الأحد، أبريل 13، 2008

تاجات حكومية

السلام عليكم ورحمة الله
=====================


بداية احب اقول ان فيه تدوينة جديدة في القوارير شرفونا بالزيارة
وتدوينة جديدة في العلمانية ايضا
=================

بما ان الاحداث ساخنة اليومين دول في البلد فقررت اجاوب على التاجات الحكومية


اللي تم ارسالها لي عبر الاخوة الاعزاء اللي عملوها وجاوبوها


وامامكم تاجين بالتمام والكمال


التاج الاول تاج من استراحة الكاشفة لتشكيل حكومة عسقلانيا العظمى


والتاج التاني تاج مجلس الشعب من خالتشي فرنسا

بسم الله نبدا
====================







مين من المدونين يصلح لتولى منصب
رئيس الوزراء فى دولة عسقلانيا العظمى [عصفور المدينة]
وزير الثقافة [ صاحب مدونة فليعد للدين مجده]
وزير الإعلام [ احمد النجم القادم واحمد الجيزاوي]
وزير التعليم [ اناعاشقة النقاب نفسي [اصلي بحب المنظومة التعليمية اوي ونفسي اصلحها برؤيتي الخاصة]
وزير البحث العلمى (أيوة .. البحث العلمى ليه وزارة لوحده)[صاحب مدونة افاق علمية]
وزير الجامع الكبير (زى شيخ الأزهر فى الدولة الصديقة مصر يعنى)[ الضاكتور خالد]
وزير الصحة [دكتور بيطري مع د/اجدع بنوتة]ودة طبعا علشان دكتور بيطري ينورنا برضه على الاتجاه المستحدث في تغذيتنا الجديدة من اللحوم اياها
وزير العدل [عاشقة الفردوس طبعا]
وزير الداخلية [محب الدين ]
وزير الخارجية [خالتي فرنسا الحبيبة]
وزير الهجوم (زى الدفاع فى دول تانية يعنى)[ عمرو سلامة صاحب مدونة لسة عايش]
وزير المواصلات [ ابي بس مع عربيتها بطوط ]
وزير المالية [عبده الرايق معلش هيظبطها انا عارفة]
وزير الاتصالات [الراقص مع الذئاب]


وزير الزراعة[ المهندس مصري ربنا يفرحه]


=======================================================
============

دخلت مجلس الشعب من اوسع ابوابه ايه هو رمزك الانتخابى المفضل ؟؟؟؟


غصن الزيتون معلش اصلي بحب اي حاجة خضرا


كنت تفضل الدخول مستقل او تتبع حزب معين ؟؟؟؟


اذا دخلت اصلا يبقى لوحدي كدة بيتهيألي دة مستقل


اذا دخلت مستقل هل توافق على التوقيع للحزب الوطنى بعد نجاحك كمستقل ؟؟؟؟


لأ طبعا دة غش هفضل كدة لوحدي مع نفسي يعني


ايه اول حاجه هتعملها لنفسك ولاسرتك ؟؟؟؟؟


لنفسي ركعتين شكر وابتهالات ربنا يوفقني وارضيه في الشغلانة اللي ما يعلم بيها غيره دي واتوكل على الله واعمل اول استجواب


لاسرتي باعتباره انه حاجة كويسة وأمل ذلك يبقى هعملهم بسبوسة


ايه المشروع اللى ناوى تعمله لاهل دايرتك ؟؟؟؟دون ذكر اسم الدائرة ان اردت


بما ان اليوسي ماس اوجده عضو مجلس الشعب عندنا هنا بس بفلوس كتير انا بقى هخليه ببلاش ومتاح للاطفال كلهم


مش اللي قادر يدفع بس وانا في مدينة عمرانية جديدة


قعدت فى المجلس جنب نائب مميز . من هو النائب ؟؟؟


طبعا بتاع حديد عز دي عاوزة كلام دة مميز جدااا


قدمت سؤال للحكومه ايه هو السؤال ؟؟؟؟؟


وضعتم خططكم لاحتواء الشعب بعد الاضراب في محاولة لاعادة ثقته فيكم ولا ايه ؟؟؟


طلب احاطه موضوعه ايه ؟؟؟


عن حادث اطلاق الرصاص على البمبوطي اللي في السويس والشباب الليي بتنضرب من اسرائيل على الحدود والبنت اللي انضربت برصاص اسرائيل على الحدود


