الاثنين، أغسطس 10، 2009

كل دة حقيقي جوايا










مش عاوزة اكتب بس عاوزة اكتب





عندي حاجات كتير عاوزة اقولها بس الكلام خلص





مفيش عندي اصدقاء بس عندي اصدقاء





اسمع واحل مشاكل كتير واساعد واطبطب هنا وهناك واقف جنب دي واصالح بين دة ودة





محدش بيساعدني ولا بيطبطب علي





نفسي حد يساعدني من غير ما يجرحني ولو بكلمة تقويني





مش عاوزة مساعدة من حد حتى لو هموت





بحب كل الناس ونفسي اساعدهم كلهم اي حد مهما كان حتى لو أساء لي





بكره كل الناس ونفسي ما اعرفش حد ولو اكلم حد ولا حد له دعوة بيا ولا بعيلتي الصغيرة





عندي ثقة لابعد حد ان كل الناس ملايكة واللي غلط منهم غصب عنه





عارفة ان الناس بقت كلها زيها زي بعضها كله بيقطع في كله حتى اللي شكله بيقول انه كويس برضه شكله دة وراه ذئب





عاوزة اعيش في الصحرا انا وعيلتي الصغيرة مش عاوزة اعرف حد





ما باعرفش اعيش لوحدي ولا من غير ناس اسال عليهم ويسالوا علي





حاسة اني الخير اتعدم كل حاجة اتقلب اسمها الحقيقي





الكدب بقى علشان تمشي حالك والنصب بقى تجارة والصداقة بقت استغلال





كل دة حقيقي جوايا





ما اعرفش انا مزوداها ولا دة الحقيقي لكن اللي متاكدة منه اني تعبت





يارب بحق الشهر الفضيل تجعلها سنة خضرا علينا وتقذف في قلوبنا الرحمة لبعض





يارب تعلمنا نرحم بعض





يارب نرحم بعض يارب نرحم بعض





يارب نرحم بعض




يارب ارحمنا كلنا
رمضان كريم علينا جميعا





معلش اوعوا تزعلوا مني لكن حقيقي هتعذروني





رغم كل دة الا اني احبكم في الله





رغم كل دة لسة عندي امل وادعي واقول يارب





كل عام والمسلمين بخير

هناك 28 تعليقًا:

دكـــــتور جدا يقول...

أسجل أول تعليق

إحنا بشر ولينا مشاعر

وتتغير المشاعر وتتغير الأحوال

عشان كدة سموه قلب لشدة تقلبه

تحياتي

حسن حنفى يقول...

متناقضات كثيره بداخل الجميع

اللهم ارحمنا جميعا

اللهم امين

أمل حمدي يقول...

كل عام وانت طيبة يارب وبخير

كتبتي وكأني املي عليك ماتكتبين

مش عارفة اقولك ايه

الحمد لله على كل شيء

المهم يبقى القلب اخضر زي ماهو ميتغيرش

والحمد لله انه عامر برضى الله

ربنا يعيد عليك رمضان اعوام واعوام

دمت بكل الود

Dr. Ibrahim يقول...

اللهم ارحمنا واهدنا

كل عام وحضرتك طيبة

مهندس مصري بيحب مصر يقول...

ياه ؟
إيه كل المتناقضات دي ؟
إحنا بنحبك في الله يا أختي و ندعو لكي و لأسرتك بالخير دائماً

اللهم إمنحها طمأنينة القلب و راحة البال

غير معرف يقول...

السلام عليكم ورحمة الله وبركاته

والعصر
ان الانسان لفى خسر
الا الذين امنوا
وتواصوا بالحق وتواصوا بالصبر

بلغك الله رمضان على خير واعانك على صيامه وقيامه وتقبل منك خالص الاعمال والاقوال واظلك بظله يوم لا ظل الا ظظله

منذر

عين فى الجنة يقول...

كل عام واتوالاسرة بخير

مجداوية يقول...

