الخميس، مارس 27، 2008

يا سائقي التاكسيات شوية رحمة







السلام عليكم ورحمة الله وبركاته

مبدئيا احب انوه عن نزول بوست جديد على هذا الرابط والكل مدعو للمشاركة
بوست جديد اخر


بطلب منكم دعم المدونة الجديدة بوضع روابط لها في مدوناتكم والدال على الخير كفاعله
========================================


القصة طويلة وبالعامية بس كلها عبررررر



الزمان والمكان المدرسة صباحا من سنة تقريبا

الاشخاص المدير واللي بتاخد الورق واهم شخصية بالنسبة لها طبعا البواب وهي


هي كدة خلاص طب الباص بكام ومواعيده امتى

الادارية اللي بتاخد الورق مبدئيا 600جنيه والمواعيد حسب سكنه

هي احنا قريبين من المدرسة يعني حوالي 25 دقيقة مشي

هي يبقى هيركب اول واحد الصبح المدرسة مواعيدها 8 وهيركب بدري بس هيروح اول واحد

بس لازم تدفعي الفلوس كلها

هي في سرها لسة مش موجودين دلوقتي هنشوف صرفة بعدين

طيب بلاش الباص كفاية المصاريف هي كام

هي مبلغ كدة اقل مدرسة في المنطقة للعلم يعني ودفعت القسط الاول الحمد لله

المنظر يتحول عند اهم شخصية هي يا عم البواب عاوزة تاكسي كويس ومؤتمن وتخلي بالك ابني اول مرة يطلع من البيت لا خرج لا يمين ولا شمال

هو عندي واحد معاه ملاكي بس هياخد اكتر شوية 60 جنيه يعني بس هتطمني على الاخر

هي

مش مشكلة هو الطبيعي كام اصلا

هو50 جنيه

هي ماشي موافقة هنتصل بيه وزوجي يتعرف عليه ويجربه شوية وهو رايح جاي من الشغل

جت المدرسة والراجل السواق كان في التجربة ما تتخيلوش

يوم المدرسة الساعة 7وربع كان على الباب

الزوج بعد كام يوم قاله تعالى 8 الا ربع احسن مش عوزينه يحضر طابور الذنب لحد ما يتعود على المدرسة وكمان هاته بدري شوية عن موعد الخروج علشان البهدلة في الخروج من المدرسة

تمام اوي لفترة شهر لحد ما جابه زباين بقى يجي 8 ونص ومرة 9 الاربع والنصيبة بقى يجيب ا لواد مرة الساعة 4 يقول اصله كان بيلعب عند الحضانة فروحت اعمل دورة لحد ما البواب يدور عليه

يا لهووووووي

الواد ياعيني من ايده دي لايده دي باعترافه بنفسه بانه بيشخط فيه

طيب يا مدام يا استاذ [هي والزوج] اهم حاجة عندي المواعيد طيب حاضر

هي ملتزمة اوي لما الواد يغيب يوم زوجها يتصل او تبعتله رسالة ملتزمة طبعا تخاف يغضب عليهم

هو اليوم اللي ميجيش فيه ولا حت رنة رنة واحدة زي ما معودينه هو يرن و هما يكعوا المكالمة

ولما مجاش ايه يا عم معلش اصلي في المطار طب ما تقول قبلها نعمل حسابنا

معلش اصلها فجاءة طب ماشي هتجيبه انت بقى

اه طبعا هتصرف

يجي الموعد وهي وا بوه بالتليفون

هو الواد لسة ما وصلش خلاص هبعتله ابني اصلي في المطار

يا لهووووووووووووووووووووووووي

الوادفي المدرسة والساعة 4

الواد وصل الحمد لله مين جابك يا حبيبي

دة عمو عمو مين مش عارفة تفهم

راحت المدرسة مين اللي جااب الواد يا عم البواب

ما اعرفش دة البواب

للسواق هي برضه بالتليفون

انت بعت مين ياخد الواد

هو ابني راح ما لقاش حد مشي

هي بالبساطة دي طيب مش تتصل بي تقولي ابنك مش لاقيه

يا لهووووووووووووووووووووووووووووي

المهم الحمد لله ربنا عالم بحالي

الواد يجيبه متاخر ويوديه متاخر خلاص اشترينا عربية نوديه احنا وهو يجيبه

بس لا بلاش شوف غيره واجازة نصف السنة جاية ندور فيها ماشي الراجل بقى شكله يخوف فيه حاجة غلط بلاش منه احسن

