الاثنين، أبريل 21، 2008

اخر العنقود لحد دلوقتي


تحديث
كلمة من بابا خالد فتحي وماما نونو لكل زوارنا الكرام واحبابنا في الله
كلمة بابا الاول
خالد فتحي عبد الفتاح: أرجو تبليغ كل الأخوة والأخوات الأعزاء أسمى آيات الاحترام و العرفان، وصادق التقدير والامتنان على كلماتهم التي زادتني بهجة وشعورا بالحب الصادق فعلا جزاكم الله خيرا وجعل الجنة مثواكم
ماما نونو اسعدتونا جداااااا جدااااااااا ورسمتوا على وجوهنا البسمة والفرحة بزيارتكم ودعواتك لنا ولاولادنا الله يبارك فيكم ويخليكم يارب
نحبكم في الله
السلام عليكم ورحمة الله


اليوم 21 ابريل 2007 بعد صلاة الفجر بشوية


حبة دربكة كدة وبكلم نفسي ايه دة دلوقتي ولا ايه ؟؟؟
زوجي الحبيب يعملي كوباية قرفة فظييييعة نصفها قرفة ونصفها عسل [يع يع ]


اشربها واطرده يروح شغله في مدينة جديدة تبعد عني ساعة ونصف تقريبا


انام لحد الساعة 10 صباحا على تليفونه





همممم ايه الاخبار ؟؟؟
انا له اقفل بئا عاوزة انام مفيش حاجة
طيب خير اي حاجة كلميني

طيب طيب
انام واصحى الساعة 12 على دربكة مريييييييعة واقول لنفسي

لا بئا دي باينها هي الساعة دي

طيب اتصل بحد ولا لحسن يكون زي الاسبوع اللي فات ويجوا كلهم على وشهم تاني ويطلع انذار كاذب
طيب هستنى شوية احسن بس انا في وسط البلد وزوجي بعيد يجي ساعة ونص بس اختي قريبة


استنيت شوية الظهر اذن والدربكة بقت بهدلة على الاخر ومش بقعد عمالة الف في الشقة زي النحلة واقول يااااااارب باعلى صوت وولادي معايا بيقوله وبقول كل الاذكار اللي اعرفها واقول كل الدعوات اللي بتمناها

اتصلت بزوجي تعالى بسررررعة خلاص خلااااااااص

هو يا عيني اهدي طيب هاجي بسرعة متخافيش
كل خمس دقايق يتصل بيا وانا اقوله كلم الدكتور يجهز نفسه مش قادرة اكلمه يرد علي ويقولي حاضر هكلمك
اتصلت باختي تيجي

بس حصل المفاجاءة بئا خلاص بجد اسراء ناوية تنزل في البيت وبسرعة صرخت وقلت يارب بلاش في البيت العيال هتتخض لحسن يجرى حاجة للنونو

زوجي يكلمني بهستريا ارد عليه خلاص يا خالد خلاص انت فين وارمي التليفون واجري في الشقة

جرس الباب يرن واقول مين الاقي شيماء بنت اخو زوجي بنوتة كدة 19 سنة ساعتها لسة هتقولي عمو كلمني وقال لي اروح لحضرتك قولتلها

حبيبتي وكأن الروح ردت فيا
الحمد لله خالد اتصرف اصلهم ساكنين قريبين منا
الحقيني يا شيماء هاتي تاكسي

