الثلاثاء، يناير 29، 2008

الصدمة

السلام عليكم ورحمة الله وبركاته
ماحدش يتخض من العنوان
الصدمة دي كانت لي انا مش لحد تاني
اليومين التلاتة اللي فاتوا اتعلمت فيهم كتير اوي
طب اتعلمت ايه واتصدمت في مين
اقولكم
كنت بتجول في المدونات وطبعا مدونة تجر مدونة
والبوست اللي فات بالذات وبعد الهجوم الدامي عليه وتجني البعض علي بالهيافة وغيره
مع ان البوست جالي في الميل ونقلته وبس والناس تناولته بطريقة اكبر من حجمه حتى ان بوست غزة لم ينل هذا الحوار اللي وصل لبعض الاحيان للتدني فعلا
المهم برده البوست جرني للتعرف على اشكال وانواع غريبة وكتيرة من المدونات
ولا انكر ان فيه مدونات تستحق المتابعة بالفعل وانتظر من صاحبها موضوعاته بشغف
ولكن الصدمة بقى مش ان فيه مدونات اقل ما توصف به انها للفضى ايوة يعني لمدون فاضي والمدونة ليس لها هدف واضح الا ملء الفراغ بما لا ينفع واحيانا كثيرة يضرومش دي المشكلة كل واحد حر
ومش دي الصدمة
الصدمة اني شفت مدونات كان بس اول ما يتفتح الصفحة الرئيسية اجري من المدونة بسرعة لامتلائها بما يغضب الله من صور وكلام
واعوذ بالله منها ووللاسف اكون دخلتها من مدونة اخت احسبها فاضلة
مش دي برده الصدمة
الصدمة اني الاقي الاخت اللي احسبها فاضلة موجودة في المدونة بتاعت الملحد الفلاني ولا التي تتباهى بحب امريكا و اسرائيل ولا اللي تتباهى بالتجرا مثلا على العلماء والشيوخ والافاضل الذين نحسبهم على خير زي الشيخ الشعراوي مثلا او مصطفى محمود واللي تتمنى في مصر يعملوا يوم نحضن فيه بعض واللي حاطط صورة تسيء للحجاب مثلا ويبدا يكيل السب في الحجاب واللي يتكلم عن تقدم فلان واللي يتباهى بالتجرا على الثوابت الدينية وتدخل تشكرها وتحييها
هي طبعا وكل واحد حر في رائيه
بس ليه الازدواجية والنفاق
اقصد ليه تدخل او تدخلي لمدون كتب موضوع ديني عن الله وعبادة وتفضل تحيي وتقول جزاك الله خيرا وكلام مجاملة واطراء
وبرده تلاقيها تدخل للمدون او مدونة كاتب موضوع يسال ويتهجم فيه على الله او رسوله او ثوابت الدين وبرده تشكره على الجراة وتبدا في النقاش دة
هو دة اسمه ايه تناقض ولا ازدواجية ولا نفاق ولا ايه
صدمة اخرى
هو اني لقيت اني عندما اكتب تعليق عند مدون ويكون المدون مثلا كتب موضوع بيهاجم فيه الاخوان ولا بيهاجم فيه اي حاجة
واقول رايي ينظر الي اني مادام منتقبة او مدونتي تنادي بالنقاب من اسمها خلاص ابقى اخوان
وانا لا اخوان ولا غيره ولا لي في حكاية الاحزاب دي من اصله انا اؤمن ب واعتصموا بحبل الله جميعا ولا تفرقوا
اؤمن باننا كلنا مسلمون مصريون من المفروض ان كل الاحزاب دي تصب في بوتقة واحدة
وبما اني الكلام دة لا اشعر به تماما في مصر فحتى انتخابات مجلس الشعب ولا غيرها لا انتخب
لاني لا اوافق على فكر الاحزاب
والاخوان انفسهم لم ارى منهم ما ينفرني منهم ولم ارى ما اقول هذا هو انجازهم
فهل لاني منتقبة يجعلني اخوان
وحتى عندما اختلف مع مدون اومدونة في الراي
اراني اتكلم بمنتهى الاحترام فانا اضع امامي دائما ما يلفظ من قول الا رقيب عتيد
لكن لا يتقبل الاخر رايي وطبعا الكلام دة مش عامة دول البعض فقط
يعني البعض لا يتقبل النقض بصدر رحب ونتناقش فيه بكلام يرضي الله او حتى لا تعلق عليه خالص تحذفه او يحذفه وانتهى الموضوع
لما التدني في الحوار وحصد ذنوب
واذا لم ياخذ المدون حقه باسمه يدخل باسم مستعار او انيموس ويبدا في تكييل السباب والشتائم والقاء التهم جزافا بدون ادلة
والحمد لله انا لا اخاف من اي انسان انا اخاف رب العالمين واخشى من اي كلمة ان تلقي بي في النار سبعين خريفا انا مش اد الكلام دة
وعندما اوجه كلام اظهر باسمي ولا اتخفى والله على ما اقول شهيد
لما كل هذاا
لا انكر اني استفدت واتعلمت كتير جدا
واول شيء اتعلمته اني اتعرفت على اصحاب المدونات السوداء الذين يتخفون ويتلونون في المدونات التي نحسبها على خير والتي ادعو لهم من كل قلبي ان يهديهم الله لسواء السبيل
واتعلمت واتعرفت على مدونات تستحق ان اتابعها بشغف وان انهل منها العلم واسال الله لهم الثبات والصدق في النية والعمل
لكن لي رجاء وامل ان نحترم بعضنا البعض
لا انكر اني قمت بعمل اضطررت اليه حتى اجعل من اضطرتني اليه ان تصدر حكمها على نفسها بيديها
وما فعلته انها عندما كيلت لي السباب وقالت انها القت كلامي والذي كتبت لها فيه نصيحة منها ما يلفظ من قول الا لديه رقيب عتيد ونصيحة الاستفادة من الوقت ودعوت لها بالهداية في الزبالة
فاخذت كلماتها ورديت عليها في تعليق عند اخت وكانت برده داخلة تتلفظ بالفاظ عندها فطلبت من الاخت ان تلقي بردها في الزبالة وطبعا
نسيت انها كانت عملته في قبل كدة فكيلت السب لي واتى محامون ايضا كيلوا ما كيلوه وبعد ما انتهت فكرتها بما فعلته معي وانتزعت منها ومن اصدقائها حكمهم عليها
لكن طبعا ولله الحمد يعف لساني ان يذكر ويكتب ما كتبت لكن الغاية تبرر الوسيلة
فليتها تعلم ما كنت اريد ان يصل لها
وهو ان برده انا زعلت زيك كدة لما قلتي لي نفس الكلام
ولكن الظاهر انها لسة ما اتعلمتش نسال الله لها ولشباب االمسلمين الرشاد والهدى
وفي النهاية انا لا زلت اتعلم واعرف لكن هل من صدمات اخرى اتية
ربنا يستر

هناك 29 تعليقًا:

Dr.khaled يقول...

