الاثنين، مايو 12، 2008

طاقية خيخة والاستفتاء

السلام عليكم ورحمة الله
تحديث هاااااااام
تابعوا حملة مدونة قولا سديدا لنصرة المسلمين بنصرة ربهم و نبيهم وسارعوا بتوقيعاتكم وايميلاتكم هنا
تدوينة جديدة للعلمانية في الى الهدي ائتنا
وتدوينة لكن يا قوارير هااااااامةجداا


موضوعنا هنا اولا طاقية خيخة اللي هلبسها واختفي وابقى شبح

مين اللى هتضربه على وشه بالقلم من غير ما يشوفك؟؟؟؟؟

اي حد عنده اي نوع من انواع الخدمات والسلع ورفع سعرها بالرغم من انها موجودة عنده قبل رفع الاسعار

وهضرب سواق التاكسي اللي رجع لي ابني الساعة 4 من المدرسة ببرود وكمان هضرب البواب اللي عاوز ياخد مني اللي بيسموه اكرامية واللي باعتبرها رشوة عمال على بطال للاسف كنت بعطيه من باب انه صعبان علي وقفته فمش هتفرق لكن بقت فردة علي وانا ارفض واستحرم فهضربه بقى
مين اللى هتديله بوسة فى جبينه

العيال هتخاف ابوسهم وقت تاني بس ممكن ابوهم علشان اخوفه
مين اللى هتدخل بيته وتعرف هو عايش ازاى ؟؟؟

رئيسنا هموت واعرف بصراحة
ولو سرقت هتسرق ايه ؟؟؟؟

لا مش هسرق السرقة حرام
هتسرق بنك ولا محل دهب؟؟؟

مش هسرق لا دة ولا دة

ومين اللى هتدخل بيته وتحطله فلوس فى الدولاب؟؟؟؟او هتخبط على بيته وتسيبله فلوس ادام البيت

العيال الصغيرة اللي بشوفها في السوق بتلف بجرايد
ومين البنى ادم اللى تبقى عايز تشنكله فى الشارع وهو ماشى؟؟؟؟ او تضربه على قفاه نوع من انواع الذل علشان متغاظ منه؟؟؟؟؟

مفيش حد لحد دلوقتي
وايه هى الاماكن اللى هتدخلها وماكنش ينفع تدخلها ابدا لما كنت مرئى؟؟؟؟

لا برضه ما فيش مكان نفسي ادخله وانا متخفية الحمد لله بالنسبة لي اي مكان ما ينفعش ادخله وانا مرئية بحكم اني منتقبة برضه ما دخلتوش وانا غير منتقبة لقناعتي بانه ما ينفعش اني ادخله
ومين الانسان اللى هتحضنه وهو مش عارف مين اللى بيحضنه؟؟؟

هو برضه زوجي بس علشان اخوفه D:

كان نفسي احضن ماما كمان بس هخاف عليها لحسن تتخض عندها السكر

بس هحضن اسماء وشيماء ولا اخو زوجي العفاريت دول علشان اهزراخوفهم

================================


دة بقى برضة استفتاء كان المفروض ابعته ايميل لخيخة ونظرا للمرض ما لحقتش فهجاوبه هنا


عايزة ايه من اهلك لما كنتى صغنونة؟؟؟؟؟

كنت عاوزة مزيد من الدفء الاسري وصلة الرحم على المستوى العائلي الكبير
عايزة ايه من شغلك ؟؟؟؟

دلوقتي لا اعمل لكني لما كنت اعمل مدرسة كنت بحب عملي جداا وكان نفسي ارتقي فيه جدا ماديا ومعنويا واحاول

أأثر فيه لكن عملي كأم وربة منزل بالدنيا واللي فيها
عايزة ايه من جوزك؟؟؟؟

عاوزاه يرضى علي الحقيقة ربنا يخليه ويبارك لي فيه ونعم الزوج قولوا بسم الله ما شاء الله لا قوة الا بالله
عايزة ايه من حجابك؟؟؟؟

عاوزاه يفضل معايا للممات
وياترى لو كان الحجاب مش فرض كنتى هتلبسيه برضه ولا لا؟؟؟

كنت هعرفه ازاي لو هو مش فرض؟؟؟ لكن لو كان موجود وكان مظهر من مظاهر الالتزام من اي نوع كنت هلبسه لاني بصراحة من الناس اللي بفضل التحشم والتميز واكيد كان هيكون مظهر للتحشم والتميز فكنت هلبسه اكيد
عايزة ايه من المكياج؟؟؟؟