المشكلة اللي تفرس

لما يتاخر وتتصل هي بيه يفضل ما يردش الا وهو ادام الباب ويقولها افتحي هتلاقي ابنك ادامك احنا اهو

يا لهووووووووووووي

تيجي المدرسة ولقيت واحد وجيت اقوله يا عم هتجيبه بس وابوه يوديه اصلي انا مظبوط والاهالي لا بدوخني

هو لا مش هينفع اصل افرضي هو ما جاش في يوم اعرف ازاي انا

هي متخافش انا هتصل اقولك طبعا والبواب كمان عارف الواد وفصل الواد ادام باب الخروج على طول

هو لا ياستي مش هينفع

اجيبه واوديه لا بلاش انا كل اللي معايا 25 عيل يعني مش كتير مش زي اللي كان معاكوا بياخد عيال كتير ويقصر

هي طيب بكام يعني

هو 50 جنيه

انا ماشي مش مشكلة انا كنت هخليك تجيبه ب30 ما فرقتش كتير

بكرة النصف لتاني من المدرسة رن الزوج محاولا اقناعه انه يجيب الواد بس طبعا ابى ورفض وللاسف وافقوا

هوبس ا لكلام دة مش بكرة علشان ملتزم بولاد الناس ولسة هيضبط اموره على الزبون الجديد اللي هو ابنها يعني


طيب تكون عندنا 8الاعشرة كدة وعاوزة الواد يجي بدري عن موعد المدرسة واخدت اذن من المدير بنصف ساعة بدري بحالها ماشي من يوم الاتنين خلاص ماشي

النهاردة الاتنين صباحا طبعا تليفون لحضرته يفكروه بيهم

هو حاضر جي 8الاعشرة بالضبط هتلاقيني ادام الباب

الساعة بقت 8 وعشرة والزوج بيتصل هتيجي ياعم الساعة بقت 8 وعشرة

هو حاضر والله يا عم الساعة 8 لسة انا جي اهو

الساعة 8 وتلت الزوج قال خلاص هودي الواد انا

وفجاءة نلاقيه جي بتاكسي مش بعربيته وبيقول معلش اصل العربية المتسوبيشي لانسر الزيروالملاكي[بيجيب مصاريفها اصله]كاوتشها قفش وما اعرفش ايه

الزوج


لا معلش هوديه انا المفروض حضرتك كنت قلت لاني منتظرك وانا اتاخرت عن شغلي اللي اصلا موعده 8 اشكرك مش عاوزين

هو ينظرللزوج شظزرا طب خلاص ومشي

هي للزوج

مين هيجيب الواد

الزوج

انا هتصرف

الحمد لله زوجي بيجيب الواد ووينتظر بعد الشغل ساعة يعوضها

بعد شهر من الحياة المطمئنة يتلغي النظام دة وترجع ريمة

يا لهووووووووووي تاني

من 3 ايام زوجي شاف سواق تاكسي بيجيب ولدين اولاده بس عرض عليع يجيب الواد قالللللله ماشي يقف هنا جنب ولادي وما تخافش عليه

بصراحة ما كانش بيمشي قبل ما يسمع ان الواد دخل لما بقفل الباب اصلي دور اول

المهم الواد مش هيروح الزوج يتصل قا ل له الواد مش رايح يبقى مش في المدرسة مش هتجيبه

هو الله يخليك اشكرك انك اهتميت واتصلت سلام سلام

امبارح بقى

الزوج ساب التليفون في البيت رنيت الزوجة على السواق الساعة 2ونص و3 الا ربع و3 الا عشرة و3 و3 وص وووو

حد الساعة جت 4 اتصلت بقى ردهو عليها قالت


لسيادته الواد فين

هو ما اعرفش هو راح النهاردة ؟؟؟ ما وقفش مع ولادي على الباب والاستاذ ما اتصلش بي يقولي انه راح

لا بقى هو هيتعبنا معاه ليه قولي لزوجك يشوف حد غيرنا [نظام قابلوهم بالصوت قبل ما يغلبوكوا]