مذبذبين بين ذلك..لا إلى هؤلاء ولا إلى هؤلاء..

عافانا الله من النفاق العقدي..والعملي

Dr.khaled يقول...

ياريت لو حضرتك تلغي الموديريشن

Empress appy يقول...

معلش متتصدميش ومش معنى ان حد اختلف معاكى يبقى صدمه اوكى
عاوزة افهمك حاجه مش معنى ان فيه حد فكر غير فكرك يبقى تزعلى وتبدئى تكلميه بالدين مش كده يا جماعه وبعدين يعف لسانى ومش عارفه ايه بصى يا حبيبتى كله كلام حلو ويدخل القلب اوكى بس احنا بنتكلم بالثقافه العامه مش الثقافات المكلكعه والالفاظ اللى 80% من الشعب والناس اللى انتى منهم مش فاهمنها وانتى عندك رساله بتؤديها صح يبقى تكونى سياسيه شويه علشان متكرهيش حد في اللى بتوصليه وبعدين التدوين فيه بلاوى ومش معنى ان واحده هاجمت الاخوان تبقى وحشه هى شايفه منهم جانب وحش يبقى براحه نفهمها الجانب الكويس
انا رديت عليها ببساطه ان كل واحد لازم بيحكمه مصالحه الشخصيه وزى ما فيه اخوان كويسين فى الجماعه فيهم الوحش ومش معنى كده انه كله زى ما فيه محجبات بيسؤا للاسلام زى ما فيه محجبات محترمات وزى ما فيه مش محجبه محترمه فيه الوحشه يعنى احنا متنوعين واللى بيحكمنا اخلاق ودين والتدين مش بكام كلمه احفظهم واقولهم التدين انى افهم تعاليم دينى اخد بالدواخل مش معنى الكلمه من بره
انا بس بقولك كده اهديكى شويه اوكى وعموما محدش غلط فيكى انتى شخصيا لان ربنا مقلش كده وانا ايه او انتى اه علشان نقيم خلق الله سبحانه وتعالى انما احنا بنقيم اسلوب كلام وانا شخصيا اضايقت وعلى فكرة ابن اختى البيبى لما بيقول زباله وحمار والالفاظ دى بفهمه ان ده عيب لان لازم لسان يبقى نظيف فهمتى وجهه نظرى
وعموما انا عاوزة اخطب البيبى الصغيرة دى له لو مش مخطوبه يعنى ههههههههههههه اتمنى انك تكونى هديتى وفهمتى وجهه نظرى وحاجات كتير ممكن ابقى افهمها لكى علشان تهدى اكتر اوكى سلااام

صاحب المضيفة يقول...

اول تعليق


أولا


أحيكي على جرأتك في الحق وقوتك فيه

ثانيا : ليس من الحكمة والتحضر التعدي على ثوابت الدين باسم المدنية والتمدن


جزاكم الله خيرا على رؤيتك الوسطية الجميلة لكل من حولك

وفعلا هي حكمة سمعتها مرة

المهم خدمة الدين بطريقة صحيحة

لايهم مع مين ولا ازاي

المهم انه يكون وفق الشرع والدين فقط

دمت بخير

الطائر الحزين يقول...

إنا كفيناك المستهزأين

اللهم اهد عصاة المسلمين

اللهم اهدنا وانفع بنا

لكن ما دمت دخلت عند هذه النوعية من المدونات جمدى قلبك ولعل الله أن ينفع بك ويهدى بك أحدا يكون لك خيرا من الدنيا وما فيها

لكن بدون جدال

اعرضى فكرك ورأيك بهدوء


تحياتى وفقك الله

عاشــــــ النقاب ـقــــة"نونو" يقول...

اسفة جدا التعليقات نشرتها بدون الترتيب هراعي دة بعد كدة
ض/خالد
اول زيارة اتمنى ما تكونش الاخيرة
فعلا هودة اللي عاوزة اقوله عشان كدة كتبت البوست دةعلشان اتعلم المسمى دة
اما الموديريشن فللاسف وجدتها الطريقة الوحيدة اللي متديش فرصة للشتامين انهم ينشروا عندي كلامهم وطبعا بيبقى فيه شغف للزائر يتعرف على اللي شتم دة وممكن يكون من اياهم عافانا الله
فاخاف اساهم في التعرف عليه واخد ذنبه
اكرمك الله يا اخي

عاشــــــ النقاب ـقــــة"نونو" يقول...

