الخميس، يوليو 22، 2010

بلاغ الى من يستطيع المساعدة باسرع مايمكن


اسكن في العقاررقم 12ح محمد خليل من شارع البعثة روض الفرج والملاصق والمشترك اشتراك خطيرمن ناحية الاسقف للعقاررقم 4ح نخلة صالح بمعنى سقف الدورالاول للدورالارضي في العقارالساكنة فيه يدخل في سقف الدورالارضي للعقارالملاصق ويمتد حتى غرفة وصالة في العقارالمجاورروهكذا في الدورالتاني والتالت والرابع اسكن في الدورالتالت وذلك لان مالك العقارين كان واحد وبناهم بهذه الطريقة بالحجارة الصخرية وايضا يشتركوا في الصرف الصحي والمياه

فوجئنا ببيع المالك لمنزل4ح نخلة صالح لرجل له باع طويل استصدرامرهدم وازالة لهذا المنزل الملاصق لنا حتى سطح الارض بدون اي مراعاة للاشتراك الخطيربين العقارين ودون اشراف هندسي من قبل الحي وقمنا بتحرير محضراحوال رقم25نثبت ذلك وارسل الحي لجنة واتنين وتلاتة للمعاينة وكل منهم تاتي وتقول لا داعي للقلق وتاخذ ما فيه النصيب من مالك العقار المجاوروتمشي والرجل يهدم ويزيل الان بطريقة عشوائية غوغائية تعرض عقارنا للخطر اللهم انه اتى بمجموعة اخشاب ووضعها تحت بلكوناتنا ((قال يعني بتسندها)))

والحي قال له لا تلمس مكان الاشتراك مع المنزل ولا تهدم فيه اهدم من حوله فقط

نذهب للحي ((حي روض الفرج))) ونحاول استصدارمعلومات ونحاول كتابة شكاوي وقمنا بعمل محضراخر رقم 3324اداري وتم تحويله للحي وارسل لجنة للمنزل واخذه اللي في النصيب ومشيوا

ذهبنا اول امس للحي وعلمت بطريقة ما ان هذا الرجل اشترى عقارنا واستصدرامر ازالة للدورالرابع في عقارنا وترميم وتنكيس لمنزلنا وقام ايضا بالتظلم في هذا القرار ليستصدرامر بازالة العقاربالكامل(((( طبعا امال هيطلع بالبرج ازاي))))

وخاطبتنا المهندسة امل بان بيتكم هيقع ولسة ما اتظلمش الراجل ولاحاجة مستعجلين ليه دة اصدر امربازالة رقم 10ورقم7ومنزله وسوركان مخالف لما يجي عليكم الدورابقوا اشتكوا وهو ما جعلني انهاربكاءا لذلك فرددمهندس وحيد معلش ربنا على المفتري

وذهبت لسكرتارية رئيس الحي وكانوا مش عاوزين يدخلوني باي طريقة كتبت الشكوى وطلع السكرتيريقولي بعد انتظار3ساعات تحولتي للجنة الاسكان هتعاين وتبت في الامر فقلت عاوزة اقابل رئيس الحي ولخوفه من اني ممكن اعمل مشكلة دخلني وللحق قابلنا الرجل بكثيرمن المودة وقال بالحرف الواحد هنجيب المالك علشان يرمم العقار وان رفض هتتحدواكسكان لترمموا العقارانتم على حسابكم وقال للموظف ابعت اشارة الان من مكتبي لاحضاره

ولم يحدث اي شيء للان حتى ان قرارازالة الدورالرابع وترميم المنزل لم يخطرنا احد به ولاحتى اخطرنا انه اشترى بيتنا كله عرفناه بالصدفة في الحي

المشكلة الان الراجل دة بيهددنا انه هيخرب في العقار وانه هيبذل وباسرع وقت هيشيل البيت حتى لو اضطره الامر انه يهده فوق دماغنا

الراجل دة تخصص شراء البيوت في شبرا وازالتها وبيع اراضيها المتر ب20الف

ياعالم انا مهددة واطفالي يوميا ومعايا اسرتين في شقتين ارملة واخواتها وارملة اخرى وبناتها

الرجل له باع وقادرعلى شراء الضمائر معاه فلوس بس انا معايا ربنا وانتم

حاولت كتابة ايميلات لكافة البرامج وحاولت الاتصال بيهم دون جدوى

اللي يقدر يوصل صوتي ويلحقني يساعدني

معنديش غير الشقة دي كل اللي حيلتي والا هبقى في الشارع

حياتنا مهددة اما بانهيارالمنزل بفعل فاعل على رؤوسنا او بتشريدنا في الشوارع باستصدارقرارات مخالفة للواقع

وكل دة علشان مترالارض ابو عشرين الف او الشقة ب400الف

طيب نتفاهم معاه ويعوضنا بشقق زي اللي احنا فيها او يعطينا مبالغ محترمة تعوضنا طبعا لا هيجرح فلوسه ليه يعني

طيب نعمل ايه بس

تحركات الرجل دة سريعة جدا وتتطور بسرعة بجد الحقوني قبل ما اكون تحت الانقاض

مشاكلي كتيرة بس انا عارفة قلوبكم كبيرة

يارب بحق اذان الفجر وهذا الصباح تفك كربي وتهلك الظالم يارب

هناك 11 تعليقًا:

الفقيرة إلى الله أم البنات يقول...

