الثلاثاء، ديسمبر 16، 2008

نت جديد واخبار تصبيرة


السلام عليكم ورحمة الله وبركاته


كل عام وانتم الى الرحمن اقرب وعلى طاعته ادوم





تقبل الله منا ومنكم صالح الاعمال





الحمد لله وصلت الشبكة العنكبوتية فعلا ( الانترنت يعني) وصلت بالسلامة ونورت البيت امس





وتزامن ذلك مع احداث تكاد تكون اهم احداث حصلت في العام الحالي





ولاني بقالي زمان كل ما بشوف شباب صحته عافية كدة وعضلات ومنفوخين وماشين في الشارع ولا سايقين عربياتهم واصوات الكلكسات والصفافير وغيره ابرز ما يوضحهم ما يجعلني اتحصر على شباب لو حصل اي عدوان ولو بمبة فرقعت بتهيألي كدة وعلى حسب مشاهداتي ان افتك سلاح هيمسكوه اسم الله عليهم هيبقى عصيان الاستيك او شفاطات المصاصات





انما لما كنت بلف على القنوات الاخبارية لقيت خير اللهم اجعله خير شاب اسمه





((( منتظر الزيدي)))) بيدنس حذائه اعزكم الله بس عمل حاجة كل بني ادم عربي مسلم او غيره المهم عنده لسة شوية منه لازم يفرح بعيدا بقى عن طق الحنك بتاع دي مش مهنية ودة كان سلاحه القلم والصحافة والشعارات الجوفاء اياها





بمنتهى البساطة منتظر عمل دة صحافة وقلم واعتقالات وشاف بقى قتل وتخريب واغتصاب وكرامة انداست واخرتها اتقال ايه ولا اتعمل ايه من الكل





ياترى ايه اتغير ولا ايه جاب نتيجة؟؟؟؟!!!!!





المحدوف بالشوز قال ايه ؟؟؟!!!!سوري اسف يا شعبي المهاود الاستخبارات غلطت اخص عليها بعد خراب مالطة فدة





من وجهة نظري دة اقل حاجة تتعمل





ومن هنا بدعوكم جميعا للدعاء والابتهال لرب العالمين ان يفرج كربة منتظر ويفرج كروبنا جميعا ويثبته يارب ويهون عليه ما هو فيه اعطاني امل كبير في شبابنا ونحسبهم على خير بعيدا عن شباب الهس بس





==========





مر عيد ميلاد حبيبتي مدونتي ولسة ما احتفلت به





باذن الله هنحتفل سوا على طريقتي





بصراحة نويت اعمل تدوينة للاحتفال واحكي عنها لكن لقيت مفاجاة بالنسبة لي على الرابط دة واضطريت اؤجل الاحتفال شوية لحين اجراء هذا الحوار وبعدها نحتفل سوا باذن الله وعاوزة اقول دة بالنسبة لي تتويج وشرف كبير لي اتمنى تشاركونا هناك





==========





قرأت عن الكتاب العظيم الفظيع اللي تم نشره وتوزيعه من قبل شيخ الازهر وزقزوق (النقاب عادة وليس عبادة) وطبعا شفت فرحة غامرة من غثاء السيل جعلتني اجدد اشفاقي عليهم وعلى احوالهم النفسية المتدهورة وزاد تمسكي واحترامي لقطعة القماش التي تؤرقهم وستؤرقهم طوال انتشارها باذن الله





بصراحة لم اندهش من ذلك





فتضييع الوقت على توافه الامور بقى آفة هذا العصر وتمنيت وقتها ان يصدر ما ينشر ويوزع على المساجد مثلا يقول الرشوة حرام او فضل صلة الرحم او السرقة حرام





وفي نفس الوقت فرحت جدا ربنا يجعله في ميزان حسنات كل منتقبة لوجه الله





وما انكرش اني اول حاجة عملتها اول ما عرفت الموضوع دة ضحكت وقلت (قل موتوا بغيظكم)





=========





على صعيدي الشخصي جدا





استغربت كثيرا عندما انتقلت من مسكني القديم لاخر جديد ولم تكن اول مرة ولن تكون الاخيرة لكن استغربت لاني ببساطة اثبت لي كالعادة