استاذة ابي
اهلا وسهلا
هرد عليكي واحدة واحدة لان الظاهر انك ما فهمتنيش خالص
الصدمة مش في الاختلاف يا اخت ابي
الصدمة في التعامل مع الاختلاف ولو حصل ازمة بتبقى في كيفية ادارة الازمةدة اللي صدمني
طبعا انا عارفة ان مستحيل يبقى كل الناس بتحب افكاري ولا انا صح في كل حاجة لا طبعا بس انا شفت ان اللي بتختلفي معاه تبصي تلاقيه على طول وبدون مقدمات مني وبدون اي غلط في حقه عملته بدا الشتيمة ودة طبعا مش اسلوب راقي للحوار كنت مصدومة اني الاقيه من ناس المفروض زي ما بتدعي انها مثقفة لكن النت مخبي وراءه نوعيات كتير وانا كنت فاكرة على راي زوجي ان الدنيا مثالية بقى وبمبي
وطبعا لا انكر ان فيه مدونين لا غبار عليهم اكن لهم من الاحترام الكثير
وبعدين العقدة بقى اني الظاهر للجميع اني متدينة ليه لما المتدين او الملتزم لما يبدا يتكلم بالدين نقول لا عارفة ليه يا ابي لان اللي بتكلم معاه من جواهعارف كويس انه مقصر وانه عنده حاجة غلط فبيكابر انه ياخد النصيحة ويبدا بالاستهزاء والصوت العالي من السباب لان مش في ايده غيره
اما كلامي المكلكع والله دة مش كلامي دي لغة عربية والمفروض انها لغتنا كلنا وبتكلم برده ساعات بالعامية بس فسه الفاظ بتبقى احسن واسهل في توصيل اللي عاوزة اقوله لو اتكتبت بالعربية
وبحب اتكلم برده بالعامية وبحب اوي الطريقة الفكاهية في طرح الموضوع برده يعني بعف برده اتكلم مكلكع زي ما بتقولي ومش مكلكع وما بتكلمش حاجة ما بكونش فاهمها والا يبقى بكتب وخلاص واتصدم بقى في نفسي زي ما شفت في المدونين اللي بيكتبوا وخلاص
وعلى فاكرة انا لما بكون مش فاهمة حاجة لا اخجل من السؤال عنها والبحث علشان اتعلم ولا اخجل من اني اتعلم من حد اصغر مني يمكن يعرف حاجات اكتر مني
المهم اتعلم
والحمد لله بحاول اوصل اللي عوزاه بسياسة شويتين والله ووالله لا شتمت حد ولا عملت حاجة اخجل منها لحد ولا مسكت شومة على حدانا تكلمت بما يرضي الله وللاسف دي بقى الحقيقة والصدمة الاكبر اني لقيت التدوين مليان بلاوي زي ما بتقولي ولا يقتصر على الناس اللي فكرهم راقيومتحضر لكن لقيت برده العكس تماما
اما عن الاخوان انا ما انتقدتش اخت لانها انتقدت الاخوان انا مش اخوان والله ولا حاجة خالص ان ربة منزل وام عادية
بس بتعلم وبدون
قلت رايي في الجانب اللي اعترضت عليه وسالتها باحترامم انها لا تعلم ومين قاللها ان الاخوان بيكفروا وهل هودة سبب كرهك لهم طيب والعلمانية تبقى هي الملاذ
ودة بدون كلام صريح بتورية
بالعربي كدة يعني بالاشارة على انهاتتناقش في حوار واله لم اقصد اي اساءة بس علشان لاقوني منتقبة كيلت اخت اخرى الفاظ جارحة وبرده تادبت في ردي واعادت فدخلت مدونتها وعرفت ليه هي السباب اخدته سبيل للكلام طبعا بحكم الثقافة الغالب عليها المدونة واانتي فاهمة كويس دة ووجهت ليها نصح بطريقتها وبرده تمنيت انها تقولي كلمتين تحترم بيهم اني اكبر سنا منها لقيتها برده المرة دي بقى بتقول رميت التعليق في الزبالة وكلام فارغ كدة طبعا اتضايقت لاني كنت كاتبه فيه اية قرانية ولم تحترم ذلك طب احذفيه وخلاص لكن الطبع غلاب
ولقيت موضوع اخر لاخت عزيزة عجبني وهكتب تعليق لقيتها مكيلة السباب مرة اخرى
فللاسف الشديد اقتبست كلامها ودة مش كلامي اخدت كلامها وحطيته لها علشان تتدوق اللي عملته معايا وقلت اكيد لازم هتعلق عليه تقول رايها في اللي يكتب لحد زبالة دي
ولانها لسة بدري على بال ما توصل لتفكير زي دة طبعا اني اعلمها من غير ما اقولها اتعلمي
طبعا زعلت وبدات تشتم بقى
ودة كان السبيل قلتلها شفتي بقى انا برده زعلت زيك كدة لما قلتيلي كلمة زبالة دي بالضبط واللي قلتيه على اللي يقول الاظ زي دي اناا معاكي جدا فيه يعني نصبت مصيدة لها ووقعت فيها وحكمت وحكمتي انتي بنفسك والاخت الاخرى عليها
ولو كنتوا فكرتوا شوية وشفتوا اسلوبي بالمدونة والمدونات التانية هتلاقوني عمري ما تلفظت باي لفظ خارج والحمد لله
ولو كانت افتكرت كلامها كانت عرفت ان دة كلامها مش كلامي
وجابته لروحها وحكتوا وحكمة على نفسها
اما المحجبات اللي بيسئوا للاسلام او كدة
طبعا انا ضد الكلام دة تماما
لان من يسيء يا اختي يسيء لنفسه انا معاكي اننا سفراء لهذا لدين فعلا واحنا اللي بنعكس صورته يبق الحكم لازم يبقى عام المحجبة تسيء للاسلام واللي بتعري شعره وسافرة لا تسيء يبقى خلاص
لا الكل يسيء لنفسه الاسلام لا يحتاج ان تحسني انتي اليه بل تحتاجي انتي ان تحسني الى نفسك به
اما التدين انا مععاكي برده مش بكام كلمة احفظهم وبرده مش بحكم الناس
انتي متدينة ولا لا
دي علاقتي بيني وبين ربي لا دخل لبشر فيها
عند البشر بقى كلمتين اتعلمهم او لا دي حاجة تانية
ومعاكي ان الدواخل مهمة جدا بس برده الظاهر يعكس ما بالداخل
عمرك شفتي موزة من غير قشرة
انتي ممكن تشتري الموز من غير قشر مش كلنا بنلاميه لو ن غير قشر لانه فاسد وعف عليه الذباب برده
ولا ايه رايك
مين بتدفعي اكتر فيه
طيب انطباعك الاول عن واحدة مظهرها متدين واخرى لا لاول وهلة بيبقى ايه
وتتكلمي معاها ازاي
وكلامك معاها بيبقى زي اللي مظهرها غير متدين
دة من اول مقابلة للاتنين دول ومتعرفيهمش
اكيد نظرتك لكل واحدة فيهم مختلفة
اما اذا اكتشفتي العكس واللي مظهرها متدين طلعت فاضية من جوة يبقى العيب فيها هي اللي اتعلمت غلط او لسة
ولا ايه رايك
وانا ولا حاجة انا لسة بتعلم وهفضل اتعلمم ودة مش عيب
بس بحاول على اد مما اقدر اني احترم نفسي واللي حواليا ليكم راي اخر نتناوله باحترام متبادل او كفى المؤمنين شر القتالولا ايه
بالظبط كدة فهمي بقى الاخت ان لازم لسانا يبقى نظيف وان دة عيب خصوصا لو اتقال لحد اكبر سنا وما غلطتش فيكي قبل كدة وحتى لو غلط لو تكلمتي معاه بطريقة مهذبة هتجبريه باحترامك على الاعتذار ولاني استنفذت وسائلي معها اتعنت بكلامها اللي نرفزها وخليتها تحكم وتحكموا عليها علمتها من غير ما اقول لها تعالي اتعلمي
اتمنى تكوني فهمتيني
وعاوزة اقولكم كلكم حاجة اشهد الله عليها اني لم ادخل عندكم باي اسم مجهول لانتقد او اشتم
لان دة مش اخلاقي وانا مش اد عذاب الكلمة اللي تلقي بي في النار والله على ما اقول شهيد
اسراء بنوتي الصغيرة
دي مرتبطة للاسف بس ممكن نشوف العريس اللي انتي جايباه ونختار
وخطوتك عزيزة وجزاك الله خيرا

Unknown يقول...