الزوجة

طب ماشي الواد يعني اروح اجيبه ؟؟؟الساعة 4 وابني في المدرسة لسة بس انا ما اعرفش ان الاتفاق انه هيتصل يومي يعرفك الواد راح اعرف انه لو الواد مش هيروح هنا هيتصل

هو كتر خيره لا هروح اجيبه ما تشغليش بالك وما ردش على باقي الكلام

طبعا لكم ان تتصوروا كم القلق من الساعة 2ونص لحد 4 وخمسة و هي بتموووووت من الباب للشباك

المهم العربية جت الواد نزل منها الحمد لله وصل

ولقت البيه السواق بيقول للواد بارف انزل وهو وراه وبيقول للواد خبط على الباب

فتحت للواد ولقيته هيكلمهابقى

كلمته من ورا الباب اذا كان عاجبه يعني

هو ابقي قولي للاستاذ يشوف غيرنا علشان فضلنا ندور على الواد ربع ساعة

هي

طب ماشي ايه حضرتك مش سامعة ليه ؟؟؟

تاني حضرتك بتقول ايه ؟؟؟

تسمع صوت محرك العربية المحترم قال الكلمتين وجري

حسبي الله ونعم الوكيل وترزع الباب [ ما لوش ذنب اعل ايه تطق يعني]

الحل بقىتروح تجيب الواد وتسيب اطفالها لوحدهم يرعاهم ربنا وتاخد ننة على ايدها لحد ربنا ما يكرمهاوتسوق

عربية صغنتوتة من لحم الحي تجيب ابنها فيها

والشهر اللي فاضل ربنا يتولاهم برحمته

يا سائقي التاكسي واللي مخليين الملاكي لتوصيل العيال المدارس وعليهم سائقي الميكروباص خصوصا اللي ظلمونا منهم

وظلموا صاحبة القصة دي

تبا لكم هترحمونا امتى؟؟؟!!!!!

حسبنا الله ونعم الوكيل

هناك 20 تعليقًا:

مشتاق لله يقول...

اسئل الله لكم ولنا الصبر والمعافاة واعاننا واعانكم علي ديننا ودنيانا

فرنسا هانم يقول...

كتير من صديقاتى اللى عندهم اولاد بيرحوا مدارس بالتاكسى بيعانوا من نفس المشكله
ولان السويس عندنا صغيره
فأن المشكله دى مش كتيره زى القاهره
عموما
ربنا يهدى الكل
وتحياتى لكى
ومبروك العربيه

الراقص مع الذئاب يقول...

السلام عليكم

ربنا يكون في عونك
الامر صعب ومتعب اوي
بس اكيد في ناس كويسين هتلاقوهم إن شاء الله
او الحل التاي إن هي تقعد من الشغل وتتتفرغ للأطفال
بس دلوقتي الحياة ومتطلبتها لا تسمح بذلك

ربنا ييسرها علي المسلمين

ِِAdem El-Mahdy يقول...

ربنا يكون فى عونك يا رب

و انا شايف ان اتوبيس المدورسه احسن

عاشقه الفردوس يقول...

لاحول ولاقوه الا بالله

والله اعصابي تعبت


وانا في الثانوي افتكر ان مدرستنا كانت بعيده مش اوي
بس برده امي وابويه خافو عليا وقالو لا المشوار طويل عليكي وانتي ثانويهووقتك مهم_ والله ياناس مش هتفرق ده احنا مبنصدق نضيع وقت-
المهم
اتفقوا مع تاكسي ومعايا بنتنين معايا جيرانا

وفي الاول انتظام مافيش بعد كده

تاني شهر لا ياهانم المبلغ بقي 45

ده من حوالي كده 7 سنين

قال ماشي

بقي يرجعنا بدل الساعه 3 لا نرجع خمسه لاننا مستنيين سيادته
قولت لامي تقول لابويه اني مستعده اخد 30 جنيه بس واوصل نفسي ارحم

هههههههههههههههههههههههههههههه


وخدت التلاتين جنيه
ودي رحلتي من التاكسيات


حسبنا الله ونعم الوكيل


خلل في المواعيد

ودي من علامات النفاق

اعذانا الله منها واياكم

عمر المصرى يقول...