المكياج وسيلة للتجدد لكنه وسيلة ثانوية ممكن استعمله احيانا واحيانا كثيرة لا فعوزاه يساعدني على التجدد احيانا
امتى تعوزى انك تطلقى من جوزك؟؟؟

بعد الشر الكلمة دي من قاموس حياتي انا وخالد ملغاة وبنعتبر انها كلمة مهولة عند استخدامها حتى اننا بنستغرب من اللي بيذكروها في حياتهم عمال على بطال لعظمها

وكان اول حاجة اتذكرها قلتها لزوجي ان الخيانة هي الشيء اللي لا يمكن اسامح فيه ابدا وبرضه مش هصدقها بسهولة لكن برضه مش هطلب فيها الطلاق للحفاظ على استقرار اولادي لكن فيه طلاق من غير لفظة الطلاق وربنا يبعده عنا يارب معلش انا عندي اولويات
عايزة ايه من اختك؟؟

انا عندي اتنين الاولى عاوزاها تكافح زيادة في تعليم اولادها وتلتزم بتعاليم دينها اكتر اتمنى تدعولها

والتانية عاوزاها تحافظ على بيتها اكتر وتحبه اكتر
عايزة ايه من اخوكى؟؟؟

عندي اتنين برضه عوزة منهم صلة الارحام الدنيا اخدتهم منها زيادة نسال الله الهداية للجميع
عايزة ايه من زمايلك فى الشغل؟؟؟

لا اعمل والحمد لله على النعمة
عايزة ايه من صديقاتك؟؟؟؟

عاوزة اتقابل معاهم اكتر دلوقتي الدنيا اخدتنا شوية من بعض بس التليفونات بتقربنا
عايزة ايه من حماتك؟؟

الله يرحمها عاوزاها تكون راضية عني انا لم اراها بس سيرتها عطرة اوي ادعو لها
عايزة ايه من عيالك؟؟؟

يكونوا الاولاد الصالحين اللي يدعولي ويدعو لابوهم بعد من نقابل وجه كريم

ويحفظوا القران ويدخلونا الجنة يارب امين
عايزة ايه من الدنيا؟؟؟؟عايزة فلوس وعربية ودهب ولا عايزة ايه بالضبط؟؟؟؟؟

احج واربي عيالي تربية صالحة واكون زوجة صالحة لزوجي دة الاول
ومفيش مانع برضه عاوزة بيت بجنينة صغيرةشرطا انه ينفع يعيش فيه اولادي كلهم بعد الزواج علشان اطمئن عليهم براحتي واخدمهم بعيوني
ايه الحاجة اللى ممكن تتحققلك الامان فى حياتك؟؟؟؟

الاستقرار والحب بكافة اشكاله
عايزة ايه من الجواز؟؟؟

الحب والاستقراروالاولاد
لو كنتى مش متجوزة هل ده عادى؟؟؟؟؟

الحمد لله متزوجة لكن لو ما كنتش متزوجة في زمنا دة بقى عادي
ولا هيفضل دايما الجواز حلم بتحلم بيه اى بنت؟؟؟

الزواج هيفضل طول العمر حلم اي بنت بس بيتفاوت درجة هذا الحلم واللي هتقول غير كدة معلش قصر ذيل
تحياتي

هناك 36 تعليقًا:

بت خيخة وأى كلام يقول...

هاقولك ايه يعنى يا نونويم
ربنا يا بنتى يبعد عنك الشيطان ويحفظك انت وجوزك وولادك من كل سوء ومن كل عين وحشة
اجاباتك رغم انها مثالية جدا
الا انى اشعر انها صادقة برضه
يعنى مش بتألفى الكلام ده
حاسة انك بجد بتعملى اللى بتقولى عليه وبجد مقتنعة بكل كلمة انتى كاتباها
يعنى مش كاتباها كدة علشان الناس تسقفلك ويقولوا برافو

تحياتى ليكى
وشكلى فعلا هاعملك اسئلة خاصة بيكى انتى لوحدك

يلا سلام يا نونويم
الا صحيح يعنى ايه نونويم

اختك خيخة

nonoymm يقول...