اختنا عاشقه النقاب
عامله ايه اسئل الله ان تكوني بخير
شوفي حضرتك انا معرفش ايه الموضوع بالظبط بس هو في حاجه
لازم نعرف ان الاسلاميين بشكل عام كانوا بعيدين عن المجتمع لفتره او كل تحركاتهم حوالين بعض يعني زيتنا في دقيقنا زي مابيقولوا بس ده مش نهج النبي في دعوته النبي كان يكلم كل البشر هو في اسوء من ابوجهل وعتبه بن ربيعه والوليد بن المغيره ,مابالك بمسلمين يقولون لااله الا الله بس علي معصيه 0وده ناتج عن غياب الدعاه واديكي شايفه التضيق عليهم دلوقتي مابالك زمان وغياب التربيه الدينيه والوعي الديني0ودي حاجه اتئصلت في النفوس من سنين طويله للاسف زيها زي السلبيه والخوف 0
فلابد للداعي او صاحب الرساله ان يدخل برفق ويطرق الباب بهدوء حتي يجد من يسمعه0
وبعدين حضرتك في اميه دينيه شديده جدا فعلا يعني احنا عايزين نرجع نكلم الناس تاني في المسلمات البديهيه مثل الصلاه والعقيده والصحابه وهكذا.0
ثم ان النبي صلي الله عليه وسلم تعرض لجميع الانواع من البشر فلو ان النبي والصحابه بعد كل كلمه او مواجهه كانوا خدوا جنب مكنش الدين وصلنا ولاكان خرج اصلا بره جزيره العرب0
يعني مثلا ممكن انا اعلق عند حضرتك واستاذ عصفور المدينه ودكتور حر ودكتور خالد وخلاص وننغلق علي انفسنا وندور في دائره مغلقه وتبقي التعليقات كلها جزاكم الله خير وموضوع رائع وكفي الله المؤمنين القتال0
بس الدنيا مبتمشيش كده لا المفروض ندخل عند باقي الناس ونتكلم براحه ونوصل الرساله بهدوء واذي تعرضنا لاذي بالقول نصبر فنحن اولي الناس صبرا حتي نوصل دعوة الله حتي لو الي الحيتان في الماء حضرتك عارفه في مجموعه من المدونين علمانيين علي ملحدين علي شيوعيين منغلقين علي انفسهم يدورون حول بعض تدخلي عندهم تشوفي بيقولوا ايه يحدث لي ذهول والله مما يقال 0
في مره دخلت عند احدهم انا واليعقوبي وقعدنا نرزع في بعض ونخبط في الاخر وصلت انا لنتيجه ان مفيش فايده مع دول الا تضييع الوقت والجهد في ناس تانيه لو بذلت معهم نصف هذا المجهود لكان المحصله افضل0
ومش عايزين ناخد الناس من مواقف ونحكم عليهم بالامس وقف سهيل بن عمرو يحمس المشركين ضد النبي وكان بليغا حتي اخرجهم الي بدر فقال عمر للنبي دعني اقطع لسانه يارسول الله قال النبي صبرا ياعمر لعل الله يريك منه خير وبالفعل كان سهيل بن عمرو هو الذي ثبت مكه علي الاسلام بفصاحته 0
وعكرمه بن ابي جهل وهند بنت عتبه
هو انا بضرب الامثله دي ليه انا بس عايز اقول ان لو النبي تركهم او كسرهم لانتهوا وضاعوا ولكن الله نصر بهم الاسلام ومنهم من مات شهيدا ولا حرج علي فضل الله0
طبعا انا مش بدي لحضرتك درس بس انا بذكر حضرتك
وعايز بس اوصل لحضرتك ان الحجات دي طبيعيه ولازم الصبر والاحتمال وسعة الصدر
وعلي العموم حصل خير والاذي في طريق الدعوه من علامات القبول تقبل الله منا ومنك
واسف جدا علي الاطاله وجزاكم الله كل خير

عاشــــــ النقاب ـقــــة"نونو" يقول...

اخي صاحب المضيفة
جزاك الله خيرا على كلماتك
فعلا المهم خدمة الدين بطريقة صحيحة بس ازاي وهناك مدونون يسيرون بمخطط واحنا للاسف اغلبنا بيقع فيه ويجرونا لمدونات بصب افكار في ممنتهى الخطورة
انا وانت وغيرنا فاهمين عاوزين ايه وعاوزين يوصلوا ايه
المصيبة في اللي مش فاهم واللي ممكن ياثروا عليه وهو مش فاهم فيبقى تدوينا عند ه غلط لان دة هيجروا يدون عندي والناس تعرفه ودة الخطر
جزاك الله خيرا واتمنى دوام التواصل وجعلنا الله واياكم ممن يرفعون راية هذا الدين العظيم

عاشــــــ النقاب ـقــــة"نونو" يقول...

جزاك الله خيرا اخي الطائر الحزين على دعواتك
لكن انا خفت فعلا اعلق على هذه النوعية من المدونات لاني لست اهل للدخول في ذلك هناك من هم افضل مني لذلك
وايضا لاني خايفة بتعليقي عندهم ارتكب وزر اللي يدخل ععندي ويلاقي الناس دي جت عندي ويتعرفوا عليهم
لان اغلبهم لو اتكلمت معاهم ضد ارائهم يبداوا السب والشتم في الثوابت والرسول والله ودة لقيته عند احد المدونين دخلوا عنده نجسوا المدونة المليئة بالموضوعات الجميلة ونشرين كل ردودهم على كل الموضوعات بتاعته بطريقة كوبي وباست
حتى اني لم ارد التعليق ند هذا الاخ لان اسني هيبقى تحت النجس اللي كتبوه ولخوفي انهم يدخلوا عندي
ودة اضطرني اني اعمل حكاية عرض التعليق علي الاول احتراما لنفسي ولضيوفي
دة تفكيري البسيط
وبرده هحاول اعمل حملة دعوية للتعريف باللي بينكروه مدعم بالادلة النبوية والقرانية
بس يا ترى انا صح؟؟؟؟!!!!

Drop of the Ocean يقول...