السلام عليكم
أعتقد أنكوا دفعتوا اتصلات أكتر من اللى هتدفعوه للأتوبيس
الله يكون فى عونك

Ahmed Al-Sabbagh يقول...

كان الله فى عونك

بس جميل وصادق

تحياتى

احمد

محب الدين يقول...

السلام عليكم ورحمة الله وبركاته

يارب الولاد الأربعة يكبروا بسرعة ويريحوكم من التاكسيات دي

بس ده انت كمان هتكبروا!!!

لأ خليكم كدة احسن


يارب ييسر لكم بسواق يكون ابن حلال

اسلوبك البسيط في الكتابة ده هو احسن حاجة

جزاكم الله خيرا

monaliza يقول...

ربنا يعينك ويقويكى

امام الجيل يقول...

ربنا يهدى
هى المشكلة عدم الانتظام بقى سمة منتشرة بينا

فما بالك بقى ببتوع التاكسيات والصنايعية وهكذا

مشكلتهم انهم مش بيحطوا نفسهم مكان الناس
ويحسوا بمشاكلهم
واثر ده عليهم

ربنا يهدى

الطائر الحزين يقول...

منتهى البرووووووووووووووووووووود

بكام العربية علشان لما يبقى فيه حى اقطع من لحمة واحاول اشترى



بارك الله فيك

أم أحمد المصرية يقول...

صديقتي العزيزة ولو انك ما بتساليش من زمان :)وحشتيني اما بالنسبة للقصة دي فهي مكررة يا عزيزتي و الحل من واقع تجربتي مع احمد و اخواته سيارة خاصة ملك حضرتك مهما كانت رخيصة او صغيرة او قديمة انا شايفة ان احد واجبات الام العصرية انها تتعلم السواقة و لا الحوجة لإمارة السواقين اوص الاولاد الصبح و انا رايحة الشغل و اجيبهم و انا مروحة حتي لو انتظروا شويه في المدرسة و في الصيف بوصل النادي و اجيب من النادي و ما الام الا سواقة محترفة و الي يكبر زي احمد كده اطلعه برا القائمة و يروح و يجي لوحده مش بقي راجل و لو انه الايام الماضية تعرض لآصابة ملاعب اضطرتني اوصل الدروس الخصوصية كمان و لا عزاء للمرتب اللي بقسمه بين محطة البنزين و الميكانيكي و الكهربائي و بتاع الريداتيرات

عايش ولكن يقول...

ربنا يهدينا ويهديكوا
ويهدى بتوع التاكسى
بس الموضوع كبير وانا توهت فيه
تحياتى
علاء

nonoymm يقول...

السلام عليكم اكرمك الله اخي مشتاق على دعائك وربنا يتقبل
=================================
اختي فرنسا ربنا يهدي يارب والله يبارك فيكي
===================================
اخي الراقص مع الذئاب
هي متفرغة من زمااااااان للاولاد ومن قبل ما يجوا الاولاد كمان
===================================
اخي ادم هو مين قال لكم ان صاحبة القصة انا تلاقيه خالد بس اما اشوفه
اتوبيس المدرسة نفس مشكلة المواعيد والفلوس كتير اوي على مشوار قريب زي دة
=================================

عاشقة الفردوس سلامة اعصابك هنعمل ايه الموضوع ان ما عدش حد بيرحم حد خلاصواستغلال دة حتى البواب ما بيمشيش الا بالخمسة والعشرة جنيه ومعلش انا لما لقيت ان الموضوع دة بقى الزامي وكاني بديله رشوة علشان ياخد باله من الواد منعته انا كنت بديهاله من باب الرحمة بوقفته دي لكن للاسف بقى استغلال تخيلي انه بقى الموضوع اتاوة علي منعته انا ناقصة ادخل في دايرة المحرمات ولا ايه الناس دي بقى
الله يكرمك ويكرمنا بقى

nonoymm يقول...

