات حرارة دي اقل حاجات بتحتاجها المستشفيات دي

والادوية كلها بيحتاجوها ومحتاجين حد يصلح لهم التلاجات ويعمل صيانة للحمامات كمان محتاجين ملايات ومراتب ومخدات للبني ادمين

محتاجين اطباق بلاستيك يتقدم للمرضى فيها اكلهم بادمية ونظافة

محتاجين كراسي متحركة وادوات نظافة

محتاجين يتملي عين التمرجيات والممرضات علشان يتعاملوا معانا كجمهور زائر وكمرضى زي بيتعاملوا مع اي بشر عاديين

محتاجين الناس اللي بتستقبلنا كجمهور زوار انهم ينظموا عملية زيارة المرضى دي شوية طالما زائر مالوش لازمة ما يدخلش لكن الموضوع فيه همجية واي حد يدخل والنفس في الاوض يتقطع

محتاجين يكون عندنا شوية رحمة نرحم بيها المستضعفين ونرحم بيها بعض



مش عارفة اقول ايه غير ربنا يشفي كل مريض ويرحمنا برحمته يارب

احبكم في الله

السبت، يونيو 19، 2010

ست الحبايب في البيت الحمد لله

تحديث
اولا الحمد لله ماما بخيروفي تحسن
وكانت عملت منظار في المعدة لانها كانت بتنزف والدكاترة عاوزين يعرفوا منين النزيف وبعد رعب دام حوالي ثلاث ايام المنظار حدد انها عندها قرح في المعدة هي اللي بتنزف بسبب كثرة الادوية اللي بتاخدها سكروضغط وكمان ادوية ومضادات حيوية كانت بتاخدها من حوالي 20يوم لانها كانت عاملة عملية جراحية لتاني مرة في سنة واحدة من مضاعفات السكر وكانت جراحة فقدت فيها دم كتير والظاهر الجراح نسي يكتب لها حديد ففقدان الدم في العملية مع نزيف القروح اللي في معدتها ادت الى هبوط في نسبة الهيموجلوبين وكان دة مفاجيء ودة بناء عليه استدعينا طبيب في البيت قال وقتها اعملوا تحاليل فعلا ابتدينا نعملها لكن اخر اليوم كانت ما بتقدرش حتى تتكلم واستدعينا الاسعاف وكانت مشورة المسعف انها تنتقل للمستشفى العبقرية دي الدكتور جالها البيت امبارح وشاف كل تحاليلها وكتب الادوية اللازمة وهي بحمد الله في تحسن وبكلمها يومي وبخليها تدعيلكم دوما ويارب ما اتحرمش منكم ولا من سؤالكم علي
اعذروني بحاول ازور مدونات لكن بنام وكاني بقالي سنين ما نمتش مع انهم كانوا خمس ايام بس
احبكم في الله




نفسي اقول كلام كتير اوي واحكي كتير اوي واقول لكم جزاكم الله خيرا كتير جدا وادعي لكم بدوام الصحة والعافية طول عمري

كل المدونين كلهم فرد فرد ساعدني بالدعاء او بكتابة تدوينة او باتصال تليفوني بقدم لكل واحد منكم وردة بيضا ودعوة من قلبي بالصحة والعافية فعلا رب اخ لم تلده امي

شوفوا بقى دعواتكم بالشفا عملت ايه المفترض ان الخميس امي تاخد كيسين دم حالتها اكتفت بكيس واحد فقط والمفروض الجمعة تاخد كيس برضه الدكاترة قالوا خلاص مالوش لازمة حالتها استقرت وعملوا تحاليل لها الساعة تلاتةصباح الجمعة والساعة واحدة ظهرالجمعة كتبولها خروج والساعة اربعة ظهرالجمعة امي كانت في بيتها بحمد الله

وانا رجعت بفضل الله تعالى بيتي في العاشرمن ساعتين بس بعد ما اطئنيت ان خلاص الحالة اصبحت مستقرة وهي بتقوم وبتمشي الحمدلله وبشوية ادوية وتظبيط في الاكل بعون الله كله هيبقى تمام

امي اد ايه مبسوطة بيكم وبتدعي لكم كلكم

طبعا حاولت احصد كمية التليفونات اللي كلمت اختي للتبرع او حتى الناس المسافرة برة واللي بتتصل تعتذرعن بعد المسافة لقيتها كتيرجدااا

ربنا يبارك فيكم والحمد لله على النعمة فعلا حب الناس نعمة كبيرة وانتم حبكم تاج على راسي ووسام شرف كمان

اشهد الله العلي العظيم اني احبكم في الله

باذن الله تعالى التدوينة الجاية هحكي معاكم اكتر واكتر عن حاجات شفتها ما صدقتش انها هنا في بلدنا وبتمارس مع المرضى وعارفة مدى ايجابيتكم وهنشوف لها حل

