الثلاثاء، أغسطس 10، 2010

يارب




طبعا انا بشكر كل من تواصل معايا وحاول يساندني ويدعيلي في الازمة اللي انا فيها


بس احب اطمنكم علي وعلى احوالي واقولكم ان مفيش فايدة الفساد ريحته فاحت على الاخر وبقى يزكم الانوف


في موضوعي دة مفيش حاجة هتنفع فيه غير الرشاوي وغير ان اشتري الضمائر معايا فلوس هنفع هعرف اشتري ضمير اتخن تخين انما ان معلش مش هعرف ارش ولا ارشي حد اصلي انا وزوجي يادوب نقدر نأكل عيالنا ويعني ناكل معاهم انما هنرشي موظفين حي روض الفرج مش هينفع او بالاصح مش هنقدر يبقى نروح نغور في داهية والغني يغتني فوق غناه ويمشي ويتمختر على جثثنا لا وايه اقوله خليني اقولك الله يبارك لك كدة هحسبن عليك وادعي ربنا يفقرك يقولي لا مش هيسمع منك


حتى ربنا بيشككني انه هيقبل دعوتي وكانه ضامن باين برضه أداه رشوة علشان ما يقبلش دعوتي استغفرالله العلي العظيم


ياحضرات انا ابتديت مشواري في المطالبة بحقي لما عرفت بالصدفة البحتة عن طريق صديقة في الحي ان بيتنا جاله ازالة للدور الرابع اللي فوقي وترميم لباقي البيت فروحت مع ولادي وزوجي اعيط لرئيس الحي واقوله ساعدنا نرمم البيت ومستعدين نرممه على حسابنا كمان ودة طبعا بعد ما كنا هنتخانق مع السكرتارية اللي مش عاوزانا ندخل لرئيس الحي والراجل مشكورا بعت من مكتبه اشارة تلزم صاحب البيت بالترميم وقلت له وقتها قرار الترميم مش في مصلحة الراجل اللي بيهد اكيد هيطعن فيه ومش هيرممه باعتبار انه اشترى بيتنا ودة برضه مش عارفين حقيقي ولا لا رئيس الحي قال لو رفض رمموه انتم السكان بطريق قانونية ما وقالي بالحرف عيشي مع ولادك في البيت وما تخرجيش منه


اليوم دة خرجت من عنده ربنا جند واحد صعبت عليه انا وعيالي وانا بعيط وقال لزوجي في ودنه روح لجنة التظلمات الراجل عامل او هيعمل تظلم ويجيب قرار ازالة للبيت ورجعنا لرئيس الحي وقال يعمل دة من حقه وانتم تتظلمه بالعربي نقضيها تظلمات


روحنا للتظلمات لقينا الظلمة المهندسة امل هانم ام كرش واسع حسبي الله ونعم الوكيل زعقت وقالت مفيش تظلمات خدوا بالكم بتعيطي ليه اما يعمل حاجة ابقوا تعالوا اشتكوا وروحت البيت وحمدت ربنا وابتديت امشي في اتصالاتي بالعاشرة مساء انهم يجوا يصوروا عندنا وكل البرامج اللي ممكن صوتي يوصل للمسئولين من خلالها وكان فاضل ابوس على ايدهم من محيلاتي عليهم يلحقوني ومعايا اسرتين تانيين


والحق ادوني اكتر من خمس مواعيد فيها زوجي ياخد اجازة والجيران ونستعد ونقول خلاص هيصوروا وصوتنا يوصل وهنخلص باذن الله لكن للاسف محدش بيجي ولا حد بيسال


طب المحامي رحلة البحث عن محامي شريف ما يستغلش الموقف واما يبتزني ويستنزف فلوسنا او يعقد صفقة مع صاحب البيت ويبيعنا له


للاسف اتهد حيلي وما لقيتش محامي يوحد ربنا عنده ضمير


نوارة نجم دلتني الله يبارك فيها على محامي تعرفه لكن طلع مش تخصصه دة


المهم على بال ما لقيت محامي عنده عشرة في المية ضمير روحنا بيه اول امبارح للحي وكانت مفاجأة كبيرة


طلب المحامي الاطلاع على الملف بتاع بيتنا والبيت المجاور رفضوا طبعا لما هدد وصوته طلع طلعوا الملف