اولا انا الاخت الفاضلة بتاعت الاحضان صح :):):):) ؟؟

اقتباس : "والبوست اللي فات بالذات وبعد الهجوم الدامي عليه وتجني البعض علي بالهيافة وغيره مع ان البوست جالي في الميل ونقلته وبس والناس تناولته بطريقة اكبر من حجمه حتى ان بوست غزة لم ينل هذا الحوار اللي وصل لبعض الاحيان للتدني "
بجد بجد ..سبحان الله !! نفسى نتعلم نفرق بين الاتهام والنقد ، وبين النقد الموضوع والنقد الشخصى ، ياحبيبتى التعليقات فى البوست اللى فات كانت نقد للموضوع مش للشخص ، وانا قولت كده بوضوح ، فى فرق لما حد يقوللى يادروب البوست ده هايف وملهوش لازمة فى الحياة وميهمنيش ، وفرق بين حد يقولى يادروب انتى بنى ادمة هيافة ...والفرق كبييييير ، ياحبيبتى مفيش اى هجوم عليكى لا دامى ولا مش دامى َ!!!!!!!! انتى بس متوقعة ان كل الناس تقولك "صح ، برافو ، جزاك الله خيرا"؟؟؟؟؟ عمر الرأى المخالف مايبقى هجوم ، وبالذات انه رأى مليان وراه فكر معين ، مش اعتراض لمجرد الاعتراض !!
وحكاية التدنى دى لحد اخر حاجة قريتها ماكنش فى تدنى !!! بالعكس انا اخر مرة مرديتش لأنى حسيت انك قلبتى الموضوع شخصى ، وبتقولى انى من ثمار المؤمرة ، وانى بمدح اليهود وافلام كده ملهاش اى دليل من كلامى ومش موجودة غير فى خيالك انتى وبس وملهاش اى علاقة بموضوعنا ، مع انى قولت بوضووووح ان الموضوع مش شخصى ، يعنى انا مش بتكلم عنك انا بتكلم عن سلوك الاف غير بيعملوه ، انتى المفروض تردى بأنك تدافعى عن السلوك اللى انتى بتتبنيه مش تردي بإنك تنتقدينى انا !!! شخصنة المواضيع بس هو لمحة التدنى الوحيدة فى الحوار .
الكلام جالك فى الميل ونقلتيه ، احنا عارفين لأنه جالنا ع الميل من سنة مثلا ، بس منقلنهوش لأننا مش مقتنعين بنقله ، انتى نقلتيه عشان انتى مقتنعه بأنه يستحق يتنقل ، وده كان حوارنا.
هناك فرق بين المواضيع الحوارية والمواضيع الغير حوارية ، فموضوع غزة ليس حوارى بالنسبة لناس كتيرة ، مين هيختلف على مآساة غزة وعلى عجزنا إلخ إلخ ... عشان كده محصلش حوار من طرفى على الاقل مش لأنه اقل اهمية لكن لأنه مش حوارى بالنسبة لى .

اقتباس :"الصدمة اني الاقي الاخت اللي احسبها فاضلة موجودة في المدونة بتاعت الملحد الفلاني ولا التي تتباهى بحب امريكا و اسرائيل ولا اللي تتباهى بالتجرا مثلا على العلماء والشيوخ والافاضل الذين نحسبهم على خير زي الشيخ الشعراوي مثلا او مصطفى محمود واللي تتمنى في مصر يعملوا يوم نحضن فيه بعض"
الكلام ده عليا صح ؟ نقطة وجودى على مدونات مش عاجباكى دى حاجة ترجلعى اولا ، وهوضحها فى النقطة الجاية ثانيا ، اما حكاية انى بتجرأ على مصطفى محمود والشعراوى ...سبحان الله !!!!!! هاتيلى كلمة واحدة من البوست اللى عنهم فيه تطاول عليهم ،هاتيلى كلمة واحدة بس !!!واضح انك قريتى العنوان بس وطبعا سيبتى خيالك يستنتج الموضوع ، وحكاية الاحضان دى ميفهمهاش غير ناس معينة !

اقتباس :"بس ليه الازدواجية والنفاق اقصد ليه تدخل او تدخلي لمدون كتب موضوع ديني عن الله وعبادة وتفضل تحيي وتقول جزاك الله خيرا وكلام مجاملة واطراء وبرده تلاقيها تدخل للمدون او مدونة كاتب موضوع يسال ويتهجم فيه على الله او رسوله او ثوابت الدين وبرده تشكره على الجراة وتبدا في النقاش دة هو دة اسمه ايه تناقض ولا ازدواجية ولا نفاق ولا ايه"
انا هشرحلك بس يارب تفهمى قصدى ، ياحبيبتى فى حاجة اسمها عقل متفتح ، انا مثلا لادينيه ، يعنى مش مؤمنة بإى دين موجود ، ومع ذلك بحب عمرو خالد جدا وبسمع كل برامجه الاسلامية وبشكر فيها فى كل مكان وبشتغل معاه فى صناع الحياة ، هل ده معناه انى منافقة ؟؟ انا بسمع مشارى راشد على طول وبحبه جدا وعندى كل اناشيده الدينيه ، هل ده معناه انى مجنونة؟؟؟ انا بحب ريتشارد داكوينز الملحد وبقرأله وبتابع اخباره مع انى مش ملحده ، هل ده معناه انى عندى انفصام شخصية ؟؟
لا ياحبيبتى ، ده معناه انى مش منغلقة ، وفى عقليات معينة بتعجبنى مع انى مش متبنية افكارها ، فى فن بيعجبنى مع انى مش منتمية للتوجه بتاعه ، معناه انى عندى مقاييس تانية للجمال والرقى والعمق غير مقياس بتاع (اللى زيى يبقى حلو ، واللى مختلف عنى يبقى وحش وهيخش النار) انا بحب الادب الروسى القديم بتوجهه الاشتراكى هو ادبى المفضل مع انى مش اشتراكية ، بحب الموسيقى العبرية مع انى مش يهودية ، بيعجبنى جدا انتقاد متحضر ضد اللادينين ، واناقشه واحاوره واتبسط جدا بالحوار ده ، انا مش حاطة نفسى فى صندوق ياعزيزتى ، بحب روحانية بعض المتدينين ، وعقلانية بعض الملحدين ، ووطنية بعض القومجين ، وتحضر بعض الغربيين ده مش معناه انى تبع اى حد فيهم ، ولا معناه انى عندى ازدواجية ولا انى منافقة
.

"ياخذ المدون حقه باسمه يدخل باسم مستعار او انيموس ويبدا في تكييل السباب والشتائم والقاء التهم جزافا بدون ادلة والحمد لله انا لا اخاف من اي انسان انا اخاف رب العالمين واخشى من اي كلمة ان تلقي بي في النار سبعين خريفا انا مش اد الكلام دة وعندما اوجه كلام اظهر باسمي ولا اتخفى والله على ما اقول شهيد ... اني استفدت واتعلمت كتير جدا واول شيء اتعلمته اني اتعرفت على اصحاب المدونات السوداء الذين يتخفون ويتلونون في المدونات التي نحسبها على خير"

يارب مايكون قصدك عليا ، لأن اول مرة دخلت غيرمعرف كانت غلطة تقنية ، تانى مرة مدخلتش ع الاكاونت عشان قعد يقولى
your request could not be processed
وانا كنت مستعجلة
لكنى وقعت بإسمى (قطرة من المحيط) اللى كل الناس عارفاه يعنى مش قصدى اخفى هويتى ياحبيبتى ، وانا بعلق فى مدونات صحابك كلهم بإسمى ، انا فخورة بكل كلمة بكتبها فى كل مكان ، وعمرى ماهخبى هويتى خباثة او خوف !!!!!!

اخر حاجة ، تقبلى نصيحتى :

النقد مش هجوم ، فبلاش كل ردودك تبقى دفاعية

النقد لكلام قولتيه مش معناه اى اهانه او عدم احترام ليكى

التفتح مش معنا ازدواجية

ياريت تثبتى انك انسانة متقبلة للنقد وتنشرى التعليق ده

خالد يقول...

