الأربعاء، أبريل 02، 2008

شقاوة شعب


السلام عليكم ورحمة الله وبركاته


احبتي في الله

بداية وكالعادة احب اعلن عن تدوينة جديدة في قسم الشيوعية وحقائق لاول مرة كنت اعرفها وتدوينة اخرى في قسم الشيعة عن كعبة في كربلاء يحج اليها مسلمين عاوزين تشوفوها ادخلوا على الهدى ائتنا بالضغط على البانر الخاص بها اعلاه


البداية


كلنا سمعنا عن اعتصام يوم 6 من ابريل وكلنا عرفنا من النت ايه الطلبات بتاعت الاعتصام برضه

الحقيقة انا بستغرب جدا جدا

هو الاعتصام دة لييييييييييييه؟؟؟؟؟؟؟!!!!!!!!!

وعلشان ايييييييييييييييييييه؟؟؟؟؟!!!!!!!!!!

دة احنا ناس ناسية الخير صحيح

انتوا يا جماعة مش شايفين البدائل الكتييييييييير والاختراعات اللي اتوفرت للسلع واصبحنا بنستغنى بيها عن السلع الغالية
ايه مش عارفينها ولا زي القطط بتاكلوا وتنكروا؟؟؟؟!!!!

افكركوا انا
انتوا نسيتوا بديل الزيت اللي بقى مغلي الحلبة

اهو دة اختراع جامد في البحيرة على ما اظن عملوا زيت جديد

ايوة اختراع وبديل رخيص الثمن يا ظلمة

يجيبوا الحلبة ويغلوها ويبردوها ويعبئوها في زجاجات زيت وتباع ارخص من الزيت المعروف

طيب يا ظالمة

نسيتوا الاختراع المبهر لبديل اللبن

قولوا اه نسينا

لا ازاي دة عمل ضجة اعلامية جاااامدة وطلع سيادة المسئووووووول عمل تجربة عملية ان الكلام دة باطل

لكن بما ان الاختراع دة دخل بيتي اكتر من مرة وكان مصيره حوض المطبخ فبسجل اعجابي بالمخترع اللي لم يقصر بالمرة ولم يحرمنا من نسبة البروتين اللي اتوجدت في الغراء واللون الابيض اللي موجود في الجير

طيب انكروا بقى الاختراع المبهر والبديل الفظيع للدقيق اللي اتعبأ واتبرشم في اجولة دقيق مدعم وتم بيعه وطبعا هو سيبيداك او جير ابيض وبالهنا والشفا يا مصريين

طيب دة فيه واحد في احد المحافظات طور الاختراع دة وعبأ العجين وكانوا بيتم بيعه معبأ برده كتر الف خيره

وفر علينا العجن واللت بس احنا نخبز

طيب قولوا بقى نسيتوا اللحمة بقى

انتوا كدة تاكلوا الكلاب والحمير الميتة اعزكم الله وتنكروا بقى

ازاي سامعة حد بيقول

يعني ماحدش سمع عن الصحفية اللي اتنكرت وراحت صورت بكاميرا الموبايل عملية سلخ لكلب ودبح لحمار ولمؤاخذة يعني وحضرت بيع الاشياء دي وتوزيعها على محلات الكباب والكفتة اللي في شارع سكة الوايلي

وكمان محلات الجزارة الكبيرة

عارفين عندي في السوق بيجوا يدبحوا ادامنا الخرفان والماعز ويبيعوها رخيييييييصة اوي بس بعينك تشوف الدبيحة من دول خلاص واقفة بتموت اصلا

والناس بتشتري ايه حصلهم ؟؟

عايشين اهم زي الفل

عمرنا سمعنا عن ان حد مات لما اكل لحم حمير ولا كلاب

عارفين في برنامج العاشرة مساء سألوا طبيب بيطري عن امكانية كشف اللحم دة عارفين رد وقال ايه؟؟؟

ان من الصعب كشفها وهي مفرومة وطبعا بيحطوا توابل كتيييييييير عليها وتتباع لمحلات الكباب بخمسة جنيه الكيلو