وبتقدمه لمين ؟؟؟؟


للحكومة ولمن يهمه الامر فيها


استجواب لاتنين من الوزراء مين ؟؟؟؟

ما ينفعش اكترطيب عموما مبدئيا

وزير الصحة ووزير التعليم

موضوعه ايه ؟؟؟؟


الناس هتفضل تموت على ابواب المستشفيات لحد امتى ؟ والعلاج على نفقة الدولة هيفضل يعالج السادة الممثلين والمطربين لحد امتى ؟؟ والدواء بتاع الغلابة هيفضل المادة الفعالة فيه صفر لحد امتى ؟؟ دة وزير الصحة


وزير التعليم بقى


التعليم هيرتفع كفاءته امتى ؟؟ والمناهج اللي قلتوا طورناها السنة دي على اي اساس اتطورت ومين اللي طوربالشكل المفزع دة دي بقت صعبة واكتر جهل؟؟


مادة التربية الدينية والقران والتاريخ الاسلامي وغزوات الرسول متجاهلة كدة ليه في المدارس؟؟


هل انت مع الخصخصه ؟؟؟؟؟؟


مع الخصخصة المدروسة اللي فلوسها ترجع للبلد وتكون هي القيمة الحقيقية للي اتخصخص وتصب في مصلحة البلد تاني


وطبعا فيه حاجات مش مع تخصيصها نهائي بضم النون زي البنوك


هل انت مع قطع العلاقه مع اسرائيل ؟؟؟؟؟


دة سؤال برضه اه طبعا قطع واستئصال كمان


هل تؤيد الحرب الحرب على العراق ؟؟؟؟؟؟؟؟


دة برضه سؤال طبعا لا ربنا يفك كربهم وكربنا


هل تؤيد مرور الامريكان فى القناه ؟؟؟؟؟؟


بعد اللي حصل وقبله طبعا لا حتى لو فيها حرب علينا اهو نموت في حرب واسمنا بنحارب بدل دمنا الرخيص اللي بيسيحوه بمرورهم فيها من غير ضبط ولا ربط


هل انت مشترك فى مؤامره كسر فرنسا هانم بالاشتراك مع ام دبوه ؟؟؟؟؟؟؟؟


اعمل مؤامرة على خالتشي فرنسا وزيرة خارجية عسقلانيا بحالها هو انا اقدر برضه


بس اموت واعرف مين ام دبوة دي


بتمرر التاج ده لمين ؟؟؟؟؟


امرره لكل اللي لسة لم يجيب عليه وكل زواري الكرام وكل اللي يحب يجاوب عليه



هناك 24 تعليقًا:

عصفور المدينة يقول...

ناجحة إن شاء الله
إجابات جميلة وشكرا على الوزارة ياريس

الفقير الى الله يقول...

انا مبحبش اتكلم كتير في السياسة فيه نكته انا دايما اقولها سمعتها من مجهول النكته بتقول مرة واحد بيسال عضو في مجلس الشعب (انتم عارفين اي حزب طبعا) فبيقله انا عاوز اترشح عضو في مجلس الشعب قاله هو انت مجنون فرد عليه وقاله هو شرط!!!
تحياتي مفيش حاجة في مصر دلوقتي بقت كويسه
على العموم هنشوف انتم هتعمله فيها ايه بهزر طبعا
تحياتي

صاحب المضيفة يقول...

على الرغم من اني مش ضمن المجموعة دي


لكن جد

اختيارت موفقة

وتاج فرنسا هانم

اجاباته دبلوماسية خالص

موهبة رايقة صحيح

دمت بخير

الحشرى يقول...

ما شاء الله عليكى

يا و زيرة التعليم

طيب ياريت تقولى لينا أول قرار هتعملى فيه أيه

وبالنسبة لمجلس الشعب أول قرار هتاخديه عن أيه


ما شاء الله عليكى

سكــر يقول...

ماشاء الله

اجاباتك كلها رائعه

واختيارك للوزراء حالفه التوفيق

هههههههه
تحياتى اختى الفاضله

اخيكى احمد سكر

محب الدين يقول...

السلام عليكم

أنا دخلت غلط ولا إيه .. هي مش دي برضه مدونة عاشقة النقاب .

.
.
.

.

اه دي بينها هي

إيه ده ؟
هي مالها قلبت سياسة كدة ؟؟





ومين ده وزير الداخلية أنا

ينهار ابيض أنا

لا حول ولا قوة إلا بالله

طب واشمعنا استاذ خالد .. ليه محطتهوش في التشكيل الوزاري ؟؟

nonoymm يقول...

