السبت، مايو 24، 2008

انا جيت لقيتكم مشيتم عاااااااااااااا


السلام عليكم ورحمة الله

اخواتي المدونين

كان نفسي اشوفكم انا وزوجي ونتعرف عليكم واسراء كمان كانت عاوزة تشوفكم حتى انها نامت طوووووول الطريق واول ما وصلنا صحيت تتفرج على كل حاجة

البداية اني طلبت من زوجي الاستاذ خالد اني اروح حفل توقيع كتاب المدونين وكعادته الله يبارك فيه انه بيحقق لي اللي شبتانة فيه قالي خلاص هاخد اجازة يوم الخميس ونروح بيتنا اللي في القاهرة الاربعاء نبات ونروح يوم الخميس الحفل

وفعلا روحنا ويوم الخميس روحنا عند اختي وسيبت الاولاد عندها واخدت اسراء بس وخرجنا نجري الساعة ستة ونص تقريبا

وتفاجانا بحالة الشوارع وخصوصا شوارع شبرا ووسط البد حدث ولا حرج وطبعا الشارع اللي بيودي على اخر ساعة دة

وطبعا سالنا واتوصف لنا غلط والله يخليه اللي وصف غلط رجع يعتذر وقال لا انا وصفت غلط وراح واصف تاني وللاسف برضه طلع غلط

فسالنا وسالنا ولما عرفنا الطريق الصح كانت هناك مشكلة تانية وهي فين نركن العربية

وجينا نركن في الشارع اللي قبل المكتبة قالوا العساكر دة تشتري كارت وما اعرفش ايه

المهم رسيت على جراج وركنا العربية ونزلنا لقينا من حظنا والمشوار الخفيف بجد ان الجراج يعتبر ظهر المكتبة فرحنا اوي وطلعنا المكتبة ولقينا كل حاجة خلصت عاااااااااااااااااااااااااااااااااااااااااااااااااااااااااااااااااا

ولقينا الناس بيلموا الميكروفونات وقلت لخالد اتاخرنا يا بابا خلصوا وزي هعيط كدة

قالي طب انتي عارفة مين طيب في الموجودين

قلتلوا مش عارفة وبعدين قلت له طب هات الكتاب طيب روح اشتريه قالي حاضر

وراح كلم الاستاذ ابراهيم صاحب مدونة ابراهيم معايا بصراحة ما سابناش ابدا ابدا حتى ان الكتاب كان خلص واعطى لزوجي رقم تليفونه علشان يكلمنا اما نسخ جديدة تروح لمكتبة قريبة من بيتنا اللي في القاهرة

لكن مفيش دقيقتين الا ولقيناه جايب لنا كتاب وبيقول اتفضلوا ما تتخيلوش فرحتي بالكتاب اول ما مسكته بايدي مع اني ماليش فيه اي تدوينة بس حسيت اد ايه المدونين بقى ليهم صوت ومؤثر وهيوصل كل مكان باذن الله

كنت هاخد الكتاب وخلاص لكن استاذ ابراهيم قال فيه مدونين يوقعوا عليه لقيتها حلوة اوي الفكرة دي وخصوصا ان الكتاب مكتوب عليه عدد خاص جدا

الاستاذ خالد زوجي مشي مع استاذ ابراهيم وعرفنا على الاستاذ احمد عصام وطلب منه يوقع وبعد ما وقع

خالد قاله لا انا عاوز تكتب كلمة تعبر عنك احتار اوي استاذ احمد وبعدها كتب شاعر في البداية

وبعدين وقع استاذ محمد مفيد صاحب مدونة في الصميم وكلمته اد ايه كانت رقيقة اوي [كتب الى اخي خالد ادام الله علينا نعمة التواصل اني احبك في الله ]

وانا بقى روحت اشوف البنات فوقعت ايناس لطفي صاحبة مدونة دنيا محيراني ووقعت شمس صاحبة مدونة ربة السيف والقلم ووقعت هدى جمال صاحبة مدونة وحي قلم وطبعا الاستاذ ابراهيم كان اول توقيع انار صفحة الكتاب

والحمد لله لقيت لزوجي تعليق منشور في تدوينة القطيع لعصفور المدينة يبقى مشاركين بقى بس

سالنا عن استاذ عصفور المدينة وكان استاذ ابراهيم له تعليق ظريف اوي قال لخالد هو ملتحي برضه فضحكنا اوي