طيب عندي برضه السوق بتاع الجمعة اللي فاتت واحد معلق دبيحة بيقول انه عجل صغير وعمال ينادي ب24 جنيه الكيلو لحم بتلو صغير والناس بتشتري

انتوا عارفين دلوقتي كيلو اللحم ب40 جنيه اقله يبقى ابو 24 جنيه دة ايه اكيد حمار ولا حصان متعلق وكاتب عليه عجل

همممممممممممممممممم اقول تاني ولا كفاية اختراعات كدة

تقوموا تنكروا كل الخير والاختراعات اللي الدولة سيباكوا تخترعوها وتبيعوها لبعضكوا ولنا ومش ملاحقة على ضبطها هتضبط مين ولا مين بس

تسيبوا كل دة ورايحين تتشاقوا من الشقاوة يعني وتعملوا اعتصام

يا فرحتي يا فرحتي

يقولك ايه اوعى تروح شغلك واوعى تروح مدرستك

واوعوا تشتروا حاجة من اي تاجر اليوم دة واوعوا واوعوا وعلقوا راية سودا

ماشي ماشي بس انتوا طيب فكرتوا كويس في الموضوع دة ونظمتوه ؟؟؟

انا مع اي خطوة ايجابية بقلبي وكليتي وفشتي لان جيب زوجي عنده التهاب خبيث مستعصي

ارى ان الموضوع غير منظم بالمرة ويحتاج لاعادة تنظيم وترتيب ورقة بطلبات محددة

انما تطالب بان مفيش محسوبية ومفيش رشاوي تتنفذ ازاي دي

تطالب ان موظف مش يروح شغله يوم ويتخصم عليه اخرالشهر او يغطوا الموظفين على بعضهم وواحد يمضي للتاني

الخلاصة انتوا وانا عاوزين رد فعل ورد فعل قوي وكلمة نقول بيها لا احنا شعب واعي ومش هيضحك علينا

ونعمل اعتصامات بس بطريقة صح

وانا من هنا باعلن عن امكانية قيادتي لربات البيوت في اعتصام واطالب فيه بخفض كافة الاسعار فجأة كما ارتفعت فجأة

لاني اتفرست الحقيقة نزلت السوق الجمعة اللي فاتت رجعت ضغطي عالي ومشيت اكلم نفسي فيه

خلاص كفاية كدة هتدرسوا الموضوع وترتبوه وبعدين ابقوا اعتصموا

انما اللي هيتعمل دة اسمه شقاوة شعب

تحياتي

هناك 35 تعليقًا:

بحبك يامصر يقول...

انا معاكى ان الاضراب ده ممكن فعلا ميعملش اى حاجه ويكون ملوش تأثير بس انا شايف
انه مهم برده على الاقل الناس تتخلى عن خوفهل وتبدأ تتحرك وبعد كده يكون فى فرصه للدراسه والنظام وعمل اى شئ منظم
على رأى المثل العيار اللى ميصبش يدوش
تحياتى

عبده الرايق يقول...

ياريت الاضراب ده ينجح
انا عن نفسى موافق عليه
ومش هاروح الشغل
ولو اننا عندنا انتخابات لكن
هاضرب

Khaled Farag يقول...

باتمنى أن كل مسلم يحاسب نفسة ويراجع ضميرة قبل مايحاسب غيرة ..
باتمنى أن الأدب وحسن المعاملة بين الناس ترجع تانى ..
باتمنى أشوف وشوش بشوشة فى الشارع بتبتسم بدل العبوث اللى مسيطر على كل الناس
باتمنى ....
حاجات كتير و عملر الزعيق ماجاب نتيجة
أنا ممتنع عن المشاركة فى أى مظاهرة

تقبلى مرورى

فرنسا هانم يقول...

تحياتى يا ام اسراء
وانا مضربه يوم 6 ابريل
بس نفسى الاضراب ده يشمل مصر كلها
مش قادره اتفأل
لكن هنعمل اللى علينا
تحياتى لكى

monaliza يقول...