السلام عليكم
اختي خيخة اكرمك الله على الدعوات يارب تكون من نصيبي
اللي كاتباه اشهد الله العلي العظيم هو اللي بعمله وبحاول اوصله باي طريقة
ولو اني حجبت شوية حاجات فعلا من خوفي للناس تسقفلي ويقولو برافو لكن انتي بسطتيني بان ممكن يتسقفلي اصل من وجهة نظري المتواضعة دة المفروض يتعمل وربنا يوفقني واقدر اعمله على طول
واعملي الاسئلة اللي تريحك انا اصلا لما بنفتح اتكلم عني وعن زوجي والعيال ما حدش بيوقفني بحب اتكلم عننا ودة بيجيبلي العين لحد عندي ولو اني ببقى ساعتها قاصدة اللي باحكيله يتعلم مني او انصحه بحاجة بس يلا مش مشكلة
يعني ايه نونو واي ام ام
نونو اسم دلع والحروف التلاتة اول حروف من اسماء تلاتة من ولادي يوسف ومريم ومحمد
تحياتي ليكي يا ام شريف

واحدة مفروسة يقول...

ماشاء الله لا قوه الا بلله
ربنا يديمها حياة
كل يوم بحس انك انسانه معتدله مش متزمته...يارب تكونى فعلا كده

كلاكيت تانى وتانى يقول...

اجمل ما فى الانسان بساطتو وتلقائيتة ودة واضح فى كل كلامك وردودك بارك الله لك ورزقنا بمثل عقلك وقلبك الرقيق الطيب
تحياتى

رئـــــيسـة حزب الأحلام يقول...

تاجين اجمد من بعض واجابتك تدل على انك انسانة طيبة ومسامحة
تحياتى لكى

أحمد كمال يقول...

أعجبني الأسلوب و المحتوى .. :)
جزاك الله خيرا

تحياتي يا أم يوسف

مجداوية يقول...

السلام عليكم

وحشتينا اختنا الحبيبة

اجاباتك جميلة وربنا يديم عليك نعمه وفضله ويظلل عليك دايما برحمته

ويظلل عليكم وعلى اولادكم بالمودة والرحمة
اللهم آمين

la3lahakhier يقول...

ربنا يحقق كل امانيك يارب ويكرمك
لطيفة ردودك جدا وواضح انك ست بيتك ودى اجمل حاجة فى الست
كل التحية والف سسلامة

امام الجيل يقول...

تاجين حلوين

بالذات التانى ده

بيطلع كل حاجة عن اللى بيجاوب عليه

وربنا يزيد حضرتك وزوجك قربا وحبا وتفاهما

بسم الله ما شاء الله

اوعى تفكر يقول...

ومين البنى ادم اللى تبقى عايز تشنكله فى الشارع وهو ماشى؟؟؟؟ او تضربه على قفاه نوع من انواع الذل علشان متغاظ منه؟؟؟؟؟
نفسى اضرب الباشا الكبير اللى مش هقدر اذكر اسمه
ونفسى اضرب عم احمد المخبر اللى ساكن ورايا
نفسى اضرب ناس كتير اوى
نفسى اروح اضرب ابو مازن
نفسى اضرب رؤساء 24 دوله
ماشاء الله الموضوع متميز زى ما عودتينا دائما
ربنا يباركلك فى زوجك واولادك واسرتك كلها

حنين القلب يقول...

السلام عليكم
اجابتك فوق الممتازة وبجد فيها صدق جميل تحسى ان كلامك طالع من قلبك.
ربنا يوفقك ويحقق كل امانيكى ويكرمك
سلام

mostafarayan يقول...

انا قرات اجاباتك
عايز اقولك ربنا يحفظلك بيتك واولادك ويديم عليكي السعادة ويحققلك كل امانيكي
انتي وانا والمسلمسن جميعا

ammar يقول...

عاااااااااااا
اظن انك فهمت كل حاجه ...
...........
يعنى ايه ؟؟

somaa mahaba يقول...

