الأربعاء، يناير 20، 2010

انا شهيدة النقاب للحظة واحدة


خرجت من منزلي كعادتي وسرت بجانب الرصيف فوجدت رجل يجلس على الرصيف ويبدو عليه علامات التشرد وجدت امامه زجاجة مياه غازية محطمة لجزأين وهو يحدق فيهما ورأيت الصليب واضح على ظهر يديه فرفع راسه نحوي واصبح يحدق في أنا وقتها تلوت الشهادتين وبعدما اجتزته كنت اتوقع ان تستقر احدى حطام الزجاجة في ظهري ولبرهة تخيلت ما ستكتبه عني الصحف والمجلات عن شهيدة النقاب


وجمعيات حقوق الانسان والصحف والمجلات والتحقيقات التي ستنهال عني وعن اسرتي


ولكن ايضا تخيلت من انه قد يتحول لحادث عابر انتقامي بسبب ما حدث في مطرانية نجع حمادي وليس له اي أهمية وتخيلت ايضا اتهام البعض للنقاب بان النقاب هو سبب الحادث فقد يكون نقابي اثار حفيظته ولو اني لم اكن ارتديه لما حدث ما حدث فلوموها (أقصد أنا) ولوموا نقابها ولا تلوموا القاتل لذلك فمنع ارتدائه هو الحل الامثل لمثل هذه الحوادث


وتخيلت ان الحادث سيُرد الى ذلك المختل عقليا الذي لا يعرف ما يفعل


وتخيلت مشهد القس والشيخ يتعانقان تعبيرا عن سلامة الوضع بين المسلمين والاقباط


وتخيلت وتخيلت وتخيلت


ولكن ما أعلمه من واقع من ان أطفالي وأسرتي هم من سيدفعون الثمن وسيصبحوا يتامى وستتذكروهم لبعض الوقت في اطار الحادث ولن يلتفت لهم اخد بعد ذلك و يتهوا في وسط الحياة مثلهم مثل محمد اصغر ناجي من عبارة السلام


مثلهم مثل صغير مروة شهيدة الحجاب

وأتذكر صداقتنا القوية بعادل جرجس صديق زوجي منذ اكثر من عشرين عاما


واتذكر أستاذ ايليا والذي يطلب مشورتنا في معاملاته المادية ومشروعاته التجارية دوما وكلمته الشهيرة لي عارف ((انك ما بتكدبيش خالص))


واتذكرمدى تقبله ومزاحه مع صغيري يوسف ابني حينما احضر المصحف له وقال سمع لي ياعمو سورة البقرة فابتسم وقال انا مش حافظها يا ابني


ولما اقول له صلي على النبي يقول الف صلاة


واتذكر ماجدة جارتي القبطية حينما شاهدت صغيري يوسف وقبلته وقالت بسم الله الرحمن الرحيم


واتذكر ان زوجي ولد وتربى في حي شبرا وتزوجت انا فيه وكل جيراني تقريبا من الاقباط وعلاقتنا من احسن ما يكون بفضل الله على مر 9سنوات وانا بينهم احاول الحفاظ معهم على حقهم كجيران كما اوصانا رسولنا الكريم وللحق علاقتهم بي فوق الممتازة ولكن تُرى هل ستظل هكذا حتى بعد الحادث الاخير؟؟؟!!!!


أتمنى

وأتذكر مشاهد الشباب والشابات وهما متجمهيرين امام الكاتدرائية والكنائس المليء بها شوارع شبرا وهم يسيرون ببطء امام سيارتنا لعرقلة سيرنا ويحاولوا اقحامنا في مشاجرة معهم ((بيجروا شكلنا يعني ))

وكانهم بنار فرن بث الحقد في قلوبهم من جهتنا كمسلمين

ومرت البرهة لاستيقظ على الواقع


واصل الى مقصدي وارجع لأولادي بحمد الله واقبلهم واحكي لزوجي المشهد واحكيه لكم


يارب أحفظ بلادنا من الفتن وكن لنا لا علينا يارب


اللهم اكتب لنا الشهادة في سبيلك يارب

الثلاثاء، يناير 12، 2010

متلخبطة وسودة ومؤامرة


صدفة طبعا مظاهرات ومحاولات أقتحام وقناص فلسطيني يقنص جندي غلبان قاعد فوق في برج الحراسة مش عارفة الظاهر انا اللي ما باعرفش افكر

طب قولولي ليه ؟؟؟؟

هو اللي قافل الحدود ولا مانع الاغاثة ولا رافع عليهم رشاشات ولا عامل احتلال للبلد الغلبان دة ؟؟؟؟