معاكى حق انا كمان كنت بفكر فى كده يعنى كل الموظفين لما يغيبوا يوم ايه اللى هيحصل غير خصم مرتبهم وافرضى واحد كان المفروض يمضى مثلا على ورقة مهمة وبسبب الموضوع دع أخر مصلحة الناس ايه اللى هيحصل غير تعطيل المصالح اكتر ماهى وبعدين ذى مافيه هيضرب عن العمل فى كمان هيروح
صح الموضوع محتاج ترتيب
أشكرك على طرح الموضوع ولما نشوف اخر الموضوع ده ايه
تعرفى اكتر حاجة بجد بفكر فيها هى صدمة الشعب وخيبة أمله لو مفيش حاجة من اللى عايزينها اتحققت
اللهم ارفع غضبك ومقتك عنا

عاشقه الفردوس يقول...

لا لا لا لا
ده احنا حتي مالناش حق

اخص علينا اخص

احنا معندناش دم بقي علي كده


بجد بجد ربنا يصلح الحال وجايز يحصل حاجه


تعرفي حتي لو ماحصلش حاجه هيكفينا ان الناس بدات تطلع وتنادي بحقها

دكتور بيطرى يقول...

بارك الله فيكى وفى أمثالك وأدعو الله أن يخرجنا من هذه المنحة سالمين غير مفتونين وأنا أقول منحة لأن اللى بيحصل ده من ظلم وإستبداد كافى ليهز كيان أمة ويحرك مشاعر ملايين من البشر المستحمرين من قبل فئة ظالمة من القادة الذين باعوا دينهم بدنيا غيرهم وإنا لله وإنا إليه راجعون

الفاتح الجعفري يقول...

اختنا عاشقة النقاب
الله المستعان
انا من رايي فعلا ان كثرة الاضرابات والعصيانات المدنيه مهمه جدا في هذه الفترة لانها خطوة ايجابية وتحرك قطاعات من الشعب ولاتضر ضرر مباشر او تحدث فوضي وغيرة ,ولكن لابد ان نغير من النفوس اولا وان نعيش لقضايا فما اهون ان يموت الانسان او ان يتخلي الانسان عن موقفه ان كان من اجل شيء مادي ,اما ان كان من اجل قضية وياحبذا لو كانت قضية البشريه قضية الاسلام لكان افضل واقوي من اي شيء
واللهم ارنا الحق حقا وارزقنا اتباعه وارنا الباطل باطلا وارزقنا اجتنابه
وجزاكم الله خير

مجداوية يقول...

هو فيه بديل عن كل السلع معرفش شوفتى فيلم دهب ولا لأ معلش أيام يعنى ما كنت باتفرج بس فيه موقف مناسب كان اسماعيل ياسين حاطط قدامه طبق فاضى ولافف فوطة حوالين رقبته وبالشوكة والسكينة قاعد ياكل من الطبق الفاضى ويقطع وياكل لحد ما شبع متهيألى ده أنسب حل لينا ,,الاضراب حتى لو محققش نتيجته زى ما قال بحبك يامصر على الأقل بيقول ان الشعب ده ممتش ولسه فيه روح يا صحى بقى وافاق يا اما الله يرحمه ولا تجوز عليه الا الرحمة

د/اجدع بنوته يقول...

الشعب لما يحب يتشاقى بيجيب لاهله العار صحيح

النظريه انى توصلت

ان احنا لا لينا ف ديمقراطيه

ولا لينا ف حريه راااى

ولا لينا ف اضرابات ولا الحاجات الكبيره دى

لسالنااااااااا كتير لما نتقنها

تحياتى

الطائر الحزين يقول...

اعتبرية شقاوة

حتى وان لم يفعل شىء
كليتى وفشتى نسيتى الطحال
تحياتى

nonoymm يقول...