ان زمن الصداقة الحقيقية ولى وراح





ولما كان عندي ايمان وامل ان يكون فيه امل انتظرت لاول مرة في العيد ان تطل علي الصداقة براسها لكن للاسف الشديد أخجلتني وأثبت الي ان بالفعل لم يعد هناك اصدقاء بمعنى الكلمة الا من اصدقاء الجامعة ربنا يخليهم يارب دوما على اتصال وزيارات





تخيلوا حتى اللي بيتصلوا بينا على حسابنا الظاهر ما عرفوش يرنوا باين





طبعا لما بتتقابل مع حد العتابات العقيمة وعلى طول الخط انت غلطان





المصلحة غلبت





اه والله ونحمد الله اننا نحتسبه لله تعالى والا كان زمان الواحد تعبان اوي





ومن هنا بقول لكل حد كان عامل صديق انا مش ندمانة على اي وقوف جنبكم





ولانه لله فربنا سبحانه لازم يكشف عن المصلحجية ونعرفهم واحد واحد





ويعوض الحمد لله





لكن هنضيع عليهم كدة وهنصل الرحم مقربة لرب العالمين





لكن سلاماتي للمصلحجية





تخيلوا اصدقائي من هذا العالم الافتراضي وعلى القائمة حبيبتي واختي واكتر وربنا يعلم عاشقة الفردوس هم من اتصلوا بي في العيد وراسلوني واغلبهم هو الباديء ومش عارفة اوصف لكم فرحتي باتصالهم واتصال عاشقة الفردوس بي قبل صلاة العيد بربع ساعة





طيرني في السما ربنا يخليها يارب ويفرح قلبها قولوا امين





وربنا يكرمكم وتفرحوني دوما





انما بقى صلة الرحم هي كمان ولت واصبحت ماضي الا من رحم ربي الواحد بقى يشحتها شحاتة حتى الاخوات بقوا يستخسروا الزيارة والرسالة وبقى يكتفي بنتقابل عند ماما حتى لما بيكون فيه مصلحة ضرورية





لكن من هنا بقولهم ولكل رحمي من الجانبين هنصل الرحم رغم انوفكم مقربة لرب العالمين





ربنا يهدي





===========





قناة( اون تي في خليك في النور ) أستضافت مؤخرا طباخ اسرائيلي وعندهم برامج بتعرفنا على اسرائيل الجميلة من الداخل وشوية كدة تطبيع مع عدم تعليق من قبلهم





ومن هنا بقول للاخت المدونة اللي سالتني مرة في تعليق عن صورة مش بفلوسي يا ساويرس





برد عليها دلوقتي وبقولها السبب هو اللي حضراتكم بتقرأوه دلوقتي ومن قبله تصريحات





ساويرس السابقة عن مصر اللي بقت شبه ايران





وأضيف بالشفا لحاملي خطوط الشركة وبقولهم مش عيب يعني جت عليكم ما غيرهم برضه وحشين





والله بجد بأسف لكم حتى الحاجة البسيطة دي بتلتوا وتعجنوا فيها وعجبي





==============





الحبايب زواري اللي نوروا مدونتي ايام الانقطاع حالا نتواصل باذن الله





واي مدون طلب مني الانضمام لمشروع او سالني في شيء بعد اذنكم يفكرني وحالا ألبي





اعذروني ما شاء الله كنتم نشيطين جدا وفاتني تدوينات كتيييرة جدا الوعد اني اقراها كلها دة لازم لكن سامحوني هعلق على اخر تدوينة او التدوينة اللي نفسي اقول فيها كلمتين لم يتطرق لهم معلق فيها





وعد بموضوعات نارية هنا وفي الهدى ائتنا قريبا جدا بعون الله





انا شايفة كفاية كدة طولت عليكم قلت اتناقش في شوية اخبار تصبيرة





وحشتووووووووووووووني





تحياتي





هناك 40 تعليقًا:

DR.HAMAS يقول...

أكرمك الله أختنا

و ثبتك على الإيمان الكامل

هعلق على ايه و لا على ايه ؟؟

تدوينة دسمة

و قرأتها كاملة

لكن سأعلق على أول الأخبار

و هو موضوع منتظر الزيدى

بالطبع هو عمل حاجة نفسنا كلنا نعملها

لكنى أرى

أننا لو عدنا لديننا

سيكون الإيلام أكثر و أشد لأعداء الله أمثال بوش

أتمنى أن يخرج من محنته

و أن يثبته الله

جزاكم الله خيرا




د.حماس

مصممة أحلام يقول...