وسالت انا عن خيخة وقالت لي الاخت ايناس انها اعتذرت وسمعت اخت بتقول انا نبضات بس اتحرجت اكلمها

حتى انا نفسي لما كانوا بيسالوني انتي مدونة كنت بتكسف اوي واقول امضوا باسم مدونة زوجي عابر سبيل فكل التوقيعات جت لمدونة حضرته اللي اصلا مش شغال فيها

المهم انا كان نفسي اتعرف عليكم انا وزوجي بس باذن الله الكتاب الجاي هاجي بدري اكتر من كدة

احلى حاجة عرفتها بما ان المشوار اصلا باظ ان فيه جراج هنحط فيه العربية من غير ما نخاف عيها

لاننا رجعنا ناخدها وجينا ندفع الاجرة بتاعتها تصدقوا دفعنا خمسة وسبعين قرش بس

وروحنا بسرعة اخدت الاولاد واختي اصلا كانت مبسوطة منهم وقالت لي دول نسايم الحمد لله يارب

وبعدين قعدنا انا وخالد نقرا ونضحك على التدوينات اللي كتبها صاحب مدونة حكاوي اخر الليل وشفت مدونين لسة ما دخلتش عندهم هروح ازورهم واتواصل معاهم لانهم جمااااااال اوي

وكمان شفت تعليق الاستاذ خالد عند عصفور المدينة واتبسطت اوي

وضحكت اوي على تدوينة الحياة التوكتوكية للصباغ

وفي الرايحة والجاية خالد يشوفني ماسكة الكتاب يفضل يضحك علي

بس انا في المكتبة ما قلتش لحد على مدونتي علشان كنت مكسوفة اوي وخالد قال لي قوليلهم انك مدونة قلت له ماحدش فيهم يعرفها ما زورتش حد فيهم ولا حد زارني من اللي ادامي

لكن اوعدكم اما اجي المرة الجاية هحاول مش اتكسف واقول على مدونتي

هممممممممممممممم هتعملوا اللقاء التاني امتى ؟؟؟؟؟

منتظرة بجدتحياتي لكم والف مليون مبروك على الكتاب وعقبال النسخة التانية

تحياتي

هناك 47 تعليقًا:

fahd يقول...

معلش ملحوقة

صراحة الحفل كان جميل

طبعا مش المكان ولا التنظيم ولا الجو

انا بتكلم عن الناس

انا كنت فرحان جدا مع اني مليش موضوع نازل لكن كنت سعيد وانا بتعرف علي الناس دي

اتمني اننا نعمل حاجه منتظمه كده كل فتره نتقابل فيها كلنا

ويلا خير

دكتور حر يقول...

خيرها في غيرها

ونورتوا مهما كان


وبالتوفيق دايما ان شاء الله

خبيب يقول...

أغبطكم كثيرا كثيرا ..

لمجرد الذهاب

:)

---

إن شاء الله يكون الموضوع أفضل في المرة القادمة

وفقكم الله

المـــفـــــــقــــــــوعـــــة مــرارتـهــا يقول...

ايه ده
أومال مين ماراحش بقي ؟؟؟
الكل راح
طب احنا ليه ماشوفناش بعض
انا كنت هناك ........ كان تجمع مهول كويس ان المكتبة كانت ماسكة نفسها بينا .. وكنتي تحسي بحالة حب رائعة عملها النت بيننا
شفت صاحبة مدونات زوجة عاشقة والصراحة انسانة رقيقة ومهذبة جداً جداً ومنقبة برضه
بس إذاي ماتقوليش انك مدونة هناك
معقولة ولو ماقلتيش هناك هاتقوليها فيييييييين ؟؟؟؟
انا اول مرة أروح في مكانوألاقي العدد المهول ده من المدونين ... ربنا يذيد ويبارك
هاشوفك المرة الجاية إن شاء الله

عايش ولكن يقول...

خيرها فى غيرها
وان شاء الله الجايات اكتر
ربنا يوفقك
تحياتى
علاء

د/أبا يحيى وادم يقول...

السلام عليكم ورحمه الله وبركاته
قدر الله وماشاء فعل
أنا ايضا كان نفسى احضر هذا التجمع ولكن الامتحانات تمنعنى
الحمد لله
ان شاء الله نكون جميعا معا فى لقاء قادم
وجزيتم خيرا على مروركم بمدونتى والسلام عليكم ورحمه الله وبركاته
أخوك
د/احمد جمال

la3lahakhier يقول...

