السبت، يونيو 26، 2010

حدث بالفعل في مستشفى الدمرداش الجامعي


السلام عليكم ورحمة الله

ازيكم كلكم يا حبايبي كل عام وانتم بخير

والدتي الحمد لله تعالى بتتحسن وكويسة لسة جاية من عندها امبارح جزاكم الله خيرا على سؤالكم

تعرفوا ان فيه اخوة واخوات لا يزالوا بيتصلوا ومن دول عربية كمان اغلبهم فاكر اني انا اللي هرد على التليفون

لكن سبحان الله في بعض من الفئات ربنا يهديهم بيتصلوا يعاكسوا تتصوروا بيعاكسوا ومن هنا من قلبي بدعيلهم ربنا يهدي لهم الحال يارب ويعف كل مسلم يارب العالمين

========

هتكلم معاكم عن اشياء حصلت بالفعل لامي ولغيرها في مستشفى الدمرداش الجامعي واللي ساقنا لدخولها المسعف لانها اقرب مستشفى لنا ولرفض مستشفى استقبال امي وبصراحة انا باستغرب ان فيه مريض يروح بالاسعاف محتاج نقل دم فوري لمستشفى وترفض المستشفى استقباله

المهم دخلت امي المستشفى الساعة ستة واخدوا منها عينة دم وقالوا انها محتاجة نقل دم ودة كان قاله الدكتور المتابع لحالاتها في البيت قبل ما تتنقل وشكلها اساسا كان واضح جدا انها محتاجة دم وشها وشفايفها وواطرافها كله ساقع تلج وابيض مصفر ومابتقدرش لا تقف ولا حتى تتكلم ودوما بتقول عندي هبوط

المهم فضلت امي راقدة على السرير ولو وصفت لكم المرتبة اللي كانت نايمة عليها شكلها ايه مش هتصدقوني والفرش ومستوى النظافة اللي اقل من اقل حاجةواساسا العنبر للامراض المتوطنة واللي حطونا فيه لانهم كانوا فاكرينها مريضة كبد لانها كانت بتنزف

المهم فضلت امي على السرير ما حدش بيسال فينا نروح للدكاترة وادارة المستشفى كل ३ دقايق الحقونا فين الدم طب نشتري طب احنا كلنا نتبرع لها طب اللي انتوا عاوزينه المهم تلحقونا

انا جيت من العاشر الساعة عشرة مساء وكان الدكاترة دخلوا مين هما الدكاترة بقى قولوا حوالي خمسة ستة دكاترة صغيرين كل واحد فيهم ماسك دفتر انا مصدومة اساسا ومش مركزة بالمرة

كلهم لابسين بلاطي بيضا الا واحد لابس اخضر بس سنه مش بعيد عنهم بس شكله اكبروزي مايكون معيد او حاجة كدة المهم لقيتهم بيكشفوا على ماما وبيشرحوا حالتها لبعض وقالوا دم (((مفيش جديد))) احنا عمالين نسال امتى ياعالم الحقونا امتى الدم حالتها بتتدهور

قررت انا واختي نغيرلها هدومها وفعلا غيرنا هدومها وبعدين عاوزين نغير المرتبة اصلها وحشة اوي اوي

فحاولنا نغيرالمرتبة وبطريقة او باخرى امي وقعت واحنا ساندينها لان الحركة حتى الخفيفة مش قادرة عليها فبسرعة نزلناها على السرير وفي الوقت دة انا شفت امي ماتت عينها تسمرت في السقف واصدرت صوت كانه صوت الاحتضار ونزل ريم ابيض من فمها وقتها اختي صرخت وجمعت قوتي وضميت راسها وتلوت عليها الشهادة وبقيت اقولها قولي ياماما لا اله الا الله وزوجي قالها وتلتها امي وفاقت تقولي ايه يانونو ما تخافيش في نفس الوقت اختي بتصرخ في الدكاترة حرام عليكم امي ماتت فين الدم بنتحايل عليكم من الصبح ما لحقتوهاش ليه

يرد الدكتور المحترم طب هوحد منكم قال هتبرع وقتها تماسكنا رجال ونساء لان ريقنا نشف نطلب دة منهم