خليكوا معايا


اول مرة لما عيطت ورئيس الحي طمني كان بتاريخ 15شهر7والمهندسة امل قالت مفيش تظلمات لقينا اول ورقة في الملف تظلم في قرار الترميم بتاريخ 13شهر7يعني قبل زيارتي بيومين ومن وانا هناك لو كنت عرفت كنت هعمل دعوى مستعجلة او اعرف بيه واعرف الجلسة اللي التظلم دة هيحددها واحضرها واقوم محامي يرد عليها انما الموظفين خبوها ايوة خبوها ولم يخطروا اي حد بيها بل والجلسة اتحددت بتاريخ 4شهر 8يعني من ست ايام واتحكم فيها خلاص ولم يتم اخطارنا بشيء بيت كامل فيه اربع اسر ولا اسرة اخدت اخطار باي حاجة في اي حاجة لان بمنتهى السهولة اشترى الراجل دة موظفين حي روض الفرج فرد فرد وكلهم وقفوا ضد اربع اسر وحكمت المحكمة باعدامي واعدام اولادي وزوجي و3اسر تانية فيهم اسرتين عبارة عن ارملة وحيدة مالهاش ماوى وارملة تانية زوجت اولادها ومعاها بنت دة ماواها حكمت المحكمة بازالة البيت حتى سطح الارض لانه خطر هيقع عليكم يا عبط هتموتوا نسيبكم تموتوا تحتيه يعني لازم يتشال علشان يتبني البرج اللي هيكون فيه ارضي وعشرة متكرر وكل دور اربع شقق الشقة 350الف


المحامي قالنا اتفاهموا مع الراجل واللي يرميه خدوه طبعا يادوبك وصلنا البيت لقيناه باعت لنا واحد من الحي وكيل للمجلس المحلي عاوزيقعد يحلها معانا وهو بنفسه كلمنا وقعد معانا وقالنا انا طلعت قرار بالازالة خدوا المبلغ دة واللي مش هيجيب شقة ايجارها 400ج حتى وامشوا


قلنا نوسطن المسألة واللي تدفعه خده احجز لنا شقق صغيرة طوب احمر عندك قال لا لاهبيعها احتمال ارض مش هبني


لو ما اخدتوش المبلغ دة ولاخر مرة خلاص خليكوا فيه وههدوا عليكوا


وهنا يا حضرات خارت قوايا وانا بقوله حرام عليك كل اللي حيلتنا هي الشقة دي والله يا ناس لو املك غيرها هسيبهاله


ماعنديش ياعالم دة كل اللي شقيت بيه انا وزوجي طول عشر سنين زواج صرفنا اللي حيلتنا واحنا بنتزوج على توضيبها وتاسيسها وكلها على بعضها 50م بس اصلها في شارع شبرا


حسبي الله ونعم الوكيل في كل واحد ظالم ساعد الراجل دة وغيره في اللي بيعملوه


وعلى فكرة انامش اول بيت في شارع شبرا يحصل معاه كدة الراجل بيشتري المنطقة كل فترة يتسلى على شارع


فين الضمير


المحامي عمل لي يأس وقال خلاص انتهى


ما بانمش من ساعتها بحاول اعيش ومنتظرة الحي يجيلي في يوم وينزلني مع ولادي بالقوة من شقتنا او يقطع علينا مية ونور او لو سمح لنا نبقى موجودين نمضي اقارات بتحمل مسئولية ارواحنا فبسهولة يعمل اي حاجة توقع البيت على دماغنا ونبقى مع السلامة


انا باصرخ بس من غير صوت


حسبي الله ونعم الوكيل


يا ناس حد عنده اي امل او نصيحة ينصحني بيها تفيدني


يا محامين ياللي لسة باقي عندكم ضمير في زمن يباع فيه الضمير ويشترى حد عنده حل يساعدني بيه ؟؟؟؟؟؟؟؟؟؟؟؟؟


يابتوع البرامج والسبق الصحفي اجهزوا لقضية كبيرة هتيجي قريب ضحاياها ام واربع اطفال اغبيا وقع البيت عليهم رغم انهم عارفين انه هيقع قعدوا فيه اصل خمس ست لجان جم قالوا البيت كويس وعاوز ترميم بس احسن لجنة فيهم قالت لا دة هيقع بالتلاتة ودي اللجنة الفاهمة انما الباقي ما بيفهموش يلا يا برامج هحضرلكم صورنا وهحضرلكم اصل الحكاية علشان تاخدوا المعلومات بدري بدري


كان نفسي والله اصور معاكم وانا عايشة


ربنا كبير وقادر على كل شيء


عارفة نكدت عليكم بس والله الصورة اغمق من كدة واصعب بجد حاولت ابيضها شوية


بالله عليكم تدعولي ربنا يفرجها علي ويرحمني


واذا قدر الله ومت وصلوا الحكاية للمسئولين يمكن تنقذوا غيري
كل عام وانتم بخير
رمضان كريم
اسفة جدا اني زعلتكم


هناك 17 تعليقًا:

فاتيما يقول...