عزيزتي عاشقة النقاب

حمد لله على السلامة ... و كل عام و انتي بألف خير
انا بتابع مدونتك من زمان بس دي اول مرة اعلق فيها
جزاكي الله كل خير مواضيعك كلها بتعجبني ربنا يجعلها في ميزان حسناتك
و على فكرة انا اخدت صورة (حجابي تاجي) من عندك بعد اذنك طبعا
تقبليني صديقة ليكي
و ربنا يعز الاسلام بكي و بكل الاخوات اللي زيك

Unknown يقول...

حمد لله على السلامة
يا نونو هانم
وحشتينا والله اوى
اولا كل عام وانتى ومدونتك بخير
والف مبروك على النت الجديد والشقة الجديدة كمان
اما عن البطل منتظر اليزيدى
فله الله والله ينصره على الخونة اعوان
امريكا وصهيون وايران
على رأيك فعلا دنس حذائه بلمس العلم الامريكى
نورتى يا قمر

غير معرف يقول...

مبروك على النت الجديد
وعلى العرب استرداد كرامتهم

HERO يقول...

اولا حمد الله على السلامة ومبروك النت وفعلا انقطاعه بيبقى حاجة خنيقة جدا وان شاء الله تعاودي الكتابة والمدونات النارية وربنا يعينك

اما عن الزيدي فده فعلا عمل حاجة كل العرب كانوا عايزين يعملوها وده عندنا احسن بكتير مما كان ضربه بالنار او كده

اما عن الشيوخ فانا مش هتكلم عن الموضوع ده

اما عن الصداقة انتي قلتي الاجابة بنفسك ان انتي صديقة علشان ربنا مش علشان مصلحتك وبس

تحياتي

الرومـيصاء يقول...

السلام عليكم


حمد الله على عودتك


وكل عام وانتى بخير

انتى كاتبه نقاط كتير

كل واحده عاوزه شرح

بس انا هعلق على النقاب

انا سمعت عن الكتاب ده

وبرده اول حاجه جت فى زهنى

موتوا بغيظكم


سينتشر رغم انفهم


لان هذا دين الله

والله يدافع عن الذين امنوا

حـــــ الــجــنــة ـــــور يقول...

السلام عليكم

مبروووووووك وصول الشبكة العنكبوتية ياقمر دمنا على تواصل

بجد بوست جميل ومقتطفات هايلة سلمت يمينك

دمتي بكل ود

Kiara يقول...

ياااااااااااااه انتي جمعتي كل الاخبار ونزلتيها مره واحده

الف حمد الله علي السلامه ياحته ثكره

Unknown يقول...

الأخت الفاضلة
السلام عليكم ورحمة الله وبركاته
وحمداً لله على سلامتك ، عودة طيبة ومباركة بمشيئة الرحمن.

أختى : فى هذا العصر الردئ التى غلبته المادة والمصلحة الذاتية اندثرت وانتهت مكارم الأخلاق والقيم والنبادئ السامية
لم يعد هناك صداقة حقة هناك مصلحة إلا من رحم ربى ..وكما تفضلت حتى صلة الرحم أصبحت من التراث القديم لم تعد لها وجود ولاتواجد ...

ولابد أختى أن نظل نحن على الدرب ولاتغلبنا الدنيا ولانكتفى بمجرد العتاب
التمسك بهذه القيم واجباً وفضيلة لابد من الحفاظ عليها والعمل على عودتها من جديد .
ولنا السعى وعلى الله التوفيق
أخوك
محمد

Dr. Ibrahim يقول...

ربنا يكرمك

ويجعل النت مصدر خير للبيت

ويارب يفك كروبنا وكروب المسلمين

ويارب تعود الاعوام على المدونة فى خير

وكل سنة وحضرتك طيبة

موناليزا يقول...

عودا حميدا
ومبروك على العتبة الجديدة ويارب تكون وش الخير عليكم
ومبروك على توصيل النت ويارب مايتقطع تانى
وكل سنة وانتى ومدونتك مفرحين الاسلام

"النجم القادم" يقول...

ايه النور اللى هل على سماء الانترنت مرة واحده ده

ربنا يعزك اختنا الفاضلة

وعودة حميدة لمدونتكم

وربنا يعزكم يارب ومنتظرين العودة الجامده كده والشغل الجامد

دعواتكم معسكر الامتحانات بدأت

http://kasperb4.blogspot.com/ يقول...