ايييييييييييييييه
قلبتى علينا المواجع الله يسامحك
فعلا هو قصر ديل يا ازعر
بس انا لو منك عشان انا شريره شويه ابخ جوزى اخضه خضه يفطس ويموت ....ونرتاح اصل انا يا اختى مفتريه شويه تجاه الرجال عشان هم معميين فى الوقت الحالى وسايبينا معنسين جاتهم خيبه
اجاباتك جميله تسلمى
تحياتى ليكى سومه_87

nonoymm يقول...

السلام عليكم
حبيبتي واحدة مفروسة بارك الله فيكي والله انا ست عادية زي اي حد نفسي اعرف يعني ايه تزمت؟؟؟
اسعدني مرورك
==================================
كلاكيت تاني وتاني اهلا بحضرتك زائرتي لاول مرة وربنا يبارك فيكي على كلماتك الرقيقة في حقي وباعتبرها وسام على صدري الله يعزك
==================================
رئيسة حزب الاحلام اهلا بحبيبتي اعزك الله على كلامك اسعدني مرورك
===================================
اخي احمد كمال اهلا بحضرتك زائري الكريم لاول مرة الحمد لله انه حاز على اعجابك
اتمنى دوام التواصل
===================================
حبيبتي مجداوية اكرمكي الله على دعواتك وتقبلها ربي
والله بتسعديني لما بتطلي هنا تقبلي تحياتي
===================================
اختي لعله خير الله يعزك وتقبل دعواتك وتقبلي تحباتي
===================================
اخي امام الجيل اهلا بحضرتك انا باعتبرهم كراسي اعتراف واكرمك الله على دعواتك وتقبلها رب العباد تقبل تحياتي
===================================
اخي اوعى تفكر دة حضرتك متسامح اوي
انا دول بقى عاوزة اربطهم بحبل واطوق فيهم بالرشاش مش اضربهم واشنكلهم
بارك الله فيك وتقبل تحياتي
===================================

اختي حنين القلب اعزك الله وانا بجاوب عاهدت نفسي اني اكون صريحة جداا والحمد لله ان دة وصل لكم بارك الله فيكي وتقبلي تحياتي
===================================
اخي مصطفى ريان الله يعزك وجزيت الخير بدعواتك
===================================

اخي عمار عااااا دي على حالنا ولسة برضه فيه عندنا امل تحياتي لمرورك
===================================

سومة محبة اهلا بحضرتك
لا يا اختشي انا هخوفه واخضه علشان بنعمل نقالب في بعض بس هزار
لكن تموتيه ليييييييييه يا شيخة حرااام
بكرة لما ربنا يكرمك وتلاقي اللي يستاهلك وتحبيه ويجمع بينكم رب العباد فيالحلال هتعرفي قيمة الحياة اللي تقوم على حب وطاعة ربنا يكرمك
عاوزة اقولك ظروف الحياة هي اللي خلت فيه عزوف عن الزواج طب جربي تسهلي ظروف وطلبات الزواج واكتفي باللي يفتح بيت وباذن الله ربنا هيكرمك
تحياتي لمرورك
===================================
بارك الله فيكم جميعا وفي كل زواري واتمنى دوام التواصل

بنوته مصرية يقول...

بسم الله مشاء الله

ربنا يبارك لكي في اسرتك ويحفظلك اولادك

ويبعد عنك الشيطان والحسد

ربنا يزيدك من الايمان

تحياتي لكي

Whispers just for a Night يقول...

باقي ساعات قلائل على إرسال رسالة تحمل توقيعاتنا نطالب فيها الحكومة الهولندية بإصدار قوانين تمنع ازدراء الأديان وتحمي بها الإسلام من العنصرية والإرهاب الفكري...توقيعك تدافع به عن دينك
Kawlansadida.blogspot.com

Hosam Yahia حسام يحى يقول...

ماشاء الله

اجابات حضرتك رائعه

قصدى اكثر من رائعه


تحياتى

Sally يقول...

ما شاء الله لا قوة إلا بالله
ربنا يهديكى كمان وكمان ويباركلك فى زوجك واولادك وأهلك ويهدينا جميعا
وسلامتك الف سلامة يا قمر
ربنا يتمم شفاكى على خير ان شاء الله

دمتى بخير اختى
سالى

النجم القادم يقول...

وربنا ماينفع كده انا معلق قبل كده راح فين التعليق ؟؟؟؟؟؟؟؟

ماليش فيه والله مش فاكر انا كنت كاتب ايه فمش هعيده

لكن لو علشان خاطى اسراء طبعا اعيده

عبد من عباد الله يقول...