ربنا معاكى يا نونو

يا ريت يا حبيبتى كان بإيدى اى شىء
مكنتش اتأخرت و الله


ربنا يفك كربك
و حسبك الله و كفى


ربنا معاكى و ينصرك
ان شاء الله

فاتيما يقول...

و الف بعد الشر عليكى
انتى و العيال
ربنا يسلمك من كل شر

رحلتنا في الحياة يقول...

ربنا معاكم ياااااااارب ويفك كربك باذن الله
وحسبنا الله ونعمة الوكيل فى الظلمة كلهم
باذن الله ربنا كبير والمشكلة هتتحل

فتــافيت (رحاب الخضري) يقول...

لا حول ولا قوة الا بالله العلي العظيم
ربنا ينتقم من كل ظالم جبار
لو في ايدي اي حاجة اعملها كنت عملتها.. كل اللي اقدر عليه اني ادعيلك وانتي اثبتي وطالبي بحقك لاخر لحظة
ربنا ينصرك يا رب وينتقم من الظلمة
بحق الايام المفترجة ديه

Mostafa Abdelmoneam Badr يقول...

ضاقت فلما استحكمت حلقاتها فرجت وكنت ظننتها لا تفرج

فسبحان من جعل معية اليسر مع العسر فقال "فإن مع العسر يسرا"

إثبتى أختاه فهو بلاء هين من الله ولن يضيرك الله

تفاءلى خبرا وأعلمى يقينا بقرب الفرج من عند الله وحده

خذى بالأسباب وعيشى حياتك العادية و قضوا الشهر الكريم زى ما انتوا متعودين واسعى برده لحل المشكلة ولكن دون خوف من عبد ما دام الله مطلع

أنا هاسأل محامى لأن المقروض فيه استئناف ونقض وقصص تانية

أنا أخشى إن الراجل ده يكون اشترى أو هدد المحامى بتاعكم ف خلينى أسأل وارد عليكى وانتى برده اسألى من ناحيتك

اللهم فرج كربى كما وعدت

الطائر الحزين يقول...

فك الله كربك

أم بتول يقول...

لا نملك لك ولاأولادك إلا الدعاء بفك الكرب
سامحينا

جنّي يقول...

السلام عليكم

ربنا معاكي .. ينصرك عليهم ..

ورمضان مبارك عليكم وكل عام وانتم بخير ..

Dr.Mohammed Gohary يقول...

فين بقا حقوق الانسان ؟؟
فين الحق اللي بيقول لكلمواطن الحق في حياة كريمة بدون خطر داهم يهدده
فين الحق اللي بيقول لكل مواطن الحق في السكن؟؟

انا لله وانا اليه راجعون

محدش بقا يلومني لما أقول أنا زهقت من الشعب دا
زهقت بجد

ياريت كان بايدي حاجة اقدمهالك

بس ربنا أقوى من الكل
وعمره ما هيسيبك

غير معرف يقول...

http://www.shaimaaatalla.com/vb/showthread.php?t=5062

طالعي هذا الرابط ربما يفيد ... واعانك الله علي ما انت فيه

الدفاع يقول...

انا اسف جدا للحاله اللى انتوا وصلتولها لكن حسب الظااهر من كلام حضرتك ان هناك قرار بالازاله القرار ده حضرتك تطعنى عليها امام المحكمه يتم ايقاف تنفيذ القرار اذا صدر حكم فى غيبتك يجوز استئناف الحكم ويتم ايقاف تنفيذ قرار الازاله ومفيش حيوان فى الحى هايقدر ينفذ القرار طالما معاكم شهاده من المحكمه تفيد بوجود طعن
انا غير قادر على انى احضر للقاهره لمباشرة القضايا لانها هاتحتاج انى اكون متواجد بالقاهره لمباشرة الامور بشكل مكثف
ارجوكى ارجوكى كلفى المحامى فقط باقامة الطعن او الاستئناف بحسب الاحوال
واذا كان المحامى بيقول ان مواعيد الطعن فاتت فقوليله لا المواعيد مفتوحه لان مفيش دليل على علمكم بالقارا او بالحكم الصادر فى التظلم
ارجوكى قومى بالطعن فى قرار الازاله والبلد مليانه محامين شرفااااااااااااااااء
هذه حقيقه وليس دفاعا عن المحامين
واذا لم تتمكنوا من ايجاد محام لحل المسأله فهناك المراكز الحقوقيه زى مركز هشام مبارك مثلا اعتقد انهم سيقدموا المساعده
ارجو فقط البدء فى تنفيذ ما قلته من الطعن على القرار او على الحكم حسب الاحوال
واعانكم الله

Sameh Ezzat - (خواطر خاطر) يقول...