الغريب ان وقت امي ما وقعت العشر دكاترة ما زالوا معنا في الحجرة والله العظيم لم يتحرك دكتور واحد لمحاولة المساعدة والنجدة وبرضه وصل الدم بعد ساعة من الحدث وجت دكتورة كبيرة في الصباح قالت لهم نفس العشر دكاترة اللي بيتشرح لهم ان الحالة محتاجة نقل دم باستمرار طبعا مش قادرين يرفعوا وشهم في وشنا من الاحراج خصوصا اننا اتبرعنا وحاولنا نشتري دم ودة حصل برضه

عارفين بقى ان اي حاجة في المستشفى سواء عاوز تطلع لمريضك او تجيب مرتبة نظيفة كل دة له تمنه

انما الدكاترة تجيبهم بالزعيق والقوة

وسهل جدا اي طبيب يرد عليك طيب طالع حالا وما يسالش فيك وتنزل له تاني تلاقيه بيتصرمح او بيشرب نسكافيه

ولما تحمرله عينيك وتزعق معاه يطلع

المفاجأة بقى ان كل الدكاترة دي مش دكاترة دول شوية طلبة لسة بتتعلم وبتتعلم في اهالينا

لا عارفين يركبوا دم ولا عارفين يركبوا كالونة ولا عارفين ياخدوا قياس السكر ولا عارفين يركبوا اي حاجة وواحد ركب لامي خرطوم المفروض يكون خرطوم قسطرة بولية ركبوا من انفها علشان يوصل لمعدتها وعملوا لها كدمة من الداخل ازرقت من الخارج بسبب طريقته الغلط

وواحد ركب لها خرطوم من مناخيرها وما شغلش المحلول ولما نزلت تعمل منظارالمعدة سالونا هما ركبوا دة ليه قلنا لهم قالوا مهم شالته الممرضة ورمته في الباسكيت وطبيب المنظار قال دة مالوش لازمة هيترمي اهو ايه اللي بيعملوه دة

حتى الدم لما كان بيركب وتيجي الكالونة تتسد كان عذاب على بال ما يركبوها وكانت اختي بتركبها افضل

تعرفوا احنا الحمد لله افضل حالا ما كناش بنسكت وبنزعق وبنتخانق وحالة امي كانت لا تسمح بنقلها لمكان تاني رغم اننا حاولناننقلها واتصلنا فعلا بالاسعاف تيجي تاخدها فيه دكتورقال ان حالتها محتاجة دم بس وهتروحوا حتة تانية هتعيد تحاليل تاني وهتلفوا اللفة من الاول امكم تاخد الدم وهتلاقوها كويسة بعدها روحوا اي حتة تانية لكن لاجدوى من نقلها

دفيه حالة دخلت لسيدة عندها فيروس كبدي وبتنزف والمفترض تدخل الرعاية المركزة قالوا مفيش لها مكان ولا سرير هناك

للاسف الحالة دي توفت تاني يوم وهي بتخلص المكان في حجرة الرعاية تواجد ونقلوها فيه

تصدقوا المستشفى مفيهاش ترمومتر حرارة ومفيهاش لزق ومفيهاش شاش

المستشفى فيها تلاجات كتيرة كلها بايظة

الناس بتموت من العطش وما بتشربش مية ساقعة في الحردة ودول مرضى

المستشفى مفيهاش اي حاجة

الدكاترة بيجوا ضيوف وبس

وبيتعلم ويتسلى على المرضى عفوا شوية عيال

يا عالم هو المستشفيات الجامعي دي اللي بيدخلها الناس الغلابة هما بس اللي نتعلم فيهم

طبعا المستشفيات الكبيرة والاستثماري لا

طيب هو دة صح اللي بيحصل دة؟؟؟؟؟

مرضى الامراض المعدية محطوطين كدة خلطبيطة على المرضى العاديين والاستقبال غير مجهز والطواريء شرحه؟؟؟؟؟؟؟؟؟

طيب انا الايام اللي قعدتها في المستشى حسستني ان مصر كلها مرضانة والناس بتبقى عيانة وتخش المستشفيات دي تموت من قلة الاهتمام والرعاية والتأخر في اسعافهم ونجدتهم لقلة الموارد لقلة الدكاترة وجهلها ممكن كل دة ؟؟؟؟؟؟