لص بلادي

بالتمادي . . . يصبح اللص بأوربا مديراً للنوادي،

وبأمريكا، زعيماً للعصابات وأوكار الفساد،

وبأوطاني اللتي من شرعها قطع الأيادي،

.يصبح اللص . . . زعيماًُ للبلاد

كتب / احمد مطر

المستنصر بالله يقول...

جمييله قوى اجاباتك ومش مختلفه عن شخصيتك فعلا
هو دة المتوقع

سبهللة عالآخر يقول...

حسيت لما قريت البوست دة انك انسانة طبعك هادى
هل دى الحقيقة؟؟
عموما عندى بوست مفيد جدا لكل من يملك سيارة
وعايز يحس ان هو اللى ضحك على الحكومة مش هى اللى استكردته
يسعدنى جدا رأيك فيه

الفاتح الجعفري يقول...

بسم الله ما شاء الله اجابات رائعه جدا ,وفعلا تربية الام لاولادها بالدنيا وما فيها لان البيت والاسرة هما اساس الفرد السليم النافع لدينه وامته
----
والله يا استاذتنا اظن ان فرائض الله عزوجل هي ما فطر الناس عليها ,يعني الحجاب مثلا ده فطره فطر الله الناس عليها فمثلا هل نظن ان امنا حواء لم تكن محجبه ,ولا اريد ان اتطرق لمثل هذه الاسئلة ولكنها اكيد كانت محجبه وتستر نفسها لان الانسان بطبيعته جخول يميل الي ستر نفسه ,اما ما نراه من عري للنساء والرجال للاسف فهو مخالف للفطرة ,وفطرة الله هي الحق وهي ما امر به الناس ,
علشان كده استغربت السؤال الي حد ما
اللهم اجعلنا دائما ابدا علي الحق حتي نلقاك
وجزاكم الله كل خير

فرنسا هانم يقول...

جدعه يابت يا خيخه
هه
اه قصدى خيخه كنت من زمان نفسى اعرف اسمك يعنى ايه ؟؟
انا طبعا عارفه الاسم الصحيح
لكن دلوقتى عرفت
نونو
واسماء الاولاد
تحياتى يا نونو
التاجين جمال جدا
واحسن حاجه انك قولتى السرقه حرام لان لو حتى بهزار وقلتى هاسرق كذا او كذا كانت الناس انتقدوكى
تحياتى الغاليه لكى

bar2ash يقول...

السلام عليكم عاشقة النقاب
ليكي عندي تاااااااااج
تعالي حالا خديه
سلااااام

doctor mohamad يقول...

أحسست ف كلامك بالبساطه و التلقائيه و الرضا _ ربنا يديم نعمته عليكى و على بيتك _ _ لفت نظرى و إنتى بتقولى :الخيانة هى الشئ الوحيد اللى مش هتقبليه _ فعلا صدقتى _ بيكون أصعب شئ إن الإنسان يتعرض لخداع أو خيانة و من أقرب الناس و فجأة و هو فى قمة وفائه _ ربنا يباعد بينكم و بين الصفه دى .. أول زيارة لى و قبل أن أعلق أخدت جولة بمدونتك _ أحييكى لتلقائيتك و انسيابية تعبيراتك بلا تكلف.

nonoymm يقول...