السلام عليكم ورحمة الله
رئيس وزراء عسقلانيا بحالها اهلا بحضرتك
الحمد لله فكرك وزارة حضرتك رئيسها ازم تنجح تحياتي لمرورك اخي عصفور المدينة
===================================
اخي الفقير الى الله
والله انا كمان ما بحبش اجيب سيرة حد بس الضرورة والتاجات حكمت بئا وربنا يستتر وباذن الله هتشوف من حكومة عسقلانيا العجب والكويس باذن الله
==================================
اخي صاحب المضيفة اهلا بحضرتك
وبعدين حضرتك مشغول بالمضيفة احملك كمان مسئوليات اكتر ربنا يعينك يارب
لكن بجد اجابات رايقة صحيح ؟تحياتي لمرورك
===================================
اخي الحشري الله يكرمك
هقولك اول قرار هعمله في وزارة التعليم هو تطوير المناهج بطريقة تخدم الواقع والغاء المدارس الاجنبية والانترناشيونال وكله يبقى تليم واحد يتبع الدولة والاهم من دة كله تدريس التاريخ الاسلامي من بدايته وادراج القران الكريم مادة تتحفظ من اول يوم دراسي لاخر يوم بحيث انه الشاب على ما يتخرج من ثانوي يكون حفظ القران كله كفاية كدة ولا اقول الباقي
بالنسبة لمجلس الشعب اول قرار هو خفض كافة الاسعار اللي ارتفعت بنفس الطريقة اللي ارتفعت بيها
كفاية كدة عندي عيال عاوزة اربيها تحياتي لمرورك
==================================
اهلا وسهلا اخي سكر الحمد لله انها اختيارات موفقة اعزك الله ولا تحرمنا من زيارتك وتواصلك
===================================
اهلا وسهلا وزير داخلية عسقلانيا بحاله
لا حضرتك هنا عند عاشقة النقاب فعلا
بس تاجات الحكومة حكمت بئا نقلبها سياسة مؤقتا
استاذ خالد ما ينفعش يتولى اي وزارة لانه مش فاضي لحكومة بيته اصلا هيفضى لحكومة البلد الله يعينه بئا
وحضرتك باسلوبك الهاديء اقدر واحد على تهدئة اي شيء داخل عسقلانيا ربنا يبارك فيك
تحياتي لكل زواري الكرام

فرنسا هانم يقول...

حبيبتى الغاليه عاشقه النقاب
شكرا على وزاره الخارجيه
وانشاء الله اقدر اكون عند حسن ظنك
واحسن حاجه انك مسكتى الرايق الماليه
كده ضمنا نشحت قبل فوات الاوان
وانا اللى هقع فيها
هيستلف من كل الدول المحيطه وانا بما انى وزيره للخارجيه هحاول ارقع وراه واصلح كل اللى هيبوظه
وكمان اجاباتك على تاج مجلس الشعب رائعه
اما ام دبوه
جاره لى فى العماره
تسببت فى وقوعى على السلم برميها لقشر الموز على السلم وكانت النتيجه
كسرين فى الفقرات القطنيه بالعامود الفقرى

الطائر الحزين يقول...

انا كنت كتبت رد قبل كدة راح فين

هو اللى يدخل عسقلانيا يطلع مسروق هدومة قصدى تعليقاتة ولا ايه


ربنا يوفقك

دعواتك

مهندس مصري يقول...

و ماله زراعة و لو انها مش تخصصي بس مقبولة منك
عموماً احنا كانوا قرفونا بشوية عن الزراعة جوه مادة هندسة الري
نراجعها يمكن نعرف نعمل حاجة
:)
و اجابات جميلة عن التاج التاني بجد

بحبك يامصر يقول...

انا بعترض انا لازم امسك اى وزاره مش موافق هدوا اللعبه دى يا اما تعملى وزاره جديده ليا

اجاباتك جميله وهايله وفيها تحديث للاحداث الجديده زى اطلاق النار على اخونا الشهيد السويسى وكمان احداث الاضراب
تحياتى

Gannah يقول...

اختى الكريمة
انا جديدة فى عالم المدونات بس لفت نظرى اسم مدونتك و اعذرينى اذا ما كنتش عارفة الوزراء فى الوزارة بس انا سعيدة جدا باعتزازك بالنقاب. أنا فى الحقيقة محجبة فقط بس باحترم جدا كل أخت منقبة.
لى عندك رجاء لون الخط فى المدونة غامق و كان صعب على اقراه يا ريت لو تكرمتى يكون فاتح شوية
و جزاكى الله خير و انتظار زيارتك لنا

امام الجيل يقول...

لذيذ اوى التاج الاولانى

فكرة حلوة
كده خلاص اتقسمت المقاعد
ومليش ولا حتة دكة
:(

اجابات جميلة بتاعة التاج التانى
وربنا يرزقك بوزارة التعليم
يا رب

علاء سالم يقول...