عاشقة النقاب
انا داخل بس اقول لك برافو عليكي تفعيل الموديريشن
بس خلاص
.

.

لا مش بس خلاص
.
عجبني كمان ردك على ضاكتور خالد ( وبالمناسبة يقصد ايه بإنه يفهيص كلمة دكتور كدا ويخليها ضاكتور ) العلم عند الله وعنده حابقى افتكر اسأله .
.
كنت باقول ايه
.
آه لما قولتيله ساعات حد من اللي همة ناس مش ولا بد بيدخلو يحطوا كومنت بس عشان يشتموا وبطريق الفضول يدخل لهم الناس اللي همة كويسين فيشوفوا الحاجات اللي مش ولا بد اللي عندهم ويبقه هم كدا عملوا اللي عايزين يعملوه
.
انتي فاهمة حاجة مني
.
أصل انا مش فاهم
.
هوانا مين
سلام

مروة الزارع يقول...

حبيبتى أنا عاوزة أقولك كلمتين بس خلاصة الكلام كلة

متتصدميش

الكلاب تعوى والقافلة تسير

عشاق المثليين والعلمانيين هيفرق كلامهم معانا فى أية

............

على فكرة النت امبارح فصل وانا بكلمك وأستنيتة شوية مجاش روحت روحت عشان كنت أتأخرت جدا متزعليش

وحشتينى

:)

عاشــــــ النقاب ـقــــة"نونو" يقول...

اخي الفاتح الجعفري
الحمد لله بخير
كلامك صحيح بس انا ما اقدرش على اني اواجه ناس بتحسسني انهم ما بيسمعوش ونفضل نرزع وخلاص من غير فايدة
وما ينفعش اروح لواحد غير سوي مثلا واعلق عنده واقوله ربنا يهديك انت بتعمل كدة ليه وابص الاقيه قام مطين الدنيا عندي زي ما شفت في مدونات اخرى
لكن عندك حق بس انا هعم اللي اقدر عليه عندي بمدونتي لاني عارفة قدر نفسي وربنا يعينا واياكم على نصرة هذا الدين مرورك تاج على راسي فعلا

mohand يقول...

السلام عليكم

عايز اقولك حاجه بعد ما قريت البوست
وبعد ما قريت الردود

خدي من المدونات محاسنها

مش عاجبك تعليق شخص علي طوال في المزبلة ولو اني مش من الناس اللي بتحب تعمل كده


مش عاجبك مدونة شخص برضه حاجه من اتنين يا تقاطعيها وترميها في المزبلة
او تدخلي تتناقشي معاها

يني انا مثلا بعمل حاجه وسط بين الاتنين
انا عامل في الريدر بتاعي جروب كده مسمية المزبلة

اللي زي صاحبتك دي وناس تانيه كتير حاططتهم في المزبلة
بس بقراء كلامهم
من باب التعرف علي الفكر الاخر ومن الاخر عايزين ايه

اللي عايز اقوله يعني من الاخر
اول ما تقفلي الجهاز
تنسي كل اللي حصل في النت
الا الافكار اللي عجبتك تقلبيها في دماغك

وعموما دا رأي ولك مطلق الحرية

اه حاجه كمان
مش اي حد هيقبل النصحية
لو دخلتي مدونات ملحدين او لادينين او مثليين هتلاقي ماضيع اقريها
ومنها هتعرفي الناس دي هل هتقبل النصيحة سواء الدينية ولا المنطقية العقلية

واحب اقوللك عن تجربة
مش هيتقبلوا لانهم فعلا لامنطقيين
وبيكيلوا بمكيالين
يحبوا لنفسهم الحرية ولغيرهم السجون

تحياتي

عاشــــــ النقاب ـقــــة"نونو" يقول...

الاخت قطرةمن المحيط ليه فندتي الكلام على نفسك
انا لم اذكرك وان كان موضوعك دة استوقفني بعض الشيء
لكن برده انا نقضت الموضوع ومش شخصك
واشكرك على وصفك جزيل الشكر
نشرت التعليق اهو زي ما كتبتي لي فيه مش علشان كتبتي في الشات بوكس وكانك بتحاصريني نشرته بس علشان نقد بناء مش كلام وخلاص
اما عن موضوع الشيخ الشعراوي ومصطفى محمود لم اقصدك فيه بالمرة دة كان مثال للعلماء والشيوخ الافاضل وانا مش هسرح بخيالي وافتري عليكي ولا على احد بالكذب الفترة الماضية دخلت اكثر من 100 مدونة علقت في اللي رايت انه ينفع اعلق عندهم
اما عن موضوع غير معرف دة له كلام تاني خالص قصدت بيه اوضح لاخت فاضلة اتهمنتي ظلما في مدونتها اني دخلت عندها غير معرف وكيلت السباب والشتائم
فانا بستهجن هذا الاسلوب من اصله ومش طريقة دخولك اول مرة وعارفةانك تحت التعليق وقعتي باسمك والا كنت هدخلك ازاي
فواله ما كنتش اقصدك خالص
وبرده قصدت الشيء اللي كتب في الشات بوكس عندي كلمات مريضة وهو متخفي لانه لا يقدر على المواجهة بارائه المريضة
يا ريت تكوني فهمتيني
اما عن الحواار المتدني اللي كنت اقصده دة حصل في موقف معين واتفاجات به وبرده ليس لكي علاقة به تماما وشفته بين المدونين والمعلقين في مدونات اخرى ولم اقصدك به
ومتافيش بعرف افرق كويس بين نقد الذات ونقد الموضوع لكن بلاقي ناس كانت بتحول الموضوع لنقد شخصي
اما عن التدني اللي حصل في بوست نجمة داود واللي بسببه فعلت المديريشين هو حصل من حد واضطريت قبل ما اتفاجا بحاجة تانية اني افعل الخدمة دي وطبعا حطلي اشارة على تعليقه اللي حذفته انه هو اللي كاتب الكلام الفارغ ي الشات بوكس
نقطة وجودك في المدونات تصدقي وتؤمني بالله اني ما ادتش بالي انك بتدخلي مدونات من النوع دة خالص وفعلا انتي حرة دي حرية شخصية مش من حقي اقولك اوعي تروحي هنا لكن من حقي اقول حاجة مش راضية عنها اتعملت من غير ما اقول فلان بيعمل وهو بيعمل غلط يمكن غيرك يعرف انه ممكن يكون بيرتكب ذنب اما عن موضوع الاحضان دة مثلا وجه فيكي وزعلتي ما تزعليش ولو اني بجد فاهمة انتي عاوزة توصلي ايه من الموضوع دة بس مش موافقة على حاجات ودة حقي غيري فاهم بطريقة او باخرى دي حريةبرده اوافق او ارفض هذا السلوك بس باحترام ودة اللي نفسي يحصل
اما النقطة اللي ديتي ربنا اني افهمها فهمتها ومختلفة معاكي فيها انك انتي مثلا بتتعاملي مع فلان على اساس كل حاجة لوحدها انا مش موافقة على كفره بس بيكتب شعر كويس
انا عندي انا يعني نونو كتبت موضوع كويس بس مش معايا في فرضية النقاب بس حابة تقري عندي حاجة
صح فهمت اهوالحمد لله
وعرفة جدا ان النقد مش هجوم وكتير جدا بستفيد منه لكني اتهاجمت لمجرد اني منتقبة هو دة ايه عار يا جماعة وكلام كتير مش ويس انتي هتعلمينا الدين وكدة ولو اني لم افرض على احد وجهة نظر
كل واحد حر بس يبقى بلاش التسخيف وبلاش نقد يهدم انا ممكن اشوفك لابسة لبس متبرج اوي واقولك ايه اللي انتي عملاه في نفسك دة هتروحي جهنم الحقي نفسك
وممكن برده اقولك شفتي زمان كنت بلبس القصير دة وبعمل شعري كدة ومااعرفش ايه بس لما لبست النقاب حسيت اني خسرت قربي من ربنا بالزي الاسلامي دة
ايه رايك ممكن تقبلي باي طريقة
طبعا التتانية فيها احترام وترقق
هوة دة اللي اقصده
ودة للاسف لقيته في بعض المدونات حتى يا اخت السخرية وصلت لحد اني لو قلت انا لله وانا اليه راجعون يتهكمون ويرددون هوة فيه حد مات ولا حاجة
دة كلام
اسلوبي غير دفاعي بالمرة
انا بوضح مقصدي فقط لان البعض زيك كدة بيفهمني اني مسكته ونزلت فيه نقد
على فكرة زوجي اكبر ناقد لاذع لي ومش بسهولة بيعجب بكلامي
وبقبل كلامه جدا وبتعلم من كل واحد فيكم ودة مش عيب
واهو كدة اثبتلك اني بتقبل النقد بنشري للموضوع ولا لسة
على فكرة كنت هنشره كدة كدة تقبلي كلامي وحقك علي لو كنت زعلتك من غير ما اقصد