تجري بسرعة في الشارع وهي بتعيط

الاقي حد بيخبط على الباب واقول مين الاقيه احد جيرانا

يسألني يا اختي فيه اخت منتقبة بتجري وتعيط عاوزين حاجة

قلت له ااااااه عاوزة تاكسي انا بولد

جري والشارع اتقلب مسيحيين ومسلمين

طلعوا اخدوا بايدي وبصيت قلت ولادي
جارتي قالت لي متخافيش روحي متخافيش

طبعا سواق التاكسي الله يسامحه كان عاوز يرميني في اي حتة

بس انا صممت على مكاني وقلت له وديني مطرح ما اقولك وهديك اللي انت عاوزه

طبعا اللي انت عاوزه تخليه يوديني المريخ

في السكة ابتهالات ودعوات مني لان اسراء قربت تيجي

وشيماء بتقرا قران واتصلت بعمها قالت له احنا في التاكسي تعالى على الدكتور

ادخل على الدكتور اللي دوخته معايا

اول حاجة يقولها انا مش قايل اما الوجع يكون كل ربع ساعة تيجي


كدة برضه زي كل مرة تيجي على وشك كدة


اقول والله يا دكتور الوجع جه مرة واحدة وما كانش معايا حد

يلتفت للممرضة ويقولها احفظيها [مس نونو انا يعني] دي كدة تيجي وهي خلاص على الاخر

[اصل فيه مرتين قبل دي جيت بنفس الطريقة حتى انه اخر زيارة قال لي الست العادية بقولها تيجي والوجع كل خمس دقايق انتي تيجي والوجع كل ربع ساعة]

المهم يديني الحقنة الجميلة بتاعتي اللي بولد مخصوص علشانها واروح في البنج واصحى على صوت بابا وبيقولي حمد الله على سلامتك يانونو والدكتور بيقوله معلش بئا المرة دي ما لحقتش تيجي تصور حاجة[ اصل الاستاذ زوجي بيحضر الولادة كلها من اولها لاخرها واول النونو ما يطلع الدنيا ويتلف بس بيصوره غير بئا صور السونار وفيديوهات ذكريات جمييييلة اوي ]

اشوفها بقى اسراء يعني

الاقيها واخدة بوكس في عينها وفي بقها بسبب تاخيري على الحضور واسال ليه كدة تعبانة اوي وازعل اوي اوي لدرجة لما بشوف صورها لدلوقتي اعيط

سالت شيماء نزلت امتى قالت لي حوالي 3 العصر يا طنط بعد ما جينا كدة بربع ساعة

وكانت شوشو فرحانة اوي انها حضرت الولادة بتاعت اسراء وارتبطت بيها اوي لدلوقتي




النهاردة اسراء الساعة 3 عصرا هيبقى عندها عام بالتمام والكمال لحد دلوقتي هي اخر العنقود سكر معقود

ممكن تدعولها ربنا يخليها ويبارك فيها هي واخوتها



اسراء بنوتي الصغنتوتة يوم ميلادك احلى يوم


هعمل احتفال صغنتوت لها يوم الجمعة باذن الله وهيكون احلى من الاحتفال اللي ادامكم دة واصورها كمان وانزل صورة تشوفوها


يلا فيه تورتات كتييير كل واحد ياخد حتة وتدعولها امانة عليكوا

يارب اعيش واشوفها زي البنوتة اللي ماسكة المصحف فوق دي وازوجها وافرح بيها هي واخوتها قولوا امين

الحمد لله يارب والشكر ليك بعتلي احلى واجمل ابتسامات في حياتي

هم زوجي واولادي ربنا يخليهم ويبارك فيهم

تحياتي














هناك 54 تعليقًا:

عاشقه الفردوس يقول...

انا كنت عارفه الموضوع ده وفاكراه من ساعه ماحكتيهولي

بس تحسي ان فيه هنا موسيقي تصويريه
خليتني سحيت عااااااااااااااااااااا


عايزاه مناديل بقي ماليش دعوه

ربنا يخليلك اسروئتي حبيبتي وتفرحي بيها هي ويوسفتي وحمادوتي ومريومتي


ههههههههههههههههههههههههه

بقوا عيالي مالكيش دعوه انتي بقي


ربنا يخليهوملك يارب ويحفظلك زوجك ويوسع عليكو ويكرمكم

nonoymm يقول...

يا حبيبتي تسلميلي يارب
بطلي عياط بقى
هعيط انا عااااااا عااا
خلاص يا حبيبتي مع اول نظرة في وشها كله بيتنسي ويبقى ما فيش
تقبل الله دعواتك ويارب ععقبال ما افرح بيكي في بيتك

الطائر الحزين يقول...