السلام عليكم
اخي بحبك يا مصر الاضراب دة ممكن يكون سيف مسلط على رقبة اي حد بس المهم زي حضرتك ما قلت شوية نظام وترتيب نقط
ومعاك جدا العيار اللي ما يصيبش اياك يدوش والمعتقلات ما تتمليش غلابة
تحياتي لمرورك
=====================================اخي عبده الرايق الرايق وانا كمان معاه طبعا بس بنظام زي ما قلت وهحط ايشارب اسود يومها بس ابني في مدرسة خاصة لو ما خليتوش يروح المدرسة يومها تفتكر هياثر انما زوجي بيروح الشغل الجمعة اصلا هينفع يضرب يومها ؟؟ الاكيد ان صاحب الشركة هيقوله روح ومليون غيرك يقعدوا مطرحك وبنص مرتبك ساعتها اروح فيييين؟؟؟؟
===============================اخي خالد اهلا بحضرتك زائر كريم لاول مرة واتمنى دوام التواصل مع حضرتك جدا جدا بس لازم زعيق المرة دي مش هينفع غير كدة انما لازم يكون مدروس
ومعاك جدا في ان كل واحد يعدل نفسه الاول ويتقي ربه
تحياتي
======================================فرنستي الجميلة وانا كمان هضرب بس على ادي بقى اللي في ايدي يعني بحبك في الله
===================================
موناليزا امة الله امين يارب وتحياتي لحضرتك حبيبتي في الله
===================================
ايوة يا عاشقة الفردوس انا حاسة انه هترسي على كدة تحياتي لمرورك
===================================
اخي دكتور بيطري الله يبارك في حضرتك ربنا يرحمنا برحمته تقبل تحياتي
==================================

nonoymm يقول...

اخي الجعفري وان معاك قلبا وقالبا وطحالا على راي اخي الطائر الحزين
نصحي النخوة في الناس ونبطل سلبية اه بس برضه نجيب نتيجة وربنا يكرمنا يارب
تحياتي لحضرتك
================================
مجداوية
حبيبتي في الله
اه شفته كنت بحب اتفرج عليه وعارفة المشهد دة وربنا يحيي الشعب من جديد يارب تحياتي لحضرتك
=====================================اجدع دكتورة بنوتة صغنتوتة
ضحكتيني
يا لهوتي يجيب العار
دة شعب خلبوص صحيح
ههههههههه
تحياتي ليكي يا سكرة
=================================
اخي الطائر الحزين
يا شقاوتك يا شعب مصر خلاص افتكرت الطحال كتبته لاخي الجعفري
تحياتي لحضرتك

في حب مصر يقول...

ربنا يوفقكم في الاضراب وتحققوا اللي عايزينه
بس انا مش هاشارك فيه

لاني برة مصر في الإمارات سيبت البلد كلها وطفشت

بس بجد تحركات جميلة مين عارف يمكن تجيب نتيجة

عصفور المدينة يقول...

يعني انتي معايا مش بتأيدي الإضراب صح ولا انا فهمت غلط

3abratalsabeel يقول...

ماشاء الله عليكى
انا قلت هدخل هلاقى بقى الدنيا مقفلة والشبابيك مواربة والستاير نازلة
لكن بجد لاقيت انسانة دمها خفيف

يا بنتى احنا كده ناكل وننكر
احنا مش بناكل العيش اللى مليان تراب وظلت ولما يكسر سنانا بنقول لا ابدا دول شوية ملح تلاقيهم ....

انا معاكى فى الاضراب بسبب غلاء الاسعار
بس ما قلتيش بقى ....
هيخفضوا الاسعار ازاى ؟
تحياتى
سلام عليكم

3abratalsabeel يقول...

ليه بس كده ؟
ما تخلى البساط احمدى وتسيبى الكلام يظهر على طول
مش هنقول حاجة عيب والله
:)
بس برضه لذيذة

الراقص مع الذئاب يقول...