السلام عليكم

إجابات جميله ومتميزه بجد والأجمل هي الوزاره اللي هاتشكليها واللي وفقتي تماماً في إختيار أعضائها .

عبدٌ من عباد الله يقول...

بالتوفيق ان شاء الله
و يبقو شوفلنا وظيفة كده على الماشى عندوكو

مشتاق لله يقول...

اختي انا مليش مكان في الوزارة ان شاالله حتي تمرجي -عاوز اعرف بس شعور الي مسكين فيها - السلام عليكم

Hosam Yahia حسام يحى يقول...

انا اعلن ولاءى للحكومه الجديده

الفاتح الجعفري يقول...

طيب ماشاء الله اجابات رائعه جدا
ربنا يحفظ حضرتك
وياريت حضرتك تبقي وزيرة التربيه والتعليم هنضمن ان يخرج اجيال تعيد مجد الاسلام من جديد ان شاء الله
جزاكم الله خير

nonoymm يقول...

السلام عليكم
اشكر تشجيعكم اكرمكم الله
ووباذن الله اللي ما اتعينش في التشكيل الوزاري دة اوعدوا التشكيل الوزاري الجاي اعينه باذن الله
اهلا بكل زواري لاول مرة
واخي عبد من عباد الله حضرتك على عيني وراسي طبعا واخي المشتاق والله لولا ان حضرتك موجود في مكان بعيد وبتحضر دراساتك ومش عاوزة اعطلك كنت عينت حضرتك في وزارة الثقافة بس برضه دراساتك مهمة
اخي بحبك يا مصر حضرتك مشغول بترويق مصر في مدونتك الاخرى ربنا يبارك معقولة هتسيبها وتروح عسقلانيا
اخي مهندس مصري انا قصدت لحضرتك وزارة الزراعة علشان شغلها كتير وعاوزينك معانا ما تسافرش
اخي الطائر معقولل كتبت رد وما ظهرش دة انا حتى فتحت التعليق اهو معلش بقى
فرنستي الجميلة ما هو علشان كدة عينت حضرتك وزيرة للخارجية عارفة انك حتصلحي وراه
اخي امام الجيل مش عاوزة احرم الجيل الواعد من امامهم ولا اشغلك عنهم
اختي جنة تحياتي لحضرتك في اول زيارة ونتواصل باذن الله وهصلح كل حاجة حاضر على عيني بس اما وكيل اعمالي يفضالي
اكرمك الله اخي علاء سالم
اخي حسام يحي نورتني وربنا يعزك يارب
اخي الجعفري الله يكرمك ويعزك ومش عارفة اقول لحضرتك ايه على كلامك الللي توج راسي الله يكرمك ويبارك فيكم كلكم يارب
تحياتي لكل زواري الاعزاء

المستنصر بالله يقول...

يافندم دة شئ يسعدنى ان تضيفى اى شئ من مدونتى عند حضرتك
اى شئ تريدينه من المدونه تفضليه من غير استاذان
جزاك الله كل خير

mostafarayan يقول...

والله كلام موزون قوي
بس ممكن سؤال هو يعني ايه يوسي ماس

عبده الرايق يقول...

المااااااااااااااااااااليه
هيييييييييييييييييييييييييييه
وهتتعدل
وهتتظبط
وهتلعلع
ربنا يكرمك يا ام اسراء

النجم القادم يقول...

لولولولولولولولولولولى

حماتى ياغالية ربنا يخليكى

ليا انا واسراء ومريم كمان

زير الاعلام مرة واحده يييييه اقصد وزير

هههههههههههههههههههه

ربنا يخليكى يارب ويعزك كمان وكمان

بس انتى عارفه انى بحب الشغلانه دى

حماتى بقى ومتوصيه بيا

وازاى خطبتى ايه بتسمع الكلام ولا ؟؟؟

ربنا يخليهالك يارب وتفرحى بينا احنا الثلاثة

د/اجدع بنوته يقول...

الناس هتفضل تموت على ابواب المستشفيات لحد امتى ؟ والعلاج على نفقة الدولة هيفضل يعالج السادة الممثلين والمطربين لحد امتى ؟؟ والدواء بتاع الغلابة هيفضل المادة الفعالة فيه صفر لحد امتى ؟؟ دة وزير الصحة

اه ياوختى .. مديانى وزارة الصحه

وتحت بتورينى العين الحمرا

وبعتالى عينه بس م حجات تقطم وسط وزارتى

لاااااااااااااااااااااااا

ده حرااااااااااام

مش كده م اولها

ع العموم

شرف كبير ليا اختيارك

حبيبة قلبى ..