لا إله إلا الله
يارب سترك سترك
والله ما أعرف حد بس اللى اقدر عليه دعوة بظهر الغيب يفرج رب العالمين كربكم ويهلك الظالمين بالظالمين
يارب يفرج كربكم يارب

فاتيما يقول...

للأسف مفيش بإيدى شىء اعمله يا نونو
غير انى ادعيلك يا حبيبتى

ربنا يفك كربك
و يرد كيد اعدائك اليهم
و يعميهم عنكم لحد ما تصلحوا البيت
و تفضلوا فيه آمنين
ان شاء الله


ربنا معاكى يا حبيبتى

مجداوية يقول...


السلام عليكم
لا أملك إلا الدعاء لكم أن يفرج الله كربكم ويجند لكم من يحل هذا الأمر
والمصائب لا تأتي فرادى فسبحان الله العظيم
وعلى قدر ايمانك تبتلى
لا تنسِ دعاء سيدنا يونس" لا إله إلا أنت سبحانك إني كنت من الظالمين "

غير معرف يقول...

حسبي الله ونعم الوكيل في كل ظالم ومفتري

فليعد للدين مجده يقول...

فرج الله كربكم ونصركم علي كل ظالم والدعاء سلاح المؤمن

فاتيما يقول...

عملتى ايه يا نونو

مفيش اخبار

يا رب يفرجها عليكى و يوقفلك ولاد الحلال ان شاء الله و يحلها من عنده


ابقى طمنينا عليكى يا حبيبتى

ربنا يفك كربك يا رب

الدفاع يقول...

اسف سيدتى على ماتتعرضين له من ظروف لكن اريد من سيادتكم ان تتوجهى وعلى وجه السرعه لزميل محام ليقوم بالطعن على ما صدر من قرارات ازاله واعلمى ان مجرد الطعن يوقف تنفيذ القرار وقوموا بالطعن فى قرارات الازاله الصادره للمنزل الاخر المجاور ليتم ايقاف التنفيذ
ثم ومن فوركم عليكم بارسال شكاوى للمحافظ وذلك عن طريق تسليمها باليد لمكتب المحافظ وايضا بارسالها بالبريد ولا مانع من ارسال شكاغوى لمكاتب رئاسة الجمهوريه
وللنتقام من الرجل عليكم ارسال شكوى مفصله بنشاطه لمصلحة الضرائب لتقوموا بفتح جبهات عده عليه
ويمكن تقديم بلاغ للنيابه بشان تهربه من الضرائب اذا كان معكم دلائل على حجم نشاطه ( اللى يدور يلاقى) كما ارجو منكم وفى اثناء فترة نظر الطعن وقبل حضور الخبير ان تقومو بترميم المنزل ترميما فنيا شاملا وبرجاء اسناده لاحد المهندسين او المقاولين الاكفاء
وبرجاء متابعتى بما يستجد على الايميل
هنا
sh4usama@yahoo.com

mido يقول...

نوارة نجم كتبت عن مشكلتك فى مقال فى الدستور
يا رب المسئولين يستجيبوا

http://dostor.org/authors/11/910/10/july/29/23832

عاشــــــ النقاب ـقــــة"نونو" يقول...

جزاكم الله خيرا يارب المنسئولين يستجيبوا نوارة نجم بتساعدني الله يبارك لها ودلتني على محامي وكمان ادتني رقم تليفون معد العاشرة مساء كلمني النهاردة وقالي هكلمك بكرة وهنيجي نصور يارب يجازيها كل الخير يارب ويجي بنتيجة
ربنا مايحرمني منكم كلكم يارب ويجعله في ميزان حسناتكم يارب

فاتيما يقول...

الف حمد و شكر يا نونو

ربنا كبير و كريم قوى قوى

نوارة شخص جميل جداااااااااااا
و ربنا يكافئها بحب الناس و احترامهم اكتر و اكتر

هيا تستاهل و بتسعى للخير

و انتى كمان يا حبيبة قلبى
تستاهلى الخير كله

ان شاء الله ربنا يكرمك
و يفك كربك يا رب
و شكرا لأنك طمنتينا

خالص حبى يا حبيبتى

ذو النون المصري يقول...

ربنا يرفقك في الخروج من كل الازمات بس اعتقد ان المحامي امر ضروري
كل عام انتم بخير
اعاد الله علينا و عليكم ايام رمضان بالخير و البركات