الأربعاء، أغسطس 18، 2010

دعواتكم دوما محتاجاها ونصايحكم يا محامين التدوين المجدع وخيرنعمله سوا


معلش استحملوني بجد اصلي ممكن اروح فيها لو ما اتكلمتش او قلت آه من شدة الألم

والموضوع فعلا بقى ياخد من صحتي رغم ان خالد زوجي بيقولي انتي قوية حد غيرك في الوضع دة كان هيبقى تصرفه حاجة تانية وكلمة في سركم انا اضعف مما اي حد يتخيل وواخد في مقلب بس لازم اكون قوية علشان اقويه هو وحط ايدي في ايده وافكر معاه ونربي ولادنا هيروحوا فين من غيرنا

الحمد لله على كل حال

انا روحت الحي علشان اجيب معلومات للمحامي وكانت معايا زميلة بتشتغل هناك علشان تسهل علي الموضوع لكن طبعا اخفوا علي اي حاجة وكنت بشد المعلومات شد وحسيت من الموظفين الشماتة وكان فاضل يطلعولي لسانهم اد ايه الظلم وحش ومفيش رحمة كنت عاوزة اصرخ فيهم واقولهم ازاي عيالكم بتاكلوها وتربوها حرام؟؟؟!!!طعمه ايه دة ؟!!! اعوذو بالله العلي العظيم

تعرفوا ان حتى القسم بيساعد الراجل دة

بس هقولكم حاجة انا حساها ما اعرفش هتقولوا علي اتجننت بس دي الحقيقة لما روحت الحي حسيت ان ربنا معايا وبيوجهني ولما اروح حتة الاقي حاجة بتدفعني لحتة تانية

حتى اني دخلت مكان ما ينفعش حد يدخله الا الموظفين وصديقتي بتكلم صديقتها وانا عندي هواية النظر في الارض عيني وقتها وهي بتتجه للنظر في الارض تلاقت بورقة موجودة على المكتب فيها عنوان بيتنا فتعلقت بيها وقلت للموظفة دة بيتنا اللي هيتهد

قالت لي بيت كرم دة خلاص دفع بقولك دفع قلت لها ايه دة قالت طلب رخصة وشفته طالب قطع المية والكهربا واخلاءنا واصدار رخصة

وشفت رقم قرار الازالة كمان ارسلت استغاثات كتيرة اوي وكتبت في مواقع كتيرة وارسلت للجرايد

وروحت البيت في حالة يأس وشفت محامي تاني كمل على اللي فاضل مني

المهم بالليل راح زوجي مع الجيران لمكتب محامي ساكن معانا في الدور الرابع اللي فوقي وجاله في البداية ازالة وما اتحركش وادانا دفعة وامل زراح مع زوجي والجيران للحي تاني يوم وللحق الراجل فاهم وجاب كتب وبيقراها وشاف كم الفساد اللي في الحي متمثل في رخصة الهدم بتطلع ورئيس الحي وقع عليها ومفيش ورقة تثبت علم السكان اليقيني اول المحامي ما قالها لرئيس الحي اتفزع وزعق في الموظفين اللي بيستغفلوه واوقف اجراءات الرخصة

كمان الملف لا يوجد فيه ما يثبت ان كرم اشترى العقار بتاعنا او انه ملكه فبالتالي يجيب له قرار ازالة ليه

تعالوا بقى نحول المشهد عندي في البيت الناضورجية طبعا عرفوه ان الرجالة في الحي والستات في البيوت يقوم يبعت لنا واحد يفتح الكهربا ويقول هقطعها وتصوت جارتي والتانية تقوله فين الورق وانا هطلب لك النجدة لو قطعتها يخطف الورقة ويطلع يجري وبعدها بشوية يجيلنا واحد يفحت علشان يقطع بقى المية ونعيد الكرة بس المرة دي طلبت النجدة والنجدة جت

وانا بكلم النجدة كنت في حالة فزع ام ومعايا اربع اطفال الساعة १२ الظهر في رمضان وغرقانين في العرق الاقي حد عاوز يقطع المية فبتكلم بفزع الاقي بتاع النجدة بدل ما يهدئ من روعي يزعق في ويقولي خلاص خلاص عاوزة ايه يعني ؟؟؟؟!!!!!