السلام عليكم
جزاك الله خيرا يا عاشقة النقاب

بصراحة وجعتي قلبي بخصوص اللي حصل دا...واللي مش عاوز افتكره
وبالذات في موضوع اللحوم
انا قاعد لوحدي بقالي شهر ونص في القاهرة ومقضي الاكل كله في مطاعم
تفتكري اكون اكلت كام كلب وكام قطة لغاية دلوقتي
ربنا يسترها علينا بقي
والله حاجة تسد النفس

اما بخصوص الاعتصام والاضراب فدي المرة الوحيدة اللي هقولك اني هتابع وهتفرج
عمري ما اهتميت بمظاهره ولا اعتصام لأنها بتكون في نطاق السياسة
وانا مليش في السياسة ولا بحب اسمع سيرتها
انما المرة ديه هتجر ناس كتيرة معاها....ناس عادية وبسيطة
ربنا يسترها بقي

انا مسلمه يقول...

لا فعلا مش لينا حق

إحنا طامعاين خالص

يلا معلش حكومتنا طيبه ولازم تستحمل

دلع شعبها عليها

إمال هاياخدو المناصب ببلاش

لازم ندلع شويه عليهم

هههههههههه

مقال جميل أختنا عاشقة النقاب

ومدونه رائعه

إن شاء الله مضربين

جزاكم الله خيرا

انا مسلمه يقول...

مممممممم
طيب ما كتر خيرهم

هايعملوا إيه أكثر من كدا

يقطعوا نفسهم يعنى

سبحان الله

بس إحنا فعلا شعب طماع

بعد كل دا وعاوزين إضراب

علشان تعرفوا إن حكومتنا طيبه

بس برضه المنصب مش بيتاخد بسهوله

لازم يعزرونا ويستحملوا دلعنا عليهم

ربنا يصبرهم علينا ياااااااارب

هههههههههههه

جزاكم الله خيرا أختنا عاشقه النقاب

مقال رائع

ومدونه أروع

وإن شاء الله عاملين إضراب

ربنا يبارك لك

Vague يقول...

عغندك حق.. تااب يناكله ده مش موز ولا دقيق ولا زيت
دي اختراعات
وكويس انك حاسسه بزوجك.. لان في ستات ولا الدموع.. مالهاش دعوة خالص

كنت كلمت واحد من الاخوان... قالي انه موضوع غير منظم فعلا.. ,ان كان يتمنى نجاحه
الاعتصام بو احد على فكرة

مجداوية يقول...

أختى الحبيبة
أرجو أن تجربى الدخول الى مدونتى وتقولى لى أذا كان الأمر اتصلح أم ما زال هناك صعوبة فى الوصول اليها
بارك الله لك

عايش ولكن يقول...

حكومتنا ممكن تخاف انما متختشيش
كلمه كنت قريتها فى احدى التعليقات فى مدونه زورتها قبل كده
اعتقد بتلخص الموقف
تحياتى
علاء

t3ban يقول...

اول زيارة
طب انت عايزة ايه
اضراب ولا لأ
و سؤال وملهوش دعوة خالص بالموضوع
و لا ليه دعوة بأسم البلوج
متفهمنيش غلط
انت انتماءك السياسي لايه
من الاخر هل تؤيدين الاخوان
و لو تأيديهم اكيد سامعة اخبارهم
هما بقي بيأيدو الأضراب
و اه هو مفهوم الاخطلاط من وجهة نظرك
متسألنيش ليه السؤال ده
اصل احد الشخصيات العزيزة الي قلبي
لما ارتدت النقاب أعتبرت المسج بالتهنئة لعيد الأضحي المبارك نوع من أنواع الأخطلاط
مسجsms

خبيب يقول...

أرى النقطة الأهم ليست في الإضراب عموما .. إنما في ظروف هذا الإضراب خاصة ..

الإضراب صراحة غير محدد المعالم ، أشعل فتيله نار الجوع لا غير ، ومتى أطفئت هذه النار انتهى كل شئ .. لا استعداد هنالك ..

كم سيتحمل التبعات ؟ كم سيتحمل التهديد ؟ كم سيتحمل الابتلاء ؟

يحتاج الأمر - كما أوضحت - إلى تخطيط وبصيرة

nonoymm يقول...