طيب اعذرهم لان الضغط عليهم كبير ولا انقم على بلدي قلة رعايتنا ولا اعمل ايه

يا جماعة لازم خطوة ايجابية للمستشفيات دي بجد

انا شفت فيها العجب وشفت بعيني حالات كتيراوي صعبة وناس موجودة بالست شهور

المستشفيات دي والناس دي محتاجة لوجودنا ومساعدتنا

عارفين شوية لزق وشاش وترمومترات حرارة دي اقل حاجات بتحتاجها المستشفيات دي

والادوية كلها بيحتاجوها ومحتاجين حد يصلح لهم التلاجات ويعمل صيانة للحمامات كمان محتاجين ملايات ومراتب ومخدات للبني ادمين

محتاجين اطباق بلاستيك يتقدم للمرضى فيها اكلهم بادمية ونظافة

محتاجين كراسي متحركة وادوات نظافة

محتاجين يتملي عين التمرجيات والممرضات علشان يتعاملوا معانا كجمهور زائر وكمرضى زي بيتعاملوا مع اي بشر عاديين

محتاجين الناس اللي بتستقبلنا كجمهور زوار انهم ينظموا عملية زيارة المرضى دي شوية طالما زائر مالوش لازمة ما يدخلش لكن الموضوع فيه همجية واي حد يدخل والنفس في الاوض يتقطع

محتاجين يكون عندنا شوية رحمة نرحم بيها المستضعفين ونرحم بيها بعض



مش عارفة اقول ايه غير ربنا يشفي كل مريض ويرحمنا برحمته يارب

احبكم في الله

هناك 12 تعليقًا:

كلنا مقاومة يقول...

السلام عليكم

الحل محطوط على البوابة , لازم التغيير

والنظام ده يغور في ستين داهية

رئيس الدولة يتعالج في أكبر مستشفيات العالم وشعبه هنا بيموت من الإهمال وعدم وجود الإمكانيات يبقى النظام ده مينفعش ولازم يتغير

وزير الصحة بيتربح من الوزارة وبيحول التأمين الصحي و الأشعات على مركزه الخاص يبقى لازم النظام ده يتغير

متقوليش نصلح بلاويهم لأنهم معتمدين على كده
محدش بيتبرع للحكومة اللي نهبت البلد
عايزين نساعد بحق يبقى النظام ده لازم يتغير
مهما قدمنا من مساعدات مش حتسد عجز وزارة الصحة عن أداء دورها
دي مش مستشفى واحدة دول عشرات وفي كل المحافظات وكلهم بيعانوا من نفس المشاكل



لو فعلا عايزين نساعد يبقى دورنا إننا لازم نغير النظام ده

حمدا لله على سلامة الوالدة الغالية والحمد لله ربنا نجاها وخرجت سالمة من هذا الكابوس

مصري جدا يقول...

ربنا سبحانه يتم شفا الوالده على خير وما تحتاجوش مستشفيات تاني أن شاء الله

غير معرف يقول...

عارفه سمعت عن ان في طالب عمل بحث ان لو كل اغنياء الدول العربيه فقط لو طلعوا الزكاه بما يرضي الله كما امر الله مكنش في اي حد فقير في الدول العربيه كلها
تخيلي بقي انا بتكلم عن الزكاه بس فقط لا غير
يااااااااه
احنا فعلا مقصرين اوي
اوي اوي
وموراد الدوله علي قدها وكل ده مع الفساد والسرقه والنهب والرشوه
مش فاضلنا اي حاجه غير اللي شوفتيه في مستشفي الدمرداش
اللهم ارحمنا برحمتك يارب
اللهم اشفي كل مريض
شفا الله وعفا والدتك إن شاء الله

ali younes يقول...