قلت له المية ما تتقطعش يقولي هبعتلك عربية نجدة بعد ربع ساعة جت

وركزوا معايا علشان تعرفوا ان ربنا معايا وبيوجهني زي احساسي ما بيقول

واحد جالنا البيت وقال مين بلغ قلت له انا قالي تعالي هاتي بطاقتك وكلمي الباشا الظابط افتكرت ان بطاقتي مع زوجي علشان عملت بيها طلب في الحي اني عاوزة المستندات علشان ارفع قضية ولازم ببطاقتي زوجي يسحب الملف

المهم روحت للبيه الظابط رجلي انتنت وانا رايحة وكنت هقع وروحت وانا بتألم وبرضه ببص على رجلي وفي اثناء نزول عيني على الارض البيه الظابط ماسك ورقة فيها اسم زوجي الرباعي والعنوان وسال عليه قلت له انا مراته استرجعت المكالمة اللي طلبتهم بيها لقيتني لم اعطي اي حد اسمي او اسم زوجي اعطيتهم عنوان بس وطلعت اجيب صورة بطاقة نزلت لقيت البيه الظابط مشي ونبه وشدد ان سكان العقار بالكامل يجوا القسم يحرروا محضر كنت كلمت خالد علشان البطاقة وحكيت له وقلت له كلم المحامي قال لره انتبه دي مؤامرة من القسم لان المالك اشتراه هيلموا البطايق ويضغطوا عليكم تمضوا على انكم علمتم بقرار الازالة

وبعدها بشوية جالنا امناء شرطة خبطوا علينا برضه الستات اللي عارفين ومتاكدين اننا لوحدنا ومافتحناش لحد منهم

شفتم وصلنا لفين

مشكلة عاوزة اللي عنده نصيحة يقولهالي

البيتين مشتركين كمان في الصرف الصحي وطبعا وهو بيهد الاولاني ردم الصرف وعملنا محضر بكدة دلوقتي بيتنا بيصرف في المنور وتكونت بحيرة من الصرف الصحي ولكم تخيل المرض والتلوث في الحر دة

حاولنا نجيب سباكين يعملولها صرفة خايفين بيقولوا دي مخالفة

والحي اللي بلغناه طبعا مش هيساعدنا طب مخرجها ايه دي ؟؟؟؟

معلش عاوزة برضه نصيحة بخصوص لو القرار بتاع الازالة بقى نهائي هل ممكن تيجي قوة ترمينا في الشارع وتهد البيت؟؟؟

ولا ممكن يخلونا نقعد فيه على مسئوليتنا ؟؟

طيب الجزء اللي البيتين مشتركين فيه مش ممكن يهدمه وفعلا لو اتهدم الحمامات والمطابخ تقع وطول ما الجزء المشترك دة موجود البيت يعيش 100سنة تانية لان الجزء دة بمثابة دعامة والبيت مش محتاج غير شوية ترميمات بسيطة انما اثاثاته حجارة وكلنا موضبين كويس

وحتى اخر لجنة جت كشفت واصدرت القرار ما كشفتش على اساسه ولا حاجة ومفيش اي شرخ موجود خطير ولا حاجة

تعرفوا احنا مستعدين نسيبه ونمشي ويبني البرج ال12دور اللي الدور الواحد اربع شقق والشقة ب300الف يشبع بيه بس يعوضنا كويس وبالطريقة اللي ترضي ربنا مش ترضيه هو وبمزاجه هو الراجل عاوز يرمي ملاليم ويقولنا روحوا اي حتة مش ضروري شبرا

طب ما يروح هو اي حتة اشمعنى احنا نبتدي نعمر في حتة تانية

المحامي قالنا اننا بنحاول نضغط عليه ونلوي احنا دراعه بدل ما يقطم هو وسطنا ونحاول ناخد منه نصف حقوقنا

المحامي ارسل جواب للاموال العامة والضرائب يقولهم ان الراجل دة بيشتري البيوت القديمة ويهدها ويطلع بابراج او بيبيعها اراضي فاضية وعمله الاصلي جواهرجي في محل 30متر وسالهم سؤال هل بيقدم اقرار ضريبي عن النشاط دة والا فمن اين له كل ذلك ؟؟

الراجل عمال يتسلى على شارع شبرا وجاب 3ازالات ل३ بيوت في اسبوعين وماشي في بيتين ادامنا وبيتين في الخطة واصلا الشهر اللي فات مطلع ازالة لبيت غيرهم غير برجين كبار في شارعين مهمين في شبرا

اصحابه اوي بتوع حي روض الفرج

المهم المحامي قال دة ضغط مننا عليه ايه رايكم يا قانونيين ؟؟؟

وفيه حاجة تانية كمان سمعنا انه بيتاجر في الاثار وبيشتري البيوت القديمة في المحيط بتاعنا بس منطقة شبرا كانت منتجع للامراء الشوام والبيوت اللي فيها كان اغلبها قصور

وفعلا سمعنا انه فعلا لقى اثار في البيت اللي جنبنا المحامي برضه عمل جواب بكدة للاثار وقالنا برضه دة نغط عليه بيه او يعطل الهدم شوية لان الاثار بتشكل لجنة للتاكد من البلاغ وتحط ايدها على البيوت شوية

ياترى الحاجات دي هتنفع؟؟!!!