اللهم اجعلها قرة أعين لك ولزوجك

الربان يقول...

تحياتي

طريقة الفلاش باك...مؤثرة بجد..

مبروك لاسراء و عقبال 101 سنه ...
ومبروك لابيها و لامها تشريفها لدنيتنا
الجميلة...

كل سنة و هي طيبة.

تحياتي

رئيس جمهوريه نفسى يقول...

اسلوبك فى وصف اليوم ممتاز جدا ربنا يخليها ليكم يارب ووتتربى فى عزكم وربنا يجعلها باره بوالديها

الحشرى يقول...

ألف ألف مبروك ليكى أختى الكريمة

بارك الله لكى فى الموهوب وشكرتى الواهب ورزقتى بره وبلغ أشده

ألف ألف مبروك ليكى ولخالد

فرنسا هانم يقول...

اسراء حبيبه قلبى عيد ميلادها كان امبارح
اخص عليكى يا فرنسا
عموما
مع انها متأخره يوم كامل
بس قولى لها
طنط فرنسا بتقولك
كل سنه وانتى طيبه
وعبقال ماتحضر زفافك

محمود المصرى يقول...

بسم الله الرحمن الرحيم

ربنا يبارك لكى فيها وفى كل ابناءك ويجعلهم مثلا يحتذى وسببا لم اهتدى ويرزقهم الخير كله فى الدنيا والاخرة , ويعين حضرتك ووالدهم على تربيتهم ويريكم الله فيهم ما تقر به اعينكم .

النجم القادم يقول...

عروستى عروستى عروستى كان عيد ميلادها امبارح

لولولولولولولولولولولى

الف مليون مبروك وكل سنة وهى طيبة وبالف صحة وسلامة

ربنا يخليهالك وانا جاى وجايب التورته معايه اهوت

بس وربنا الصور قبل ما تنزل لازم تبلغينى

وتستاذنى منى مش عروستى بقى علشان محدش يشوقها

ويعجب بيها ويروح يخطفها منى وربنا اقتل نفسى

هييييي عاااااااا

كل يوم ميلاد وهى طيبه وعقبالى

رفقة عمر يقول...

بجد كلامك مؤثر قوى ماشاء الله ربناا يباركلك فيها وفى اخواتها وتفرحى بيهم كلهم اللهم امين ييارب العالمين

المستنصر بالله يقول...

كل سنه وهى بالف خير
وفكرة حلوة قوى تصوير الولادة بلغى تحياتى لزوجك العزيز

بحبك يامصر يقول...

ربنا يباركلك فيها
ويخليهالك يارب

عصفور المدينة يقول...

ربنا يبارك أنا نهجت وانا باقرأ

بنت القمر يقول...

يا شيخه موتيني من الخوف انا فكرا الاحداث دي الايام دي وعمالا اقول
البت بتولد وعمالا تنزل بوستات؟؟؟؟
ازاااي
وبعدين لقيت انك بتحكي بأثر رجعي
((((((((((:
حمد الله علي سلامتك متأخرة
وعلي سلامه البيبيبي وكل سنه وهي واخواتها بالصحه والسلامه
وتشوفيها عروسه يارب وتجري بيها وهي بتولد
(((((:
ومستنيه الصور

دكتور بيطرى يقول...

انا بحسب ان هناك مولود جديد وكنت خلاص حبارك ليكى عليه ولكن المفاجئة ان المولود وهى اسراء اخر العنقود طلع عندها سنة !! ولا تعليق
حفظكى الله انتى وزوجك لأولادك وجعلهم ذرية صالحة إنشاء الله تدخلون بهم الجنة و كملوهم نصف دستة بس من البنانيت الحلوين وانتم تدخلوا الجنة حدف ههههها

monaliza يقول...