طبعا مستبعد انه يكون اسرائيل هي اللي تعمل كدة طبعااااااااا ليه تعمل كدة ةةةةةةة بقى ىىىى ؟؟؟

هو يعني علشان تشغلنا باننا ناكل في بعض وتتفرج هي وترقص على اجسادنا ؟؟؟

لا طبعا الفلسطينيين يعملوا كدة خصوصا حماس اللي الفلسطينييين بيحبوهم وادوهم اصواتهم

وبعدين الدنيا تكرههم وخصوصا مصر والمصريين يعملوها امال ايه

يا ناس اعقلوا وفكروا بقىىىىى

علشان يبقوا في مزنق لا مصر طيئاهم ولا العرب طايئهم اصلا

ونتلوح كلنا عن الجدار الفولاذي دة ويبقى مبرر طبعا بيتعمل ليه لا طبعا مش كدة خالص امال ايه

يا ناس اعقلوا وفكروا بقىىىىىىىى
طيب يا عالم كام شهيد ماتوا بالقصد وعيانا بيانا على حدودنا مع اسرائيل الدنيا ليه ما اتقلبتش كدة وما طلعش ليه رجل الاعمال برضه صاحب القلب الكبير يتبرع لاهله اه نسيت صحيح دي نيران صديقة
يا ناس اعقلوا بقىىىىىىىىى وفكروا
ولا كمان موضوع نجع حمادي دة

غريبة جدا يبقى في التوقيت دة برضه مع الاحداث الاولانية دي

لا وايه بقى الاغرب اننا ما نسمعش عن الطفلة اللي تم اغتصابها والبهدلة اللي حاصلة هناك دي الا لما القيامة قامت هناك وشوية مسجلين خطر عملوا اللي حصل

رغم ان الخلفية ما كنتش على اثر ديني زي ما اتقال

وافتكر ان القيامة ولا قامت ولا حد قالها اعلاميا زي دلوقتي في الحادثة بقى اللي خلفيتها دينية بالتلاتة واللي فيها بنت اسلمت وتزوجت فعلا من مسلم وانجبت طفلة جميلة منه واخوها وقريبها ترصدوهم وانهالوا عليهم بالرشاشات برضه والنتيجة الزوج توفى وزوجته انصابت بخطورة والطفلة اللي ما كملتش سنة واحدة تم بتر ذراعها واتقال الخبر دة زي اي خبر رغم ان الخلفية دينية بقى طحن

الحادث طالما فيه واحد مسلم والتاني مسيحي خلاص الدنيا باظت ما ينفعش انها تبقى صدفة وبين كل تلاتين حادث عادي حادث ديني فيه متعصب من هنا او من هناك انما على طول تطفوللسطح حقوق الاقباط

هو يعني المسلمين في مصر اخر جمال وانسجام ما اللي بيسري عليهم بيسري علينا
ما احنا عايشين مع بعض من سنين طويلة


ما اعرفش احنا حصلنا ايه بس

الواحد شايف ان كل دة مؤامرة واضحة فاضحة توقعنا في بعض سواء مسلمين واقباط ولا مصريين وعرب وفلسطينيين

وعارفين اللي فيها وبرضه الحنجرة عالية بالهتافات الفاضية وماشيين ورا الكدب والمؤامرة زي القطيع

ياريت نصحى بقى ونعقل

حبوا بعض بقى

عقولكم اللي سابت مكانها وخرجت تتفسح رجعوها لاماكنها شوية ما حدش يقع في الخية يا مسلمين ويا اقباط مصر لو مسكنا في بعض هنفرجهم علينا لحد ما واحد فينا يخلص على التاني واللي هيتبقى هيبقى مجهوده قليل في الابادة مش هياخد في ايدهم كتير

يا عرب ويا مصر ويا فلسطين هنمسك في بعض وواحد هيخلص على التاني او نخلص على بعض وهما بردوا الكسبانين

يا عالم اصحوا

تصدقوا انا عندي احساس ان المؤامرة دخلت بيتي

ازاي ؟؟؟

النت دخل والحمد لله تاني يوم الكمبيوترات الاتنين يخربوا وابعتهم يتصلحوا ويتقفل عليهم المحل شوية ولما لقينا المصلحاتي طلع والدته دخلت المستشفى والحمد لله هيصلحهم ابتداء من غدا

طيب بكتب منين ؟؟؟

رأفة بحالي المصلحاتي شحتني كمبيوتر لحد ما يصلح كمبيوتراتي

طب دي مش مؤامرة بذمتكم ؟؟؟

ولا دي بقى اللي عادي ؟؟؟!!!
هااااااااااااااااا