المهم انك روحتى
امنياتى الطيبة لك واسراء وعائلتك الكريمة

Sally يقول...

ان شاء الله تتعوض يا حبيبتى
انا مروحتش الحقيقة لأنه صعب
بس بجد أتمنى انى أقدر أروح المرة الجاية ان شاء الله

يارب نتقابل

دمتى بخير اختى
سالى

رئـــــيسـة حزب الأحلام يقول...

انتى رحتى ياقمر انا كان نفسى اشوفك اوى
النوبة الجاية انشاء الله اشوفك
تحياتى لكى اختى

HERO يقول...

طيب كويس انك رحتي انا كان نفسي اروح بس معرفتش للأسف ودي اول زيارة ليا ومش هتكون الاخيرة ان شاء الله

تحياتي

drpharma يقول...

معلش تتعوض ومبروك الكتاب

صيد الخاطر يقول...

إحنا روحنا كملنا القعدة على البورصة

أنا شخصيا رحت بغير استعداد
كن كان لقاء فوق الرائع

ربنا يجمعنا دائما عل الخير والطاعة

أبو خالد يقول...

أنا كان نفسى ألتقى معكم أنتى و خالد
كنت عايز أتعرف عليكم ..
الحمد لله على كل حال ..و خيرها فى غيرها

الفاتح الجعفري يقول...

السلام عليكم اختنا
قدر الله وماشاء فعل
ربنا يجعل هذه الخطوات في ميزان حسناتكم ان شاء الله ,والله كنت اتمني ان اري استاذي جدا ولكن خير ان شاء الله تتعوض ,هو فعلا كان يوم رائع ومليء ومثري جدا ,كان ينقصكم فقط
علي العموم اكيد هيبقي في تجمعات كثيرة في فترة الاجازة
وطبتم وطاب ممشاكم وتبوئتم من الجنة منزلا
وجزاكم الله كل خير

ro7 يقول...

معلش يمكن انتي
عندك امل تقابليهم العدد
الجاي لكن وحدة زي مفيش
امل احضر الحفل دة
وياريت ياجماعة حد يصور حتة منه فيديوا ويعرضها
او كل مدون يعض جزئية
يارررررررررريت
خلي بالك من نفسك تحياتي

doctor mohamad يقول...

شوقتينى أرجع مصر مخصوص يا أم يوسف لاجل أحضر شئ زى كدا . معلش مسيرنا نتقابل كلنا و بإذن الله تستمر اللقاءات _ سلامنا للأستاذ خالد.

حسن محمد توفيق يقول...

اختى الفاضلة

ياه

كان نفسى والله احضر واصور هذا اللقاء

التاريخى واتعرف على المزيد من الاخوة

والاخوات .. وبالمرة كنت اعرفهم ب

اتحاد المدونيين المصريين

شكرا لك تواصلك وسلامى لزوجك العزيز

امام الجيل يقول...

خير

انا كمان مكنتش هروح
بس ربنا قدر كده وعرفت اروح

بس سعدت جدا بالتعرف على مدونين
ما شاء الله

بجد يكفى ان الاحد يخرج من التدوين بناس زى دول

وان شاء الله تعوضيها فى المرة الجاية

جني يقول...

لقد حاولتي وذهبتي وحصلتي على الكتاب وتوقيعات بعض الأخوة .. فالحمد لله ..
ولكني لم أكن متواجد لعدم وجودي في مصر حاليا .. المرة القادمة إن شاء الله أكون موجود للتعرف على زوجك الكريم الأخ خالد فسلامي وتحياتي له ..
said

ayman badr يقول...

طب انتى جيتى متاخرة تقولى ايه للموكوس اللى جه بدرى ومشافش الا بعض الناس وبقية الناس مشافهمش ومشى
يللا بقول خيرها فى غيرها وكان نفسى اتعرف عليكى وعلى استاذ خالد والأمورة الصغيرة اسراء ربنا يحميها
تحياتى

عصفور المدينة يقول...

http://shamseddeen.blogspot.com/2007/12/blog-post_25.html

السلام عليكم
جزاك الله خيرا وأنا النادم لأني فاتتني الفرصة حفظكما الله

وللتصحيح فإن تدوينة القطيع هي للكاتبة المتميزة شمس الدين
وقد وضعت العنوان أعلاه ويبدو أن تنسيق الكتاب لم يظهر من صاحبتها

ولكن التعليقات لي فيها تعليق
أما تدوينتي فهي
وتشتكي إلى الله

عصفور المدينة يقول...