تحياتي ودعواتي لكم جميعااااااااااااااااااااااااااااااا




الخميس، يونيو 17، 2010

مش مصدقة نفسي







اشهد الله العلي العظيم اني احبكم في الله


اليوم انا ما كنتش مع اختي المرافق لوالدتي بالمستشفى علشان كدة تركت تليفونها على الانترنت تتواصل معكم وطبعا انا بتصل بيها كل ساعة وكل ما اتصل بيها تقولي اقفلي بسرعة فيه تليفون غريب الظاهر علشان طلب التبرع بالدم اللي عملتيه


وقالت ان فيه سيل من التليفونات للمساعدة منكم ومن جروب فرسان الخير


الحمد لله بفضل الله وفضلكم تم توفير كيس دم اخدته امي اليوم وارتفعت نسبة الهيموجلوبين من تلاتة الى سبعة ونصف وغدا فيه كيس كمان هيكون موجود الساعة تسعة ونصف وباذن الله تعالى احتمال ما تحتاجش غيره يارب ودة برضه بفضل الله ثم فضلكم


دعواتكم ومساعدتكم ووقفوكم جنبي بيرجع لي الثقة في ان الدنيا لسة فيها خير رغم ان الاربع ايام الماضية اللي قضيتهم في المستشفى مع امي خلوني اقول خلاص ظهر الفساد حتى في الهوا اللي بنشمه وهنتكلم سوا في الموضوع دة باستفاضة بس لما افوء من الازمة دي


غدا باذن الله انا مع امي بالمستشفى وطلبت من اختي الاحتفاظ قدر المستطاع على التليفونات اللي اتصلت علشان اكلمهم واحد واحد


ومن هنا من قلبي جزاكم الله خيرا جزاكم الله كل الخيرساعدتوني ووقفتم جنبي بكل حاجة والله انا لما فتحت النت وشفت كم التفاعل


لم اتمالك نفسي وغرقت في الدموع بس من الفرحة


يارب ربنا يفرح قلوبكم كلكم ويسعدكم دوما واحد واحد ياربي حتى المسافرين برة واللي مااعرفش مدوناتهم ساعدوني


ياربي الحمد لله الحمد لله الحمد لله


مش عارفة اقول ايه ربنا يبارك لكم


ست الحبايب بكرة هحكيلها وباذن الله في تواجدها كدة مع رب العباد هخليها تدعي لكم كلكم
لكل أخ أو أخت فكر مجرد التفكير في انه يساعد او يدعي لي شكرا جزاكم الله خير الجزاء
مش عاوزة اكتب اسامي علشان لا يسهو مني اسم
ربنا يخليكم يارب



الأربعاء، يونيو 16، 2010

محتاجة لكم بشدة فينك ياخيخة

السلام عليكم ورحمة الله
والدتي ترقد الان في مستشفى الدمرداش قسم الباطنة والمتوطنة عنبر10طواريء
تحتاج بشدة لنقل دم فصيلة اوه موجب مستعدة اشتري كيس الدم المشكلة عندي في توفر الدم اصلا
بنجيبه من هيئة المصل واللقاح وبندفع حقه لكن ما ينفعش اشتري غير كيس واحد بس
امي امس اخدت اربع اكياس دم وكيسين بلازما وقدرت تتكلم اشتريت كيس وبطريقة ما حصلنا على الاخربضعف تمنه والكيسين الاخريين من المستشفى اللي مليانة عباقرة بتتعلم في المرضى وهنحكي كتير في دة
اليوم لفينا لحد مالقيت كيس واحدبس عارفة ان شباب الخير كتير وباذن الله ربنا هيقف جنب امي
احتاج لكيسين دم على الاقل ياشباب الخير اليوم الاربعاء