حمدلله على السلامة ونورتي بيتك ومطرحك من جديد
:)
حكاية المصلحجية دي تعباني اوي انا كمان والله وقليل انهاردة لما تلاقي حد بيسألأ عليكي عشان بس عايز يطمن من غير اي مصلحة

جنّي يقول...

السلام عليكم

حمدا لله على السلامة وعودا حميدا

فعلا جزمة منتصر تدنست واسمعي البيت دا :
وبوش اذا ضرب بالحذاء
....... صاح الحذاء بأي ذنب ادنس( بضم الالف) ..

واضم صوتي لصوتك ( قل موتو بغيظكم)
لزقزوق وحزبه الفاسد

والمصلحجية ربنا يكفينا شرهم .. بس الواحد يعمل الخير حتى لو رماه في البحر ..

والمطبعين هم واليهود على شاكلة واحدة ..

سلام

نعكشة يقول...

حمدالله علي السلامة

حضرتك نورتي

منتظر الزيدي ... ربنا يعينه و يصبره
و يعز بيه وب ينا الاسلام

مدونة حضرتك ... كل سنة و انتي بيها لربنا اقرب و معلومات مفيدة اللي كانت في الرابط و مستنين الحوار

النقاب .... ربنا يثبتك و يثبت كل المنتقبات آمين آمين آمين
و يهديني

الصداقة و صلة الرحم ........ انا اعاني من اني انا اللي مش بسأل علي حد
نادراً ما بطلب من حد مصلحة حتى و لو حد قصدني في مصلحة بعملها و فركش
صلة الارحام انا اصلا معرفش قرايبي
ربنا يهديني برضو


ربنا يخليلك الناس اللي تحبيهم و اخواتك و اهلك و اصحابك كلهم يا رب و يجمعكوا دايما ببعض
امين



القناة اون مش عارفة اية ..... مبتفجرش عالتلفوز

مرحباً بيكي
عوداً حميداً
في انتظار موضوعاتك النارية

كل سنة وحضرتك طيبة

سلام عليكِ

rovy يقول...

حمد الله على السلامه و كل عام وانتى بالف خير وعيد ميلاد سعيد لمدونتك العزيزه..
ادعوا معكى ومع كل العالم العربى و المسلمين كافة لمنتظر الزيدى ليعينه الرحمن و يحميه و قادر ربنا يهدهم ويعميهم عنه و يحفظه و يرده سالما يااارب لأهله اللهم امين ياارب ..
سلمت يداه و حقيقى نعل حذائه اغلى و اثمن ملاين المرات من الهدف اللى رمى به

دمتى بكل خير

تحياتى

واحــ الفكر و القلم ــة يقول...

حمدا لله على السلامة يا جميل
نورتى مدونتك
هنيئا لوصول النت
والف مبروك للشقة الجديدة جعلها الله عتبة مباركة

أجمل ما فى حادث الحذاء أنه أعاد الينا كثير من الاحباء بعد الغياب

فرج الله كرب منتظر الزيدى وفك أسره واراح قلبه كما اراح قلوبنا
كم تمنيت لو صدته مباشرة
ولكن يكفى الدلالة لتزيده مهانة هذا البوش

كل عام وانتم بخير

سالى

على عبدالله يقول...

والله ربنا يباركلك
همه عالية كنا افتقدناها لكن الحمد لله عادت بالسلامة
انا متفق معاكى فى كل ارائك
بالنسبة لمنتظر الزيدى فعمل اللى كلنا نفسنا نعملو ،،وكفاية اقولك ياريتنى كنت مكانه وبعدها يموتونى مش مهم ،، العمر واحد والرب واحد

اما بالنسبة لزقزوق فضيفى عليه طنطاوى والطيب وادعيلهم معايا الدعوة دى
ربنا يهديهم او يخلصنا منهم
حتى يعود الازهر لما كان عليه قلعة حصينة لحماية الاسلام

واخيرا احنا لما بنعمل خير بتبقى نيتنا ان شاء الله هى ارضاء لله عز وجل ولا ننتظر الاجر الا من الله وحده
اما اليهود وامثالهم والتطبيع فليس اكثر من قول الله عز وجل
يا ايها الذين امنوا لا تتخذوا ابائكم واخوانكم اولياء ان استحبوا الكفر على الايمان ومن يتولهم منكم فاؤلئك هم الظالمون

اللهم ارزقنا الفهم والبصيرة

والسلام عليكم ورحمة الله وبركاته

المهـ إلي الله ـاجر يقول...