السلام عليكم

ربنا يطمن نفسك ويبعد عنك كل شياطين الانس والجن

بصي يا غاليتي
هي اختلاف مسميات بين الناس اللي ممكن تقولي عليه استغلال غيرك مسميه شطارة وفهلوة واللي بتسميه أنانيةغيرك مسميه ذكاء اجتماعي واللي بتسميه كذب غيرك بيسميه مجاملة واللي بتسميه غش غيرك بيسميه إما تعاون أو اللي تغلبه إلعبه وهكذا لأن كل الناس كل الناس كل الناس بتشتكي من غيرها من الناس يبقى لو صدقنا كلنا يبقى مين اللي وحش إحنا ولا إحنا انتي في نظر البعض المخطئة والملامة واللي مليانة عيوب عشان تستريحي لازم تتأكدي ان كل واحد فينا مليان عيوب هو مش شايفها لكن غيره حاططها تحت العدسة المكبرة عشان كده لو لومتي حد عمره ما بيطلع نفسه غلطان وبيركبك إنتي الغلط
العلاج لينا عشان نتغلب عن المشاعر السلبية نتيجة تعاملنا مع الغير إننا نتسامح مع بعض ونعذر بعض و نغلط نفسنا ومنغلطش غيرنا ,ساعتها حتستريحي بشاااااااااكل ,,قولي ورايا ,الناس فلة ,,الناس حلوة ,,الناس قشطة ,,
قبل الأكل وبعد الأكل وشوية شوية حتبقي زي الفل ومتكليش لا سمك ولا بيض

أنا نهيت كلامي بضحك وهزار لكن بجد هو ده العلاج وإلا فعلا حنزورك في الربع الخالي قريب
:)

وبصي على التعليقات حتلاقينا كلنا بنقول نفس الكلام عن غيرنا فأكيد الناس الوحشة الموجوده بينا دي إليان جايين من كوكب زحل

إبن مصر يقول...

السلام عليكم

يارب نرحم بعض

يارب علمنا نرحم بعض



الرحمه من الله وان شاء الله يرحمنا بس فعلا دعوتك حلوه انه يعلمنا نرحم بعض


تحياتى وكل رمضان وانتى بكل خير

فليعد للدين مجده يقول...

طبيعي ان نصاب بالحيرة وعدم القدرة علي الحكم بصورة متوازنة في فترات من حياتنا لكنها تظل عارضة ان شاء الله ونسترجع توازننا بفضله سبحانه وبروح المثابرة التي نتحلي بها
كل عام وسيادتك بخير

mohamed ghalia يقول...

المهم يستمر الأمل والتفاؤل ده
ربنا يكرمك ويسعدك دايما

غير معرف يقول...

السلام عليكم ورحمة الله وبركاته


والعصر
ان الانسان لفى خسر
الا الذين امنوا
وعملوا الصالحات
وتواصوا بالحق
وتواصوا بالصبر

اسف كتبت السورة ناقصة
غير ان بيسو جه وانا باصلى بعدها وقعد يوسوس لى ويراجع معايا

منذر

على عبدالله يقول...

السلام عليكم

كل عام وانتم بخير
مبارك عليكم شهر رمضان

رفقة عمر يقول...

كل سنه وحضرتك طيبه
رمضان كريم
اعادة الله علينا وعليكم بالخير واليمن والبركات
لا تنسونا من صالح دعاءكم

Beram ElMasry يقول...

رمضان كريم
أعاده الله عليكم وجميع الأهل والأحبة باليمن والخير والبركة

الحب بين العرب فطرة وشئ مألوف
ولا يحسدوه من الخلق غير القرد والحلوف

علي محـمــــــد يقول...

كــل عـــــام وانتم بــخـــــيــر

الميكروباص يقول...

كل عام وانتم بخير

زراعة في زراعة يقول...

السلام عليكم
الاخت الكريمة لا الومك بما كتبتيه فزماننا هذا يفقد الانسان الكثير
اتمنى من الله العلى القديم انى يحسن
احوال المسلمين
ورمضان كريم للجميع
وفقدنا زيارتك لمدونتنا المتواضعة
دمتى بخير

"النجم القادم" يقول...