فى بلد الوسايط و الكوسة
فى مصر اللى لو ملكش فيها ضهر هتتضرب باوسخ جزمة على ماغ اهلك
يا خسارة يامصر .. بأحبك حب يعصر القلب عصر..

الوطن أصبح بؤرة فساد...... مصيبة ربنا يفك كربك ويصبركم.
امين

shaimaa samir يقول...

ياه يا حبيبتى ربنا ييسرلك حالك
ويفك كربك
احنا فى رمضان
ربنا يعينا على الدعاء لك يا حبيبتى

همس الاحباب يقول...

حسبنا الله ونعم الوكيل
ربنا يفك كربك
ان مع العسر يسرا
اصبرى واثبتى والنصر من عند الله

ايه رايك يقول...

ربنا يعينك علي ماأنتي فيه
وزي مقال سبحانه وتعالي ان مع العسر يسرا
وجعتي قلبي بجد
وحسبي الله ونعم الوكيل في كل ظالم

safa7_karmooz يقول...

ميعاد الطعن فى القانون من تاريخ علمكم بالحكم...لكن طالما كان فيه تدليس وغش ومفيش محضر اعلمكم قانونا من حقكم تروحوا وتطعنوا فى الحكم...حضرتك ممكن تفكرى المحامى بكده ويراجع قانون المرافعات لو مش متأكد مش عيب لما نراجع ...

للاسف معرفش اى حد فى القاهرة عشان اساعدك...هحاول لو لقيت محامى كويس هقول لحضرتك عليه

وربنا يفك كربكم

عاشــــــ النقاب ـقــــة"نونو" يقول...

السلام عليكم ورحمة الله
جزاكم الله خيرا انا عرفت منكم معلومات كتير والاخت اللي سابت لي الرابط تعرفي ان دة القانون اللي المالك بيستند عليه لازالة البيت
الحمد لله المحامي اللس ساكن معانا فاق اخيرا من الغفلة ومسك هو الموضوع واشتغل زوجي وباقي الجيران محامين وكتبة كمان ووالنهاردة بيتقدم الطعن في الحكم مستندين على ان مفيش علم يقيني بالنسبة لنا وعملنا وقف للرخصة اللي الظلمة في الحي بيستخرجوها بدون استكمال اجراءات وامضاءات باعلامنا وعملنا شكوى في رئيس الحي اللي وقع على الرخصة بدون ما يشوف اننا عرفنا بالقرار ولا لا واتوقفت الرخصة فعلا بس خدوا عندكم مؤامرات من القسم واللي فيه علشان يمضونا واحنا ما بنفتحش والراجل يبغت لنا ناس تقطع الكهربا ولما نزعق لهم ونطلب ورق رسمي بكدة او نهدد بطلب النجدة يطلعوا يجروا
المشكلة ان الصرف الصحي بتاع بيتنا كان مشترك مع صرف البيت اللي جنبه واللي طبعا اتردم وكنا عملنا محضر بكدة وقلنا للحي لكن محدش سال فينا دلوقتي اصصبح بيتنا تقريبا بيصرف في المنور وريحة وامراض طالعة علينا والسباكين خايقفين يساعدونا يتبلغ عنهم من الناضورجية اللي حاططهم لنا ويتمسكوا بيقولوا دي مخالفة وطبعا الحي المتواطئ مش هيساعدنا حدوطبعا دة بقى اللي يوقع البيت الصرف بيضرب في الاساس ايه الحل في كدة حد يعرف
انا عندي امل كبير في الله ان الغمة دي هتنزاح لاني شفت اني مظلومة اوي انا وجيراني والراجل دةواللي بيعاونوه ظلمة والحي اد ايه فيه كمية فساد فظيعةلدرجة انهم شمتانين فينا وفاضل يطلعولي لسانهم محدش فيهم قلبه فيه رحمة ادعولي الله يبارك لكم ما تنسونيش
رمضان كريم