الجمعة، مايو 24، 2013

حياة مرة اخرى تجربتي :)

السلام عليكم ورحمة الله
وحشتوني ووحشتني المدونة والتفاعل معكم صحبة الخير
اولا كل عام وانتم بخير اللهم بلغنا رمضان 
يوافق اليوم الذكرى الاولى لوفاة امي فلاتنسوها من صالح دعائكم
اللهم ارحمها واغفر لها واغسلها بالماء والثلج والبرد وادخلها جناتك يارب بغير عذاب واجعل قبرها روضة من رياض الجنة هي واخي واموات المسلمين يارب العالمين
_________________________
مررت بتجربة امس اسميتها موت ثم حياة ؛ لا أعلم لها تفسيرا أو ربما يعجز عقلي عن تفسيرها
سأقصها عليكم كماهي
غفوت قبل صلاة المغرب بقليل وايقظني زوجي لالحق بها واستيقظت بحمد الله وصليت المغرب ثم اذن العشاء وصليته ووترت ودخلت لاجهز وجبة لزوجي واولادي ؛ كنت نبهت على ابنتي وابني بعمل في المطبخ لم يتموه مرارا وتكرارا فثارت ثورتي كان امامي على حوض المطبخ مجموعة من الحلل الصغيرة فضربتها بعصبية تطايرمنها حلة صاج صغيرة في الهواء ووقعت على قدمي ظننتها كدمة من شدة الألم فاذا بالدماء تتدفق من اصبع قدمي الصغير فانخفضت لاوقف النزف بتجميع وغلق الجرح وبالفعل قد كان بدأ النزف في التوقف لكن وقتها شعرت بدوار فظيع فصرخت على زوجي (( أنا بدوخ يا خالد ))((خالد رجله اليمين مكسورفيها 3اصابع ومركب فيها 3مسامير من 23يوم )) فرد علي صراخي (( اقعدي على الكرسي ورجعي راسك لورا )) جلست على كرسي اضعه في المطبخ ولم أشعر بعدها بأي شيء الا صرخات صغاري ((ما تموتيش يا ماما ..ما تموتيش يا ماما )) استمعت لهذه الكلمات باذني اليسرى واحسست بمن يجذبني منها لأستيقظ وقتها فتحت عيناي ورددت(( متخافوش .. ورددت الشهادتين وبادرت بالسؤال هو ايه اللي حصل )))وجدت نفسي بأرضية المطبخ بجوار زوجي طبعا اخدت كدمة محترمة في ظهري الحمد لله  وحولي أطفالي يبكون ويصرخون وزوجي رد (( وقعتي فطلبت مية بسكر عملتها بنتي وشربت منها 
استعدت بعض وعيي وكنت اشعربرعشة غريبة وتنميل في يداي وقتها طلبت من ابنتي اسدالي ونقابي وارتديتهم وبادرت بالاتصال بصديقة غالية علي جاءت على الفور لتساعد زوجي وتساعدني بالخروج لمستشفى خوفا من تدهور او اي شيء من ذلك لشعوري بهبوط 
سالت زوجي هو ايه اللي حصل قالي بالحرف دخلت عليكي لقيت عينيكي ابيضت وفتحتي بقك وصوت حشرجة فظيع كأن روحك بتطلع واتشنكتي وخشبتي  ووقعتي من على الكرسي خدتيني معاكي واستقريتي على رجلي المكسورة ووشك مابقاش فيه دم خالص قلت خلاص دة الروح بتطلع  اضطريت استحملك لحد ما اشوف حد يشيلنا احنا الاتنين :)))) !!
المضحك اني لما روحت المستشفى ريقنا نشف على ما جالنا حد في الطواريء يقيس الضغط وقالت 130على 90وقالت مش عارفة هبعت لكوا حد تاني !!!ريقنا نشف تاني على ما جالنا حد تاني وقاس الضغط وقال 110على 80 !!!!!!!
ولما بقى الدكتور النبطشي جالنا قال فين الجرح وطبعا داس في كل حتى فيه تقريبا علشان يتأكد ان مفيش كسر وقال دي كدمة بس وتخلل ذلك عبارات دلع ستات ، مفيش حاجة، بلاش دلع!!! وزوجي متغاظ منه لانه شاف الموقف وعمال يفهمه اني اغمي علي وكان تفسيره ان الألم الشديد خلى الجسم يعمل دفاع بالاغماء ليشغل نفسه عن الألم !!! طيب لما الألم شديد لدرجة اني اغمي علي منه بتدوس وبتفتح في الجرح ليه زيادة عن اللزوم لحد ما نزف تاني ؟!!
بقيت اقول لزوجي معلش من اللي بيشوفوه ومن كتر الادعاءات بقى حالتي بالنسبة لهم دلع ستات !!

انما بكرة مع استشارة
زوجي قالي بقى استغلي الموقف دة العيال هيعملوا اللي انتي عاوزاه مايسمعوش الكلام تقوليلهم اموت لكوا بقى ؛)))))

الحمد لله رب العالمين على كل حال 
الحمد لله حمدا كثيرا طيبا مباركا فيه 
لا تنسوني من صالح دعائكم
نحبكم في الله


هناك 8 تعليقات:

موناليزا يقول...

حمدالله على سلامتك يا حبيبتي
قدر ولطف

Baskouta يقول...

سلامتك الف سلامة
صعبان عليا خضة الاولاد عليكي
ربنا مايحرمكوش من بعض وماتشوفوش شر ابدا
:)

عاشــــــ النقاب ـقــــة"نونو" يقول...

جزاكم الله خيرا حبيباتي
الحمد لله رب العالمين حمد كثيرا طيبا
فعلا العيال اتحصروا والله
والله انا من اللي بيحكوه انا فسرته بان الاوان قد آن ودعوات اولادي ردت القضاء والله العيال اتخضوا وتعيطي على شكلهم وهما عمالين يبصولي بعد ما رجعت من المستشفى وعمالين يبوسوا في ايدي وكتفي الحمد لله على كل حال يارب

الميكروباص يقول...

ايه ده؟ معقوله؟ ولله ما صدقت عنيا

انا نازل اصلي العشاء وهاتفرج على ماتش وراجع أرد

حمدا لله على العوده

لم أقرأ الموضوع بصراحه- لكن أتمنى ان تبتعدي عن السياسه فقد تسببت في خسارة صداقة السنين مع بعض الاصدقاء!

عاشــــــ النقاب ـقــــة"نونو" يقول...

لورنس العرب
بصراحة انا مش فاهمة تعليقك خالص
وجزاك الله خيرا على النصيحة وانتظرتعليق مفسر

جنّي يقول...

السلام عليكم

حمدا لله على السلامة ..

شفاكي الله وعافاكي ..

ورحم الله امي وانك رحمة واسعة واسكنهما الفردوس ..

مرحبا بك في عالم التدوين من جديد..

تحيتي

مهندس مصري بيحب مصر يقول...

ألف سلامة يا فندم
شفاكي الله و عفاكي انت و زوجك
و رحم الله والدتك
و بارك لك و لزوجك و لولادك و رزقكما من الخير كله في الدنيا و الآخرة

عاشــــــ النقاب ـقــــة"نونو" يقول...

جزاكم الله خيرا
والله فرحانة انكم لسة فاكرني يارب يديم المودة وطلتكم علي
وكل عام والجميع بخير وهنا يارب