الثلاثاء، يونيو 01، 2010

أشكو اليك يارب



السلام عليكم ورحمة الله

لا أجد كلمات تعبر عن ما يجيش في صدري حدثين كلاهما قتل للحرية قافلة الحرية أغتالتها يد لطالما تلوثت بدمائنا ولطالما ساعدناها في ذلك
رحم الله شهداء قافلة الحرية نحسبهم كذلك باذن الله
الصهاينة ومن والاهم اغتالوا قافلة الحرية ليس لشيء الا لانهم كانوا يحملون رصاصات من الادوية ودروع من الالبان وصواريخ من الكادليز للاطفال
حسبنا الله ونعم الوكيل
حسبنا الله ونعم الوكيل
حسبنا الله ونعم الوكيل
يارب شغلتنا الدنيا
يارب شغلنا الجوع والاسعار وازمة مياه النيل
أغرقونا في بحور دم اخواننا
لم نعد نملك غير الدموع والشجب وارسال الرسائل للعالم والمظاهرات
يارب
اشكواليك ضعفي يارب
نعم أنا ضعيفة
لم استطع حتى ان أدافع عن حقي الشخصي
لم أستطع حتى ان أقول أنا حرة
بالامس كنت ابيع قطعة ارض وأقوم بعمل توكيل بالشهر العقاري ووقت أخذ التاشيرة على التوكيل هم الموظف من مكانه وبصوت عالي أكشفي عن وجهك !!!!!!
فنظرت اليه يا سيدي لا أعترض وسأكشف عن وجهي كما تشاء لكن لاي موظفة من الموجودين معك فهم كثيرات والحمد لله الاخوات هنا كثيرات
فارتفع صوته لا أنا اللي مسئول ومن ورائي أكثر من عشرين صوت ((((معلش بقى تعالي على جنب وارفعي نقابك ))) فرددت يا جماعة الاخوات زميلاته كتيرأحسست أني بمفردي وليس معي غير الله والحمد لله وناجيته في سري ان يثبتني
فرد الموظف اما ان تكشفي عن وجهك والا مفيش توكيل انتي حرة بقى
أين الحرية هنا يا أخي
فانزويت جانبا وقد خارت قواي بعد كثرة قولي له وللجميع الأخوات كثيرات فأنا في الشهر العقاري قرابة ساعتين لاحصل على التوكيل ومن أبيع لهم الأرض شغلهم كثرة غيابي
وحاولت أن أستنجد برئيس الشهر العقاري ولكن لم أجده فلم يعد أمامي الا الكشف عن وجهي
ورفعت نقابي على استحياء ولم أنظر اليه نظرة وقد أقترب وجهي من ألارض من شدة النظر فيها ولا أعلم هل نظر في وجهي الذي أغرقته الدموع أم لا ليضاهيه بالبطاقة الشخصية وشعرت أن الدنيا تدور من حولي وكدت أسقط مغشيا علي
وظللت في هزة نفسية قرابة الساعتين
وظللت اقول لنفسي ((ايه الخضوع دة ليه ما أصريت على الرفض ليه ما دافعتش عن حريتي
وأصريت أن من تراني تكون سيدة ليه خضعت بسرعة كدة وظللت أجلد نفسي )))
يارب أشكو الي ضعفي
يارب سأجمع ما تبقى لي من قوة وسأدافع عن ما أخترته أنا منتقبة أنا حرة فيما اخترته واقتنعت به

ملحوظة هامة جداااااا
رجعت وحكيت ما حدث وكان أمام أحد المعارف والذي قص لي أنه من عدة أيام حدث ذلك من نفس الموظف لزوجة صديقه لكنها سارعت لموظفة تعرفها شخصيا فهبت الموظفة وقالت دي انا عارفاها كويس وهشوفهالك انا ووافق والموضوع عدى ))))
حسبنا الله ونعم الوكيل

الأحد، مايو 23، 2010

مابين هذا وذاك

السلام عليكم ورحمة الله
أنتظر تعليقاتكم



الأحد، مارس 21، 2010

بفضفض معاكم وبس




السلام عليكم ورحمة الله


رغم اني غايبة الا اني متابعة على قدر المستطاع نادر جدا لما اضع تعليق اتابعكم في صمت


وبفتح صفحة الرسائل اوقات كتيرة على امل اكتب حاجة لكن بلاقي الكلام هرب او بالتحديد ابدا الكتابة واتوقف


شعور بأنه هنغير ايه ولا ايه حتى اني التدوينة دي مش عارفة هتطلع للنور ولا لا


قلت اكتب واتكلم وافضفض واهو كلام


من كام يوم كنا في طريق مصر اسماعيلية وناحية اكاديمية المستقبل زحمة جدا وعساكر وعربيات فكرتها حادثة لحد ما عرفت ان الموضوع حفلة لمحمد منير والدنيا هايصة وزحمة جدا ويوم خميس في طريق سفروالف علامة تعجب


!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!


رسائل كتير بتتبعت لي على تليفوني المحمول مغزاها أغيثوا الاقصى وأقصاه والقدس ينادي وووووووووو


شعور اكيد بان هو دة كبير اي حد فينا شوية ولولة ولا شوية كلام ولا اوبريت ولا نندد ونشجب ونتظاهر


هو دة اللي فالحين فيه شعور بعجز غريب


اسمع ان فيه في مصر ناس باعت اراضي في سيناء للاسرائيليين


واسمع كمان ان مجلس الشعب سيبيح قانون لتعقيم الزوجة واجهاضها بسبب الظروف المعيشية الصعبة ولا حول ولا قوة الا بالله