التغطية عند أحمد الصباغ وفيها فيديو أيضا
http://ahmedelsabbagh.blogspot.com/

الفقير الى الله يقول...

قدر الله وما شاء فعل
انا والله كان نفسي احضر بس انا معرفتش الا من الموضوع دلوقتي
حصل خير بس باذن الله المره الجايه هكون هناك بس نفسي اعرف هو كان فين

واحدة مفروسة يقول...

تصدقى لوكنت اعرف انك رايحه...كنت رحت لانى فعلا عاوزه اقابلك و اتكلم معاكى

أم أحمد المصرية يقول...

صديقتي عاشقة النقاب بتغظيني يعني عشان انت قاهرية و انا لا
طيب انا حأ عمل دعوة ضد المركزية عشان لا تصبح القاهرة دايما مقر اجتماعات المدونين و العدد القادم من الكتاب اللي ان شاء الله يكون اسمك منور فيه يكون حفل توقيعه عندنا في اسكندرية
و متخافيش حبقي اعزمك تباتي عندي قبلها بيوم و ممكن بأسبوع لو حبيت تنوريني تلافيا للزحمة

nonoymm يقول...

السلام عليكم
فهد الحمد لله انا لحقت حاجة اشكر مرورك
==================================
دكتور حر فعلا ان شاء الله كان منور بوجودك تحياتي لمرورك
=================================

خبيب باذن الله تقدر في مرة كدة تنور القاهرة ونتعرف على بعض اشكر مرورك
==================================
المفقوعة مرارتها كان نفسي اتعرف عليكي عاااااااااا معلش باذن الله تتعوض بس هقول انا مين طبعا اصل المرة دي ما كانش فيه حد يعرفني فاتكسفت
تحياتي لمرورك
===================================
عايش ولكن ان شاء الله اشكر مرورك
===================================
دكتور ابا يحي وادم ربنا يوفقك يارب وتفضى ونتقابل بقى انا تشرفت بمروري لمدونة حضرتك فعلا تحياتي لمرورك
==================================
لعلها خير اتمنى بالفعل اتعرف عليكي حبيبتي وجزيتي كل الخير
===================================
سالي يارب المرة الجاية تقدري تيجي نفسي اتعرف عليكي فعلا
تحياتي لمرورك
===================================
رئيسة حزب الاحلام اه روحت شفتي باذن الله تتعوض تحياتي لمرورك
===================================
هيرو اهلا زائري الكريم لاول مرة وباذن اله نتواصل دائما ونتقابل ان شاء الله كلنا اسعدني مرورك
===================================
drpharma اهلا بحضرتك باذن الله تتعوض اسعدني مرورك
==================================
صيد الخاطر اه ما انا عرفت واحتفلتوا بعيد ميلاد فاتيما وكلتوا تورتة لوحدكوا وكمان بتغيظني مااااااشي:)
تحياتي لمرورك
===================================
الاب العزيز ابو خالد انا اللي كان نفسي اتعرف على الشخصية الملائكية ربنا يعزك يارب وخالد كمان والله وباذن الله تتعوض واعمل احتياطاتي
يستاهل الحمد جزيت الخير على مرورك الكريم
==================================
الفاتح الجعفري اكرمك الله والله احنا لما عرفنا ان حضرتك واليعقوبي روحت زعلنا اكتر واكتر اننا ما تقابلناش لكن كل تاخيرة وفيها خيرة وباذن الله تتعوض
جزيت الخير على دعواتك الله يعزك يارب
اسعدني مرورك
===================================
روح باذن الله تتبدل الاحوال وربنا يكرمك ونتقابل اسعدني مرورك حبيبتي
===================================
دكتور محمد باذن الله لما ربنا يكرمك وتنور مصر نتقابل تيجي بالف سلامة يارب
اسعدني مرورك
===================================
استاذي حسن محمد توفيق والله دة يشرفنا وتتعوض باذن الله
اسعدني مرورك
===================================
امام الجيل تتعوض ويا بختك بيسعدني مرورك
===================================
جنى الحمد لله على كل حال ربنا يرجعك بالف سلامة ونتعرف ببعض باذن الله بيسعدني مرورك
===================================
ايمن بدر لا بعد الشر عليك من الوكسة باذن الله تتعوض تحياتي لمرورك الكريم
=================================== عصفور المدينة جزيت الخير على التوضيح واعزك الله يا اخي احنا اللي كا هيزدنا الشرف بلقائك وكنا نتمناه بصراحة جدااااا وكنت اول من ساللنا عليه بالنسبة للتغطية ذهبت ورايتها امبارح لكن الصور اغلبها مختفي للاسف
تحياتي لحضرتك وتتعوض ان شاء الله
اسعدني مرورك الكريم
===================================
الفقير الى الله باذن الله المرة الجاية ابقى اعمل اعلان عن اللقاء عندي هنا ونشوفك على خير باذن الله دة يشرفني
اسعدني مرورك
===================================
واحدة مفروسة الله يكرمك يا اختي دة الشرف لي والله
انا بس خفت اقول اني رايحة يحصل ظروف وما اقدرش اروح وانا بحب ابقى عند كلامي وكفاية اوي المقلب بتاع الطريق اللي اخرني اصلي ساكنة في منطقة جديدةوالظاهر نسيت شوارع القاهرة بتبقى عاملة ازاي فقدرتها غلط
يلا تتعوض ان شاء الله وتتكلمي معايا وتقولي اللي انتي تحبيه
بيسعدني مرورك دوما
دمتي بود
===================================
حبيبتي ام احمد المصرية
انا قاهرية ايوة وليا سكن في القاهرة واهلي كلهم فيها برضه لكن السكن الدائم في مدينة جديدة فبنزل مخصوص والله لكن هعملها معاكي ثورة ونخليهم يعملوا تجمعات اقليمية برضه
ولنبدا باسكندرية والمصايف جاية اهيه ممكن نتقابل في مصصيف معين برضه
تحياتي لمرورك وانا نفسي بجد اوي اتعرف على الشخصية الجميلة اللي هي حضرتك
بتنوري مدونتي جدااااا وبفؤرح اوي
اعزكم الله

