الخميس، أكتوبر 21، 2010

حالة



السلام عليكم ورحمة الله
مهم جدا الرابط دة تتطلعوا عليه ونشارك مع بعض كالعادة في محاولة لتفريج كربة اخ لنا ولو بنشره على نطاق واسع وجزاكم الله خيرا

فاكرة لما اول مرة شفت مدونة واتمنيت يكون عندي انا كمان مدونة اكتب فيها براحتي واتبادل من خلالها خبرات وافكار ومعلومات وكمان اتواصل مع الناس واتكلم معاهم وانصحهم وينصحوني بدون اي مصالح كدة لله في لله

على طول كان زوجي انشأئها وقالي تعالي شوفي كدة وفتحها لي وكمان كتب لي اول تدوينة وكمان اختار لي اسمها لانه عارف اد ايه بحب النقاب وفرحت اوي بالمدونة واعتبرتها حتة مني مش ممكن ابعد عنه

وفعلا لحد دلوقتي أغيب على اد ما اغيب واحن لها واجري عليها وافتح تدوينة وكتير اوي اقفلها واوقات اكتب وافضفض فيها

هكون صريحة اكتر معاكم

انا باعتبراهل التدوين اهلي واخواتي بيسالوا علي ولما بقول عيانة ولا عندي اي ظروف على طول بيدعولي وبيساعدوني كل حد باللي يقدر عليه بدون اي مصلحة وبدون معرفة حبيت العالم دة جدا

عالم مختلف عن العالم الواقعي العالم الواقعي بقى مزيف الاخوات ما بتسالش عن بعضها كنت فاكرة انا بس لقيتني انا احسن من غيري

كان عندي ثلاث اخوة واختين توفى اخي الاكبرمني مباشرة من 8سنين تقريبا وكان مش محسسني اني عاوزة يكون لي حد غيره

واصل للرحم وكان بمثابة الاب واكتر لنا كلنا الله يرحمه لدرجة ان باقي الاخوة رموا كل المسئولية عليه واتعودوا انه هو بيعوض كل حاجة وكانت المفاجأة انه توفى بدون اي سابق انذار وكانت الطامة الكبرى بالنسبة لي انه ترك فراغ شديد وبقى واضح وجلي لان ما بقاش اخويا يزورني بانتظام ومبقاش يسال علي زي الاول ولا الاقي حنانه الاخوي ولا الاقيه في ازماتي

طبعا الاخين التانيين ولا على بالهم مكبرين دماغهم ودة اللي خلانا كبنات نعاني جدا واهتزينا نفسيا وبنحاول نقرب من بعض اكتر واكتر في محاولة لتعويض الفقد دة لحد ما تعودنا خلاص

الحمد لله مرتبطين ببعض جداوبنحاول نعوض بعض
بحمد الله قدرت اتخطى الكبوة دي بفضل الله تعالى وارادته وقتها حملت في مريم بنتي وانشغلت اوي بيها وزوجي ساندني واتحملني كتير وقتها وقررت اكون اسرة كبيرة وبقى يحصل لي الحمل ورا بعض ومن جوايا كنت ببقى مبسوطة اوي واقول لنفسي هعمل عائلة بتاعتي اخليها مرتبطة وتحب بعضها

يمكن ضغوط الحياة تخليهم ينشغلوا عن بعض ايوة انما دوما ما ينسوش بعض ويحبوا بعض ويحنو علي وعلى ابوهم بحاول انا ووالدهم اربيهم على كدة وربنا معايا

بلاقي بقى مشكلة بحكم اني الاخت الكبرى مطلوب مني اللي انا محتاجاه بحاول اعطيه لكن انا محتاجاه حاولت انا وزوجي نكون صداقات كتيرة ونتبادل زيارات اسرية لكن لقينا الواقع بيفرض نفسه المصلحة والغيرة والحسد والنميمة ومشاكل خايبة من نوعية بتتصلي وما بتتصليش وتعالي انتي اشمعنى انا وحاجات تضيع الوقت ونميمة الحريم استغفر الله العظيم وشغل العيال بقى فكان البعد احسن

طيب ايه الحل يا ناس ؟؟

بالنسبة لي كان المدونة واهلي من العالم دة وقبلهم بيتي وازوجي واولادي دول هما كل حياتي وكل شغلي الشاغل وشوية بقى جنبهم شغلي والحمد لله تعالى نجحت فيه جدا بفضل الله برضه ووقفة زوجي جنبي لاني صممت انجح لكن ما كانش ينفع انجح بدون وقفته ومساندته لي وماكانش اناني


في يوم الاولاد راحوا مكتبة جنب البيت علشان يشتروا طلبات اشتروا بدالها لعب وقتها ما كانتش اسراء معاهم لكن اشتروا من كل لعبة اربعة لكل واحد لعبة ورغم اني وقتها عاقبتهم انهم اشتروا غير اللي طلبته منهم الا ان نصف الكوب المليان انهم اشتروا لبعضهم وعملوا حساب اختهم اللي مش معاهم

ودة اد ايه بسطني انهم لما هيفرحوا هيفرحوا مع بعض ووقتها قلت يارب ولا زلت بقول يارب يفضلوا يحبوا بعض على طول لا زوجة اخ تفرقهم ولا زوج اخت يفرقهم يارب يحبوا بعض على طول

ما اعرفش التدوينة سببها ايه وحاسة انها متلخبطة ومش مرتبطة يمكن

بس حالة حساها وعاوزة اكتبها حبيت احكيها مع اهلي في العالم الافتراضي

احبكم في الله

هناك 3 تعليقات:

غير معرف يقول...

انتي جميله اوي
ربنا يزيدك يارب
انا اكتر اجه بغبطك عليها شغلك
انا كمان منتقبه ونفسي اشتغل وانجح اوي في شغلي زي مقولتي
ربنا يزيدك من نعيمه يارب
انتي بنت حلال وتستهلي كل خير
ويجعل ولادك ذريه صالحه مترابطه يارب

عاشــــــ النقاب ـقــــة"نونو" يقول...

الله يرضى عليك ويرزقك بشغل يعزك ويصونك وتنجحي فيه يارب ويبارك لك في كل حاجة بس كان نفسي اعرف انا باتكلم مع مين حتى لو في تعليق ومش هنشره ممكن ؟؟؟

norahaty يقول...

ربنا يخليلك اسرتك
ويخليكى لهم وتشوفيهم
زى ما انتى عايزة واحسن
كمان وتاكدى ان زارع الخير
بيجنى خير وزارع الشر بحصد شر
فبأذن الله الحب والخير حيفضل بين
اولادك وبعضهم ما دمتى بتحرصى
على زرع الحب بينهم.