عاشــــــ النقاب ـقــــة"نونو" يقول...

بابا خالد الله يبارك فيك
تلميذتك يا افندم
وحلو الشغل بتاع الشات بوكس دة
وفاهمة انت عاوز تقول ايه هو اللي عوزة اقوله وقلته قبل كدة
انت خالد فتحي اللي انا مدامه والبنوتة الحلوة دي بنتنا الصغيرة
ربنا يخليك لنا
ابقى اسال الضاكتور خالد انت بقى

dr.Muslim يقول...

السلام عليكم ورحمة الله

أولا أحييكي أختنا علي الموضوع الطيب

ثانيا أنا قرأت كل مواضيع مدونتك ووجدت أن كل المواضيع ذات أهميه وفعلا مواضيع رائعه

بل وقمت بنشر الموضوع السابق((بتاع نجمة اسرائيل))

الي في واحده دخلت وقالت انه موضوع ((هايف))

وأنا عايز أقول لحضرتك شئ يا أختي

في ناس انتظري منهم أي شئ

يعني واحد بيقلد الغرب في كل شئ في حياته وبيسمع أغانيهم بل ويتخذ من الكفار مثلا أعلي

ماذا تنتظرين منه؟؟

أكيد طبعا وجود نجمة اسرائيل علي جهازه شئ عادي جدا بالنسبه له لأنه تخطي المرحله دي خلاص..

وأنا لم أحدد بكلامي شخص ما


انما هذه هي الحقيقه

وهضرب لحضرتك مثال

واحد لابس قميص عليه عليه علم أمريكا...هل تستكثرين عليه أن يضع

نجمة اسرائيل علي جهازه؟؟؟

أكيد المعني وصل

جزاكي الله خيرا أختنا وفعلا مواضيعك كلها ماشاء الله طيبه

اه صحيح قبل ماانسي....النقاب لا يدل علي انك اخوان....لسبب بسيط أن الاخوان لا يرتدون النقاب اساسا((أقصد ليس العام بين معشر الاخوان المسلمين النقاب))

نسأل الله لهم الهدايه

"النجم القادم" يقول...

السلام عليكم
بوست جميل ربنا يباركلك يااارب
وزى مافيه ناس تسى للاسلام زى مافيه ناس تدعوا للاسلام بطريقة جميلة ومش عاوزك تتصدمى هو ده الواقع المرير الا بنجده عندما نمر على المدونات اذ نجد فلان فى المدونةدى عمال يشكر ويمجد وفاجاة تجده فى مدونة تانيه عمال ينافق ويناقض
حسبنا الله ونعم الوكيل
اللهم اعفى عنا وارحمنا يارب العالمين

بس ليا رجاء انا اتخنقت من الموديريشن
بس زى ما انتى بتقولى
يبقى ده حقك

وربنا يكرمك يارب
واتمنى تكرار الزيارة الميدانية التى قد قمتم بها الى مدونتنا جزاكم الله خيراً

محب الدين يقول...

السلام عليكم ورحمة الله وبركاته
أولا حضرتك زعلانة ليه من اللي يكيلك السباب ... المفروض ده ميزعلش خالص لأن ده لو دل على شئ يدل على شخصية هذا الإنسان وكما قيل فإن كل إناء بما فيه ينضح
ثانيا بالنسبة لإنصادامك بنوعية هؤلاء البشر ... فهذا شئ طبيعي ولابد أن يوجد في البشر ومهمتك ومهمتي ومهمة كل مسلم صادق أن أن يخرج هؤلاء الناس مما هم فيه من التيه والغفلة انظري إلى قول الله تعالى محدثا رسوله صلى الله عليه وسلم " وثيابك فطهر " كان للأستاذ سيد قطب رحمه تعليق جميل جدا على هذه الأية قال
" وطهارة القلب والخلق والعمل ...... أي طهارة الذات التي تحتوي الثياب هي الحالة المناسبة للتلقي من الملأ الأعلى وهي ألصق شئ بطبيعة هذه الرسالة لأنها ضرورية لملابسة الإنذار والتبليغ ، ومزاولة الدعوة وسط التيارات والأهواء والمداخل والدروب وما يصاحب ذلك ويلابسه من أدران ومقاذر وأخلاط وشوائب تحتاج من الداعية الطهارة الكاملة كي يملك استنقاذ الملوثين دون أن يتلوث وملابسة المدنسين من غي أن يتدنس وهي لفتة إلى أنه يجب أن تقام الدعوة بين شتى الأوساط وشتى البيئات وشتى الظروف وشتى القلوب " اهـ بتصرف مني

جزاكم الله خيرا على دعوتك إلى الله وأسأل الله لي ولكي ولجميع المسلمين الثبات والرشاد

Empress appy يقول...

