الثلاثاء، فبراير 21، 2012

فاكرين توتي ؟؟كتبت له رسالة هنا من 4سنين تعالوا ادعوله :)

يوافق اليوم الذكرى التاسعة لاسترداد المولى لوديعته(( اخويا سيد)) وقتها كان عمره 32عام فجأة وقبل فرحه ب3شهور ورغم انه كان اكبر مني 8سنوات الا اني كنت باعتبره ابني وبيجري علي في اي حاجة اخويا علمني الصلاة وانا صغيرة وعلمني صلة الرحم علمني التسامح والحنان علمني العطاء بدون ما انتظر مقابل في يوم كنت في زيارة لبيتنا بيت ابويا وشقته كانت تحت التشطيب في نفس البيت وماما قالت لي شفتي سيد جايب ايه فوق في شقته ؟ايه يا ماما قالت لي لقيته جايب كلب صغير!! ولفه وجايب له لبن ولانشون فضحكت وقلت له ايه دة يا توتي كنت دوما اناديله بتوتي قالي وانا راجع من شغلي بالليل لقيته بيترعش من البرد صعب علي صغير اوي اخدته بس على بال ما يدفى ويقدر يدافع عن نفسه _وفي يوم تاني لقيناه شايل بنوتة عمر سنتين وداخل علينا بيها وقالع الجاكيت بتاعه ولاففها بيه قالنا دي بنت العامل الصغيرة امها بتولد قيصري في المستشفى وابوها مش عارف يوديها فين وعمال يضرب فيها رايح جي خدوها معاكوا راعوها لحد امها ما تطلع من المستشفى !!! غير خروجه في سبيل الله في وقت اللي يطلق لحيته على طول على امن الدولة _ اخويا ربانا وعلمنا 3بنات مع والدي وزوج اتنين مننا في حياته والتالتة لما توفى وصى بكل جهازه لها اخويا كان عارف انه عمره قصير دوما كان بيقولنا كدة انا حاسس اني هموت الوحيد اللي دوما كان يبر كل الناس حتى وان أسائوا ليه ربنا يرحمك ويغفرلك يا حبيبي ويسعدك يارب زي ما اسعدتنا كلنا ويجعل قبرك روضة من رياض الجنة ويبدلك دارا خيرا من هذه الدار واهلا خيرا من هذه الاهل ويبدل سيئاتك حسنات ويدخلك الجنة بغير حساب ويجمعني بيك في الجنة يارب العالمين _يا سيد يا حبيبي انت معايا على طول عمرك ما فارقتني لحظة ولا عمري حسيت انك متوفي اخويا مالوش اولاد يدعوله فامانة عليكوا تدعوله بالرحمة والمغفرة

هناك 3 تعليقات:

لورنس العرب يقول...

رحمه الله واسكنه فسيح جناته وأثابكم الله الصبر

بـت خـيـخـة وأي كـلام يقول...

فيه ناس تفضل عايشة وكانها ميتة لانهم مسابوش اثر وراهم

وناس تانية تموت وتفضل عايشة باعمالها الطيبة

ربنا يرحمه يارب ويغفرله ويدخله فسيح جناته

مجداوية يقول...


السلام عليكم
اسأل الله له الرحمة والمغفرة و جنة الفردوس وحور العين وأن تكونوا جميعا في صحبته

أمواتنا لا يغيبون عنا إلا بأجسادهم لأننا لم ولن ننساهم فهم الحاضرون الغائبون

وإن شاء لن ينقطع عمل أخيك طالما لديه أختا صالحة تدعو له فهو كان مسئولا عنك بحكم مسئوليته كأخ فاعتبريه والدا وليس ابناوهكذا أراه من حديثك عنه
رحمه الله رحمة واسعة وكل موتى المسلمين
اللهم آمين