ربنا يحميها ويحفظها ويباركلك فيها هى واخواتها
وكل سنة وانتوا دايما مع بعض اسرة مسلمة ولحب الخير دائمة

امام الجيل يقول...

بورك فى الموهوب وشكرت الواهب
ورزقت بره وبلغ اشده

اللهم امين

مبارك عليها
وان شاء الله تكونى نعم البنت ليكى
وتسعدك دنيا واخرة

اللهم امين

وجهة نظري يقول...

كل سنة وهيا طيبة وربنا يباركلك فيها وفي ولادك كلهم، ويجعلهم من البارين بوالديهم والحافظين لدينهم.

صاحب المضيفة يقول...

يا نهار

انا قلت الدنيا انتهت

لاقيت الموضوع بقاله سنة

على العموم


ربنا يبارك لك فيها وفي اخواتها كلهم يارب

ويجعلهم من جنود الدين


تحياتي

عبده الرايق يقول...

كل سنه واسراء طيبه
مفيش حاجه زادت من الحفله ولا ايه ؟؟؟

فليعد للدين مجده يقول...

دعواتي لإسراء ووالديها وأشقاءها بطول العمر وحسن العمل

الفاتح الجعفري يقول...

بسم الله ماشاء الله
ربنا يحفظها لكم ويحفظكم لها بأذن الله
وينشئها في طاعته ومنه وكرمه وفضله ويجعلها بارة بوالديها ,
طريقة عرض حضرتك رائعه والتدوينة دي احلي هدية لاسراء وخاصة الحفله المعموله والتورته حلو جدا
اللهم اطعم من اطعمنا واسقي من سقانا
:)
جزاكم الله كل خير

نور يقول...

الله

بارك الله لك فيم رزقكم

بارك الله في زوجك وابنائك يارب

احبك جدا في الله

nonoymm يقول...

السلام عليكم ورحمة الله احبتي واخوتي في الله
اخي الطائر الحزين اسعدك الله وتقبل الله دعواتك تحياتي
===================================
اخي الربان اكرمك الله وكل عام وحضرتك بخير تحياتي
===================================
رئيس جمهورية نفسي الله يكرمك دة بعض ما عندكم ولو اني عملت شوية مونتاج بس لم يخخل بالحدث والحمد لله وتقبل الله دعواتك
اسعدني مرورك
تحياتي
===================================
اخي الحشري الله يبارك في حضرتك ويعزك تحياتي
===================================
حبيبتي فرنسا لا يوم ميلادها كان 21 ابريل مش 22 لحقتي يا حبيبتي ما اتاخرتيش ولا حاجة قولتلها وعنها بقولك ربنا يخليكي يارب ونحضر مع بعض زفافها
===================================
اخي محمود المصري الله يبارك فيك وييتقبل دعواتك يارب امين وعقبال ربنا ما ينعم عليك بالذرية الصالحة تحياتي
===================================

nonoymm يقول...

النجم القادم خطيب بنوتي الصغنتوتة اسراء عيد ميلادها 21 ابريل ايوة فين تورتتك اه طيب ماشي
الصور هوريهالك الاول واخليك تنتقي منها اللي اذيعه هتقول ذيع هذيع
وبعد الشر عليك ربنا يبارك فيك ويخليك
ما حدش هيخطفها هي هتنقي وتقرر معلش انا عندي ديمقراطية
اسعدني مرورك وتحياتي
===================================
رفقة عمر حبيبتي اعزك الله اختاه وبارك الله فيكي وتقبل دعواتك تحياتي
===================================
اخي المستنصر بالله الله يكرمك
بالفعل فكرة جمييييلة اوي تصوير الذكريات الحلوة
واحنا بنصور السونار نفسه فيديو وبنصوره صور وسبحان الله ساعات بنصورر اوضاع للنونو تتجلى فيها عظمة الخالق اوي وغير بقى شكل النونو اول ما ينزل ويادوب بيبقى اصلا متصور سونار تشعر كأن الشكل لم يتغير سبحان الله
اعزك الله وتقبل دعواتك وعقبال ربنا ما يكرمك ويديك تحياتي
=================================
بحبك يا مصر الله يبارك فيك ويعزك تحياتي
===================================
اخي عصفور المدينة ههههههههههههه
معلش بقى يبارك ربنا في عمرك ويديك الصحة تقبل تحياتي
===================================

nonoymm يقول...