حبيبتى فهمت قصدك من بدرى انا بس كنت بحلل الموقف اللى حصل بينك وبين الناس التانيه انا شخصيا مفيش بينى وبينك حاجه فاهمه ولما قولت على نونيمس عند نسرين مقصدكيش انتى ليه اخدتى الكلام عن نفسك ما علينا عموما انتى لكى وجهه نظر المفروض احترمها واقبلها لان ده الصح اوكى وعموما برضه الفاتح الجعفرى بيعجبنى ردودة جدا ورده ده عجبنى لانه فهمك اللى عاوزة بس بطريقه تانيه

واخده عليكى حاجه واحده بس مش شرط يا قمر اللى يدخل عند العلمانين والملحدين مع انى شخصيا معرفهمش يبقى بيشجعهم ممكن يكون بيقول رأيه فى نقطه معينه بس وفيه ناس فعلا بتشجعه وانا ضدهم طبعا بس عموما انا المدونات علمتنى انى اقرأ كله وافكر بعقلى وبدينى وبعدين احدد واكيد زى ما كل مدونة فيها مساوئ اكيد لازم نتعلم منها حاجه حتى ابسط حاجه اننا منعملش غلطهم صح ولا غلط ولاخر مرة بلاش تزعلى نفسك من حد لان زى ما كتير قالوا لكى هما مش بينقدوا شخصك وغير كده انا مقصدش انك بتقولى كلام مكلكع انا اقصد ان يكون فيه بساطه شويه فى الكلاك وفيه ناس فعلا بتتعمد الكلكعه دى يعنى علشانن تقدرى توصلى ردك وعموما انا اصلا متابعكى من اول مشكلتك مع فانتازيا واستغربت من رده فعلك انتى ونسرين عموما عندى انا دى متزعليش كلنا اخوة فى الله

عاشــــــ النقاب ـقــــة"نونو" يقول...

مروة الزارع هوة دة خلاصة القول فعلا
يا حبيبتي ما اقدرش ازعل مننك بس طمنيني عيكي


اخي خطاب جزاك الله خيرا بس والله انا مش عارفة هو جرى ايه للشباب بس برضه الواحد بيطمن لما بيلاقيي ناس زي حضرتك يبقى لسة فيه خير وربنا ينصر هذا الدين العظيم


اخي مهند حضرتك فعلا كلامك صح انا في الول قلت هقاطع بس رجعت وقلت زي الاخ جعفري ما قال احنا فين من الرسول واللي شافه يبقى لازم يكون لنا دور ايجابي برضه ونعمل اللي نقدر عليه اللي عاوز يتناقش بادب واحترام نناقشه واللي هيسب ويشتم فالشتيمة ما بتلزقش واهو ثواب بناخده من غير تعب
والرد اللي يتعدى حدود الادب برضه احتراما لزواري فيه اني اعرف صاحبه واحذف تعليقه من غغير ماا يتنشر احتراما لضيوفي بس هرد عليه برده
وان شاء الله ربنا يعلي راية الدين دة هم بيدونا مادة خصبة ندون فيها حقيقتهم ونكشف الاضمحلال الللي هم فيه وربنا هيعينا ان شاء الله
بس فعلا انا لقيت منهم ان لم يكن كلهم تقريبا طرش ما بيسمعوش غير صوتهم بس اللي داخل يقرا دة همنا عليه اهو يشوف ويعرف ان فيه برضه حاجة اسمها دين ما نطمسهوش زي ما هم بيقولوا
ازاي افصل الدين عن الدولة انا مش فاهمة طيب احكم بما يرضي الله دي تتحقق ازاي
ربنا يعينا كلنا على مقاومة التخلف والافكار الشاذةومرض حب الغرب بمساوءه

عاشــــــ النقاب ـقــــة"نونو" يقول...

اخي النجم القام عندك حق بس مهمتنا بقى التوعية للي ما يعرفش وبيتعب من غير ما يعرف مساويء اللي بيتبعه
ومعلش اسفة اني تعبتك بس الموديريشن شال عني انا كمان اني اتخنق
شرفت وتوجت مدونتي بزيارتك

عاشــــــ النقاب ـقــــة"نونو" يقول...

اخي محب
كلامك شجعني فعلا وهنفذه ومحتاجين يدك معانا
وفعلا زي ما حضرتك قلت كل اناء ينضح بما فيه اوعي تحرميني من ارائك وتعليقاتك الثرية اللي بطمني فعلا والحمد لله انكم بخير
جزاك الله كل الخير

عاشــــــ النقاب ـقــــة"نونو" يقول...

الاستاذة ابي
حبيبتي انا برضه لما تكلمت على انونيمس قصدت حد تاني مش حضرتك قصدتني انا بلقب لقبتهوني وشكرتها عليه
بس مش عارفة اسلم من لسانها للاسف الله يهديني انا لحسن بتزعل
اما ما تاخذيه علي هوما اخذه عليكي ايضا ولكي مطلق الحرية اختي واتمنى دوام التواصل بينا
وهدخل موضوعك اقول رايي
دمتي بخير

خالد يقول...

امسك
.
.
بتقولي للأخ محب الدين اوعى تحرميني ؟ آآهاهاأأااا
اعتذرلك يا محب بالنيابة
.
هم كدا الستات يقعدوا يكلموا بعض ولسانهم يتعوج وابص الاقيها بتقوللي ياختي

لا حول ولا قوة الا بالله
.
أرجو لك مزيد من التفاهم مع كل من يدخل معك في حوار وطبعا لا تنسي قول الله سبحانه وتعالى أعوذ بالله من الشيطان الرجيم وجادلهم بالتي هي أحسن وقوله سبحانه وتعالى ولو كنت فظا غليظ القلب لانفضوا من حولك

.

عندي ليكي بقه موضوع سوقع ياريت تدوني فيه بوست يكسر الدنيا وهو التزام المرأة التي لا تحتاج الى العمل بالمنزل
.
يالا أي خدعة
سلام

محب الدين يقول...

ياعم مش مشكلة
هنعمل إيه
ياللا
واحنا نقدر نتكلم




واتا حاسس إنا الموضوع اللي أشرت إليه ده وراه حاجة... ماشي منتظرين الموضوع

عاشــــــ النقاب ـقــــة"نونو" يقول...

معلش يا اخ محب الدين دي غلطة والله بعتذر عنها مش مقصودة
يا حاج خالد انا عرضت السخان بتاعنا للبيع ومش عوزاك مطرحه خلاص
ماشي يا بابا
ليك مدونة برضه

الشريف / جمال طة يقول...

الله يحفظك ويرعاك ويكثر من أمثالك

اصدق أمنياتى لك بالتوفيق