الحاجات دي كلها اتكتبت وعريضة الدعوى والطعن اتعمل واليوم وبعد ساعتين من دلوقتي هتتقدم

دعواتكم ونصايحكم ما تبخلوش بيها علي

مش عارفة انام ولا بناكل ولا بنشرب والحمد لله بنضحك ولسة فيه امل انا ظني وقتي بالله خيروكبيرة وعارفة اني مظلومة وربنا واقف جنبي ودوما بشجع نفسي بنفسي وبقول يانونو من امتى ما حصلش اي حاجة كنت بتتمنيها زي ما انتي عاوزة حتى الحدث اللي كنت بظنه شر وازعل بعد شوية افهم ان مفيش حاجة اسمها وحش ولا شر كل خير وكل صح بس بيتفهم في اوانه

ربنا بيعمل للانسان كل حاجة حلوة

الحمد لله على كل حال يارب الحمد لله حمدا كثيرا طيبا مباركا فيه

معلش استحملوني رمضان كريم عليكم

فيه رابط مهم اوي كله خير باذن الله ربنا يقدرنا جميعا ونشارك فيه باللي نقدر عليه هنااااااااااااااااا

هناك 13 تعليقًا:

ali younes يقول...

الاخت المحترمة

شوفي أنا متابع مشكلتك من الاول بس طبعا أنا مهندس مش محامي
والله اعلم أحنا حسين بمشكلتك اد اية ..
بسي بقة أنا هاقلك عن خبرتي وكلام عام بس ممكن يفيدك
أنا كثير جدا أتحطيت في مشاكل وفي البداية كان ليس لدي ولا بأيدى أي حل ولا مخرج , بس كان كل المخارج مرهونة بشيئ واحد ودة كنت بعملة لانى حاسس بالظلم وكمان لا أريد أن أترك حقي أبدا
الشيئ دة هو الصبر مع الحركة الدائمة زيك كدة ومع مرور الوقت كان كل شوية يظهر مخرج وبعدة مخرج تاني وهكذا حتي يفرج الله عنى المشكلة وتتحل بفضل الله وبكرمة...
المقصد أنى أري أن جميع ما تنون القيام بة من شكاوى وغيرة مهم جدا ولا تستهوني بة , واي خيط في يديكم وتتخيلين انه غير مفيد مع مرور الايام تجد ان الله يجل منه شيئ عظيم
والله كل دة مجرب مع الاستعانة بالله وانت يعني مش محتاجة توصية

كمان والمهم أنك لازم تكوني قوية في الظاهر والباطن وهو ده أهم شيئ

والله صدقيني سوف تنتهي المشكلة بفضل الله وبالطريقة التي ترضيكم بأذن الله بس الصبر مع العمل االجاد حتي لو لم تظهر النتيجة بسرعة ...
عاوز اتكلم كتير بس كل الكلام يدور في محور واحد هو أن تكونوا أقوياء وتعلموا ان الحي والشرطة وغيرهم أضعف منكم وعليكم انت جميع السكان ان تكونوا يد واحدة وهو دة سر قوتكم واذا تفرقتم فستكون هذة هى بداية الهزيمة

أدعوا الله لكم بالتوفيق مع كامل شعورى انكم منصورون ان شاء الله

معلش أنا بعتذر لاني أعمل بالسعودية وغير موجود بمصر
اخوك
م / علي يونس

الطائر الحزين يقول...

عملتى زى ما اسامة قال لك (مدونة الدفاع) طعنتى او استأنفتى؟

كيــــــــــــارا يقول...

للاسف كل اللي في ايدي اني ادعيلك ربنا يطلعك من الازمة باذن الله

غير معرف يقول...

