الأربعاء، نوفمبر 03، 2010

هل الاضراب هو الحل؟؟؟؟!!!!!!!!!!!!!!!!!!


في تطور غير مسبوق لموضوع بيتنا اللي جاله قرار ازالة ظالم وفي ظل تواطئ واضح من حي روض الفرج ضد سكان العقار رقم 12 ش محمد خليل من ش البعثة روض الفرج وفي ظل عدم وجود اي ضمير حي يرحم دموعي او يرحم اولادي ويرحم دموع واولاد اربع اسر كاملة بينهم رضع واللي بيرحم العباد ربنا تم قطع الكهرباء بالكامل عن بيتنا عن طريق شيل الكابل بالكامل اليوم صباحا اللي بيغذي 3 بيوت وقبلها وفي نصف رمضان تم قطع مية الشرب برضه ولولا وجود وصلة خاصة بعيدة عن العمومية قمنا بتوصيلها ما كان عندنا مية وطبعا الصرف الصحي اتردم والصرف بيتم في الشارع
ورغم قواضي مرفوعة من قبلنا ورغم محاضر اتعملت ورغم استغاثات اتكتبت لكل حتة ورغم مكالمات ورسايل محمول اليوم اتعملت لوسائل الاعلام علشان يلحقوني انا وعيالي والجيران من الظلام وابني سخن مولع وعاوز كمادات واضطريت اشتري تلج علشان الحرارة تنزل لاني طبعا ما عنديش كهربا ومحدش عبرني ولا حتى رد على تليفوناتي
ولان رئيس الحي اليوم قالنا بعلو صوته ما اقدرش اعمل لكم حاجة ولان الظاهر لنا ان محدش هيسال الا لو حصلت مصيبة كبيرة
ولاني لسة عندي بصيص امل ان يحصل تطور سريع يحل مشكلتي ما اعرفش ليه مع ان الواقع مش كدة خالص
وبكرة صباحا فيه مقابلة مع نائب المحافظ واحتمال المحافظ هنروح نعيط ونتحايل عليهم يوصلوا لنا الكهربا وفي حالة ماحدش سمع ياترى لو اضربت عن الاكل والشرب لحين حل المشكلة هل ممكن حد يعبرني ويساعدني ؟!!!!!!ولا ايه رايكم
اللي يحب يقدم مساعدة من اي نوع يحل المصيبة اللي انا فيها يتواصل من خلال تليفون خالد فتحي عن سكان المنزل المشئوم
0101754294
وذنبي في رقبتك ياحكومة وذنب عيالي اللي بايتين في الضلمة وخايفين
في رقبة اي حد ساعد الظالم على ظلمه وفي رقبة اي حد يقدر يوصل شكوتي للاعلام ومكسل
بكتب وفاضل شرطة واحدة واللاب توب يفصل شحن يا عالم
وحسبي الله ونعم الوكيل

هناك 8 تعليقات:

الميكروباص يقول...

لا أجد ما أقوله

فاتيما يقول...

يا ريت كان بإيدى حاجة يا نونو

ربنا يا حبيبتى يفك كربك

كان قلبى حاسس بيكى و الله
ربنا معاكى و ينصرك

ان شاء الله يفرجها
و من حيث لا تدرى و لا تعلمى
و لا تنتظرى


خلى بالك م العيال
و من نفسك
و اشتدى يا أزمة
تنفرجى

ان شاء الله

حاجات جوايا يقول...

ربنا يفك كربكم يارب
انا مش معايا غير رقم اون تى فى الارضى
يمكن يكون سبب فى فك كربكم ان شاء الله0238555206
0238555233
ياريتنى اقدر اساعد يا حبيبتى
ربنا معاكم

فاتيما يقول...

عاملة ايه يا نونو
طمنينا عليكى لما تقدرى يا ريت

ربنا معاكى يا حبيبتى

كلمات من نور يقول...

حسبي الله ونعم الوكيل

أختي في نفس محنتك بس هي جايلها قرار إزالة للأدوار الثلاثه الأخيرة وبالمنقولات يعني كمان محدش يتجرا ياخد لبس ولا عفش ولا حاجه وشغالين استئناف ومحافظه ....يعني مش كفايه مش حتعرف تتعامل مع أصحاب العمارة لا وكمان كل حاجاتها تروح عليها؟؟؟؟؟ظلم ما بعده ظلم ..اسأل الله الكريم ان يفك كرب جميع المكروبين و أن ينصرنا على هؤلاء الطغاة

غير معرف يقول...

الأخت الفاضلة / عاشقة النقاب
السلام عليكم و رحمة الله و بركاته
الله سبحانه و تعالى أعلم بما أنتم فيه و هو القادر على تفريج كربكم
أرجو ( إن كان بالإمكان ) كتابة موضوع ماذا حدث بعد مقابلة المحافظ
و إن كان الموضوع لا يزال عالقا هناك من أهل الخير من هو قادر على المساعدة بإذن الله تعالى و سأحاول التواصل بعدها على رقم الهاتف المسجل.
و إن شكوت للناس جرحاً أنت صاحبه
فلا يؤلم الجرح إلا من به ألم ،،
كان الله في عونكم و فرج همكم - اللهم آمين

سهل وسهيلة يقول...

بسم الله الرحمن الرحيم

الأخت الفاضلة : عاشقة النقاب

فك الله كربكم وإن كان باستطاعتى شىء لفعلته
دلينا على ما يمكن فعله لك


..سهل..

بنت الصالحين يقول...

الله المستعااااان

حسينا الله ونعم الوكيل

طمنيني عليكي يانونو