زواري وضيوفي الكرام اسعدني كلامكم جداا والله وهونتوا علي زعلي
احبكم في الله
تحياتي للجميع انا وخالد

النجم القادم يقول...

السلام عليكم

حماتى الغالية وحماى الغالى كمان

شوفتى بقى علشان واخده اسراء معاكى وانا مكنتش هناك

تعرفى لو كنت عارف ان اسراء رايحه كنت جيت وطظ فى الامتحانات

هبدأ امتحاناتى غداً الآثنين دعوااااااااااتكم http://ewaatekhaf.blogspot.com/

فقط وحصريا مع النجم القادم مدونة إوعى تخاف

كريم محمود يقول...

كان نفسي أحضر انا كمان والله

Whispers just for a Night يقول...

موعدنا غداً لنتحد ولو لدقيقة
الساعة الرابعة عصراً نرسل رسالتنا الأخيرة
http://kawlansadida.blogspot.com/2008/05/blog-post_24.html

26.05.2008

نبضات يقول...

انا زعلت اوى لما قريت فى البوست انك جيتى اخر الحفل وكان نفسك تحضريه وضحكت موت على جمله ولاقيت واحده بتقول انا نبضات حسيت انى طفله اوى بجد كان نفسى اتعرف عليكى واتكلم معاكى انا تصفحت مدونتك بسرعه وان شاء الله سااتابع مواضيعك والى لقاء قريب على ارض الواقع وان شاء الله تحضريه من اوله

تحياتى

نهر الحب يقول...

خيرها فى غيرها
وان شاء الله نتقابل كلناا
لانى كمان نفسى اعترف عليك وعلى اصدقائنا المدونين التانين
كل الود

عبده الرايق يقول...

فكره حلوه
حكايه الكتاب وتجمع المدونين
بس اللى مستغربله
ان الناس بتكون شايفه بعضها من خلال كلماتها
يعنى بقراء كتير عن ناس قابلوا بعض لاول مره
وخمنوا ده مين وده مين
ومعظم التخمينات بتطلع صح

سارة يقول...

أشكرك على جمال مدونتك و ما اشدني أكثر هو اسمها كم يحمل من معاني كبيرة

في حب مصر يقول...

حلوة فكرة الكتاب دي جدا، بس انا للأسف ما كنتش اعرف عنها حاجة، وحتى لو كنت اعرف كنت مش هاحضر لاني برة مصر؟؟ بس البركة فيكم
وياريت لو فيه ملخص للكتاب او مين كتب فيه؟
تقبلي تحياتي

ذو النون المصري يقول...