انا كنت فاكره ان الموضوع ده ميخصكيش
وكنت فاكره انه لحد قريب منك
بس لما عرفت انه يخصك انتي بجد قلبي واجعني اوي واكتر من الاول
بجد ربنا يعينك
ده ابتلاء وان شاء الله كله خير
وربنا علي المفتري يارررررررررب
وافتكري كويس
ويمكرون ويمكر الله والله خير الماكرين
استعيني بالله ومتسبيش حقك ابدا وامشي في كل اتجاه ومع كل خيط
وخلي بالك من اطفالك
ولازم تتاكدي من مهندس مدني كبير ان البيت فعلا فعلا مفهوش اي خطر عليكي
ربنا يعينك

ام الابناء يقول...

السلام عليكم ورحمة الله وبركاته


الاخت الفاضله عاشقه النقاب

اولا كل عام وانتى والاسرة بالف خير واتم صحه بحلول شهر الكرم والغفران
اعاده الله علينا جميعا بالخير والصحه

اعانك الله اختاه وثبت خطاك لا استصيع

الا ان اقول لك
حسبى الله ونعم الوكيل

انت المنتقم الجبار
يا حاكم يا عادل يارب

ده دعاء لكم داومنا عليه كثيرنا
انا وابى واخوتى
حتى يرفع الله به عنا ظلم الضالمين

والحمد لله استجاب الله لنا الدعاء

وبفضل منه ونعمه نصفنا المولى عز وجل
واصبحنا بفضل من الله فى احسن حال اليوم

اما الظالم يا اختاه
فقد انتقم الله منه فى الدنيا امام اعيننالعظم ما فعل بنا
ورفعت ارواحهم لبارئهاوهو مخطئون فى الدنيا وظالمين لانفسهمولمن حولهم

ادعو الله لكى اختى وحبيبتى فى الله
ان يفرج
كربك ويزيح عنك الهم والحزن
قريبا ان شاء الله

وقريبا
احضر اليكى مهنئه اياكى بانتصارك على الظلم والظلمه

واسال الله فى تلك الايام المباركه
ان يقبل دعائنا جميعا لك بزواك الكرب والغمه
ان شاء الله

صاحب المضيفة يقول...

في طريقة حلوة جدا في السعي على الحق

عليكي بموقع بوابوة الحكومة الالكترونية وتدخلي على موقع وزارة الاسكان في باب شكاوى المواطنين وحطي شكواكي

واكتبي براحتك هيطلع لك بعد ما بتعتي وتملي البيانات رقم المقوع هيدهولك ... احفظيه عندك وتابعي بيه

على فكرة شكاوي النت سرها باتع بجد وعن تجربة وبتوصل لاعلى مستوى وغالبا بتوصل للوزير

اهم حاجه تكتبي شكوتك بطريقة صحيحة وتوصفيها بشكل مظبوط وتحطي البيانات الصحيحة وتتابعي فقط

وربنا يسعدكم يارب ويزيح همكم وغمكم يارب

اقصوصه يقول...

رمضان كريم

وكل عام وانتم بخير

عمرو يسرى يقول...

ربنا معاكوا

كيــــــــــــارا يقول...

عملتى ايه ؟؟

أ / أحمد عبد المنعم يقول...

كل عام وأنتم بخير
هدية العيد على http://ommee.blogspot.com/

أم الخــلـود يقول...

اصحى يا نايم ووحد الدايم

أرجوا من المدونين الموقرين أن يضعوا شعار الحملة واسمها فقط فوقها

(حملة الجسد الواحد)

في الشريط الجانبي لمدوناتهم كدلالة على وحدة صف أمة محمد

http://dndanh111.blogspot.com/2010/06/blog-post_14.html

ومن أجل قيام الولايات المتحدة الإسلامية

http://dndanh111.blogspot.com/2010/06/blog-post_17.html

جعله الله في ميزان حسناتكم .. آمين

أم الخــلـود يقول...

اصحى يا نايم ووحد الدايم

أرجوا من المدونين الموقرين أن يضعوا شعار الحملة واسمها فقط فوقها

(حملة الجسد الواحد)

في الشريط الجانبي لمدوناتهم كدلالة على وحدة صف أمة محمد

http://dndanh111.blogspot.com/2010/06/blog-post_14.html

ومن أجل قيام الولايات المتحدة الإسلامية

http://dndanh111.blogspot.com/2010/06/blog-post_17.html

جعله الله في ميزان حسناتكم .. آمين

كلمات من نور يقول...

يا الله

طالما ثقتك بالله ويقينك بالله يبقى ربي قادر كريم ينصرك ويخفف عنك و يزيح همك

عيد سعيد وطمنينا عليكي