الأربعاء، ديسمبر 15، 2010

وبعدين بقى هو مفيش غيري ولا ايه ؟؟؟؟؟؟؟؟؟؟؟؟؟؟؟؟؟؟؟؟

تحديث
النهاردة زوجي اتصل بي وقالي المدرسة قررت اليوم الخروج الساعة 2ظهرا ولسة الادارة مكلماني دلوقتي يلا روحي هات العيال وكنت هناك فورا وامبارح واليوم لما بوصل المدرسة الراجل البواب دة بيجري ينادي على يوسف ومريم ويقولهم يلا ماما جت بحنان كدة مش معهود وهات شنطتك يلا وانا ولا كاني شيفاه اصلا
وكنت قلت لزوجي يكلم الادارة يسال المسئولة عن الاجراء اللي تم أخذه فضلت تعتذر وتقول معلش يعني معلش بقى المهم سيبنا التليفون وتاكيد من زوجي ان الوضع دة لو اتكرر هنقل الاولاد من المدرسة
بيتهيالي خافوا على العدة هههههه
قصدي خافوا انقل العيال من المدرسة خصوصا ان السنة الجاية هيبقوا تلاتة واللي وراها اربعة قوة برضه
ولا لما عملنا زوبعة قلقوا
انا خلاص عرفت ان الوضع في اي حتة يا رشوة يا دربكة بس الاولى ذنب ممكن زي ما قلتوا لي الجأ له لما خلاص ما عدتش ينفع غير كدة انما فيه بدائل اهو بتجيب حل
اخي الله يرحمه كان دوما يقولي انت قلبك طيب ودة ما ينفعش غريبة دة هو كان اطيب واطيب لدرجة المثالية فاسترده ربنا عن عمر32سنة
الله يرحمه ويبدو فعلا ان ممكن افلسع بدري بدري لو فضلت على كدة زي استاذ علي يونس ما قالي ووقتها هيشتري البواب ويبيع في العيال يارب سلم
ممكن حد يتطوع ويديني دورة تدريبية في الشراسة والتطنيش وانعدام الضمير وموت القلب والجليطة والموبقات دياعوذو بالله؟؟
الطبع يغلب التطبع
وانا هرجع دوما واقول زي خالد زوجي ما بيقول
الله خير حافظا وهو ارحم الراحمين
النتيجة اليوم كويسة مش كدة برضه تدي امل ان الصح والخير لازم ينتصر ههههههههههههههههههه اخر الفيلم؟؟
قررت بقى اني أجند البواب الأخر وياخد باله من العيال اذا احتاجوا حاجة
اما عن الدادة يا دكتور ابراهيم للاسف الشديد مش هقدر اكون مطمنة عليهم مع اي حد بعد تجارب مؤلمة مع سواقين التاكسي وباصات المدرسة والدادات سواء شخصية او مع اخرين
فكان اسلم حل ولو انه مكلف ان ابوهم يوديهم وانا اجيب تاكسي من البيت واروح اخدهم وارجع بيهم للبيت بس بشتري راسي وواولادي
متعبة انا عارفة بس سنتين على الحال دة لحين اتمام تعلم القيادة وبعدها وانا رايحة المدرسة بالعربية هدوس على البواب
ههههههه
ربنا يبارك فيكم
بواب مدرسة العيال كنت زمان كل فترة بديله حاجة لله خدوا بالكم معايا لله تحتها مليون خط

كان بيصعب علي وقفته على الباب وعارفة المرتب قليل رغم انها مدرسة خاصة وبسذاجتي المعروفة وطيبة قلبي فاكراه غلبان

المهم قعدت فترة ما اروحش بالعيال المدرسة ونسيت اوصي باباهم يعمل الواجب دة معاه المهم لاحظ بابا ان الراجل معاملته متغيرة وجافة فساله مالك طيب فيه ايه مغيرك

البواب لمح له على المعلوم

وجالي بابا يقولي فاعترضت وانتفضت وقلت لا انا باعملها لله مش علشان يفرضها علي ويبتزني بيها لو اتاخرت يقصر في واجبات عمله لا مش هديله تاني هديها للي يستاهلها من المدرسة برضه