لا اله الا الله ايه يا ست الكل انتى كمان مخنوقه وزهقانه زى يلا متخديش فى بالك معتدش حاجه فارقه وكل سنة وانتى طيبة واهم شئ انك تكونى انتى والاسرة بخير وده الاهم وربنا يوفقك يارب

مهرة سالم يقول...

السلام عليكم ......
لا تقلقي من هذا التناقض أخيه ....
فهو طبيعي في الإنسان ...
.......
كل عام وأنت بخير ...
وشهر مبارك عليكم...
....
في أمان الله

mahasen saber يقول...

مالك بس ايه اليى مزعلك كدا

ربنا يصلح حالك وحال كل من تحبين

احنا كلنا اخواتك اهه يعنى نطبطب ونسمع منك فضفضتك واليى جواكى بكل حب

ربنا يصلحلك حالك دايما

عالم حبيب يقول...

مع ختام رمضان وقدوم العيد .. أدعوا الله أن يتقبل منا ومنكم الشهر ويهل علينا وعليكم والمسملين هلال العيد بسعادة واطمئنان وثبات على الطاعات بعد رمضان

أذكركم بصيام 6 من شوال لحديث النبي صلى الله عليه وسلم : من صام رمضان وأتبعه بست من شوال خرج كيوم ولدته أمه .. صحيح مسلم

كل عام وأنتم الى الله أقرب وعلى طاعته أدوم

Mohamed يقول...

كل عام وانتم بخير وصحة وسعادة واقرب الي الله تقبل الله منكم صيامكم وقيامكم واعاد الله عليكم هذه الايام المباركة بالخير عليكم وعلي احبابكم يا رب العباد

الفقيرة إلى الله أم البنات يقول...

لا اجد ما اضيفه على كلام مجدوايه
ربنا يسترها معاك ومع اسرتك وميحوجكيش غير ليه هو بس رب العباد

أمل حمدي يقول...

السلام عليكم

كل عام وانت بخير يارب

ويارب تكوني في احسن حال

أم أحمد المصرية يقول...

حبيبتي عاشقة النقاب
عدت من اجازة طويلة لأجد تدوينتك هذه من فترة طويلة ايضا و لكنها دخلت قلبي مباشرة فهي صادقة جدا كلنا نحس هذا الاحساس احيانا لدرجة ان متهيألي ان انا اللي كتبتها تصدقي حكاية اني عايزة اعيش في الصحرا دي من اقوالي المأثورة :))
كل سنة و انت بالف خير يارب مودك يكون احسن الان و ترجعي لنا لأنك وحشتيني

عمرو المصري يقول...

ممكن حضرتك تكوني اتعرضتي لموقف او حالة وصلتك لحالة الحيرة دي

لكن عموما
في حاجتين

الاول
عجبا لامر المؤمن امره كله له خير فعسي ان ده خير ان شاء الله

الثاني
الحمد لله علي حاجات تانية كتير مفيهاش مشاكل بجد تخلي الواحد عنده حاجات اكتر بكتير من الحيرة والقلق
انك مثلا خايفة علي طفلك وهو خارج
او خايفة علي حياتك الشخصية من تهديد باي حاجة ممكن تأذي
المختصر يعني ممكن ربنا يكون عافاكي وعافانا من مصير الامهات العراقيين مثلا او المقدسيين


انا اسف
ممكن اكون مش عارف اعبر
لكن فعلا ان شاء الله ده خير
اسأل الله الخير والسكينة لك ولأسرتك

تحياتي

عالم حبيب يقول...

أحيانا بتحاصرنا المتناقضات دي .. الواقع واللي نفسنا نكون فيه .. لكن ربنا يرحمنا برحمته ونقدر نعيش واقعنا بقدر الامكان على أفضل صورة نقدرها

جزاكم الله خير