بنت القمر
اهلا بحضرتك زائرتي الكريمة لاول مرة
معلش خضيتك انا اسفة
بس فكرك وانتي مجربة فيه واحدة بتولد وتنزل بوستات دي مين الجبروت دي؟؟
اكرمك الله وتقبل دعواتك يارب
اسعدني مرورك تحياتي
===================================
دكتور بيطري اكرمك الله يا اخي
لا لسة اسراء اخر العنقود سكري المعقود
امين يارب يتقبل دعواتك اسعدني مرورك
===================================
حبيبتي موناليزا امة الله ربنا يتقبل دعواتك اختي ويعزك اسعدني مرورك تحياتي
===================================
اخي امام الجيل تقبل الله دعواتك يا اخي الله يعزك سعدت بمرورك تحياتي
===================================
اخي وجهة نظري تقبل الله دعواتك وربنا يبارك فيك اسعدني مرورك تحياتي
===================================

nonoymm يقول...

اخي صاحب المضيفة
ههههههههههههههه حلوة الدنيا انتهت
لا دي ابتدت من عام مش انتهت وعقبال ربنا ما يعطيك ويديك ويبارك فيك اسعدني مرورك
تحياتي
===================================
اخي عبده الرايق لا مفيش اكلنا كل حاجة
بس يوم الجمعة هعملها احتفال ما حصلش انا وباباها واخواتها وياريت تنورني بقى اول ما نزل صوره وهيكون فيه تورتاية برضه
الله يعزك ويكرمك اسعدني مرورك
تحياتي
===================================
اخي فليعد للدين مجده تقبل الله دعواتك وربنا يبارك في عمرك
تقبل تحياتي
===================================
اخي الجعفري الحمد لله انها حازت اعجبكم ودة بعض ما اتعلمته منكم وعقبال ما ربنا يعطيك ونفرح بيك وتقبل الله دعواتك
اسعدني مرورك
تحياتي
===================================
حبيبتي نور احبك الذي احببتني فيه وانا كمان اشهد الله العلي العظيم اني احبك في الله
تقبل الله دعواتك واسعدني مرورك
تحياتي
===================================
اسعدتوني ورسمتوا البسمة على وجوهنا امبارح انا وباباها وحسينا فعلا ان نا اخوات نحبهم ويحبونا في الله
بارك الله فيكم

اوعى تفكر يقول...

الف الف مبروك
الحقيقه انتى خضيتينى فى الاول
حقيقه اسلوب سردك للاحداث ممتاز
واختيارك للصور اكتر من ممتاز

جيهان علي يقول...

السلام عليكم ورحمة الله وبركاته

ربنا يبارك لكِ في أولادك وزوجكِ ويجعلهم ذرية صالحة لكِ وله وللإسلام
وربنا يحفظك لهم

:)

خبيب يقول...

ربنا يبارك فيها

وينفع بيها

ويستخدمها لنصرة دينه

ويرزقها طول العمر في طاعته

---

ولوالديها بمثل

النجم القادم يقول...

حماتى حماتى حماتى

انتى مش بتردى ليه اه طب ماشى

انا جايب التورته وجى اهوت افتحى الباب

ولبسى اسراء الحته الزفرة بقى

سلاموزززززززززز

الفاتح اليعقوبي يقول...