السلام عليكم ورحمة الله
اهلا وسهلا بحضرتك [في حب مصر] زائري الكريم لاول مرةوارجو التواصل الدائم
التحرك بالفعل جميل ولكنه سيكون اكثر جمالا اذا كان مدروس تحياتي لحضرتك
====================================اخي عصفور المدينة فعلا انا لا اؤيد هذا الاضراب الغوغائي ولكني مع ضراب مدروس ومخطط له بنقاط محددة ويقوم به ممثلين عن الشعب او عن كل مجموعة ولكن ما سيتم ببساطة هو شقاوة شعب كما ذكرت وان كان نابع ع ن ضيق نشعر به جميعا تحياتي لحضرتك
==================================== 3abratalsabee
اهلا بحضرتك زائرة لاول مرة واتمنى دوام التواصل وفكرتي اكيد وصلت من خلال تعليقاتي اما عن المدونة نفسها فهي مدونة ستائرها منسدلة ومقفلة ونتكلم من وراء الكي بورد فقط ولكن نشعر ببعض ونتعاون على البر والتقوى واعتذر على تفعيل الموديريشن نظرا لدخول مدونين كالمملحدين وغيرهم ولا اريد نشر افكارهم من خلال مدونتي وان كان ما يوجد ما يناقش او يستحق الرد انشره بدون حسابهم حتى وان كان نقد للمدونة
دمتي بخيروتحياتي
===================================
اخي الراقص مع الذئاب اهلا بحضرتك وسلامة قلبك ربنا يعزك ويخليك وما تخافش احنا في الهوا سوا انا عن نفسي اكلت اد حمارين اعزك الله ومنتظرين احنا كمان حيحصل ايه ربنا يسترها
دمت بخير
===================================

اختي انا مسلمة نورتي المدونة وربنا يبارك فيكي واشكر اطرائك حبيبتي وارجو دوام التواصل
اول زيارة ونورتينني
تحياتي
===================================
اخي ادم اهل بحضرتك وشرفتني وتعليقاتي وضحت اكتر موقفي ومع الاخ الاخواني فعلا
تحياتي لحضرتك
===================================
اختي مجداوية حبيبتي في الله انا ادخل المدونة بسهولة لكن وضع المدونة على القاريء هو اللي صعب وحاولت اضعها تاني بيقول فيه خطا وبيتهيالي انه بسبب ان القالب بتاع المدونة قديم والله اعلم
تحياتي لحضرتك
ومضطرة ادخل لك يومي لاتابع الى ان تعدلي لقالب جديد يناسب قاريء المدونات
تحياتي
=====================================اي عايش ولكن دلوقتي طلعو لنا بيان بالمادة 124 تجرم وتعاقب بالحبس كل من يشارك في الاعتصام دة او يحرض عليه
ولا تعليييييييييييييق
تحياتي لحضرتك


===================================

nonoymm يقول...

السلام عليكم اخي تعبان ربنا يعافيك يارب
انتمائي السياسي ولا لاي حد ولا لي في السياسة بتاتا بس مش مغيبة برضه اعرف كل حاجة حواليا واقول رايي ووجهة نظري
انا عاوزة ايه
عاوزة اضراب ولا اعتصام ولا اخد حقي بالعقل وبخطوات مدروسة وبادب ومن غير ضرر لاي حد
انا توجهاتي لله وللرسول يعني عاوزة ارضيهم وخلاص تسموني سلفية تسموني اخوانية انا مسلمة وربة بيت
مفهوم الاختلاط عندي هو الاختلاط المعروف ليك ولي ولاي حد والكلام يطول شرحه
اما عن اسم البلوج بما اني اتسالت فيه كتير
منضطرة اني اعمله في بوست وليكن في اقرب فرصة
حكاية ان زميلتك اعتبرت رسالة الموبايل واللي عارفاها انها بالانجليزي اسمها مسج ااعتبرته اختلاط فبيتهيالي عند البعض بيسبب االاختلاط وغالبا لضعاف النفس
اسمحلي حضرتك ضحكتني
تحياتي وودي

اخي خبيب
اهلا بحضرتك ومع كل كلمة حضرتك قلتها بالحرف
تحياتي ودمتم بخيروود

Whispers just for a Night يقول...