في يوم الام ارسل لكل أم باقة ورد ولامي كل عام وحضرتك بخير يا ماما عارفة مش هتشوفي تهنئتي ليكي هنا لكن قلتهالك امبارح وهقولها وانا والعيال تاني


اليوم دة بيبقى صعب اوي على امي لان اخويا الله يرحمه كان بيجي يبوس ايديها وراسها ودوما بيهادي ستو اللي هي امها قبلها ودة كان بيبسطها اوي ربنا يرحمه يارب ويرحم ستوواموات المسلمين ويبارك في ماما ويصبر قلبها يارب




مش فاهمة هو الكلام بيتحجر ليه حد عنده حل ولا من كتر اللي حوالينا خلص الكلام


يلا المهم اني قلت حاجة


بحبكم




الأربعاء، يناير 20، 2010

انا شهيدة النقاب للحظة واحدة


خرجت من منزلي كعادتي وسرت بجانب الرصيف فوجدت رجل يجلس على الرصيف ويبدو عليه علامات التشرد وجدت امامه زجاجة مياه غازية محطمة لجزأين وهو يحدق فيهما ورأيت الصليب واضح على ظهر يديه فرفع راسه نحوي واصبح يحدق في أنا وقتها تلوت الشهادتين وبعدما اجتزته كنت اتوقع ان تستقر احدى حطام الزجاجة في ظهري ولبرهة تخيلت ما ستكتبه عني الصحف والمجلات عن شهيدة النقاب


وجمعيات حقوق الانسان والصحف والمجلات والتحقيقات التي ستنهال عني وعن اسرتي


ولكن ايضا تخيلت من انه قد يتحول لحادث عابر انتقامي بسبب ما حدث في مطرانية نجع حمادي وليس له اي أهمية وتخيلت ايضا اتهام البعض للنقاب بان النقاب هو سبب الحادث فقد يكون نقابي اثار حفيظته ولو اني لم اكن ارتديه لما حدث ما حدث فلوموها (أقصد أنا) ولوموا نقابها ولا تلوموا القاتل لذلك فمنع ارتدائه هو الحل الامثل لمثل هذه الحوادث


وتخيلت ان الحادث سيُرد الى ذلك المختل عقليا الذي لا يعرف ما يفعل


وتخيلت مشهد القس والشيخ يتعانقان تعبيرا عن سلامة الوضع بين المسلمين والاقباط


وتخيلت وتخيلت وتخيلت


ولكن ما أعلمه من واقع من ان أطفالي وأسرتي هم من سيدفعون الثمن وسيصبحوا يتامى وستتذكروهم لبعض الوقت في اطار الحادث ولن يلتفت لهم اخد بعد ذلك و يتهوا في وسط الحياة مثلهم مثل محمد اصغر ناجي من عبارة السلام


مثلهم مثل صغير مروة شهيدة الحجاب

وأتذكر صداقتنا القوية بعادل جرجس صديق زوجي منذ اكثر من عشرين عاما


واتذكر أستاذ ايليا والذي يطلب مشورتنا في معاملاته المادية ومشروعاته التجارية دوما وكلمته الشهيرة لي عارف ((انك ما بتكدبيش خالص))


واتذكرمدى تقبله ومزاحه مع صغيري يوسف ابني حينما احضر المصحف له وقال سمع لي ياعمو سورة البقرة فابتسم وقال انا مش حافظها يا ابني


ولما اقول له صلي على النبي يقول الف صلاة


واتذكر ماجدة جارتي القبطية حينما شاهدت صغيري يوسف وقبلته وقالت بسم الله الرحمن الرحيم


واتذكر ان زوجي ولد وتربى في حي شبرا وتزوجت انا فيه وكل جيراني تقريبا من الاقباط وعلاقتنا من احسن ما يكون بفضل الله على مر 9سنوات وانا بينهم احاول الحفاظ معهم على حقهم كجيران كما اوصانا رسولنا الكريم وللحق علاقتهم بي فوق الممتازة ولكن تُرى هل ستظل هكذا حتى بعد الحادث الاخير؟؟؟!!!!


أتمنى

وأتذكر مشاهد الشباب والشابات وهما متجمهيرين امام الكاتدرائية والكنائس المليء بها شوارع شبرا وهم يسيرون ببطء امام سيارتنا لعرقلة سيرنا ويحاولوا اقحامنا في مشاجرة معهم ((بيجروا شكلنا يعني ))

وكانهم بنار فرن بث الحقد في قلوبهم من جهتنا كمسلمين

ومرت البرهة لاستيقظ على الواقع


واصل الى مقصدي وارجع لأولادي بحمد الله واقبلهم واحكي لزوجي المشهد واحكيه لكم


يارب أحفظ بلادنا من الفتن وكن لنا لا علينا يارب


اللهم اكتب لنا الشهادة في سبيلك يارب