حمدا لله علي وصولك اختنا عاشقة النقاب زادك الله حباً وعشقا له (:

وأنا متاكد أنك وكل الاخوات المنتقبات يزدادون حباً يوما بعد يوم بزيادة تلك الهجمات الهلامية علي النقاب والتي هي هجمات ابعد ما تكون عن روح العلم وتناول العلماء للمسائل الفقهية والخلافية . ويكفي روح الحقد والكراهية المفعمة من ورائها

في انتظار مزيد من التدوينات النافعة وسلامي لزوجك الفاضل الاخ خالد

SemSem يقول...

ماشاء الله البوست روعةبجد
ربنا يثبتك على الحق دائما

تحياتى
اتمنى زيارتكم لمدونة حواديت

"أم أدهم المصرية" يقول...

السلام عليكم ورحمه الله وبركاته
---------------------------
حبيبتى مبااااااااارك عليكى رجوع الانترنت ورجوعك انتى شخصيا

مبدئيا كده بوست جميل وشامل
بس انا هعلق على موضوع النقاب والاصدقاء

شوفى على الرغم من كتر انتقاده ومحاربته الا انه فعلا بدءينتشر من جديد يمكن هما بيعملوا دعايه من غير قصد
ويمكرون ويمكر الله والله خير الماكرين

اما الصداقه بئه والاصدقاء فدى بقت حاجه نادره جدا عشان كده انتى فرحتى قوى باتصال المقربين منك
يدوم عليكم الصداقه والمحبه ان شاء الله

نورتى المدونه برجوعك ياسكره
----------------------------------

أبو فاطمة / هويتي إسلامية - مدونون من أجل فلسطين يقول...

السلام عليكم ورحمة الله وبركاته

الحمد لله علي عودة عاشقة النقاب وبارك الله في عامل التليفونات والنت علي توصيله لعاشقة النقاب النت مرة اخري

الاحتفال هيكون عندنا باذن الله في الرابطة وبنوعدك بإحتفال في نفس وقت إحتفالك باذن الله ولكن أخبرينا قبلها باذن الله بميعاد الاحتفال

الحوار اتمني منك تحديد ميعاده بعد يوم الاثنين القادم لأن الانتخابات في الرابطة ستنتهي في يوم السبت باذن الله حددي الميعاد المناسب لحضرتك من يوم الاثنين الي ما شاء الله ويكون مساءا باذن الله وهيكون الحوار عبارة عن حوار مفتوح ندعوا اليه الجميع الان لمعرفة من سيشاركنا فيه ليكون علي مستوي عالي من النظام و الدقة لأنه سيكون مباشر وعلي مدونة أخبار المدونين

أتمني لحضرتك التوفيق والتمسك بهذا النقاب والدعوة اليه ابد الابدين

مع تحياتي أبو فاطمة

Unknown يقول...

حمد الله على سلامتك

والف مبارك على البيت الجديد .. يارب يباركلكم فيه ويكون بداية خير لكم ان شاء الله

وثبتك الله اختي الحبيبة على الحق

ولا يهمك .. احسب الناس ان يتركوا ان يقولوا امنا وهم لا يفتنون

دعواتك ليا

احبك في الله

عاشــــــ النقاب ـقــــة"نونو" يقول...

السلام عليكم ورحمة الله
اكرمكم الله جميعا وبارك الله فيكم فردا فردا
واهلا بزواري لاول مرة ونتواصل باذن الله
والحمد لله ان التدوينة لاقت اعجابكم
تحياتي للجميع وكل عام وانتم بخير

همس الاحباب يقول...

كل سنة وحضرتك بخير
وحمدلله على السلامة
وافتقدنا حضرتك الفترة الماضية
جزاكى الله خيرا
ووفقكى لما يحبه ويرضاه
تحياتى

أحمد سعيد بسيوني يقول...

بسم الله

عودا حميدا اختنا الفاضلة

كل التدوينة دي وتقولي تصبيرة
ههههه

فك الله قيد الزيدي

ورزقكم الله بصحبة صالحة مخلصة لوجه الله

وكل عام وانتم الى الله اقرب

دمتم سالمين

doctor mohamad يقول...

منتظر _ الصداقة الحقيقية _ نقاب زقزوق _ أون تى فى _ تلبية الطلبات .. ما شاء الله .. دا كله ف بوست واحد؟ .. الأهم من كده : حمدلله ع سلامتك ، و مرحبا بعودة النت.