و الله يا بختك بالمشوار و ان كانوا فاتوكي و مشيوا قبل وصولك
حتي انك قابلتي جماعه منهم
انا قابلت جماعه من المدونين في القاهره في ليلة راس السنه في احتفاليه خاصه تضامنا مع اهل القرصايه و كان يوم مميزفي حياتي
و عقبالك لما نقرا لك في العدد القادم من كتاب المدونين
تحياتي

منى يقول...

انا كمان كان نفسى اروح

مع انى مليش حاجه فى الكتاب
بس للاسف مقدرتش
وحتى لما عرفت ان فيه لقاء تانى ونسخ من الكتاب الخميس الجاى ولسه يدوب هفرح
اكتشفت انى عندى ميعاد مهم
بس والله ياريت نستغل فرصه الاجازه دى ونحاول نشوف بعض
تحياتى وحبى

سبهللة عالاخر يقول...

ياريت تكتبى لى عنوان مدونة زوجك اللى اسمها عابر سبيل عشان احب ادخل عليها

أحمد سعيد بسيوني يقول...

بسم الله
انا برضه لم استطع الحضور وان شاء الله ملحوقة في مرات قادمة
تحياتي

بت خيخة وأى كلام يقول...

انا اللى خسرت بعدم مجيئى الحفل
خسرت علشان متشرفتش بمعرفة ناس محترمة زيكم
يلا المرة الجاية تكون احسن

سلام
اختك خيخة

Ema يقول...

ان نفسي أكون معاكم وأتعرف على شخصيه محترمه زي حضرتك...يارب أكون معاكم المره الجايه..
تركت لك تاج في مدونتي ياريت تمري وتخديه
تحياتي

الربان يقول...

تحياتي

الف مبروك الكتاب و التعرف علي افراد
اسرة المدونين...

كل التمنيات الطيبة بالتوفيق دائما.

تحياتي و تقديري

الباحث عن الحقيقة يقول...

معلش خيرها في غيرها
ان شاء الله اللقاء الجاي
ويكون كل الاخوة اللى نتمنى نشوفهم موجودين
خالص تحياتي لحضرتك ولأبو اسراء

مـ~ـاجدولين يقول...

كتاب شو ؟؟؟؟؟

monaliza يقول...

تانى مرة روحى بدرى عن كده
متهيألى انا لو كنت رحت كنت هتعرف على المنقبات مخصوص لان غالبية اخواتى المدونات منقبات فماتقلقيش كنت هعرفك لوحدى بس اوعى ساعتها تكسفينى وتقول انا مش تبعكم هههههههههه
ان شاء الله نشوف بعض على خير

سومه...مجنونه فى بلد عاقل يقول...

بصراحه هو بطل القصه استاذ خالد زوجك ربنا يحفظهولك وحطيه فى عينك ما شاء الله مافيش اجواز بتحقق اى حاجه لزوجاتهم لما يرموا نفسهم من الدور العاشر دا اذا مقالهاش مع نفسك عاوزه تروح روحى على رجليكى ولا بلا هبل اترزعى فى البيت من واحده خبيره فى الردود ارجوليه من قبل ما تتجوز
انا كمان فرحانه ان المدونين ليهم صوت
عقبال المصريين هم كمان لما يكونلهم كلهم صوت
تحياتى ليكى سومه_87

سبهللة يقول...

حبيبتى
الاخت عاشقة النقاب
مدونة سبهللة ومسلمة مصرية وباب النجار
كلهم يكتبهم شخص واحد
وهو انا
لكن لانى كنت جديدة فى مسألة المدونات فماكنتش اعرف انه يمكننى بنفس الاسم انى اكتب اكتر من مدونة
وحاليا جارى تحويل كل المدونات على نفس الحساب
على فكرة انا مهندسة ديكور واسمى رانيا وزوجى كذلك مهندس ديكور ايضا
أشكرك للمتابعة

عاشقه الاقصى يقول...

بجد حضرتك روحتى ما أنا كنت هناك ومش شوفتك انا كنت نفسى اتعرف عليك

اان انتظرت بعد الحفله والتجمع ما خلص بكتير واتعرفت على شمس صاحبه مدون رب السيف والقلم

كل الناس د كانت هناك مش معقول

بصوا ياجماعه المره الجايه لك مدون ومدونه

يكتب اسمه واسم المدونه على اى دى زى المؤتمرات

عشان نعرف بعض

كنت نفسى اعرف حضرتك جدا

سبحان الله موجودين فى نفس المكان ومعرفناش بعض

وبجد كفايه روح اليوم ده كان فوق الخيال

جزاكم الله خيرا