الأربعاء، أبريل 22، 2009

أخاف؟؟؟؟!!!!!!!!!!!!!!!!


فكركم ايه بس يخوف، الدنيا حلوة وجميلة ومفيهاش حاجة تستدعي اني أنا على الأقل أخاف

لا فيها شخصية تحسبها صديق وتشحتف روحك عليها وتفتح لها بيتك في كل وقت ويطلع حتى مش الاخر لسة الاول ولا يستاهل حتى يتبص في وشه

لكن لولا ان الواحد بيعامل رب العالمين كان زعل واتقهر المهم اني عرفته وفي صفيحة ----- حدفته

ولا فيها اهل كل همهم يتعبوك ويجرحوك يقصد او بدون قصد وعلى طول الخط لازم تسامح وتفوت اصل الجنة غالية وصلة الرحم بتوصل لها

الدنيا برضه لسة حلوة

ولا فيها ناس بتاكل حقوقك بالتدليس والتزوير والادعاء ولانك ماشي عدل ابقى قابلني ان عرفت تاخد حتة ارض تبني عليها بيتك ولا حتى تعرف تاخد حتة مكافأة انت الأحق بيها ودة كله ليه علشان ماشي عدل

لاعاوز تغش وتدلس ولا تتلوى زي التعابين ولا تقول هشتغل على اد فلوسهم

طب يا فالح اوعى تشتكي بقى

يبقى هخاف بس من ايه؟؟!!

نفسي اروح اعمل عمرة بس خايفة ارمي روحي في التهلكة اصل مش هعرف ادبر غير حق السفر على مركب وتبقى خيبة تقيلة لو طلعت السلام 98 الجزء الثاني

يوووووووه خليها على الله

ماشي بس ناخد بالاسباب

طب بقيت اخاف على ابني وهو رايح المدرسة

خايفة يتخطف ولا مدرس يضربه ضربة تموته ولا يرشه بشوية مية مغلية ولا ما اعرفلوش طريق

واخرتها يتقالي معلش ما كانش قصده

والله الواحد تعب خلاص بيشوف العجب كل دقيقة حواليه

شفتوا حملة الازهر اللي دلوقتي بيروحوا للسيدات العاملات المنقبات علشان يقنعوهم يكشفوا وشهم ؟؟؟!!!

يا ترى يا هل ترى هنشوفهم برضه يروحوا للي قالعين هدومهم وراشينها على جتتهم يقولولهم حتى احترمي نفسك في لبسك

ولا دي حرية شخصية وحملة الفيس بوك غير جائزيتعمل لها حملة من الازهر؟؟!!

طيب هيطلع لنا فتوى امتى بحرمة النقاب؟؟!!!

بس رُب ضارة نافعة ولا تحسبوه شراُ بل هو خير

عمر اليأس ما هيعرف لي طريق باذن الله

لاني عندي حُسن ظن بالله

حتى وان كنت قاعدة في امان الله والاقي هوووب عين راحت خابطة بنوتي في يوم ميلادها وتوقع علي صدرها شاي مغلي وتبقى عارف ان العين دي عين فلان ما هو خبطهالها عيني عينك كدة

الحمد لله يارب على كل حال

الحمد لله


طيب هخاف بس ليه خليها على الله

هو يعني فكركم انا اذا ماكنتش مخلياها على رب العالمين واصبر واحتسب كان زماني لسة بينكم

يارب انت العالم بحالي وغاني عن سؤالي

ألا بذكر الله تطمئن القلوب

اوعوا تفكروا اني بنكد عليكم بس لازم نفتكر كلنا ان مفيش حاجة تخوف ابدااااااااا

ليه بقى؟؟؟

لان الحمد لله كله يهون ما دام مصيبتنا مش في دينا

ومادام عندنا رب كريم بيتزل كل ليلة نزولا يليق بجلالة ويسألنا الاستغفار والدعاء

الحمد لله على نعمة الاسلام وكفى بها نعمة

جولدشتاين تعرفوه؟؟!!

تحبوا تعرفوا مين جولدشتاين؟؟؟


تجدوا ما لا تعرفوه