السلام عليكم
بنوتة مصرية جزيتي الخير على دعواتك واهلا بحضرتك زائرتي الكريمة لاول مرة
===================================
اخي صاحب مدونة قولا سديدا الله المستعان يا اخي
===================================
اخي حسام يحي اكرمك الله وتحياتي لحضرتك
===================================
حبيبتي سالي اعزك الله وجزاكي الله خيرا على سؤالك الحمد لله اصبحت بخير اسعدني مرورك ودعواتك
===================================
خطيب بنوتي النجم القادم حضرتك علقت الموضوع اللي فات معلش كانه اتكتب بيسعدني مرورك
===================================
اخي عبد من عباد الله كلمات مبكية الله يعافينا
اسعدني مرورك
===================================
اخي المستنصر اعزك الله على الثقة الغالية دي بيسعدني مرورك
===================================
سبهللة على الاخر اهلا بحضرتك زائرتي الكريمة لاول مرة واتمنى دوام التواصل
الحمد لله اسعى ان اظل طبعي هادي واحاول دائما ان اتغلب على اي شيء يعوق هذا الطبع لكني عصبية اصلا بطبعي وبيبقى فيه صراع كبير بين العصبية ومحاولة الهدوء للوصول لرضى رب العالمين وبيجي على نفسي بس الحمد لله
وحالا حالا هروح اشوف محتاجة دة اوي
جزيتم الخير
=================================
اخي الفاتح الجعفري اعزك الله يا اخي والله انا كمان استغربت سؤال الحجاب بالذات وحاولت اقول اللي ممكن يتعمل خاصة واني من الناس اللي حجابي ونقابي علي غالي اوووووووووي لدرجة جنونية فبيهيالي ان صعب اوي واحدة تستطعم طعم العفة والستر وتستغنى عنهم اعزك الله يا اخي وبارك الله فيك
تحياتي لمرورك
===================================
حبيبتي فرنسا
انا اسمي الحقيقي انتي عارفاه بقى ونونو اسم دلع خاص لي من زوجي فقط ما حدش اطلقه علي غيره بس وبيناديني بيه والنت كمان لكن ما حدش عارفه
وحروف الاولاد الاولى هي الواي ليوسف والام لمريم والام لمحمد وفيه اسراء بس مش موجود حاليا
اما موضوع السشرقة حتى لو كنت بهزر دي قناعة وحد ديني المفروض التزم بيه بعيدا عن ان الناس هتنتقدني او لا انا تعاهدت مع نفسي وانا بجاوب التدوينة دي انها لازم تبقى فعلا اللي هعمله
وربنا يقدرني يارب دايما وارضيه جد وهزل
تحياتي لمرورك
===================================
اخي برقش حالا هاخده التاجات كترت اوي ربنا يستر
===================================
اخي دكتور محمد اهلا بحضرتك زائري الكريم لاول مرة
والله كلامك اسعدني جدا وحسسني اني متوازنة الحمد لله
تحياتي لكم جميعا واسعدني مروركم بشدة

رئيس جمهوريه نفسى يقول...

ربنا يبعد عنك الشيطان ويوفقك لما فيه صالحك انتى وزوجك واولادك فى الدنيا والاخره

رفقة عمر يقول...

اجاباتك جميله بجد
قربتنا اكتر منك وانا مبسوطه انى عرفت معنى اسمك ايه كان محيرنى جدااااا

امل يقول...

مدونتك جميلة قوي
وحلوة فكرة طايقة الاخفاء
واجاباتك عليها احلى
تقبلي مروري وتحياتي

صيد الخاطر يقول...

السلام عليكم يااستاذة
والله ماشاء الله تبارك الله
حقيقة اجابات غاية في الروعة
اجابات كلها تفيض حبا للدين ومحاولة للتشبث بكل تعاليمه وفهم لروح الدين
حقيقة اجاباتك اسعدتني فهي موفقة ان شاء الله
ربنا يزيد مودة بينك أنتي وزوجك واهل بيتك جميعا
وينفع بيكم الاسلام والمسلمين

راجى يقول...

اكرمك الله انتى واسرتك والمسلمين

النجم القادم يقول...

لالالالالالالالالالالالا

بجد طب معلش بس انا فاكر انى كنت معلق بقولك

مش عاوزه حاجه منى انا كمان

وبعدين ايه الكلام الجميل ده ربنا يخليكى ليا

ادعيلى بالله عليكى

الربان يقول...

تحياتي

ما اجمل أجاباتك....وفقك الله الي ما يحب
و يرضي ..و ان شاء الله سوف ترين خصالك
الطيبة في اولادك و ذريتك...لان الشجرة الطيبة دائما ما يكون ثمارها طيب.

غفر الله لحماتك...و اسكنها فسيح جناته.

تحياتي و تقديري

منى يقول...

ربنات يبارك فى عيلتك ويكرمكم دايما
لان يبدو انهم واخدين كل تفكيرك
ويحقق لك كل احلامك الجميله
وعجبتنى اوى اجابتك عن الحجاب
لان تقريبا حب الستر ده فطره عند صاحب الفطره النقيه
تحياتى واحترامى