الاخت الفاضلة
تصدقي بالله اني وانا اقرأ البوست انتفكرتيني بحالة ابن خالتي ..
كنت عاوز احكيلك ما حدث له لكنك انت حاكيتي ما حدث لة بالضبط..
نعم ما حدث لة هو ما حدث معكم بالضبط
هو كان عندة مشكلة غريبة انة جالة فيرس في سائل المخ .. ومحدش عارف وتشخيص غلط .. قبل معرفت دة كان تعبان وجرينى بة الي مستشفى الاسماعيلية العام .. حجزوة هناك . رحنالة بلليل .. حالة عمالة تسوء .. دكتورة صغيرة ودكتور برضك عيل لسة بيتبعوة ..
لما بدءنا ننفعل عليهم اتصلوا بالدكتور الكبير وجابوة من علي المقهى ..
ايوة .. الدكتور جة كأنة سواق ولا واحد صنايع صايع ... المهم بكل بساطة طرد الحالة من عندة وحولها الى مستشفي جامعة قناة السويس بالاسماعيلية ..
رحنا مستشفي الجامعة وحالة متدهورة وكانوا مش رضيين يستلموا الحالة برضك..
المهم بالزعيق استلموة وتركوة وكلهم شوية عيال امتياز في الطوارئ .
احنا وجدناة نفس ما حضرتك قلتي .. عينة مش في السماء لا دة عينة نطت لبرة الجفن قلب وحاجات غريبة زهلتني وطبعا الريم من فمة .. اصبحان عاجزين ولا حول ولا قوةلنا اطلاقا .. انا جريت اتصلت بالشرطة ... والوضع خطير .. رحت موشوش اختة وقلت لها صوتي ومتسكتيش .. بالرغم انى اعلم ان صويت المرءة حرام ولكنة كان المفتاح السحري ...
صويت وصويت يا ريس ..ز الدنيا اتقلبت والدكترة خافوا وجم الدكترة الكبار .. فجئة تحولت الدنيا وانقلبت وتركيب دم وبلازما ورسم قلب وجميع التخصصات ..
يا ضوبك ساعة ورجع الولد للحياة من جديد .. والله انا كنت مش مصدق نفسي ..

الظاهر ان هذة الامور هيالطبيعية فيالبلد كلها .. وان اول درس يتعلمة الاطباء كبر دماغك نفض طنش .
تحياتي لك وسلامي لامنا الغلية
يارب ما تشوفوش وحش
م / علي يونس

فليعد للدين مجده يقول...

أولا دعواتنا بالشفاء وتمام العافية لوالدتنا الكريمة
ثانيا: هذه -كما رأيتيها- هي حال جميع مستشفياتنا الحكومية بلا استثناء، بل هي نفس حال جميعالخدمات الحكومية، تعاني تراجع القيم وقلة الدعم وجهل المديرين وقلة اهتمامهم، وجميع هذه المؤسسات تحتاج للمساندة وليست فقط المستشفيات
تقبلي تحياتي

nor يقول...

حمد الله علي سلامتها شفاها الله

مصطفى عبدربــه يقول...

السلام عليكم يا أختي

ابو ريم يقول...

الحمد لله على سلامة الوالدة الكريمة
مع تمنياتى بها يدوام الصحة والعافية

Dr Ibrahim يقول...

فعلا يا فندم المستوى فى المستشفيات الجامعية سىء للغاية وعلى الرغم ان من أهدافها هدف تعليمى لتعليم الطلبةوالأطباء حديثى التخرج ولكن يجب أن يعامل كل إنسان بإنسانية من فحص وعلاج وكل شىء وليس كدمية يسهل التعلم فيه
ربنا يتم شفاء والدة حضرتك على خير

كلمات من نور يقول...

الحمدلله على السلامة

باعتذر عن التأخير في ردي عليكي بس الانترنت عندي كان صعب قوي وادخل مدونة الاقي نفسي مش عارفه أرد و أعلق

حمدا لله على سلامة ماما وربي يشفيها شفاءا تاما

ومتزعليش على حالنا علشان فعلا حالنا بقى صعب قوي ويارب ما يحتاج مريض للمستشفيات ...ربي يشفي كل مريض ويعافينا من كل سوء

أم الخــلـود يقول...

اصحى يا نايم ووحد الدايم

(حملة الجسد الواحد)

أرجوا من المدونين الموقرين أن يضعوا شعار الحملة واسمها فقط فوقها (حملة الجسد الواحد) في الشريط الجانبي لمدوناتهم كدلالة على وحدة صف أمة محمد، ومن أجل قيام الولايات المتحدة الإسلامية.

لمزيد من المعلومات

http://dndanh111.blogspot.com/2010/06/blog-post_14.html

جعله الله في ميزان حسناتكم .. آمين

الفقيرة إلى الله أم البنات يقول...

ربنا يعافي امك وجميع الناس
مستشفيات مصر حكوميه وعاديه
حدثى ولا حرج
ربنا يذل الظالمين ويؤتيهم العذاب مضاعف