م/ الحسيني لزومي يقول...

من اجل مصر
شارك في الحملة الشعبية للقيد بالجداول الانتخابية وادعو غيرك
ضع بنر الحملة علي مدونتك
البنر موجود علي مدونتي
اذا كنت ترغب في وضعه علي مدونتك ارسل ميلك كي ارسل لك كود البنر
ارجو المعذرة للدخول بلا مقدمات لأني ادخل علي مئات المدونات يوميا
م/ الحسيني لزومي
مدونة /مواطنون ضد الشعب
-----------------

Mafrousa يقول...

نونو
كل سنة وانتى طيبة و بخير
و مبروك على النت الجديد و العتبة الجديدة
ربنا يباركلك فيه و يكفيكي شرها يارب
و تكون قدمها سعد

انتى متكلمه على حاجات كتيرة
وفيه حاجات مش جمعتها او بمعنى ادق مش فهمت تقصدي منها ايه
زي الدونة التانيه اللى هاوزين منك حوار
مين دول اصلا انا لما دخلت هناك مش عرفت دول مين اصلا غير انهم عاملين عنك موضوع
المهم
كل سنة و مدونتك طيبة و بخير

حسن حنفى يقول...

اولا الف مبروك للمدونه

وعقبال 100 سنه في عالم التدوين

..............

للاسف علشان الانسان يحصل علي صديق حق محتاج يقابل الف صديق لمجرد المصلحه بس اسوا شعور لو انسانه حضرتك حاسه انها صديقتك وقريبه منها وفي الاخر مش تكون كده

........

عموما الف مبروك علي العوده وان شاء الله بلا انقطاع

دمتي بخير

حنين القلب يقول...

انتى وحشتينا اكتر

والله العظيم لو معايا تليفونك كنت هتصل واقولك كل سنه وانتى طيبه
وكل سنه وانتى الى الله اقرب
وكل سنه وانتى حبيبتى
اخبارك كلها جميله وخفيفه
وكل سنه ومدونتك بخير
وعقبال 1000000 سنه وانتى معانا

تقبلى مرورى

عالم حبيب يقول...

الأخت الفاضلة عاشقة النقاب .. حمدا لله على سلامتكم .. ومبروك عودة الأنترنت اسأل الله أن يجعله لنا فيما يرضيه .. موضوع منتظر شغل الدنيا وأحلى هدية لبوش .. فهذه قيمته وقيمة امريكا حذاء شاب عربي مسلم .. بل الحذاء أعلى

بالنسبة لموضوع كتاب النقاب عادة وليس عبادة .. فكافيك أنه من تأليف زقزوق ومباركة شيخ الأزهر الذي ليس لديه وقت إلا لمصافحة بيريز .. ولا تعليق عليهم لأنهم لا يحتاجون إلى تعليق .. يعني تضييع وقت الكلام عنهم

ومبارك عيد ميلاد مدونتك .. اسأل ربي جل وعلا أن يجزيك بكل حرف تكتبينه وأن يجعل عملنا خالصا لوجهه الكريم

تقبل الله منا ومنكم

زُمُرده يقول...

كل دي تصبيييييييييييييره؟؟

ماش يا قمرايه

اولا مش لاقيه كلمه شكر تعبر عن احساسي بزيارتك ليا وسؤالك عني
اللي بجد اسعدني كثييييييييرا
جعله الله في ميزان حسناتك

انا مقصره بس مش معاكي بس
ظروفي جت كده

الحمدلله بخييييييييير

بالنسبه للتدوينه المتوسعه دي
---------

منتظر الزيدي ... ربنا ينصره ويقويه
وياريت كلنا نقدر نحول مشاعرنا لطاقه وفعل موحد ومنظم
نصر الله الاسلام والمسلمين

اما النت فده نعمه لابد من انا نشكر ربنا عنها

من بيت قديم لاخر حديث
مشاعر وافكار واحلام اتمنى تتأقلمي سريعا

الصداقه
في جمله بحبها
سهل ان تضحي من اجل صديق ولكن الصعب ان تجد الصديق الذي يستحق التضحيه

اعملي ما عليك تقربي من اصدقاءك وارحامك
واتركي لهم اختيار الوصل والقطع
فعليهم وزرهم

ربنا يسعدك دايما
ياااااااااارب

غير معرف يقول...