السلام عليكم
ربنا يخلي اسراء ويحفظها يارب وان شاء الله ربنا يجعلها من المقربين
ههههههههههههههههههه حضرتك فكرتيني بقصة ولادتي امي بتكره السيرة دي
لان الدكتورة اللي كانت هاتولدها قبل ميعاد الولادة جلها انزلاق غضروفي وهي طبعا اللي تعرف حالتها ايه
وامي بتقولي اني اول مااتولدت كان وزني كبير اوي فجدتي الله يرحمها امت واخداني وخبتني عشان الحسد
وعامة ربنا يبارك يارب
والف مبروك لاسراء وكل سنة وهي بخير وعافية
والسلام

خديجة عبدالله يقول...

بسم الله ماشاء الله

ياااه تصوير حضرتك روعة بجد

أنا حسيت إنى كنت معاكى :):)

ربنا يباركلك فيهم يارب كلهم ويكونوا نعم الأولاد الصالحين ويرزقكم برهم وتسعدوا بيهم دنيا وآخرة

ولسوسو العسل كل سنة وهيا طيبة ونبت مسلم حماها الله وأقر عينك وزوجك بهم جميعا

وأنتظر الصور بفارغ الصبر :)

مع تحياتي

ammola يقول...

أسلوبك كتابتك خلانى أحس أن أنا واقفة جنبك وانتى بتولدى..كل عام وانتم جميعا بألف خير وربنا يعزكم جميعا بالاسلام وتجدى من بينهم أمثال صحابة رسول الله

nonoymm يقول...

شكرا ليك جدا

عصفور المدينة يقول...
أزال المؤلف هذا التعليق.
nonoymm يقول...

السلام عليكم
اخي اوعى تفكر جزيت بالخير
واسعدني مرورك تحياتي
===================================
اختي جيهان علي الله يبارك لك زاهلا بحضرتك زائرتي الكريمة لاول مرة واتمنى دوام التواصل
===================================
اخي خبيب تقبل الله دعواتك وجزيت بالخير
اسعدني مرورك
===================================
النجم القادم خطيب بنتي
ربنا يبارك فيك معلش كان النت معصلج شوية
تحياتي لمرورك
===================================
اخي اليعقوبي حمد الله على سلامتك ونورت المدونة كلها
ربنا يعين ماما لان فعلا صعب اوي يكون الدكتور اللي عارف حالتها يمرض وما يبقاش موجود عندها حق فعلا
حمد الله على سلامتك للدنيا وسلامي لماما الغالية
===================================
حبيبتي خديجة الله يعزك يا حبيبتي يارب
والله دة انا عملت شوية مونتاج كمان
يلا عقبال ربنا ما يعطيكي في بيتك
اسعدني مرورك حبيبتي في الله
===================================
حبيبتي امولة اكرمك الله واسعدني بحق مرورك واتمنى دوام التواصل ما بينا
===================================
اخي عصفور المدينة جزاك الله خير على التنبيه وجاري عمل اللازم

تحياتي لكم جميعا وكل عام وانتم بصحة وخير

concord يقول...

الحمد لله على سلامتك يا اختي الكريمه
وسلميلي على اسراء

منى يقول...

كل سنه واسراء واخواتها ووالديها وكل حبايبها بكل خير
ربنا يبارك لكم فيهم ويفرحكم بيهم دايما
تحياتى

عمرو سلامة يقول...

اللهم اجعلها قرة عين والديها يارب ...
بس انتى خلتينى اقول في ايه فى ايه .. لحد لما اكتشفت فى الاخر انها ولاده .. هههههه
مش تبقى تعملى فلاش باك تانى يا طنط ... لأحسن بجد هتخلينا نعيط ...
وكل سنه واسراء بخير .. كل سنه واسراء حفظت جزء من القران .. كل سنه واسراء رافعه رايه الاسلام خفاقه فوق ..

حنين القلب يقول...

السلام عليكم
دى اول مرة ادخل مدونتك بس والله اسلوبك بجد شيق وربنا يخلى اسراء ومامتها وباباها واخوتها وتشوفيها عروسه يا رب.كل سنه وهى طيبه وانا هجيب ليها حاجه حلوة هجيب ليها فستان ابيض بطرحته علشان تبقى عروسه صغنونه وربنا يبارك ليكى فيها.
سلام

احساس لسه حى يقول...