عرفت بقى انه بيشتغل تسالي كدة وبيؤجر شقق للناس وله دخل اضافي كمان يعني مش محتاج والتصدق عليه ماينفعش ونازل ابتزاز في الناس برضه بطريقة ياخد فلوس يخلي باله من العيال والمعاملة خاصة وعادي جدا الناس بتدفع

لمحت للمدرسة ومديرها وشكيت للحجر يا عالم الراجل دة مش مظبوط ولا حياة لمن تنادي

المهم كام مرة المدرسة فجاءة تقرر العيال يطلعوا بدري ساعة ونصف تقريبا ومحدش يبلغني اروح الاقي البواب قاعد بيهم على الباب

واساله يقولي طالعين بدري طب رن علي ياعم علاء مش هفتح عليك او كلم الادارة يحلف انه ممعهوش رصيد

اقوله جرب ترن علي كدة ولو عملتها هجيبلك كارت

انا عاوزة اوصله انك لو هتستجدع وتبقى راجل تشتغل شغل بمايرضي الله هتلاقي مكافاة حلال عليها انما ارغام على اني ادفع له مرتب تاني مش من حقه وهو بيقبض مرتب اصلا على شغلته دي علشان يخص اولادي برعاية اضافية لا ارفضها دة اسمه رشوة

المهم برضه حاولت الفت نظره لشغل يخلي مستواه يتحسن وقلت في نفسي انتظر بس فعل يرضي ربنا منه في معاملة للعيال تخليني ابقى راضية واساعده دخله يتحسن بطريقة كويسة وما تخلنيش احس اني بديله رشوة

انما مينالظاهر بقينا بنستسهل

كان ياحضرات يوم الاحد الماضي يوم العاصفة الترابية والصقيع الذي لايوصف ولان الاولاد كان عندهم امتحان اضطريت اوديهم المدرسة وسالنا المدرسة المواعيد ايه قالوا زي ماهي

وجرجرت نفسي الساعة 3الاتلت روحت لقيت ولادي واقفين مردومين وبيترعشوا زي الارانب بقالهم ساعتين ؟؟؟؟

سألت هما خرجوا بدري قالي اه الساعة واحدة طار عقلي ياحضرات وانا بقوله حرام عليك حسبي الله ونعم الوكيل ما انت معاك تليفوناتي

يحلف ممعهوش رصيد وكأنه بيكلم سيدة من كوكب اخر ما تعرفش كلمني شكرا ولا تعرف ان فيه ادارة مدرسة فيها تليفوناتنا ممكن يبلغهم

حد يقولي طب العيال تدخل تقول بنفسها !!!

اقوله بمنتهى البساطة انا ما قلتش لهم على الاجراء دة قبل كدة متعودين يستنوا ماما بتيجي بالتاكسي تاخدهم للبيت

اصلهم زي الملايكة مطرح ما تحطهم وتقولهم يعملوا ولو حد قالهم هاتوا تليفون ماما وبابا نكلمهم كانوا جابوه

المهم اقوله حسبي الله ونعم الوكيل يقولي انا ظالم ايوة

اقوله يعني لو فيه مصلحة وفلوس هتيجي مش هتتصل يقولي لا رغم انه من كام يوم كان فيه شغلانة كويسة هيجيله فلوس كتيرة من وراها ولقيته اعطى للناس اصحابها تليفوناتي علشان اساعدهم الشغلانة تخلص واذا خلصت هيجيله فلوس كتير شفتم الضمير

لما طار عقلي وصعب علي عيالي روحت قلت لابوهم واتصل بادارة المدرسة وانا كمان كلمتهم ولا حياة لمن تنادي

يعيدوا ويزيدوا ان العيال كانت جت قالت

طب ياعالم هو احنا مش تليفوناتنا عندكم ؟؟؟؟

طيب لما المدرسة فضيت على الخمس ست اولاد منهم اتنين عيالي مش تسالوهم طيب انا كاتبة تليفوناتي في بطاقة المتابعة المدرسية ؟؟

المهم وكان لم يحدث شيء

منظر العيال قاتلني لما شفتهم كدة وبجد كان ممكن اقتل البواب لكن سارعت بالتحرك من امامه قبل الجريمة مرددة حسبي الله ونعم الوكيل وهو يقولي انا ظالم