أختاه الكريمة

أنصحك بمراجعة موضوع أختنا المجداوية الأخير بعنوان "إضراب لله" فأحسب أن فيه خير كثير.

أما عن الإضراب فلقد علمت أن الكثير من البشر لا يعلمون عنه شيئاً. ولكن قد يكون خطوة من ألف مليون خطوة. وما أصبر المصرين على الذل والهوان ودائماً يقص لنا التاريخ عن صبرهم عى الأنجليز وعلى اليهود وعلى فرعون منذ قديم الزمن. أسأل الله في كل الأحوال أن يكون بداية تغيير

إحترامي وتقديري

مجداوية يقول...

فين اللينك ؟ أنا دورت فوق وتحت ملقتش اللينك اللى قولتى عليه ,,مجاوبتنيش اختى الكريمة الوصول لمدونتى أصبح سهلا أم ما زال هناك صعوبة ؟

واحدة مفروسة يقول...

كلامك جميل .. و مرتب.. احسن كتير من اللى انا كتبته..و معقول....بس انتى مش معايا....ان اللى بيدبح الحمار..واللى بيغش اللبن..و اللى .....و اللى........مننا و فينا
انا معاكى فى الحمله..من دلوقتى..و على فكرة اللحمه ب60...و الفراخ الفيليه اللى كانوا بيدللوا عليها اول ما ظهرت انفلونزا الطيور اعتقادا منهم ان الناس مش حتشترى.. و طبعا الناس ولا خفت ولا احزانون ....بقت ب 42.. و رزق الهبل على المجانين

nonoymm يقول...

Whispers just for a Night
اهلا بحضرتك زائري الكريم لاول مرة
وجزاك الله خيرا على الدعوة
والحمد لله قرات تدوينتها امس وبالفعل هي اكثر عمقا واحسن في المغزى بارك الله فيك وفيها ولا تحرمني من زيارتك الكريمة
===================================
اختي مجداوية حالا هلبي طلبك حالا واعتذر عن التاخر وللاسف لا زال هناك صعوبة في وضع المدونة على الرايدر
تحياتي
==================================
واحدة مفروسة اهلا بحضرتك زائرتي الكريمة لاول مرة واتمنى ان لا تحرميني منها زيارة ونظرة حضرتك لموضوع من خلال تدوينتك تناولت وضع معاناة فظيع هو استغلالنا للبعض والغلبان بيظلم الغلبان اللي زيه ربنا يرحمنا وارجو الا تحرميني من زيارتك
تحياتي لحضرتك
==================================
احبائي يا ترى حصل حاجة جديدة النهاردة لان دلوقتي الساعة بقت 3 ولم اسمع اي تغيير او شيء غير اعتيادي

t3ban يقول...

أحرجتيني بالأدب
و أعتبرتيني من المنحرفين
و مش حشرحلك معني المنحرفين لغويا علشان متزعليش
أما عن رأيي
يوجد شعرة بين الايمان و التعصب
و التعصب و التطرف

nonoymm يقول...

والله يا اخي تعبان لم اقصد احراجك ابدا ولم اقصد اي اساءة ولا اقدر ان اتهمك ان تكون من المنحرفين انا لا اعرف حضرتك
واذا كنت حضرتك فهمت اني اساءت اليك
فانا اعتذر وبشدة لاني فعلا لم اقصد اي اساءة
وانا لا متعصبةة ولا متطرفة
انا سيدة مسلمة تخاف الله ورسوله وابسط مما تتصور
على فكرة انا راجعت تعليقي على حضرتك لقيتني عمالة حتى اهزر فيه وقلتلك منضطرةتحياتي وودي

t3ban يقول...

انا متشكر و الله
و علي فكرة أنا مبزعلش من أي نقد مبجل
أحنا في الاول و في الاخر أخوة في الأسلام
تقبل شكري مرة ثانية
و تقبلي زيارتي لمدونتك

nonoymm يقول...

تحياتي اخي تعبان ولا تحرمني من اطلالتك على المدونة