استاذ عمر فعلا دفعت تليفونات اكتر
اعزك الله ونورت المدونة
==================================
اهلا خالو احمد اكرمك الله
==============================
اهلا وسهلا اخي محب ويارب يكبروا الولاد بس انا لا خالد يكبر مش مشكلة
انا بقى هجيب الواد يومي لحد ربنا ما يكرمنا بقى بعربية صغنونة ولعلمكم انا بتعلم سواقة فعلا واول ما اتعلمها خلاص هاخد العربية والحاج يترجل بقى ولا يتكس هو احنا مالنا
===================================
موناليزا امة الله امين يارب واهلا بحضرتك يا اختي
==============================
فعلا يا اخي امام الجيل لو كل واحد فينا اعتبر نفسه في نفس الموقف واتصرف على الاساس دة هتتغير حاجات كتير انما ازاي قلة رحمة بينا وقلة ضمير ومحسوبية وحاجة تفرس شرفتني
===================================
اخي الطائر الحزين منتهى البرود
والحي عمال يطلع في الروح والعربية الصغيرة صديق زوجي لسة شاري لزوجته حاجة كدة بعشر الاف لما فقدت الامل اني اشتري عربية تخصني فهناخد بقى بتاعت الحاج والحاج يتصرف
اكرمك الله
==================================
اختي ام احمد اعتذر بشدة يا اختي عن تاخري في الزيارة حالا اروح
حضرتك فعلا انا بتعلم السواقة واول مرة العربية مشيت نطيت جري منها وانا بقول العربية مشيت بهستيريا بس الحمد لله سوقتها مرتين بس بتعلم شجعوني بقى
==================================
اخي علاء معلش انا كمان توهت اوي وتعبت والله وربنا يهدينا كلنا يارب
اهلا بحضرتك زائر لاول مرة وان شاء الله تتابع
بارك الله فيكم اجمعين

بحبك يامصر يقول...

ربنا يكون فى عونك

رئـــــيسـة حزب الأحلام يقول...

السلام عليكم
انا مرة كنت راكبة تاكسى واديدتة اتنيت جنية كان عاوز يخبطنى بالعربية

أنا إنسان يقول...

والمشكلة انهخ طفل صغير
المفروض انه يتعامل كويس
وعلى الاقل يتاخد على قد عقله مهما حصل
لكن والله ولا بقى فيه ضمير ولا اخلاق
حسبنا الله ونعم الوكيل
..........
ياريتها جات على المواصلة بس
بكرة الولاد دول يكبروا
ويعانوا من مشاكل التعليم بحق وحققيق

appy يقول...

لا حول ولا قوة الا بالله

بجد معلش انا معنديش اولاد ومش بعانى من المشكله دى هههههههههه اقولك حل والله بس لو قدرتى اعمليه هاتى عربيه صغيرة قوى دى اللى هى ب3000جنيه لو تقدرى يعنى وروحى انتى هاتيهم ووديهم
اصل يا حبيبتى اللى بتتكلمى عنه ده اخلاق وفيه ناس معندهمش ده
بصى انتى كمان غلطانه انتى كنتى نفشتى ريشك عليه من الاول يعنى وريه العين الحمرا اقولك ايه ربنا يكون فى عونك يا رب

nonoymm يقول...

بحبك يا مصرامين يارب
==================================
رئيسة حزب الاحلام بعد الشر عليكي يا حبيبتي
حصلتلي مرة انا كمان بس ساعتها كنت بعاقبه علشان وقف ميت مرة في السكة يلم زباين ولا كاني مشحونة معاه \
====================================انا انسان والله ابني دة عامل زي الملايكة اكتر حاجة يعملها يتنطط ويفرح اوي بحضن ولا كلمة صغنونة ومش زي العيال للاسف عرفت من بواب الغبرة ان الراجل جه ومشي من غير ما يكلف نفسه ويدور على الواد
ازمة اخلاق للاسف
تحياتي لمرورك
==================================
اختي ابي اهلا بحضرتك
فين العربية اللي ب3 الاف دي وانا اجيبها بعد عشر ايام من دلوقتي
لسة صديق زوجي جايب سيات لمدامه بعشر الاف
انا بتعلم سواقة دلوقتي واذا اكرمني الله قريب هاخد بقى العربية والحاج يتصرف
ابوس ايدك لو عندك حد عنده عربية بالمبلغ دة سيبيلي عنوانه على الماسنجر
تحياتي لمرورك
جزاكم الله خيرا على التواصل واالدعوات