الحل ايه يا جماعة؟؟؟؟

ارجع اديله فلوس تاني رشوة علشان ياخد باله من العيال رغم اني الحمد لله اقوم بالتصدق على ناس تستاهل بالمدرسة ومش منتظرة لا اهتمام بالعيال ولا غيره لرفضي الاسلوب دة

انما اقدم خدمات ادارية للمدرسة كعمل سي ديهات للمواد الدراسية وعمل منتدى للمدرسة وانشطة ما باخدش عليها اجر لكن عاوزة نهضة لمدرسة اولادي واهتمام بيهم ومش نافع او اني ببساطة انقلهم لمدرسة تانية بسبب البواب ويمكن اروح الاقي بواب واتنين افظع دلوني

العمل ايه

هيفضل الفساد ورايا ورايا وبرضه احاول اقف له والاخر يطلع مفيش فايدة ولا ايه ؟؟؟؟ّ!!!!

وبعدين بقى هو مفيش غيري ولا ايه؟؟؟؟؟؟؟!!!!!!!!!!!!!!

هناك 5 تعليقات:

ali younes يقول...

سيدتي العزيزة

السلام عليكم ورحمة الله وبركاتة
اولا احب ان اقول لك هون عليك نفسك شوية... انت لو أخذتي كل شيئ في حياتي بالطريقة دى بالرغم انى متفق مع وجهة نظرك لكن هتكون النهاية قريبة لو فضلتي كدة
يعني اية الاكلام دة
الكلام دة معناه انك تهدي شوية وتفكرى كدة بطريقة مختلفة ومن جميع الجوانب ليس من جانب واحد
يعنى تشوفي المفسدة والمصلحة اللي ها تحصل لما تديلة فلوس وحتى لو كان شكلها رشوة وتشوفي المصلحة والمفسدةاللى هاتحصل لما تمنعي الفلوس اعتقد ان المصلحة اكبر من المفسدة لما ياخد الفلوس دى وانا اقصد المصلحة لك انت
ام هو فهو مش راحم تلقية بيعمل كدة مع الكل خلاص هو حر يشيل وزرة
كمان لازم حضرتك تعرفي كويس قوى ان احنا في هذة الايام الدنيا اتقلب حالها بجد لا أخلاق ولا كرامة ولا دين ولا خلق
اما ان ينعزل المسلم المحترم عن هذا الواقع وهذة كارثة وام ان يستمر في اضيق الحدود لكن دون ان يضر بمصلحة بيتة واولادة واسرتة
سؤال
يساوى كام من المال ان يرى احدنا اولادة بهذا المنظر الذى ذكرتية في هذة العاصفة الترابية؟؟؟؟
بس خلاص

لورنس العرب يقول...

لازم تديله
انتي بتشتري راحتك وراحة أولادك- على الرغم من أنه رجل ندل وملوش في المعامله المحترمه زيه زي كتير من الناس وزي جميع من شابهه في عمله
لكن هي الناس دي كده
لو لم تأخذ منك يوم واحد هتلائي وش تاني خالص
ناس تقرف

Dr Ibrahim يقول...

حسبنا الله ونعم الوكيل...
من ترك شيئاً لله عوضه خيراً منه..
هو فيه فكرة بس على ما أعتقد مكلفة شوية أن لو داية توديهم وتروح قبل الميعاد بساعتين مثلا وتجيبهم على اساس مثلا المدرسة ممكن تطلعهم بدرى ساعتين ممكن يكون حل بس مش عارف هتبقى نفس النقود اللى حضرتك بتطعيها للبواب ولا لا؟
او عدلى الفكرة بافكار مماثلة ولكن لا تدفعى له مرة اخرى.

عاشــــــ النقاب ـقــــة"نونو" يقول...

جزاكم الله خيرا
فيه تحديث مه اليوم
على صفحة الموضوع ومعاه رد على ردودكم الكريمة جزاكم الله خير انكم جنبي ومعايا لحسن ممكن بجد يجرالي حاجة ربنا يديم المعروف بينا يارب
تحياتي

همس الاحباب يقول...

لا حول ولا قوة الا بالله
هونى على نفسك يا استاذة
مع الاسف كل شىء فى تلك البلد بقى بالرشوة والمحسوبية وضاع الضمير والاخلاق
ربنا يصبرك والمؤمن دائما مصاب
والحمد لله ان الموضوع جاب نتيجة وفيه ايجابية الحمد لله
تحياتى