عزيزتى
انا اسف علشان اللى حصل عندى فى المدونة

وانا شايف كلامك محترم ومفهوش اى مساس لشخص علشان الناس اللى تعرفها تعمل ده

وانتى شوفتى اهوه اى شئ يمسهم بيعملوا ايه

اسف

تحياتى

سلام

أم حبيبه يقول...

يااااااااااااه
لحظات صعبه جدااااااا

ربنا يباركلك فيها يا رب و تفرحى بيها هى و اخواتها و تجوزيهم

Khaled Farag يقول...

ألف مبروك ليكى أختى الكريمة

بارك الله لكى فى الموهوب وشكرتى الواهب ورزقتى بره وبلغ أشده
ربنا يباركلك فى أولادك وزوجك ورزقك
وبيتك

Whispers just for a Night يقول...

ساهم بتوقيعك في مطالبة الحكومة الهولندية بسن قوانين من شأنها حماية المسلمين من العبث بمقدساتهم الدينية خاصة ومن التجديف على الأديان عامة على الرابط التالي


http://kawlansadida.blogspot.com/2008/04/blog-post_21.html

وجزاكم الله عن إسلامكم خيراً

ذو النون المصري يقول...

مبروك يا ست نونو
الف مبروك
ربنا يبارك لكم فيها
و يارب يحقق لكم كل امانيكم فيها

مسلمة مصرية يقول...

احلةى حاجة عجبتنى فى الموضوع دة ان بنتك اسمها اسراء على اسم بنتى
وبنتى حاليا عندها سنه و8 شهور
بارك الله لكى فيها وفى اخواتها

mostafarayan يقول...

ربنا يخليهملك كلهم ويباركلك فيهم

nonoymm يقول...

السلام عليكم
اخي كونكورد واختي منى
ومسلمة مصرية وحنين القلب زائرتي للمرة الاولى
واخي عمرو سلامة اعتذرعن خضتك ومش هضمنلك حكاية الفلاش باك دي بس حاول ما تعيطش لان عندي المزيد
واخي خالد فرج واخي مصطفى ريان واختي ام حبيبة واخي ذو النون المصري حمد الله على سلامتك واخي احساس لسة حي لا مفيش مشكلة الموضوع منتهي بالنسبة لي اللي حصل دة كان للكي بورد مش ليابارك الله فيكم جميعا وتقبل الله دعواتكم ولكم مني فائق الاحترام والتحية وعامكم مبارك
اهلا بكل زواري للمرة الاولى

واحدة مفروسة يقول...

اللى يقرأ المشهد ده يقول انك شفتيه مش انتى البطله
انتى كنتى مركزه فى ايه و لا فى ايه
ربنا يخليهم و يباركلك فيهم و يرزقك برزقهم...و بوسيلى اخر العنقود روءه

shaimaa samir يقول...

يا روح قلبى
والله خلتينى ادمع كدة
ربنا يباركلك فيهم
وانا حصللى زى بنت القمر
كنت مفكره دلوقتى
وقاعدة تنزلى بوستات
ههههههههههههههههههههههههه

احبك فى الله

مسلمة يقول...

ما شاء الله أسلوب حضرتك أكثر من رائـع

وأنا زى أختنا بنت القمر ظننت إنك بتتحدثى الان وبقول بتولد وبتكتب طيب إزاى

بس الحمد لله فهمت

ربنا يبارك فى إسراء ويعز بيها الإسلام

د/اجدع بنوته يقول...

هو البوست ده اتحط امتى

غريب جداااااااااااااا

انا مشفتوش قبل كده نوهائى

شكل اسراء بركاتها واسعه

ربنا يخلهملك يارب هى واخواتها

ويباركلك فيهم وف زوجك

ويقويكم ويبارك فيكم ليهم يارب

ام البنات يقول...

ربنا يبارك فيها وفى اخواتها..وفى اسرتك
ويجعلهم ذرية صالحه
ويرزقك برهم