السلام عليككم

مبروك ألف مبروك النت والشقة وكمان معرفة وغربلة الأصحاب

أخبارك مش تصبيرة أبدا دى بوفيه مفتوح فيها كل حاجة والأهم النوعية مش الكمية فهى مشبعة جدا

منتظرين لقائك المرتقب مع الرابطة وكمان تدويناتك النارية

يا ارهابية

:)
:)

نورتي مكانك وانت وحشينا أكتر

عبد من عباد الله يقول...

ايه الغيبه الطويله دي يا ست نونو ما تبقيش تعملي كدا تاني فاهمه هههههه

هو انا مش عارف اتكلم عن انهي خبر يعني بس بتاع منتظر الزيدي دا و كالعاده كلامي فيه مش حيعجب ناس كتير و احتمالي تكوني انتي منهم ....

بغض النظر عن اللي عمله منتظر دا صح و لا غلط بس اللي بيحزني ان دا كل اللي حصل و اللي بيخليني احزن اكتر و احس بالخيبه اللي احنا فيها اننا كعرب فرحانين اوي باللي حصل و سعداء و طالعين بمظاهرات معاك يا منتظر ... من و جهة نظري دي خيبه بعيد عنك .. 22 دوله يضربوا على قفاهم و تيجي دوله تبهدلهم و تمسح بكرامتهم الارض و يحصل كل اللي بيحصل دا و في الاخر نبقى مبسوطين اوي لما حد يقول لبوش انت كلب انت حيوان و يرميه بالجزمه هو دا اللي احنا مفتخرين بيه ... ياللأسف مش عيب دا برده ، دا مش يدل على ضعب مننا و خيبه عاملين زي اللي بيضرب من واحد و يتلطش و يتبهدل في الشارع و في الاخر يقول للي بيضربه كخه انت وحش وحش يا معفن و بكدا يبقى رد كرامته و بقى بطل .......

رحم الله الكرامة و العزة ، قتلت بأيدينا يا عرب

أبو فاطمة / هويتي إسلامية - مدونون من أجل فلسطين يقول...

أتمني التواصل عبر الايميل لتعرفي كيف سيجري الحوار

عموما الحوار هيبقي عبارة عن حوار مباشر علي صفحة التعليقات لرسالة بعنوان

نقاش مباشر عاشقة النقاب

اليوم السبت الثامنة مساءا

بمجرد حضور أي مدون ونتمني أن تكوني أول الحاضرين أن يسجل كل مدون بمجرد حضورة تعليق يقول فيه السلام عليكم ورحمة الله وبركاته النقاش لمدة ساعتين باذن الله قابلة للزيادة ساعة قابلة للتقلص ساعة ليس أكبر ولا أصغر من ذلك

سيكون حوار المدونين منظم عبر الاخ أبو فاطمة الذي سيكون هو منظم الحوار

عن طريق أنه يعطي كل مدون حظه من النقاش ولكي لرد علي المدون ثم يسمح الاخ أبو فاطمة لغيره ويسمح لكي بالرد

وهذا ولأول مرة في تاريخ المدونات حوار مباشر مع مدون علي النت في المدونات

لو هناك أي إستفسار أن تضيفي الايميل عند حضرتك
أبو فاطمة

المستنصر بالله يقول...

حمدا لله على سلامه حضرتك
وكل سنه وحضرتك ومدونتك بخير

تحياتى لحضرتك

غير معرف يقول...

الأخت الفاضلة
كم اسعد ان اعود واتابع تدويناتك مرة اخرى
ومواضيعك كلها قيمة كالعادة وبالنسبة لقناة OTV القناة دى فعلا ليها برامج من النوع الهدام واللى بيلت ويعجن على ايه بيدافع ما ساوريس اعلنها بنفسه وقال انها هتقاوم نزعة التدين فى الوسط المصرى
ربنا يرحمنا من شرار خلقه

غير معرف يقول...

ثواني ثواني
اخد نفسي بس بعد البوست الطويل ده
كوباية مايه الله يكرمك

حححححححححححححح
نونو،، اخبارك ايه؟؟ البيت الجديد والنت الجديد برضه والصحبة اللي طلعت فشنك وجزمة منتظر الجامدة وحاجات تانية كتير

نونو سنة حلوة يا جميل

مها ميهوووو

غير معرف يقول...

مات زميلنا فى المستشفى